Чюдо десятое о том же человеце Юрии Казаринове.

Той убо человек Юрий Казаринов поживе в трезве уме доволно время, елико Бог дарова. Злый же демон, ненавидя православных христиан в трезвости, поущая на пиянство, хотя отвратити от славы Божия и поглотити в погибель, вложи во ум тому человеку Юрию Казаринову, и забы обещание, егда будучи страждуща, яко «мимо шло есть обету моему». И бе в пиянстве обдержим быти, и паки в той же недуг впаде наипаче перваго лютее, от нечистаго демона страждуща.//(л. 46 об.) Родителие же везоша его в монастырь и, отпевше молебная пения, и будучи у чюдотворных мощей преподобномученика Андреана, получи исцеление, и бысть здрав, и поживе доволно время, и отиде ко Господу.

Чюдо первое надесять.

Того же монастырского села Пертомы некий посацкий человек Гавриил по реклу Новиков бе одержим лукавым бесом и, егда бысть во храме Успения Пречистыя Богородицы, идеже многоцелебныя мощи преподобномученика Андреана, божественной литургии, поемей херувимской песни, получи у чюдотворных мощей той беснующий человек Гавриило исцеление, и здрав бысть, и отиде в дом свой, славя Бога, и Пречистую Богородицу, и чюдотворца Андреана.

Чюдо второе надесять.

Во обители же сей не бе власти, бысть некий воин Иосиф Михайлов сын//(л. 47) Левашев, еже зовется веси пошехонец. Впаде в великий недуг зол, и вселися в него лукавый демон, беснующися, кричаше велиим гласом, и бияшеся, и ничто же Божия слова вразумляя. Жена же его зело боголюбива Марфа Василиева дочь, еже зовется Павловых, видевше мужа своего Иосифа страждуща от нечистаго духа, и возьвестиша людем, повеле взяти мужа своего Иосифа и вести в дом Пречистыя Богородицы и к целбоносным мощем к преподобному чюдотворцу Андреану. Иосифу же тому возбраняше лукавый бес итти на исцеление, но хотя в пагубный ров воврещи. Иосиф же нача жену свою и людей бити, и зубы скрежетаху. Боголюбивая же та жена и людие едва его, Иосифа, приведоша в монастырь и, отпевше молебная пения, и ко гробу// (л. 47 об.) к многоцелебным мощем преподобномученику Андреану приложися, и святою водою освятиша. Вечеру же позде против пятка в пяток часу нощи сведен бысть той Иосиф в сон тонок у многоцелебных мощей, братиям же и всем людем изшедшим из церкви, ни един же оста. Иосиф же возбнув очима и виде Пречистую Богородицу Одигитрие у многоцелебных мощей, предстояща с Превечным Младенцем. Иосиф той бысть в страсе велице и нача пети: «О тебе радется обрадованная» еже и до конца. И обращася на первое и воспеваше велием гласом. Ото очию же его слезы возливашеся, аки от неисчерпаемаго кладязя и в церькви бысть благоухание.

Братиям же слышавшим пение в церкви, и шедше в церьковь Честнаго и Славнаго Ея//(л. 48) Успения Пречистыя Богородицы, и виде Иосифа здрава, наполнившеся радости и слезнаго рыдания. И бысть в велице страсе, еже Всещедрый Владыко Человеколюбец и Пречистая Его Богомати показа велие чюдо у многоцелебных мощей угодьника своего чюдотворца Андреана. Воин же Иосиф сам нам поведа исцеление угодника чюдотворцева и како виде Пречистую Богородицу с Превечным Младенцем Сына Божия у гроба чюдотворцева предстояща. Братия же слышавше изо уст того воина Иосифа, како ему исцеление бысть, и начаша молебная пения ко Всемилостивому Спасу, и Пречистей Богородице, и угоднику их преподобному чюдотворцу Андреану. И отиде той Иосиф здрав в дом свой, славя Бога, и Пречистую Богородицу, и чюдотворца Андреана.

Чюдо третие надесять. //(л. 48 об.)

Бысть в Пошехонии Белого села Романовского государев губной староста Кирило Васлиьев сын Хвастов. Манастырь же отстоя десять поприщь от села Белого. При боголюбивом же игумене Илии тоя обители от того губного старосты Кирила Василиева сына Хвастова дому Пречистыя Богородицы и чюдотворцу свады и обиды велия быша, и безвинных в вину претворяше. Игумен же и братия тоя обители со вторицею скупы даваше ему. Он же хапаше и свирепяся, и ничтоже от него благо бысть, но и паче на дом чюдотворцев возяряшеся. Игумен же и братия в велии печали и сетовании бысть.

Бог же Всещедрый Человеколюбец и Пречистая Его Богомати, не хотя дом свой чюдотворный гибнущь быти, но и хотя угодника своего преподобномученика// (л. 49) прославити, нападе на того губного старосту Кирила Василиева сына Хвастова недуг зол и обдержим лукавым демоном, но и беснующиися. Людие же, его видевше страждуща от нечистаго беса, и везоша его в дом Пречистыя Богородицы и к Чюдотворцу Андреану. И привезоша во обитель, и отпевше молебная пения, и у многоцелебных мощей в третий день получи иселение, и бысть здрав. И отиде в дом свой славя Бога, и Пречистую Его Богоматерь, и великаго чюдотворца Андреана. И по том той Кирило Хвастов в дом Пречистыя Богородицы и к чюдотворцу Андреану держа велию веру и бысть милостив и воздатель.

Чюдо четвертое надесят

Тоя же обители при боголюбивом же//(л. 49 об.) игумене Илии бысть чюдо сие. Монастырские вотчины бе христианин Константин, у него дщерь Устиния девица. В пяток во время утренняго пения от`яся у той девицы руце и пониче, не возмогоша ими осязати. И быша в той болезни, а к чюдотворным мощем не везоша болящую до двою недель и призываше врачев. Врачеве же не помогоша, посрамлени отхождаху. Отец же, и мати, и сродники возложиша облегчение болезни и на всещедраго Бога и Пречистую Богородицу. И везоша родителие к чюдотворным мощем и, отпевше молебная пения, и абие в третий день от многоцелебных мощей преподобномученика Андреана девица Устиния получи исцеление и бысть здрава. Родителие же и девица отидоша в дом свой, славя Бога, и Пречистую Богородицу, и великаго//(л. 50) чюдотворца Андреана.

Чюдо 15.

Тоя обители Андреановы пустыни при боголюбивом игумене Илии в вотчине Пречистыя Богородицы Андреановы пустыни бе некий христианин Иоанн Евсегниев, у него же бе сын Михаил младенец, и затворися у него очи, и ослепоша, и гной текоша. Отец же, и мати, и сродичи быша в велии печали и в сетовании, и волхвов ко врачеванию много призваша. И ничто же от них помощи имея, и не виде отроча очима до трех недель, и мняше, что изгнили очесе. Отец же и мати, от волхвов взем чадо, и возложи на волю Всещедраго Бога и Пречистую Богородицу, и принесоша чадо свое в дом Пречистыя Богородицы. И у многоцелебных мощей преподобномученика игумена Андреана отпев молебная пения, отроча же во время утренняго пения//(л. 50 об.) получи исцеление, и прозре очима, и бысть здрав. Отец же и мати со отрочатем отиде в дом свой, славя Бога, и Пречистую Его Богоматерь, и виликаго чюдотворца Андреана.