Приход преподобнаго отца нашего Трифона на Вятку.

В лето 7088-е (1580) месяца генваря в 18 день на память иже во святых отец наших Афанасиа и Кирилла Александрийских прииде преподобный отец наш Трифон вначале в слободцкий град,//(л. 141 об.) и ту мало дний пребыв, и оттоле прииде во град Хлынов. И егда бысть близ града Хлынова, и возре нань, и виде место его высоко и красно, и о сем радости духовныя наполнися и прослави Всемогущаго Бога и Его Богоматерь. И назнаменав лице свое крестообразно, и рече: «Благодарю Тя, Господи Боже Мой Иисусе Христе, яко сподобил мя еси видети//(л. 142) вятскую землю и град ея сей Хлынов. И не лиши мене, Господи, небеснаго Твоего града горняго Иерусалима. Ты бо еси Царь царствующим и Господь господствующим. Даруй нам, земным, во граде сем получити небеснаго Твоего дара, да вкупе с небесными Твоими силы мы, земнии, прославим Твое пресвятое и великолепое имя Отца, и Сына, и Святаго//(л. 142 об.) Духа ныне, и присно, и во веки веков. Аминь». По благодарении же том входит преподобный во град Хлынов и первее убо приходит ко святым Божиим церквам и, пред святыми божественными иконами припадая, молится со слезами Господеви, дабы обрести прибежище ко упокоению, понеже бо странен бе и пришлец в чюждей стране и никим ведом.//(л. 143) Часто же прихождаше к церкви великаго чюдотворца Николая Мирликийскаго, идеже стояше чюдотворный его образ, нарицаемый Великореицкий, и ту моляшеся Господу Богу, и призывая в помощь святителя Николая, воспоминая бо прежде бывшее его явление, еже бысть в Спасском Пыскорском манастыре. И сего ради, яко должный раб, приходит начасте к господину//(л. 143 об.) своему и со слезами должная молитвы воздает.

Един же от клирик, диакон, именуемый Максим, прозванием Мальцов, той бо, видев преподобнаго странна, и пришельца, и начасте в церковь приходяща, и со слезами Богу молящася, и разумев его быти раба Божия, и нача к нему имети любовь велию. Посем же и мнози от вятчан начаша почитати преподобнаго, и в домы//(л. 144) своя вводяху и упокоеваху его, яко же леть бе творити рабом Божиим. Преподобный же Трифон виде их любовь нелицемерную и веру, яже по Бозе имущих несуменну, всегда о них моляше Господа Бога, яко да подаст им милость свою во всяком исправлении блазе. И потом святый имяше с вятчаны вящшую любовь. И тако преподобный хождаше около града сюде//(л. 144 об.) и онуде, разсмотряше места, идеже бе угодно быти обители. И приходит преподобный на показанное ему Богом место, и возлюби е зело, и сотворив молитву, рече: «Сей покой мой в век века, зде вселюся, яко Господь изволи его. Благословен Господь, иже не остави молитву мою и милость свою от мене» (Пс 131:14, Пс 65:20).

Воздав же благодарныя молитвы, и отиде, и по некоем времяни приходит//(л. 145) в сонм вятких земских людей, и умоляет их судей, и старост, и всех православных христиан о манастырском составлении. Посем же и писанием многим сице от убогаго старца Трифона вятским земским судиам, и старостам, и всему православию поклон и благословение: «Слышал есми, господия моя, отцы, и братия, и чада, веру вашу//(л. 145 об.) и желание о составлении монастыря. И аще хощете желание свое исполнити, еже о создании монастырском к совокуплении братии, и по благодати Господа Бога Нашего Иисуса Христа и молитв ради Пресвятыя Богородицы и всех святых силен бо есть и мене, грешнаго старца Трифона, на сие дело произвести. И аз вашея ради любви рад работати и трудитися противу силы своея, елико ми//(л. 146) Бог поможет, место же Бог благоволи, идеже быти монастырю, близ града Хлынова за рекою, глаголемою за Сорою, идеже стоят две церкви малы и ветхи зело: едина (в которой служат) во имя Успения Пресвятыя Богородицы, а вторая во имя Афанасия и Кирилла Александрийских чюдотворцов. И аще сие благое дело изволити мне вручити, убогому старцу, и ныне приоб//(л. 146 об.)щается ко мне брат священноинок имянем Онисим, и обещается со мною потрудитися, и службу на том месте совершати хощет, а мене, убогаго старца, о создании монастыря послати к Москве бити челом Государю царю и великому князю Иоанну Васильиевичу Всея России и Преосвященному митрополиту Московскому. Будите, возлюбленни о Христе, спасени//(л. 147). Аминь». Понеже бо не на том месте у церквей онех, идеже ныне монастырь стоит, вятчане погребаху усопших. И в некия дни в тех ветхих церквах по усопших памяти службы совершаху приходящии священници от града, водворения же ту мнихом не бысть.

Народи же вятския земли всех градов преподобнаго о сем в сладость послушаша и зело возлюбиша таковое дело. И написавше//(л 147 об.) челобитныя всеми пятию грады за священническими, и за судейскими, и земских старост, и целовалников, и всех православных христиан, и за отцов их духовных руками, и послали преподобнаго к Москве ко государю царю и ко преосвященному митрополиту бити челом, чтобы государь царь пожаловал, а преосвященный митрополит благословил преподобнаго отца Трифона к созданию монастыря и о строени//(л. 148) его. И тако преподобный от вятчан с честию посылаем бывает к Москве. Приходит же преподобный отец наш Трифон к Москве, и от преосвященнаго митрополита Антония благословение приемлет, и возложением святительския его руки во священство поставляется, и строительскому чину сподобляется того же году месяца марта в 24 день, и приемлет священническую и свя//(л 148 об.)тительскую грамоту. Митрополит же Антоний, видев преподобнаго благоподвижна суща и на таковое дело Богом устроена, и благословил образом Пресвятыя Богородицы Честнаго Еа Одигитриа, и дав ему о Христе целование, и рече сице: «Чадо, добро дело о Христе сотворил еси смирениа нашего благословением и своим послушанием, строительства сан восприял еси. Тем же//(л. 149) подобает ти не себе единому пользоватися, о искренним твоим». Многа же и ина от божественнаго писания поучив преподобнаго, яже о духовных исправлениях, и тако отпусти его с миром.

И того лета месяца июня в 12 день благоверный государь царь и великий князь Иоанн Василиевич Всеа России самодержец, пожалов (так!) преподобнаго отца Трифона, велел ему на Вятке//(л. 149 об.) место под монастырь отвесть, где те ветхия древния церкви стояли, и колокола и книги их отдать в манастырское строение. И о том отводе, и отдаче, и о строении манастыря грамоту велел дати. Преподобный же Трифон приемлет царское жалование и святительское благословение, и отиде с Москвы того же месяца в 24 день. И Божиею благодатию приходит на Вятку июля в 20 день. Видев//(л. 150)ше же вятчане и слышавше о царьском жаловании, и о святительском благословении, и о сем возрадовашася и прославиша Бога и тако вси течаху ко преподобному радостною душею и приимаху от него благословение. Посем же раб Божий преподобный отец наш Трифон по царьской грамоте и по святительскому благословению нача манастырьскому строению касатися и, помоляся Господу Богу и Его//(л. 150 об.) Богоматери, нача келлицы ставити. Видевше преподобный, яко церкви оне ветхи зело, и мышляше всегда в сердце своем, како бы ину нову устроити, но понеже тогда ему мало знаему сущу, и мало радяху о нем, еще бо от иных и презираему, яко странну и пришелцу. Обычай бо миряном о суетных века сего паче пещися, мнее же о духовных прилежати, не вси бо//(л. 151) всем сердцем оставляют долу влекущее мудрование, аще и начало благо сотворшее, первый бо совет свой яко в забвение полагаху, но паче пекущеся суетами своими. Но Бог неложный всех промысленник, Иже всеми промышляяй и пекийся, сотвори слышано быти преподобному, яко близ града слободцкаго некто тамо нача монастырь строити и церковь созда. И судбами//(л. 151 об.) Всесилнаго Бога той строитель преставися, и тако церковь в несовершении стоит пуста два лета. Преподобный же отец Трифон испроси ю слободскаго града у земских людей; они же преподобнаго прошения не презреша и оную церковь вдаша ему.

Преподобный же посла во град слободский учеников своих иноков Дионисия и Гурия, дабы тую церковь, разобравше, привести//(л. 152) Вяткую рекою в Хлынов под манастырь. Они, послушание сотворше, шедше, и прииша (так!) во град слободской в навечерии Успения Пресвятыя Богородицы, и возвестиша о сем гражданом, яко преподобный отец Трифон посла их для тоя церкви. Они, с радостию приимше слово их, но и работников вдаша им на разобрание церкви тоя. И егда начаша разбирати, в то же время Божиим изволением//(л. 152 об.) воста буря велия и един некто от работников онех возлезе на верх церкви тоя, и Божиею помощию зня крест, и спусти его долу со всяким исправлением. Последи же того креста едва два человека или вящши возмогоща устроити и того дни разобрати до матиц. В нощ же ту дождь велий бысть. Во утрий же день Успения Пресвятыя Богородицы приидоша иноци и работники и видеша таковое//(л. 153) преславное чюдо Божиим промыслом. И молитв ради преподобнаго церковь бо она от земли разобрана бысть и разкладена по чину, и о том иноцы и работницы зело удивишася и прославиша Всесилнаго Бога. Взем же бремена она, и свозиша я к реце, и складоша я в плоты, и поплыша вниз по реки Вятке. И егда бяху близ града Хлынова, и сташа ко острову, понеже бо бывшу ветру//(л. 153 об.) велию и от бури великия заметаша я песком, яко не можаху двигнутися. Молящимся же им Богови, и се паки воста буря велия, и волнением водным ис тех плотов песок вымыло, и поплыша стройно и приплыша во езеро под манастырь, и прославиша Всесилнаго Бога, и Пречистую Богородицу, и преподобнаго отца Трифона, бревна же тая свозиша на гору.

В то же время бысть дождь//(л. 154) велий со Успениева дни даже и до Рождества Пресвятыя Богородицы и непрестанно идяше. Вся бо сия бяху судбами всех праведнаго Бога, наказуя бо люди града того, яко бо наченше дело благо и презреша е, понеже бо непогаху (так!) преподобному о манастырьском строении и забвение полагаху по пророку, глаголющему: «Хранящии суетная и ложная милость свою оставиша» (Иона 2:9), яко же и выше рехом,//(л. 154 об.) но Премудрый Бог ово чюдесы, ово же виденми прещения, овогда же наказанием и ранами привлецаше во благое дело, по пророку глаголющему: «Броздами и уздою чюлюсти (так!) их востягнеши не приближающихся к Тебе» (Пс 31:9). Тако и им сбысться притча сия сицевым образом. В лето 7089-е (1581) сентевря в 8 день бысть явление некоему поселянину, мужу, благочестиву сущу, //(л. 155) Никите прозванием Кучкову, живущу ему от града Хлынова яко пять поприщ сицевым образом: спящу ему в дому своему, и видит во сне, яко бы во граде Хлынове будущу ему, и се зрит царицу пресветлу Госпожу Нашу Пресвятую Богородицу и Приснодеву Марию с небесными силами и со Предтечею. И тоя Пресветлыя Царицы гласу бывшу ко всенародному множеству, глаголя: «Како вы обещалися//(л. 155 об.) во имя Моя манастырь строити, и ныне почто обещание свое забыли есте? Уже бо и строитель Богом дан вам, и ныне зело скорбит о строении манастырском и в молитвах непрестанно плачется Господеви многое время, а вы его презираете и повеленное им не творите. И отныне аще в повеленнаго Мною не сотворите, то от содетеля Бога всея твари по праведному суду Его//(л. 156) гнев на себе обрящете и казними будете: огнеми пожжени или глад, или мор понесете». И тако Ей глаголющи, и пойде из града со множеством народа за реку, глаголемую Засору, на кладбище усопших, и прииде на место, идеже храму Ея быти, и показа рукую, глаголя народу: «Зде воздвигните храм мой». И паки зрит, и се Иоанн Предтеча, иже с Нею бе пришед, обращься к народу//(л. 156 об.) и рече: «Зрите, о христиане, сия Мати Божия, Пресвятая Владычица Наша Богородица и Приснодева Мария разгневася на вас, яко нерадите о манастырьском строении. И аще хощете прещения таковаго избежати, и вы потщитеся к строению манастыря того, да не постигнет на вы гнев Божий», и посем невидими быша. Никита же, от видиниа возбнув, и страхом и трепетом одержим бысть, и скоро возстав,// (л. 157) прииде во град Хлынов, и поведа в земском сонме всему народу, яже в видении своем виде и яже слыша.

Народи же слышаху таковое преславное явление и прославиша Бога, явльшаго таковую к ним милость. И в то время бысть проповедь во всем мире и по сем священницы, певше литоргии порану, и собрашася в соборную церковь, и вземше чюдотворную//(л. 157 об.) икону великого святителя Николая чюдотворца Великорецкаго, и поидоша на место, идеже быти обители Богоматере. Последствующим же им и народом многим, мужем и женам и всякаго возраста. И пришедше на Богом показанное им место, еже за малым рвом, и пеша молебная пения Всемилостивому Спасу и Его Богоматери, и чюдотворцу Николаю,//(л. 158) и на месте том заложиша церковь во имя Пресвятыя Владычицы Нашея Богородицы и Приснодевы Марии Честнаго и Славнаго Ея Благовещения на самый праздник Честнаго и Славнаго Ея Рождества. И абие с того дне преста оный дождь, и бысть благопотребное ведро. Священный же собор и вси народи видеша таковое преславное знамение, и прославиша Всесилнаго Бога.

По сем же//(л. 158 об.) та церковь вскоре совершися и освятися, в ней же и преподобный отец наш Трифон со многою радостию молитвы и благодарение ко Господу Богу возсылаше. Потом же преподобный отец наш Трифон нача паче труды ко трудом прилагати, келлицы поставляше, и братию совокупляше, и духовному подвигу наставляше, паче же на церковныя и на манастырския службы и труды поучаше.//(л. 159) Вначале же сам преподобный во всем собою всей братии образ показоваше, смирению поучая, любви и послушанию наказуя, и нестяжание, и чистоту совершенну имети опасно повелевая, и тако во всяких добродетелях укрепляя. Страннолюбив бо бяше преподобный и яко отец благоприятный ко всем бываше. Слава же о нем повсюду прохождаше, и мнози людие//(л. 159 об.) от вятчан и от далних стран к нему во обитель прихождаху иноческаго жития ради ис превания (так!) его благаго. Преподобный же яко отец чадолюбивый всех с радостию приимаше и к желаемому приводяше. Они же во всем ему с радостию, яко отцу, повиновахуся. И тако братии множащейся, и добрыми делы цветущи, по реченному пророком: «Се что доброе или что красно, но еже//(л. 160) жити братии вкупе» (Пс 132:1).