Страдание преподобнаго отца нашего игумена Андреана от зверообразных разбойник.

По преставленнии же спослушника старца Леонида завистник же добродетелному житию лукавый бес злый демон вселися в Росийския агаряны в малоумныя поселяны белилных сел злодеев, вооружает их на преподобнаго ков ковати, уложих себе в злой мысли своей разорити пустыню, и преподобнаго игумена со ученики погубити, и собранием преподобных своя домы исполнити. И по преставлении преподобнаго старца Леонида в год лета 7058 (1550)// (л. 18 об.) марта в 5 день противо четыредесяти и двоих мученик, иже во Аммории, в среду против четвертка в нощи вооружилися злодеи белоселцы, овии в доспесех с мечи, а иннии в сладацех, а иннии с копии и с рогатины, еще Христова святая четверодесятница Спасу древними и святыми мученики не исполнена, в цареградских странах, в римских, и в севастийских, и в прочих царствах, иже не леть их исписовати. Тии бо мучители отвращали Христа Бога, сии же окаяннии возмятошася богатства ради. Христовы седмицы приехали дополнивати белоселцы преподобными сими в Росийстем государстве и от иных стран. Многую себе дружину собрах, яко же глазатии, иже в Синае и Раифе, преподобных избиваху, стреляху, иного убиваху и ового копием прободоша, а инных мечи иссецаху.

Преподобныи же игумен Андреан скрыхся//(л. 19) ото убийц под задний дровяник. Окаяннии же мучители обретоша преподобнаго под дровянником, и оцепих ужем игумена за гортань, и влечаху его в преднюю келию, и воздаша ему различныя муки, рвуще бритвами тело его и огнеными лучами прижигающе, рекуще и глаголюще: «Где суть животы ваши и статки?» Преподобный же великомученик игумен Андреан рече им: «Животы наши у Всемилостиваго Спаса на небесех и статки наши на земли. Ослабите ми мало, изму их и воздам вам в руки». Мучителие же ослабиша, наготу воздаша. Преподобныи же, востав, приим корчажец, в нем же четыредесять рублев, подает мучителем и глаголет: «Теми статки и сим сребром церковь было болшую создати во имя Пречистыя Богородицы вкупе со мною братии». Мучители рече: «Мы тебе созиждем своею силою часа сего». Отвеща преподобныи:// (л. 19 об.) «Горка ми есть ваша церковь и тощно созидание ваше, “прискорбна душа моя при смерти”(Мф 26:38, Мк 14:34), се сребро созидание наше и животы мои в руце ваю и статки наши вне келии моея, а в пределех множество черноризец. Опустите мя Бога ради, братия моя, в Корнилиев монастырь чернечествовати, да никакоже возвращуся семо и спасу душу свою тамо у отца своего Корнилия». И рече мучители: «Мы тебе воздадим “шлем спасения” (Еф 6:17) и послем тебя к царю небесному». Презре старческое моление, приим ужем, оцепляют его второе за шию. Преподобномученик рече: «“Яко агнец на заколение ведеся, яко овча безгласна в руце своих стрегущих” (Ис 53:7) отверзаю уста моя:

Молитва.

“Господи Боже мой, отдай же прегрешения моя сим человеком, “не ведят бо, что творят” (Лк 23:34), приими дух мой с миром. Не помяни//(л. 20) беззакония моя, яже согреших пред тобою и беззаконновах. Не презри моления моего, Пречистая Богородица, рождение мое града Ростова, отцы мои духовнии, и братия спостницы, и духовная чада моя, и велицыи сродичи, простите мя Бога ради и благословите, уже бо иду к вам, к судищу Христову. По сем не имам свидетися с вами во свете сем, по глаголу Господню, яко “земля еси и в землю пойдеши”(Быт 3:19)”».

Сия слышах злодеи вне келии преподобнаго, извлецаху ужем и под полоз санный устрояют. Оттоле преподобный Андреан мученик предаст дух свой в руце Божии. Нача злодеи похищати и монастырская грабити, инии же напред сего на дворце сослужебников их перевязаху и в подполия пометаху, да не воздадут вести во окрестныя веси, и стражи уставляху около обители и дворца конюшенного. Кравия же не суть суще было.// (л. 20 об.) Иннии же злотворцы, окаяннии сатанины ученицы не пощади церкви Божии, затвор выломих, и царскими дверми внидоша во олтарь, и тамо обретоша за престолом триех учеников преподобнаго. И извлецаху их вне церкви в трапезу и начаша их мучити и путати, аки козлы, вне спят, и кости их троскотаху. И ту убиша старца Давида. Разбойницы же выграбиша имение все обителное: мед и воск, книги и масло, ларцы, и платие, и сосуды всякие, и всякое собрание. Еще же и конии, и возы покутаху.

Последи же и тело преподобнаго мученика Андреана игумена в сани ввергли и изо обители преподобнаго повезли. И не имамы поведати в та времена, где есть преподобнаго тело, скуташа и скрыша. Душа его во веки радуется, иже Христа ради пострада, на пустыни со ученики своими от злых агарян от белоселец.

В та же времена бе некий// (л. 21) священник сослужебник церкви великомученика Георгия страстотерпца Христова, зовомыи Косарь. В приходе тех убииц белоселец, иже по его благословению деяху разбой на пустыни преподобных. И по убиении преподобнаго отца нашего игумена Андреана и старца Давида разбойницы же, пришедше во своя дому, радовахуся о множестве богатства. Некий же разбойник утаих своея братии ларец, начася в нем злата много, и сребра, и всякаго имения. Разверз сосуд разбойник, приник, виде много множество образов святых икон, такожде вапов и кистей сподоба иконнная. Убоя же ся разбойник о вещи сей недоведомой, прииде ко отцу духовному, ко прежде реченому Косарю, глагола ему: «Отче, простимся Бога ради, дерзнух неподобная, украдох у своея братии сосуд ларечьный,//(л. 21 об.) начаяхся в нем корысти многие, яже ми вещь не удобь ведомая». Темже, братия, расмотрих поп Косарь, яже бе образы святых икон и сподоба, и нача себе сетовати и глаголати: «Се же бе на нас поличное се злое, а не корысть предлежит, где бе таково сокровище скрыти». И реша се им, нача приницати семо и овамо и проглагола в себе: «Реки не имам, прудища у нас не лучилось, не вем, где скрыти святая». Такожде рече, слыша его сослужебник, рекомыи Баба, таковы Косаревы речи, и восмеяся Баба, глаголюще: «Безумен поп, не весть, где положити, восхоте разбоя творити, такожде и душ человеческих побивати, устроих себя от неправды богатство собирати и красти у сосед своих всякое орудие и от далных стран скот приводити, // (л. 22) и отводити ея от человек конным человеком».

Бог крепок Владыко человеколюбец милостив грешником, а безумным злодеем не попущает во свете сем. Православные христианя поцепих злодея сего татя Ивана Матренина и приимах его ко своим рукам пред государских слуг, си речь стражей начальным старостам Симеону да Иоанну со товарыщи с прочими. Старосты же государские и целовалники повеле прияти мастером татя и поцепих его на дыбе Матренина с своих им промыслом. Таже разбойник Иван Матренин пред многими людми повинуяся в различных своих татбах, прочее же и в разбой ограды Пречистыя Богородицы обители преподобнаго Андреана.

Нача его старосты вопрошати, где бе тело преподобнаго игумена Андреана. Он же по вопросу отвеща пред многими людми://(л. 22 об.) «Нас множество было дружины белоселцов, возвещу вам по их имянам, ового сицу, иного сии бе. И он же дружина со своими советники, разграбих лавру Пречистыя Богородицы и замучих преподобнаго Андреана, и свезли из обители, и повергли тело его на рубежи Белова села и Широгоша. На заутрия убиения святаго нам было, злодеем, устроити громаду дров костерных и сожещи мощи преподобнаго. Мы же, злодеи, со дружиною своею изыдох заутра на дело, орудия своего огненнаго, таже искахом телесе преподобнаго и не обретохом его». Сохранены быша Господем Нашим Иисусом Христом в бесконечныя веки.

По том же по сохранении святаго тела и по восхищении злых убийц государские прикащики и старосты губные послах писание о повелении цареве, что им повелит //(л. 23) сотворити над всеми губители. Не по мнозе же времени прииде к ним повеление царево: губным старостам разбойника Матренина повеле обесити, такожде и прочих обителным разбойником повеле устроити внутреннюю темницу и всадити их до кончины живота их. Дворы их, и статки, и животы их с пашнями на продажу продати, и повеле цену сел их привести в разбойную избу, иже бе цена их и доныне тамо вселяется пятьдесят рублев.

Чаях злодеи извести святую обитель и привести ея на придворие свое белоселское, и паче ныне Пресвятыя Богородицы обитель сияет, яко же солнце, посреди земли Росийския молитвами и молением Пречистыя и Преблагословенныя Владычицы Нашея Богородицы и Приснодевы Марии, тако сего преподобнаго отца нашего великомученика игумена Андреана// (л. 23 об.) со ученики его. Христе Боже наш, помилуй нас, дондеже живем в жизни сей и в будущем веце, Господи, избави нас муки вечныя и по отшествии нашем учини, Господи, полезная всему миру. Такожде и скиптры, и державу царя нашего и даруй ему победы на варвары, супротивныя враги наша, и одоление противу татар кримских, и главы их поганаго царя Девликерия покори благоверному царю нашему под нозе, и братию нашу утверди, Господи, помилуй и упокой, яко же при нашем животе, и обитель его распространи выше наю, поставления нашего и устрой ея в долготу дний во веки веком. Аминь.

Месяца ноемврия в 19 день. Слово на обретение честных мощей преподобномученика Андреана, благослови, отче.

Во обители Успения Пречистыя Богородицы,// (л. 24) нарицаемо Пошехонския веси на реке на Вотху в лета 7058-го (1550) преподобномученик игумен Андреан пострада от зверообразных разбойниц и от мучения конец прият, и скрыша его честныя мощи недоведом никим же. И тоя святыя обители игумени и братия много искахом и вопросихом изоо всех окрестных весех боголюбивых христиан о мощех преподобномученика Андреана игумена, и не вомогох, где слышати и не обрести. И тоя же обители боголюбивыи игумен Порфирий и братия бысть в скорби и в сетовании. И нача молити всещедраго Бога и Пречистую Богородицу, да бы им Бог проявил, где преподобномученика Андеана мощи похищены от злых разбойниц, и воспомянуша слово Господне во святом Евангелии: «Просите и датся вам, ищите и обрящете,//(л. 24 об.) толцыте и отверзется вам, всяк просяи приемлет и ищай обретает» (Мф 7:7). И виде, яко не презре Господь моления раб своих, хотя прославити угодника своего. Сам бо Господь рече: «Не может град укрытися, верху горя стоя, не светилника вжигающи поставляют его под спудом, но на свещнице и светит иже во храмине суть» (Мф 5:14-15). Тако бо просветится память и страдание преподобномученика игумена Андреана. О обретении честных мощей его се нам, братие, слово предлежит.

В лето 7120 (1612) в Пошехонском уезде Шигарския волости села Гужека церковныи дьяк Иоанн Прокопиев хожаше по вся лета к Илие пророку на пустош на реку Ухру на усть реки Ушломы к ребине на Ильинскую пятницу, и из окрестных весей священники прихождаху на той день и с собою приношаху икону//(л. 25) мученицы Парасковии, нареченной Пятницы, и поюще молебны, а из окрестных волостей и из градов многи торговые и пахотные люди веру держаху мученице Христови Парасковии, нареченной Пятнице, на той день прихождаху и молящеся мученице Христове Пятнице; и у ребины сквозе сучие проимаху дети малые и юноты, а иннии людие и в совершенном возрасте проимахуся.

Прежде реченному дьяку Иоанну Прокопиеву разсуждаху людем сим, яко «не подобает тако творити вам, православным христианом, яко же вы содеваете: по правилом святых апостол и святых отец, древо, на нем же несть образа Спасова и святых богоугодников, да не покланяемся таковому древу, и яко неистово есть и неподобно тако творити христианом. Аще ли у вас есть вера теплая на сем пустом месьте//(л. 25 об.) молитися, и вы устройте себе на сем месте церковь во имя святаго и славнаго пророка Илии и мученицы Христовы Парасковии, нареченныя Пятницы. И вы себе от Бога сугубу мзду примете, а от окрестных христолюбивых христиан честь и славу».

Людие же окрестных весей, слышав таковую речь богоугодну от Иоанна Прокопиева, начаша с ним совещати, дабы им Бог дал таковаго строителя в пустыню их, кому бы мощно в том пустом месте церковь Божия строити. Позему же тому бывшу в поместье за вдовою Ириною Корнилиевою, женою Чеглокова. И влагает Бог в сердце богоугодную мысль Иоанну Прокопиеву, и прииде ко вдове Ирине Корнилиеве, жене Чеглокова, и благословляется на том пустом месте у ребины церковь воздвигнути во имя святаго славнаго пророка Илии и мученицы Христовы Пятницы.//(л. 26) Вдова же Ирина не токмо едину церковь повеле строити Иоанну Прокопиеву, но еще и самому ему повелевает совершитися в попы к той церкве, но и отцем духовным себе нарече. Иоанн же Прокопиев со окрестными христолюбцы начаша лес ронити и возити на то церковное пустое место, занеже то церковное место по та времена было пусто годов за сто, яко же толко и признаки на церковном месте, что сие место и древо ребина посажена для признаку впредь ходящие годы. А церковное место равно с прочими покосы и сена косили на том церковном месте, а кладища туто родителем не бывало у пророка Илии и от зачала веку. А старожилцы сказывают, для того та церковь и запустела, что кладища родителем у нея не бывало от зачала веку.

Преподобнаго отца нашего//(л. 26 об.) игумена Андреана молитва помогающи Бог строити, молитвами же преподобнаго устроиша церковь святаго великаго пророка Илии Иоанн Прокопиев в лета 7123 (1615), а сам Иоанн Прокопиев совершися в попы к той же церкви святаго пророка Илии и мученицы Христовы Пятницы, и даша к той церкви вдова Ирина пашню. И по малу времени отяся то поместье у вдовы Ирины Корнилиевы жены Чеглокова по государеву указу за прежнего помещика, за государева думного дьяка, за Томила Июдича Луговского.

В лета 7127-ого (1619) священник же Иоанн Прокопиев призывает к себе в новую пустыню к Илии пророку на Ухру к ребине игумена Лаврентия с острову Богоявленского из Романовского уезда. Игумен же Лаврентий прииде в новую пустыню к Илии пророку на Ухру, и начаша игумен Лаврентий монастырь//(л. 27) мнишеский строити и христолюбивыя люди к себе в пустыню призывати. И которыя христолюбцы восхощут монашескаго жития, в пустыни терпети Бога ради, игумен же Лаврентий их постризаху. Того же году священник Иоанн Прокопиев, купив своими денгами против манастыря за рекою Ухрою две пустоши поместных у детей боярских, у Жеревцовых, в дом святому пророку Илии и Христове мученице Парасковии, нареченной Пятнице. Игумен же Лаврентие советует еже о Христе з братиею во своем монастыре у пророка Илии на Ухре и посылает священника своего белаго Иоанна Прокопиева с челобитною за своею игуменскую рукою к Москве бити челом Государю Царю и великому князю Михайлу Феодоровичю всея Русии, чтобы им государь пожаловал те две пустоши в дом святому//(л. 27 об.) пророку Илии и мученице Христове Пятнице в вотчину во свое царское благомолие во веки Божиею милостию, и святаго славнаго пророка Илии, и мученицы Христовы Пятницы. И молитвами преподобномученика игумена Андреана по челобитью игумена Лаврентия з братиею государь царь и великий князь Михайло Феодоровичь всея Русии пожаловал их, велел им дать свою царскую вотчинную грамоту за красною печатью на те две пустоши и на тое пашню, которая под монастырем со всеми угодьями, в дом святому пророку Илии и мученице Христове Пятнице в новую пустыню.

И начаша ту околных волостеи православныя христиане наипаче постризатися в новую пустыню. И случися ту пострищися некоему христолюбцу белоселския волости деревни Иваникова, зовомыи Иоанн Исидоров сын, а во иноцех наречен бысть Иона.// (л. 28) И начаша быти сын духовныи игумену Лаврентию и не поведаша такова великаго духовнаго дела и отцу своему духовному игумену Лаврентию до конечныя скорби ко исходу души своея. Лета 7134-го (1626) апреля в 1 день узна преждереченныи старец Иона скорбь и конечныи исход души своея от тела, и призывает к себе отца своего духовнаго игумена Лаврентия, и поведает ему сие великое духовное дело, о нем же нам ныне слово предлежит: «О преподобне мучениче Андреане, отче святый, прости мя Бога ради, прежде сего утаих твоего преподобия, сказах мне отец мой родный Исидор, отходя сего света: “Сыну мой, Иоанне, в прошлых временах лета 7058-го (1550) марта в 5 день в среду против четвертка приходили во Андреанову пустыню разбойницы, что на речке Вотху, промежь// (л. 28 об.) волостми Белоселскую, и Шелшедамскою, и Патроболскою, и Кештомскою разоряти тоя пустыни и грабити. И мучив его началника Андреана, и свезли тело его на рубежь Белого села и Широгоша, на речку на Ушлому, и покинули его в бачаге тоя же речки. И отец мой деревни Иваникова Исидор с соседми своими того началниково Андреаново тело свезли на пусто место к пустой церкви славному Илии пророку на Ухру, где ныне монастырь стоит сей Живоначалныя и пророка Илии новые пустыни, и разобрали тое пустой церкви помост церковьныи и, под мостом выкопав могилу, и тело началника Андреана погребли ночью без службы (блюлися выимки от губных старост). А на том мосте церьковном посадили древцо невелико для признаки в приходящие годы,// (л. 29) зовомая ребина. И ныне то древо выросло велми красно и велико. И прежде сего у того древа на пусте месте было многое исцеление болящим, толко запросто вменяли того исцеления, писати некому, потому что было место пусто. А сьезд был издавна разных городов всякие торговые и земские люди ярославцы и костромичи, вологжаня, и романовцы, и пошехонцы для своих торговых промыслов в году на един день в Ыльинскую пятницу. И в той день приходили многие болящие мужеск пол и женеск, и з сущими младенцы. И у того древа священницы окрестных весей в те дни молебны служили, и многие болящие народи, молебны слышав и образу великомученицы Парасковии, нареченныя Пятницы, прикладывалися и сквозе то древо промежь сучие рябину//(л. 29 об.) проималися, и в те времена недоведомо было, и никим же неповедано, что под тем древом погребено тело преподобномученика игумена Андреана, не от древа бысть исцеление, но от его многострадалных мощей. И в та времена подавали кождо по своей силе и отходили во своя домы, благодаряще Бога. И от недуг своих исцеление получали”».

Слышавше игумен Лаврентии от сына своего духовнаго, от старца Ионы, таково великое духовное дело, посла в Шагоцкую волость в село Андреевское по козмодомьяновского священника, по Лукиана Козмина. И повелевает священнику Лукиану писати изо устную духовную память, а сам игумен Лаврентии перед священником Лукианом допрашивает старца Ионы по прежереченному его словеси. И старец Иона сказа им ту же духовну повесть, что и отцу своему//(л. 30) духовному игумену Лаврентию. Священник же Лукиан Козмин, написав изо устную духовную память, и отдал игумену Лаврентию. Игумен же, приписав духовные своею рукою и вместо сына своего духовнаго старца Ионы.

И потом посылает игумен Лаврентий во Андреанову пустыню живоначалныя Тройцы, и святаго славнаго пророка Илии, и мученицы христовы Пятницы служебника старца Исаию кирьпичника своея новыя пустыни, и повелевает игумен Лаврентий старцу Исаие, пришедши во Андреанову пустыню, в церкви на соборе игумену Порфирию и всей братии таковое село духовное учителное слово возвестити, дабы в чювство пришли, понеже бо игумен Лаврентии достоверно слышав про их самочиние и невоздержателное пьянство: «Аще желаеши от теплыя вашея сердечныя веры//(л. 30 об.) про отца своего началника игумена Андреана ведати, где его мощи почивают и до ныне, и мы, Бога ради, оставите во обители и в дому чюднаго Богоявления Господа Бога и Спаса Нашего Иисуса Христа, и Пречистыя его Богоматере Честнаго и Славнаго Ея Успения, и великого чюдотворца Николы, и преподобнаго мученика и отца нашего игумена Андреана хмелное питие, и пиянственный нрав до конца отрините. И отец наш новые пустыни игумен Лаврентии про таковое великое духовное дело подробну возвестит вам, про началника нашего игумена Андреана, где он преподобный и доныне почивает. Аще ли таковаго его духовнаго совету не приимете и пиянственнаго от себе нраву до конца не отрините, то и отец наш новые пустыни игумен Лаврентий о таковом великом духовном деле орудия// (л. 31) и совету с вами не имеет отныне и до века».

Игумен же Порфирий и вся братия Андреановы пустыни, воздевши руце горе и вси, яко едиными усты, вопияху: «Аще бы нам Бог даровал мощи преподобнаго отца нашего началника игумена Андреана в дом чюднаго Богоявления, и Пречистыя Его Богоматере Честнаго и Славнаго Ея Успения, и великаго чюдотворца Николы, и преподобномученика отца нашего игумена Андреана, хмелное питие и пиянственный нрав отринули, а поручница по нас и послушница нашему обещанию Пречистая Богородица, и великий святитель Христов// (л. 31 об.) Николае Чюдотворец, и преподобный отец наш началник игумен Андреан, что впредь дому чюднаго Богоявления, и Пречистыя Богородицы, и великаго чюдотворца Николы, и преподобнаго мученика игумена Андреана хмелного пития не держать отнюд во веки веком».

Старец же Исаиа новые пустыни, слышав их во церковь Пречистыя Богородицы таковое великое обещание, и повелевает игумену Порфирию быти на совет к Живоначалней Троице и святому славному пророку Илии на Ухру в новую пустыню ко отцу своему игумену Лаврентию. Игумен же Порфирий по возвещании старца Исаиа вскоре прииде к Живоначалней Тройце и святому славному пророку Илии в новую пустыню к игумену Лаврентию. Игумен же Лаврентии вопрошает игумена Порфирия: «Чадо и брате, коего ради орудия//(л. 32) и ползы подвиг сии учини всю пустыню к нам нищим и непотребным?» Понеже бо игумен Порфирий сын духовный игумену Лаврентию. Игумен же Порфирии с великим молением и обещанием повелевает орудие своего пришествия игумену Лаврентию. Игумен же Лаврентий вопрошает сам, яко же довлеет отцем духовным детей своих духовных вопрашивати о таковых великих духовных делех: «Чадо и брате мой духовный, Порьфирий, помниш ли ты и со всею своею братиею обители чюднаго Богоявления, и Пречистыя Богородицы Честнаго и Славнаго Ея Успения, и великаго чюдотворца Николы, и преподобнаго мученика игумена Андреана свое обещание, что во обители его началника игумена Андреана хмелное питие и самочиние отставити и не быти хмелному питию во веки веком//(л. 32 об.) во Андреанове монастыре? Понеже бо преподобнии отцы наши и началники игумен Андреан да старец Леонид не хмельным питием и не различными сладкими ядми питайся, строя дом Пречистыя Богородицы, но и паче питалися словесы Божественнаго писания, и всенощными бдении, и непрестанным постом, и молением, и теплыми сердечными слезами. А ядь их была преподобных отец в такове непроходимей пустыни в подобно время и во уреченныи час былия и мало хлеба с водою. Аще не бы таково их моление и подвиг постныи был, и не бы тако святая их обитель распространилася их составлением, понеже бо и всем нам иноком правила святых апостол и святых отец, учение иноческое обещание предлежит от первых нас и до последних инок, якоже и апостол Павел нас учит:// (л. 33) ко ефесеом зачало 129, глаголя: «Братие, не упивайтеся вином, в нем же есть блуд» (Еф 5:18). Такожде и вам подобает слово обещания своего памятовати во веки веком, яко же обещалися есте чюдному Богоявлению, и Пречистей Богородице, и великому чюдотворцу Николе, и преподобномученику игумену Андреану во обители их хмелново пития и самочиния не держати». Игумен же Порфирий с клятвою изрече отцу своему душевному игумену Лаврентию: «Ей, ей, по священноиноческому обещанию, честный отче, будет по словеси твоему тако, яко же ты нас поучаеши и наставляеши на духовный подвиг, а поручница по нас и послушница нашему обещанию Пречистая Богородица, и великий святитель Христов Николае, и преподобномученик и отец наш Андреан». Игумен же Лаврентий рече игумену Порфирию: «Чадо и брате// (л. 33 об.) “По вере вашей буди вама” (Мф 9:29). Бог да услышит веру вашю и явит вам мощи преподобномученика и отца нашего игумена Андреана».

И по том игумен Лаврентий вручает игумену Порфирию духовную изо устную память старца Ионы за своею игуменскою рукою: «Яко же вас Бог наставит, да и преподобныи мученик и отец наш игумен Андреан, тако себе и промышляйте, чада и братия, Бог да подаст вам мощи молитвами преподобнаго мученика игумена Андреана». Игумен же Порфириии благословение приим ото отца своего духовнаго, от игумена Лаврентия, и в путь шествие творяху к Москве бити челом государю царю и великому князю Михайлу Феодоровичю всея Русии и великому государю святейшему кир Филарету Никитичю патриарху московскому и всея Русии,//(л. 34) чтобы государь да святейший патриарх повелели перенести мощи преподобномученика и отца нашего игумена Андреана в его обитель, в дом чюднаго Богоявления, и Пречистыя Его Богоматере Честнаго и Славнаго Ея Успения, и великаго чюдотворца Николы во Андреанову пустыню.

Игумен же Порфирий прииде к Москве и вда духовную, и заустную память вручи великому государю святейшему кир Филарету Никитичю Патриарху московскому и Всея Русии. Великий же государь святейший и всея Русии вычет духовную изустную память старца Ионы за рукою отца его духовнаго игумена Лаврентия новыя пустыни и, советовав з государем и великим князем Михайлом Феодоровичем всея Русии, и со властми, с митрополиты, и со архиепископы и епископы, со архимандриты и игумены, и повеле//(л. 34 об.) вдати свою святительскую грамоту за своею святительскую красною печатию игумену Порфирию Андреановы пустыни; приехав в Пошехонской уезд в новую пустыню Живоначалныя Троицы и святаго славнаго пророка Илии на реку Ухру к ребине, искати мощей преподобномученика игумена Андреана против духовные изустные памяти старца Ионы под древом ребиною.

Прииде игумен Порфирии во обитель чюднаго Богоявления и Пречистыя Богородицы Честнаго и Славнаго Ея Успения и великаго чюдотворца Николы во Андреанову пустыню и советует з братиею на соборе, призывает к себе на совет от Николы Чюдотворца Тропскаго монастыря Киприановы пустыни игумена Серапиона.

Слышав Томило Луговской, что государь царь и великий князь Михайло Феодоровичь и всея Русии//(л. 35) и по Полоцкому рождению отец его государев, а в духовном чину отец и богомолец великий государь святейший кир Филарет Никитичь патриарх московский и всея Русии, повеле искати преподобнаго мученика отца нашего началника игумена Андреана в новой пустыни на реке на Ухре против духовные памяти старца Ионы под древом ребиною. И пишет своим приказщиком в Шагоцкую волость в село Андреевское, «как-де приидет к вам в новую пустыню игумен Порфирий Андреановы пустыни з братиею и со христианы искати мощей началника своего преподобномученика игумена Андреана под древом ребиною, и вы бы ему мощей началника игумена Андреана под древом ребиною искати дали, а древа бы отнюд ничем не вредили с великим брежением». Приказщик же Томила//(л. 35 об.) Луговского с писмом прииде в новую пустыню ко игумену Лаврентию и к братии на совет, како бы им мощей преподобнаго искати велети, а древа бы ничем не вредети.

Игумен же Лаврентий з братиею прииде к древу ребине и, поклоняяся Животворящему Кресту на святой церкви и проговоря достойно, а сам игумен Лаврентий озирашеся семо и овамо, с которую бы страну древа искати мощей преподобнаго (яко же сын его духовный старец Иона игумену Лаврентию не указа, в котором месте положен преподобный началник игумен Андреан, занеже и старцу Ионе не указа места и отец родный Исидор, в котором месте положен преподобный мученик игумен Андреан, развее словом сказа признаку древо ребину поставлена в ногах посторонь могилы). Игумен же Лаврентий//(л. 36) назнаменав своим посохом с полуденную страною сажени с полторы от древа, уповая на судбы Божия, яко же Бог восхощет, то и сотворит, в том месте разгребше землю, идти подкопом к древу искати мощей преподобнаго.

О великое чюдо! Бог прославляет святых своих! Похранен бысть преподобномученик игумен Андреан лета 7058-го (1550) и недоведомо бысть, где преподобнаго тело похранили до 134-го (1626), яко и место могилы его преподобнаго сравнялося с прочиею пожнею равно. И яко же пред очима игумена Лаврентия погребен бысть преподобномученик игумен Андреан, понеже бо над самыми мощьми преподобнаго начальника игумена Андреана назнаменовал место игумен Лаврентий своим посохом разгребати указывает, чтобы мощи преподобнаго обрести, а древа//(л. 36 об.) не вредити.

И не по мнозе времени после того, заговев в Филипов пост, на память святаго апостола и евангелиста Матфея прииде игумен Порфирий Андреановы пустыни з братиею и со христианы в новую пустыню к Живоначалней Троице и святому славному пророку Илию на Ухру к ребине. И в то время не лучися в монастыре у себя быти игумену Лавреньтию (во ину весь отлучися нужды ради); игумен же Порфирий Андреановы пустыни, да Николской игумен Серапион, да черной священник Варлаам Новые пустыни, и с прочими священники, и со дияконы совершив понахиду под древом ребиною над мощьми преподобнаго. И нача озиратися семо и овамо, с кою бы страны итти ко древу подкопом мощей// (л. 37) преподобнаго искати, а древа бы не вредити. И указаша Томилов человек Луговскаго Иоанн Барма: «Отец наш игумен Лаврентий приговаривал, и благословлял, и посохом своим игуменским очертил сие место разгребати».

Игумен же Порфирий благослових служебников своих по благословению игумена Лаврентия то место разгребати и ко древу итти подкопом. Служебники же начаша разгребати, уже бо земля в то время велми мерзла. И сняша землю первый слой с пядь на толщину пожни и заяша вторый слой земли. И ту прииде гниль древяная перста на три на толщину гнили, а под гнилью менши пяди земли сняша, и ту явилися мощи преподобнаго Андреана началника. «Людие же видевше и не разумевше, ни положиша в помышлении таковаго» (Прем 4:15), начаяхся// (л. 37 об.) преподобнаго под самым древом, а те мощи выбрали на скалу, и в то время прииде во свою пустыню игумен Лаврентии, и помолився живоначалней Троице и святому славному пророку Илии, и благословися от игуменов и сам им такожде благословению подав и прочим всем такожде. И иде ко древу проститися над мощми преподобнаго и, видев мощи выбраны из земли, и нача сетовати и повеле принести чашу хлебенную из хлебни и собрах мощи преподобнаго и несох в трапезу теплую и поставих их честно на поставе сам игумен Лаврентии своима рукама и покрых покровом и глаголаша со властми: «Братия не скорбите, Бога ради. По вере вашей да явит нам Бог достоверно мощи преподобнаго отца нашего началника игумена Андреана». И повелеша служебником// (л. 38) под древо итти подкопом.

Служебники же сутками подкопашася под древо с полуденныя страны и с нощныя сажени полуторе от древа, а с восточныя страны и з западныя по сажени, и не обретохом под древом ничтоже, развее земля матерая николиже была двигнута, занеже и памятухов не было, что у тое церкви пророка Илии родителям кладища не бывало ниже каменных признак на могилах для, де, того та церковь и пуста была от давных лет. Наутро восташа игумен Лаврентии, к заутрине прииде в церковь и, помолився святым иконам, и пришед к мощем проститися, и открыв покров, приник со свечею и видев у мощей на главе и на прочих составех земля обтаяла и с мощей обвалишася в сосуд. И видев игумен// (л. 38 об.) Лаврентии у мощей преподобнаго на затыли у главы еще венца знати власов под главою улежалися, яко полстки перста на три в ширину и в длину черны, яко же и образ его, преподобнаго, написан на иконе при тех людех, которые его, преподобнаго, знали велми во Андреанове пустыне; а на прочих составех одежи его обтаяло з землею невеликие части, не вем – отлас бывал золотной, не вем – бархать узорчат на золоте изотлеша в толикое давно время, а иныя части иноческия одежди власяниц.

Игумен же Лавретии призва к себе и прочих игуменов, и братию и велми о том возрадовашася радостию великою, яко явил им Бог мощи преподобнаго началника игумена Андреана. И скуташа преподобнаго мощи, и положиша его честно во гробницу,//(л. 39) и покрыша покровом, и понесоша ис пустыни мощи преподобнаго на главах во обитель чюднаго Богоявления Господа Бога и Спаса нашего Иисуса Христа, и Пречистыя Его Богоматере Честнаго и Славнаго Ея Успения во Андреанову пустыню. Братия же и вси иноцы возрадовашася, и христианя з женами и з детми радостию великою, и встретоша мощи преподобнаго началника своего игумена Андреана за пять поприщь от монастыря, и несоша во обитель его преподобнаго на главах братия и христианя и, отпевше надгробное пение, и положиша мощи преподобномученика игумена Адреана в соборной церкви Святаго и Славнаго Ея Успения Владычицы Нашея Богородицы и Приснодевы Марии во гробницу честно против праваго крилоса. И на обретение и по пренесении честных мощей преподобномученика // (л. 39 об.) игумена Андреана бысть многое исцеление различными недуги беснующим, и дряхлым, и слепым, и хромым дарова Бог исцеление от честных мощей преподобномученика Андреана. И до ныне с верою приходящим к честному его гробу неоскудно приемлют и ото всяких напастей и бед к Богу молитвами своими ходатай и заступник и от всяких скорьбей и различных болезней от святаго гробу чюдотворных его мощей неоскудно подает исцеление. Богу нашему слава ныне, и присно, и во веки веком. Аминь.// (л. 40)