Чюдо 1. внегда принесены бысть многоцелебныя мощи преподобномученика и отца нашего игумена Андреана в его в созданную обитель при игумене Порфирии.

Лета 7135-го (1627), егда преподобномученика и игумена Андреана многоцелебныя его мощи обретоша и некоего царскаго сигклита Флора по реклу Томила Луговскаго приказныи его человек Пошехонския веси Шагоцкие волости Константин на обретение мощеи бысть, взя втаи мощей участок, мня на благословение себе, и отнесе в дом свой, никому же ведуще. И абие впаде той приказный человек Константин в велий зол недуг, и воспомяну той слуга в болезни своей, что чюдотворных взя втай, никому же поведа, и отсла, взявши участок мощей, во обитель Успения Пречистыя // (л. 40 об.) Богородицы к целбоносным мощем преподобномученику и отцу нашему игумену Андреану. И по том бысть здрав той приказный человек и отиде в дом свой, благодаря Бога, и Пречистую Его Богоматерь, и преподобномученика Андреана.

Чюдо второе.

В та же времена, егда несены многоцелебныя мощи преподобномученика игумена Андреана во обитель его созданную, во Андреанову пустыню, и идущим игумену Порфирию со освященным собором и с христолюбивыми христианы, и многоцелебныя мощи на главах носяще к селу Кобелеву, и тоя же Андреановы пустыни христианин Маркиан слеп очима и не виде пять надесят лет. И на встретение честных мощей той христианин прозре очима, и бысть здрав, и яко николиже безо очию в слепоте бывшу, и благодаря//(л. 41) всемогущаго Бога, и Пречистую Его Богоматерь, и преподобномученика отца нашего игумена Андреана Чюдотворца в созданную его обитель, и положен бысть многоцелебныя его мощи в соборней церкви честнаго и славнаго Ея Успения и Приснодевы Марии против праваго клироса в раце. И бысть преподобномученика игумена Андреана от многоцелебных мощей его в различных недугех и в скорбех велие исцеление.

Злый же властолюбец и завистник лукавый бес, искони ненавидя святых отец, не хотя видети на месте сем в прежесозданней его обители преподобномученика игумена Андреана многоцелебных мощей его, но//(л. 41 об.) хотя и храм Успение Пречистыя Богородицы и многоцелебныя мощи сожещи… Бысть во храме Успения Пречистыя Богородицы у гроба преподобномученика игумена Андреана свеща на лампаде неугасимая и, егда игумену Порфирию и братиям после соборнаго пения ишедшим из церкви, и ринуся свеща неугасимая с лампады на гроб преподобномученика игумена Андреана на покров, и згоре свеща на гробу, на покрове. Покров же и гроб с мощьми преподобномученика игумена Андреана цел бысть, ничтоже вредимо бысть. Егда же время соборному пению, и игумену Порфирию, и братиям сшедшимся в церковь, и виде таковое чюдо на гробу преподобномученика игумена Андреана: свеща неугасимая на гробу и на покрове изгоре, и к покрову, и ко гробу не прикоснуся огнь. Игумен же Порфирий и братия нача славити Бога, и Пречистую// (л. 42) Богородицу, и великаго чюдотворца Андрена и молебная Богу воздаша.

Чюдо четвертое

Тоя же обители Андреановы пустыни христианин Томило Борисов впаде в великий недуг зол, и бе мучим лукавым бесом и беснующися, яко и людей ему не знати и святым иконам не покланятися. И тоя же обители христолюбивыми христианы едва приведоша того беснующегося человека Томила во обитель Успения Пречистыя Богородицы и к многоцелебным мощем преподобномученика игумена Андреана приложили и, пев молебная пения, и не по мнозе времяни бысть здрав, яко николиже в болезни бых, и отиде в дом свой, славя Бога, и Пречистую Богородицу, и преподобномученика игумена Андреана чюдотворца.

Чюдо пятое.

Тоя же Андреановы пустыни бысть//(л. 42 об.) сослужебник именем Архип, и впаде в велий недуг, и бе мучен от нечистаго духа, беснуяся. И тоя же обители боголюбивыя мужи едва приведоша его в церковь. Он же, беснующася, не возможе поклонятися святым иконам и нелепотная глаголаше; бе одержим лютым бесом, и диаволим наушением украдоша той беснующий святыя кресты и пометаху не в подобно место. Едва возмогохом, и приведоша его в церковь того беснующаго, и приложиша ко многоцелебным мощем, и не по мнозе времяни бысть здрав, яко никогда же бе тою болезнию одержим. И святыя кресты обрели, и по том той человек боголюбив бысть.

Чюдо шестое

Тое же пошехонские веси государевы дворцовые езовые Шелшедамские волости бе некий христианин Мартиан по реклу//(л. 43) Злочаня, впаде в велий недуг зол и тако разслаблен бысть: руце и нозе от`яшася, и ничим же не возможе владети, но токмо по земли ползая и валяшеся. И паки той христианин и родители его, слышавше о преподобном мученике Андреане, что бывают от него многая исцеления болящим, и обещася той христианин, «аще мя преподобномученик Андреан от болезни сея исцелит, не изыду из дому чюдотворцева, но пребуду до смерти своея». И паки повеле родителем своим вести себя во обитель Успения Пречистыя Богородицы во Андреанову пустыню. Родители же того христианина везоша того к чюдотворцу Андреану. И отпевше молебная пения, и остависта родители того христианина в монастыре. И не по мнозе времяни исцеле той христианин от недуга своего и бысть здрав, яко николиже в болезни//(л. 43 об.) бысть.