Чюдо о слепце, исцелевшем молитвами преподобнаго.

Человек некий имянем Григорий художеством бяше земледелец, и бе одержим очною болезнию, и многая лета не могий нимало//(л. 126) зрети, и слыша о преподобнем отце Трифоне, яко молитвами его мнози человецы от недуг своих свобождаю (так!), и прииде во умиление, глаголя в себе: «Иду и аз ко преподобному отцу и помолюся образу Святыя Софии Премудрости Божии, да негли его ради молитв святых дарует ми Бог исцеление». Бе бо сия икона стояше во оной часовне, знаема всеми паче инех икон. И востав, прииде ко преподобному, и припадает,//(л. 126 об.) и молит его со слезами, дабы умолил всем содете всех Бога о прозрение очес его. Видев же его преподобный умилно припадающа, и нача молебная своя Господу Богу совершати, глаголя: «Боже Вышний, Создателю всяческих, яко же бо иногда от рождения святому ты, Владыко, даровавый свет, тако и ныне сему рабу твоему благоизволи очесем его прозрети, не мене ради, Спасе мой, но да явиши славу Свою в целовецех сих//(л. 127) во славу имене Твоего святаго». И по молении своем взя святую воду и покропи на очию слепаго, и абие Божиею милостию на него Богоматери и молитвами преподобнаго отца Трифона слепый прозре, и прослави Бога, и хвалу воздая преподобному, и иде в дом свой, радуяся. И по некоем времяни начат помышляти лукавая в сердце своем, иже диаволею прелестию маловерием одержим бе, и глаголя в себе//(л. 127 об.) сице: «Не София Премудрость Божия помилова мя и не ради Трифовы молитвы прозрение ми бысть, но тако само о себе начах зрети». И таковаго ради неверия от`яся свет от очию его, и паки слеп бысть, и не могий нимало зрети, и по сем уразуме свое прегрешение, и нача плакати, и каяся о своем согрешении, глаголя: «Ох, увы мне, яко злонравнаго ради моего обычая и маловерия нагло впадох//(л. 128) в слепоту». И повеле паки вести себе ко преподобному отцу Трифону, и пришед припаде ко преподобному отцу, исповедая своя согрешения, прося о них прощения. И молит его, дабы паки умолил о нем Всещедраго Бога и Богоматерь о прозрении очес его. Преподобный же, видев его умилно суща припадающа, и приходит в дом молитвенный, и нача молити Господа Бога и Его Богоматерь, и припаде//(л. 128 об.) ко образу Софии Премудрости Божии, благодарственныя мольбы принося на мног час со слезами. И по молитве взя святый святую воду и покропи на очию слепаго, и милостию Божиею и молитвами преподобнаго паки слепый прозре и возда славу Богу и Пречистей Его Богоматери, и хваляще преподобнаго отца Трифона. Святый же, поучив прозревшаго, глаголя: «Чадо, не буди о милости Божии, но веруй, яко без Бога//(л. 129) ничто строитися может, ниже в нас проиноситися, но вся Его благостию бывают нам противу веры и добрых дел наших. И отселе престани от таковаго маловерия своего, и буди правоверен, и ктому паки не согрешай, да не горши что себе приобрящеши». И тако прозревый, приим от него благословение, отиде в дом свой, радуяся.

По сем же преподобный отец наш Трифон нача//(л. 129 об.) труды ко трудом прилагати и нача лес сечь для сея хлебнаго, восхоте от трудов своих питатися, и по сем нача тую подсеку палити огнем, яко же обычай належит. И судом Всесилнаго Бога внезапу прииде буря велия и страшна зело, и начаша горети всякая древеса, и дошедшю огню даже до ставленных дров от ту живущих поселян,//(л. 130) яже ставлены ради соляного промысла Строгановых, и тех дров погорело многое множество. Злохитрый же враг диавол, видя себя на том месте утесняема, и изыска удобное ему время, и восхоте преподобному пакость сотворити и из места того изгнати, и возмути ту живущих людей, и ненависть велию наведе на преподобнаго. Вознегодоваша бо тии и зело воз`яришася,//(л. 130 об.) омрачишася злобою и не пожиша (так!) упование на Бога, посетившаго их, и “забыша благодеяния Его, яже сотвори” (Пс 77:11) им рабом своим Трифоном.

Собравше же ся и шедше на гору преподобнаго, яко волцы агня незлобиво, и с высоты горския низринуша его по острому камению, помышляху себе, яко да тем его погубят. Преподобный же благодатию Всесилнаго Бога невредимо сохранен бысть, и воста от места//(л. 131) того, идеже бе свержен, и нача помалу поступати, како бы от тех неблагодарных человек избежати и дати место гневу (Рим 12:19). Они же видеша его грядуща и паки тщахуся постигнути, да нечто ему зело сотворят, и погнахуся вслед преподобнаго, и хотяху его смерти предати. Преподобный же Трифон виде их таковое злообразное гонение, прослезися, и елико можаше, тече к Чюсовой реце и с воздыханием//(л. 131 об.) сердца своего Бога призывая в помощь, Его Богоматерь и великаго чюдотворца Николая, и помышляше, како реку ону преплыти и избежати от рук враг своих. И Божиим строением виде ту прилучившееся судно у брега, и седе в нем, и некако нужно отпехнуся от брега, и тако просто пловяше, зане не имяше весла, никакова иного орудия. И в той час некая боже//(л. 132)ственная сила поспеши ему, и привезе на он пол реки тоя, и постави у брега. Преподобный же прослави Бога, явльшаго таковую милость, и моляшеся за творящих пакости, глаголя в себе: «Господи, не постави им греха сего, не ведят бо что творят» (Лк 23:34). Видевше же людие, гнавшии вслед его, таковое преславное чюдо и яко явно избави Бог преподобнаго от рук их, и дивишася, и//(л. 132 об.) ужасошася вельми, недоумеяху что сотворити о нем.

И шедше скоро ко господину своему имянем Григорию Строгановых, и поведаша о преподобнем отце Трифоне, глаголюще: «Было, господине, нами насечено дров на твои соляные промыслы, яко до трех тысящ сажен. Черноризец же некто обиташе на горах близ ту//(л. 133) сущих имянем Трифон. Не вемы, каковым обычаем те наши дрова той чернец сожже. Мы же в горести сердца нашего яхом его и з горы оныя долу низринухом. Он же яко ничим врежден бысть, и, востав, бежа к Чюсовой реце, и некако дивно преплы ю. Мы же о сем зело удивишася и не вемы, что сотворити ему». Слышав же сия Григорий, зело//(л. 133 об.) удивися, и нача о преподобнем размышляти, и гневатися нань, и повеле скоро вослед его гнати и, возвративше, поставити пред себе. Посланнии же, скоро шедше, и яша преподобнаго, и привлекоша его к господину своему. Видев же Григорий, и в горести сердца своего многая претительная и поносная словеса изрек, и повеле его железы обложити, хотя//(л. 134) святому скорбь навести. Святый же ему прорече, глаголя, яко «не по мнозе времяни и ты таковая же понесеши».

И по сем в четвертый день приидоша с Москвы от царя поланницы грознии, и взяша Григория с великим гневом и яростию, и сковаше ему руце и нозе железными путы, и укоряху его безчинно. Он же, дав им дары многи, и помянув святаго пророчество, и повеле его//(л. 134 об.) разрешити, и припаде к ногама его, плачася, моляшеся, прощение получити, и молитв святаго требоваше о уставлении царского гнева. Святый же, дав ему прощение и получив его о любви, и милостыни, и о смирении. Григорий же тогда, вельми ублажив преподобнаго, и свята мужа изрек его быти, и по сем рече к нему: «Отче и святый, благоволи отити от моея вотчины и//(л. 135) и зде ктому не начинай жити, и иди, аможе хощеши». Мнози же людие начаша скорбети о преподобнем, понеже ту преподобному жившу девять лет и молитвами его мнози исцеления от недуг своих получаху. Святый же рече: «Не скорбите, братия, о сем, но разумейте, чесо ради братии несть в сем моем обитании, но по сему познайте, понеже бо место сие пустыня//(л. 135 об.) есть и от господина вашего во утеснении. Аз же от обитания сего отхожду, аможе Бог повелит, в место же себе оставляю вам строителя месту сему ученика своего Иоанна». И вшед в часовню ону, идеже ныне стоит церковь во имя Успения Пресвятыя Богородицы, и моляшеся на мног час, и по молитве дав им мир и благословение, и отиде от них.

Отселе помысли преподобный//(л. 136) в Вятскую землю ити. И от того времяни вложи Бог в сердце преподобному о Вятской стране, и нача всегда помышляти, глаголя в себе: «Слышах бо от многих, яко в Вятской стране обители несть ко иноческому водворению». И возгореся духом, како бы ему желаемое получити и вятския земли достигнути. И прииде преподобный во град Чердынь во обитель//(л. 136 об.) святаго апостола и евангелиста Иоанна Богослова ко отцу своему духовному преждереченному иеромонаху Варлааму, и ту собеседник ему бысть, и поведа ему вся случшаяся, и посем поведа мысль свою, яже о Вятской стране, глаголюще сице: «Слышах, отче, яко Вятская страна многолюдна есть и изобилна всякими потребами, а еже о душевнем спасении, скудостию одержима, и//(л. 137) и монастыря несть тамо ко иноческому жительству. И о сем помысл одержит мя присно и желанною любовию, яко огнем, палим есмь, како бы достигнути Вятския земли и видети ю. Молю же о сем твою святость: что ми, отче, повелеваеши? Да аще по твоему совету блага быти разумеваются сия, то и благословение твое да будет на мне». Наставник же его, паче и отец духовный Варлаам//(л. 137 об.) рече ему: «Чадо, благословенное Богом Вышним, добре потрудился еси и прииде к нашему смирению вопросити. Самем бо еси ты Богом наставляем, иже сведый тайная и открывая сердечная. Той тя благоволи, и научи, и настави на путь истинный исполнити желание сердца твоего, яко же имаши веру, и упование, и любовь к Богу, да и от мене, смиреннаго, буди о сем и благословение отныне//(л. 138) и навеки».

И тако преподобный отец наш Трифон, приим благословение от наставника своего, и пойде на Вятку. И егда преподобный дойде верх Камы реки до Кайдогодка, и по Божию смотрению обрете ту человека родом вятчанина града слободскаго имянем Иоанна прозванием Витязева, и той Иоанн поведа преподобному, яко вятчане издавна желают, еже быти у них монастырю//(л. 138 об.) к совокуплению иноческаго жительства, и наставника таковому делу избирают. И таковому начинаю не обретают человека. «И аще твое преподобство волит на Вятке быти, и вятчане с радостию приимут тя и твоей святости повинуются». Слышав же преподобный от него таковыя глаголы, и восприя с радостию, и абие разгарашеся божественною ревностию,//(л 139) очима зря долу, ум же свой простирая к вышнему. И вооружився духом на больши подвизи, и устреми итти на Вятскую землю волоком.

И егда преподобный дойде верх Вятки реки, идеже ныне стоит монастырь Всемилостиваго Спаса и святыя великомученицы Екатерины, и ту преподобный труда ради путнаго восхоте мало почити, и восхоте вятския воды испити. И по обычаю//(л. 139 об.) сотворив молитву, и нача со благодарением пити, и бысть ему вода, яко мед, сладка. Святый же о сем прослави Бога и Пресвятую Богородицу, и паки пойде в вятския страны. И еще бо недошедшу ему вятских стран, и виде в видении чюдну вещь. Видеша бо ся ему место на вятской земли вельми высоко, зело прекрасно, на нем же стояху множество изрядных древес,//(л. 140) посреде же их едино древо изряднее паче всех и краснее и вышши прочих стоящее. Преподобному же возлезшу на оное красное и превысочайшее древо, и возрадовася душею. Окрест же стоящии древеса приклонишася вси ко оному превысокому древу, на нем же бе преподобный стояше. И возбнув от видения, исполнися духовныя радости, и прослави//(л. 140 об.) Бога, и рече: «Жив Господь, яко да иду видети Вятскую землю, юже никогда видех. И что ти, Господи Боже мой, се видимое о древесех? И о сем уповаю на милость Твою, и Ты помощник ми буди, и не остави мене, защитителю мой». И по том видении паче преподобный на желание духовное простреся и устремися, яко елень на источники водныя (Пс 41:2), тако и святый желаше о ма//(л. 141)настырском здании. И тако преподобный скончавает путь своего шествия в вятския грады.