Молитва Пресвятой Богородице пред иконой Ея Пермской

О, всепе́тая Богоро́дице Присноде́во, Богоизбра́нная Отрокови́це! Огради́ о́бразом Свои́м чудотво́рным всю́ зе́млю Пе́рмскую и все́х благоче́стно живу́щих на не́й от все́х наве́тов вра́жиих, защити́ ча́д свои́х земны́х матери́нским Покро́вом Свои́м, укрепи́ в ве́ре и благоче́стии все́х                              власте́й и во́инство земли́ на́шей, архипа́стырем земли́ Пе́рмстей пода́ждь му́дрость кро́тость в несе́нии креста́ своего́, и пода́ждь на́м, Влады́чице, си́лу служи́ти бли́жним свои́м, и стране́ на́шей пода́ждь стойкость                                           в испыта́ниях и ве́ру непоколеби́му.

 

Священномученику Константину (Богоявленскому), пресвитеру Меркушинскому:

Тропарь глас 3:

Церкве Русския столпе непоколебимый, благочестия правило, жития евангельскаго образе, священномучениче Константине, Христа ради пострадавый до крове, Его же моли усердно, яко Начальника и вершителя спасения, Русь Святую утвердити в Православии до скончания века.

Кондак, глас 2:

Восхвалим, вернии, изряднаго во священнице и славнаго в мученицех Константина, Православия поборника и благочестия ревнителя, земли Русския красное прозябение, иже страданием Небесе достиже и там тепле молит Христа Бога спастися душам нашим.

 

 Тропарь преподобномученице великой княгине Елисавете Феодоровне, глас 1

Смире́нием досто́инство кня́жеское сокры́вши,/ богому́драя Елисаве́то,/ сугу́бым служе́нием Ма́рфы и Мари́и/ Христа́ почти́ла еси́./ Милосе́рдием, терпе́нием и любо́вию себе́ предочи́стивши,/ я́ко же́ртва пра́ведная Бо́гу принесла́ся еси́./ Мы же, чту́ще доброде́тельное житие́ и страда́ния твоя́,/ я́ко и́стинную наста́вницу усе́рдно про́сим тя:/ свята́я му́ченице вели́кая княги́не Елисаве́то,// моли́ Христа́ Бо́га спасти́ и просвети́ти ду́ши на́ша.

 

 

 Кондак преподобномученице великой княгине Елисавете Феодоровне, глас 2

Вели́чие по́двига ве́ры кто пове́сть?/ Во глубине́ земли́, я́ко в раи́ све́тлости,/ страстоте́рпица вели́кая княги́ня Елисаве́та/ со А́нгелы во псалме́х и пе́ниих ра́довашеся/ и, убие́ние претерпева́ющи,/ о безбо́жных мучи́телех взыва́ше:/ Го́споди, прости́ им грех сей,/ не ве́дят бо, что творя́т./ Тоя́ моли́твами, Христе́ Бо́же,// поми́луй и спаси́ ду́ши на́ша.

 

Молитва преподобномученицам великой княгине                                       Елисавете Феодоровне и инокине Варваре

О, святы́я новому́ченицы Росси́йския, вели́кая княги́не Елисаве́то и сестро́ ея́ кресто́вая пречестна́я иноки́не Варва́ро, ку́пно путь свой во мно́зех му́ках сконча́вшия, Ева́нгельския за́поведи де́лом во Оби́тели милосе́рдия соверши́вшия, ве́ры ра́ди Правосла́вныя подвиза́ющися до сме́рти в после́дняя времена́ сия́, и до́брый плод в терпе́нии страсте́й Христу́ прине́сшия! Моли́теся Ему́, я́ко победи́телю сме́рти, да утверди́т Це́рковь Ру́сскую Правосла́вную и оте́чество на́ше, кро́вию и страда́ньми новому́чеников искупле́нныя, и не даст в расхище́ние враго́м Росси́и достоя́ния на́шего. Се бо лука́вый враг вооружи́ся на ны, хотя́ нас погуби́ти в междоусо́бных бране́х, ско́рбех, нестерпи́мых печа́лех, боле́знех, ну́ждах и беда́х лю́тых. Умоли́те Го́спода низложи́ти вся немощны́я де́рзости их; ве́ру в сердца́х люде́й росси́йских укрепи́те, да егда́ на́йдет на ны испыта́ния час, му́жества дар восприи́мем ва́шими моли́твами, отве́ргшеся себе́ и взе́мше крест свой, после́дуем, Христу́, распина́юще плоть свою́ со страстьми́ и похотьми́. Сохрани́те нас от вся́каго зла, освяти́те пути́ жи́зни на́шея, да́руйте покая́ние нелицеме́рное, тишину́ и мир душа́м на́шим, испроси́те у Го́спода всем нам мыта́рств го́рьких и ве́чныя му́ки изба́витися и Небе́сному Ца́рствию насле́дники бы́ти со все́ми святы́ми, от ве́ка угоди́вшими Бо́гу, да ра́дующеся воздади́м хвалу́, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.

 

Священномученик Михаил (Накаряков)

Тропарь священномученику Михаилу (Накарякову), глас 4

Днесь ликует собор новомучеников Российских, / земли Пермския священномученика славнаго прославляя, / усольскаго пресвитера / Михаила добраго пастыря. / Во дни гонения безбожнаго / жизнь свою за Христа положившаго / и стояща у Престола Вседержителева / и молящагося за ны. // Егоже молитвами, Боже, спаси души наша.

 

Кондак священномученику Михаилу (Накарякову), глас 6

Благословение, премудре, стяжавый / и венец мучений приимый, / Троицы всесвятыя проповедниче, / иереев образе достохвальне, / новомучеников преславное удобрение, / блаженнее Михаиле богомудре, / молися Владыце Вседержителю // во еже спастися нам.