О благоразумном воеводе Василии Овцыне.

Всемилостивый Господь Бог восхоте проявити рабу своему преждереченная о видении древес, о сем бо разувай во время оно бысть от самодержца с Москвы послан на Вятку воевода имянем Василей прозвищем Овцын. И той бяше муж благочестив и живый в заповедех Господних, земному царю праведно служаше//(л. 160 об.) и небесному угодная творяше. Христианский же народ добре управляше, вдовам и сиротам милостив бываше, паче же духовный и иноческий чин зело любляше и часто с ними о духовных пользах беседы творяше. Той же воевода, видев преподобнаго отца Трифона во своей ему обители живуща и в велицем подвизе, и в трудех, и в посте, и бдении пребывающа, во дни убо//(л. 161) работая, монастырское строение исправляше и многотрудными делы тело свое изнуряше, в нощи же к Богу в молитвах и коленопреклонениих пребывая, мало же сна приимаше. По сих же постом и воздержанием душу свою просвещая, милостынею же и смиренем, кротостию и беззлобием и благоприятием ко всем человеком духовную любовь простирая. И за премногую//(л. 161 об.) добродетель воевода Василий зело возлюбих, и в монастырь милостыню доволну творяше, и самаго раба Божия преподобнаго отца Трифона, яко ангела Божия, почиташе, и собеседник ему о духовных пользах начасте бываше. О таковых бо рече пророк: «С преподобным преподобен будеши и со избранным избран будеши» (Пс 17:26).

И некогда убо има по обычаю во обители//(л. 162) той беседующим от божественнаго писания о ползе душевней. Преподобный же отец Трифон в беседе той предложи слово и рече к воеводе сице: «Господине, и брате, и сыну мой, о Христе возлюбленне Василие, ныне ты зде властию от Бога почтен еси и от самодержца послан еси, еже рассуждати всяку правду, и блажен еси о всех благих твоих, понеже виде мою худость,// (л. 162 об.) не презрел посетити мя, не мне бо таковая твориши, но самому Господу Богу и Его Богоматери. Кто бо есмь аз грешный, паче всех человек хуждьши есмь? Но аще аз худ и грешен, но по вере твоей буди ти от мене смиреннаго мир и благословение отныне и навеки. Молю же твою благочестивую душу, видиши бо мене зде на земли сей странна и пришелца, паче же и груба, и не имам себе//(л. 163) от человек помощника о манастырском и церковном здании, кроме Пресвятыя Богородицы, понеже зде братии числом множится, церковь же мала, пространнее же и более не имам чим воздвигнути, но всегда воспоминаю пророка, глаголюща: “Возверзи на Господа печаль Твою, и Той тя припитает” (Пс 54:23). И Господь наш Иисус Христос глаголет: “Елико бо просите, верующе, прияти имате” (Мф 21:22). И паки: “Просите, и дастся вам. Всяк бо просяй//(л. 163 об.) приемлет и толкущему отверзается” (Мф 7:7). Посему же и аз смиренный дерзаю изрещи слово, дабы вящую церковь воздвигнути во имя Пресвятыя Богородицы Честнаго и Славнаго Ея Успения и чтобы ты, господине мой, был мне о сем помощник, елико нам Господь Бог и Пресвятая Богородица помощи даст». Воевода же Василий, слышав сия от пре//(л. 164)подобнаго, и рече: «Отче святый, моли за мя Бога и поминай во святых своих молитвах. А еже рекл еси о здании церковнем, и о сем буди по глаголу твоему с миром». И взем благословение, и отиде в дом свой, держа в разуме своем реченная преподобным, во еже бы исполнити е вскоре. Благословен Бог, Иже давый рабом свои разум во еже творити благое,//(л. 164 об.) яко преподобный Трифон со благочестивым воеводою Василием совещаша радостная мирови возвестити и яко же восхотеста о Христе, молитвами Богоматери тако и сотвориста.

Во благознаменитый же светлый великий день в самый праздник Воскресения Господня преждереченный воевода Василий молитвами преподобнаго просветися душею, и бысть в веселии, и сотвори в дому//(л. 165) своем пир велий, и созва вся нарочитыя, и изобилныя вятския жители, яко да обидуют в дому его. Призван же бысть ту преподобный отец Трифон, и егда на обеде том людие плотскою пищею и питием удоволишася и быша в веселии, а не пиянстве, благоразумный же воевода подвиже люди на духовное торжество и веселие, яко да будут людие душею и//(л. 165 об.) и телом радостни и веселы, по пророку, глаголющему: «Сий день, иже сотвори Господь, – возрадуемся и возвеселимся вонь» (Пс 117:24). И нача воевода к людем глаголати душеполезными словесы с любовию сице: «Отцы и братия, православныя христиане, слышах аз древле веру вашу о строении манастырьском, а ныне Бог посла вам на сие дело строителя и спроста рещи отца,//(л. 166) и богомолца, и наставника ко спасению душ нашим». И прирек, указа на преподобнаго отца Трифона, глаголя сице: «Хощет Бог рабом своим сим преподобным отцем собрати иноков множество, а обитель у него скудна и церковь мала, да аще он ходатайствует о нас Богу о отпущении грехов и вечной жизни, то кольми паче должни есмы и мы помогати//(л. 166 об.) ему о манастырьском и церковном здании. И ныне чтобы воздвигнути церковь большую, поможем ему кто что может в дар Богови дати от имея своего».

Слышав же вятчане от воеводы сие глаголющее, и сему вси возрадовашася зело, и прославиша Бога и Его Богоматерь, и воеводе вси падше поклонишася, глаголюще сице: «Воля Божия есть и будет. И яко же//(л. 167) Бог восхощет, тако и сотворит. Мы же твоему воеводскому благому совету и преподобнаго отца Трифона благословению вси радостно повинуемся». Воевода же Василий, сия слышав, радостен бысть, и в той час повеле некоему скорописцу в книгу писати, кто что по обещанию от имений своих по силе можаше дати в дом Пресвятей Богородице на создание церкви. И прежде сам//(л. 167 об.) воевода обещася дати и написа. Потом же и вси тако же написашася. И сие тако бысть, и не во един день, но и во вторый, и в третий день, тако же воевода обеты творяше, и народы к себе многи с любовию призываше от первых даже и до последних, и покой им телесный творяше. И тако весь народ к тебе любовию привлече. И егда всенародному множеству//(л. 168) писания исполнишася, тогда воевода по писанию повеле денги собрати. Собрано же бысть яко шестьсот рублев и вящши.

И тако Божиею помощию нача преподобный отец Трифон с воеводою Василием созидати церковь деревяную. Лес готовляху, и с плотники совещашася, и церковь велию заложиша с молебным пением, яко же подобает//(л. 168 об.) во имя Пресвятыя Богородицы Честнаго и Славнаго Ея Успения. Церковь же та бысть велика и прекрасна зело. Преподобный же отец Трифон виде воеводскую велию веру, такожде и вятчан веру и радение и ненасилуемое, но от своего им произволения от имений своих приношаху и преподобному отцу в руце даяху. Он же с радостию приимаше, и Господа Бога, и Пречистую Его Богоматерь благодаряше, яко//(л. 169) поспешествующи Ей во благое дело, и молитвы возсылаше за творящих милостыню. Зде же буди разумно всем, яко в начале (еще бо преподобному не дошедшу вятских градов) явление бысть ему от Бога, еже выше рехом, – видение о древесех и яко се сбытие его бысть. Мним бо древу быти велику и красну воеводе Василию. Прочих же древес множество – многочисле//(л. 169 об.)нный народ вятский приклонишася к воеводе, паче же и к преподобному отцу Трифону о благом их совете.

По сем же преподобный отец Трифон паки из своей обители с Вятки к Москве емлется, и приходит в царствуй град Москву и не по едино время, и бъет челом благоверному государю царю и великому князю Иоанну Василиевичю Всеа России, по//(л. 170) нем же и сыну его благоверному царю и великому князю Феодору Иоанновичю Всеа России о милостыни и о церковных потребах. И Божиею милостию, и Его Богоматери заступлением, и ходатайством преподобнаго отца Трифона благоверныя цари пожаловали села и деревни с людьми, и езера, и рыбныя ловли, и сенныя покосы, и всякия угодья в 96-м (1588) и в 97-м (1589) и во 103-м (1595) и во 107-м (1599)//(л. 170 об.) годех пожаловали, дали жалованныя грамоты безданно и безоброчно, яже и доныне во обители Богоматери и чюдотворца Трифона свидетельствуют. Благоверный же царь и великий князь Феодор Иоаннович Всея России и великий господин святейший Иов патриарх Московский Всеа России преподобнаго отца Трифона зело любляху, ведаху бо его богоугодное//(л. 171) житие, яже труды и подвизи, смирение и кротость, яко истинный раб Божий есмь (так!). Потом же от святейшаго Иова патриарха благословение приемлет, и возложением от святительския его руки во архимандриты поставляется, и благословенную грамоту антимисы на освящение церкви преподобному даде. И по сем по его прошению наипаче даяху ему в дом Пресвятей Богородице Божия милосердия//(л. 171 об.) иконы, и книги, и ризы, и прочия церковныя потребы, а яже царьская жалования и патриаршескаго благословения и прочих вельмож и христолюбивых московских царей даяние, собранное преподобным отцем, и того ради благочестивый царь повеле преподобному вдати дванадесят подвод с Москвы и по городом даже и до Вятки и до обители святаго. И тако преподобный отец отпу//(л. 172)шен бысть с Москвы с честию.

Егда же преподобный отец архимандрит Трифон прииде к Вятке со святыми иконами, слышав же воевода Василий и священный собор пришествие преподобнаго, и изыдоша во сретение ему со множеством народа. И тако вси возрадовашася, и прослави Бога, и от преподобнаго отца благословение приимаху. Священницы же и народи, вземше честныя иконы, и по//(л. 172 об.)несоша во обитель Богоматери с молебным пением, и тако прииде во обитель свою с радостию, и внесоша иконы в новую великую церковь, и поставиша по чину, и освящена бысть та церковь во имя Пресвятыя Богородицы Честнаго и Славнаго Ея Успения. Видевше же народи во обители Богоматери новую церковь совершену и освящену, яко новый Сион,//(л. 173) возрадовашася вси и прославиша Бога, и Пречистую Его Богоматерь, и преподобнаго отца архимандрита Трифона. Преждереченный же воевода Василий такову веру теплу име ко обители Богоматери и ко преподобному отцу Трифону, и о церковном здании велие тщание показа, яко и ему самому ктому делу касатися. И главу церковную обложи белым железом и не точию се, но и деревни и сенныя//(л. 173 об.) покосы и с ыными угодьи в дом Богоматери вдаде и даныя памяти во обители вдаша.