Тропарь праведному Иоанну Кронштадтскому, глас 1

Тропарь праведному Иоанну Кронштадтскому, глас 1

Православныя веры поборниче, / земли Российския печальниче, / пастырем правило и образе верным, / покаяния и жизни во Христе проповедниче, / Божественных Таин благоговейный служителю / и дерзновенный о людех молитвенниче, / отче праведный Иоанне, / целителю и предивный чудотворче, / граду Кронштадту похвало / и Церкве нашея украшение, / моли Всеблагаго Бога // умирити мир и спасти души наша.

Кондак праведному Иоанну Кронштадтскому, глас 3

Днесь пастырь Кронштадтский / предстоит Престолу Божию / и усердно молит о верных / Христа Пастыреначальника, / обетование давшаго: созижду Церковь Мою, // и врата адова не одолеют ей.

Молитва ко святому праведному Иоанну, пресвитеру Кронштадтскому, чудотворцу

О великий чудотворче и предивный угодниче Божий, богоносне отче Иоанне! Призри на нас и внемли благосердно молению нашему, яко великих дарований сподоби тя Господь, да ходатаем и присным молитвенником за нас будеши. Се бо страстьми греховными обуреваеми и злобою снедаеми, заповеди Божия пренебрегохом, покаяния сердечнаго и слез воздыхания не принесохом, сего ради многим скорбем и печалем достойни явихомся. Ты же, отче праведне, велие дерзновение ко Господу и сострадание к ближним своим имея, умоли Всещедраго Владыку мира, да пробавит милость Свою на нас и потерпит неправдам нашим, не погубит нас грех ради наших, но время на покаяние милостивно нам дарует. О святче Божий, помози нам веру православную непорочно соблюсти и заповеди Божий благочестно сохранити, да не обладает нами всякое беззаконие, ниже посрамится Правда Божия в неправдах наших,          но да сподобимся достигнути кончины христианския, безболезненныя, непостыдныя, мирныя и Тайн Божиих причастныя. Ещё молим тя, отче праведне, о еже Церкви нашей Святей до скончания века утвержденней быти, отечеству же нашему мир и процветание в Правде Божией испроси и от всех зол сохрани, да тако народи наши, Богом храними, в единомыслии веры и во всяком благочестии и чистоте, в лепоте духовнаго братства, трезвении и согласии свидетельствуют: яко с нами Бог! В Немже живем, и движемся, и есмы, и пребудем во веки. Аминь.

 

 

Священномученик Леонид (Антонищенко), епископ

Марийский и Кунгурский

Тропарь, глас 4

Царевококшайска архипастырь добрый показался еси, священномучениче Леониде, Церкве Христовы утверждение и Евангелия исполнение: гонений бо мученически сподобився, еще же уз и темниц, Апостольское теми исправил еси житие твое, пострадав даже до крове, исповедал еси Христа Бога Совершенна, Егоже усердно моли о творящих твою память верно.

Кондак, глас 1

Божественнаго Твоего, Христе, разумев истощания силу, новый угодник Твой, Господи, Леонид мудрый, исповедник и мученик явися днесь; сей убо ведый, яко Ты, Спасе мира, образ дал еси учеником Твоим, первый пострадати хотя даже до смерти Крестныя, избра Тебе последовати во времена последняя, свидетельствовав доброе исповедание. Темже вопияше: Ты мучеников еси, Христе, утверждение.

 

Священномученики Павел и Григорий, Мокинские и Пермские

Тропарь, глас 5:

Честное страдание ваше / за веру святую Православную / к веселию духовному вся люди созывает, / священномученицы Павле и Григорие, / вы бо землю Пермскую кровьми своими освятивше, / любви совершенней научаете, / душу полагати за Христа Бога нашего, // Светом Воскресения мир обновившаго.

Кондак, глас 3:

Пастырю добрый Павле / и святолепнаго служения рачителю Григорие, / паству вашу словом просветившии, / святыни Церкве Христовы зело возлюбившии, /          и веры ради смерть мученическую приявшии, / ныне землю Пермскую благодатию просвещаете, / и святыня ея бываете, / мощми своими безсмертие проповедающе, // и исцеления точаще всем с верою притекающим.

 

Величание:

Величаем вас, / священномученицы Павле и Григорие, / землю Пермскую кровьми вашими обагрившии, / и образ любве ко Христу // показавшии.

Тропарь священномученику Андронику Пермскому, глас 5

Меч духовный взем, священномучениче, за Церковь и Отечество воинствовал еси; и духом пламенея, богомудре, любовь Христову стяжал еси. Жизнь убо временную ни во что вменив, в жертву себе принесл еси. Мы же, грешнии, молим тя, святителю Андрониче, неотступным буди ходатаем за нас пред Богом.

Тропарь, глас 3

Ратниче за истинное веры исповедание, ангельских чинов непреложное ликование, поборниче демонских ополчений, дивный воине Царя Небеснаго, дивная цевнице земли Пермския и Ильинския, святе священномучениче отче наш Николае, моли милостиваго Бога спастися душам нашим.

 

Кондак, глас 8

Днесь ликует град святый Пермский, яко обретен бысть источниче благ вечных, рукописаний евангельских хранителю пречудне, священномучениче отче наш Николае, моли Милосерднаго Владыку Господа даровати нам оставление прегрешений и велию милость.

 

Икос, глас 5

Пророку Даниилу в премудрости подражая, дивный пастырю овец Христовых показался еси. Якоже Иову многострадальному многия скорби претерпевый и мученическою кровию Христа Изнодавца без остатка в сердце своем запечатлевый. Того моли, священномучениче Николае, долгов разрешение нам даровати и струпы душ грешных венцем своим мученическим очисти.                         И душам нашим даруй восприяти трапезы благ вечных.

 

Величание

Величаем тя, священномучениче отче наш Николае, и чтим честная страдания твоя, яже за Христа претерпел еси.

 

Тропарь, глас 5

Благоукрашается Церковь Русская, земля Пермская ликовствует в памяти преславного лика святых своих, словом и житием Богу угодивших, имже мы благодарственно взываем: О, древнии и новии подвижницы веры православныя, ови апостольския труды понесши, ови же кровьми мученическими веру утвердившии, велиции заступницы и хранителие, молите Христа Бога душам нашим в мире спастися.

 

Кондак, глас 5

Радуйся, Пермская земле, память святых твоих празднующи, Православия благовестников уделе светоприемный, святителей ниво плодоносная, в тебе Уральский Афон возсия, преподобных жилище, в тебе Голгофа вознесеся новых мученик, ихже мощей ради яко антиминс распростертый зришися, темже и мы заступником нашим взываем: о, святии избранницы Божии, веру, смирение и братолюбие в нас умножите, в покаянии и благочестии утвердите да спасение улучим и велию милость.

 

Величание

Величаем вас, вси святии земли Пермския, и чтим святую память вашу, страну нашу светом Евангельским озарившии и жизнь за веру во Христа положившии.

 

Молитва

О, святии сродницы наши, древнии и новии Пермския земли заступницы, первосвятителя Стефана наследницы, пламенней вере священномученика Андроника подражателие! Кто возможет достойно воспети подвиги ваша?               Кто поведает миру вся яже за веру Христову претерпенная вами? Прославляюще память вашу и праздник ваш светло совершающе, благодарственное моление вам приносим. Величаем святители, яже страну нашу от мрака языческаго к свету евангельскому приведшия и тайну вечнаго спасения пермяном поведавшия. 

 

Воспеваем новыя мученики, яже кровьми своими холми, удолия и реки обагрившия и велие дерзновение ко Христу стяжавшия. Почитаем Царственныя страстотерпцы, яже со сродники и други поношение и смерть               в пределех Пермских приявшия. Восхваляем архипастыри со пастыри, яже чад церковных укрепившия за веру Православную непоколебимо стояти противу обновителей льстивых. Ублажаем преподобныя, яже из келий монастырских на скитания и смерть изгнанныя и молитвою места страданий облагоухавшия.

Воспоминаем и страдальцы, яже деннонощными мученьми в горьких работах и в темницех изнуряемыя и терпением врага победившия.

О, велицыи святии Пермския земли! Приимите моление наша, в похвалу вам приносимое, и молите о земнем отечестве вашем, яко дерзновение ко Господу стяжали есте. Мы же с любовию припадаем к вам, предстателем нашим и заступником, и тепле взываем: сподобите нас продолжатели быти делания вашего, любовию божественною сердца верных воспламените, да доброе наследие оставим чадом церковным и Царства Небеснаго достигнем, идеже купно с вами прославим Отца и Сына и Святаго Духа, Троицу Единосущную во веки веков. Аминь.

 

Кондак, гл. 3

Днесь ра́достно лику́ет град Оре́хово-Зу́ево, / прославля́я святи́теля своего́, / священному́ченика Ники́ту, / той бо, нищету́ Христо́ву возлюби́в, / пра́вило ве́ры и о́браз милосе́рдия яви́. / Ны́не же Престо́лу Бо́жию предстои́т // и мо́лится о душа́х на́ших.

Величaние:

Велича́ем тя,/ священному́чениче Ники́то,/ и чти́м честна́я страда́ния твоя́,/ я́же за Христа́/ во утвержде́ние на Руси́ Правосла́вия// претерпе́л еси́.

 

Моли́тва

О, преславный священномучениче, святителю отче наш Никито, града Орехова-Зуева первый епископе! Ты во время гонения безбожнаго от сокровищницы души твоея спасительное исповедание Православныя веры изнесл еси и, яко пастырь добрый, душу свою за овцы полагая, любве и милосердия преисполнен был еси и, в нищете пребывая, многим благотворил еси.

Услыши нас, грешных, молящихся тебе и к твоему предстательству усердно притекающих, и помози нам веру Православную до конца жития нашего соблюсти, любовь нелицемерную к Богу имети, заповеди Господни неленостно исполняти, чистоту и целомудрие хранити, обидящих прощати и ближних преискренне любити.

Ты во дни земнаго жития многими испытании искушен быв, можеши ныне и искушаемым помощник быти. Сего ради просим тя: воззови ко Творцу всяческих, да дарует малодушным – укрепление, заблуждшим – исправление, согрешившим – дух покаяния, бедствующим – благовременную помощь, и всем нам – ревность ко исправлению греховнаго жития нашего.

Не остави нас, к тебе с верою притекающих, споспешествуй, яко отец чадолюбивый, иго Христово со упованием во благодушии и терпении понести, да сподобимся унаследовати Небесныя обители, идеже ты со ангелы и всеми святыми ныне водворяешися, прославляя Бога, в Троице славимаго, Отца и Сына и Святаго Духа. Аминь.

Молитва

О свяще́нная главо́, богоно́сне о́тче наш, богому́дре святи́телю Христо́в Анто́ние, па́стырю наш до́брый. Градо́в Во́логды и Перьми архиере́ю пресла́вный и украше́ние пресве́тлое. Преди́вный чудотво́рче, ко святы́м моще́м твои́м (ко святе́й ико́не твое́й) притека́юще, усе́рдно мо́лим тя: при́зри на ны, па́мять твою́ соверша́ющих и под кров моли́тв твои́х ны́не прибега́ющих, проле́й те́плое твое́ моле́ние ко Спа́су всех, я́ко да огради́т ми́ром держа́ву на́шу, святы́я оби́тели, гра́ды и ве́си ея́ и град наш до́бре да сохрани́т, благоче́стие лю́дем Свои́м да́рует, Правосла́вную же Це́рковь па́ки и па́ки да утверди́т и испо́лнит вся блага́я проше́ния рабо́в Свои́х, я́же ко спасе́нию. О всепозлаще́нный сосу́де Всесвята́го Ду́ха, бу́ди нам хода́тай ве́чных благ, да прославля́ем ди́внаго во святы́х уго́дницех Свои́х Бо́га на́шего Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.

 

Молитва

О пречестный и преславный отче Маркелле! Пастырю добрый, служителю Христов благоговейный, славы Соловецкия обители луче неугасимая,                         и архиереев сонма украшение всесветлое! От юности добродетелей многих исполнився, пламенем Божественныя любве возжжен, в пастырстем звании верно подвизался еси, наставляя иноков на путь спасения, и Церкви Вологодстей многа лета доблественне послужил еси попечением о славе Божии и благонравии пасомых. По преставлении же твоем ко Господу, честныя мощи твоя воспитавшая тя обитель Соловецкая прият духовно радуяся, молитвенника тя у престола Божия обретши. Ныне в присносущней славе отчей пребывая, испроси у Царя Царствующих мир обители твоей, от напастей ограждение, и от всяких бед и обстояний избавление: всем же православным христианом вся благая и ко спасению полезная. Посещении небесными твоими утверждай нас во всякой добродетели, утешая в немощех, помощь подавая в скорбех, и имже имаши дерзновением низводи на ны благодать божию, возжигая ревность о Христе в сердцах наших: да благочестно на земли поживше, и со усердием Богу поработавше, сподобимся и в жизни будущей с тобою воспевати Всесвятую Троицу, Отца, и Сына, и Святаго Духа во веки веков. Аминь.

 

Тропарь святому праведному Феодору Томскому, глас 4:

Жизни светския праведне Феодоре удалився, в землю сибирскую вольно приити изволив, чудесы и знаменьми Божиими народ Томский удивил еси, и по смерти своей веру чтущих тя укрепляеши. Поминай нас, чтущих память Твою, отче наш Феодоре!

МОЛИТВА

О, священномучениче Николае, веси култаевския иерею трудолюбнейший, земли пермския молитвенниче усердный, чад Церкве Русския скорое услышание и всех притекающих к мощем твоим целителю отраднейший! Приими моление наше и пение благодарственное, храм бо тобою созданный и от бури безбожия пречудно сохраненный имамы яко свидетельство огненныя ревности твоея о славе Божией и о спасении душ христианских. Тем же молим тя‚ помози пастырем земли нашея пермския храмы новы воздвизати и во имя Господа труды подвижническия совершати, людям же в вере возрастати и о очищении сердца попечение прилагати; и всем нам, с любовию мощем твоим покланяющимся, подаждь избавление от недугов душевных и телесных и исполни всякое на пользу духовную прошение, да непреткновенно шествующе путем спасения достигнем вси Небеснаго Царствия, и тамо с тобою прославим в Троице покланяемаго Бога нашего, Отца и Сына, и Святаго Духа, ныне и присно и во веки веков. Аминь.

 

 

ПАМЯТЬ - 7 ИЮНЯ / 25 МАЯ -

ДЕНЬ ОСНОВАНИЯ БЕЛОГОРСКОГО МОНАСТЫРЯ ПЕРМСКОЙ МИТРОПОЛИИ (+ 1891)

ТРОПАРЬ, ГЛАС № 5:

Уральскаго Афона хранители преславнии, / обетов иноческих досточуднии блюстители, / житие свое мученически скончавшии и темже от Господа венцами Славы Небесныя удостоени еси. // Темже молим вас присно мы недостойнии: святии преподобномученицы Белогорскии Варлааме, Антоние и Сергие, молите Милостиваго Бога спастися душам нашим.

 

КОНДАК, ГЛАС № 5:

Лучезарнии свещницы Православия земли Пермския, / Уральскаго Афона отцы и наставницы великоименитии, / мученицы преславнии, // святии преподобномученицы Белогорскии Варлааме, Антоние и Сергие, молите Милостиваго Бога да прегрешений оставление подаст душам нашим.

ИКОС, ГЛАС № 8:

Уральскаго Афона лампады молитвы дерзновенней наставницы преславнии, / послушания Матери Церкви примере преизрядне, / верности Христову завету даже до зверския мученическия смерти всех малодушных и заблудших вразумление великолепое. // Темже молим вас присно мы, сквернии и нечистии: святии преподобномученицы Белогорскии Варлааме, Антоние и Сергие, молите Милостиваго Бога избавитися от сатанинския злобы нелицемерным покаянием и спастися душам нашим.

 

 

СТИХИРА, ГЛАС № 1 (КОЛЕНОПРЕКЛОНЕННАЯ):

Твердое основание колыбели Православия земли Пермския, / Уральскаго Афона, обители Белогорския наставницы духоноснии, / житие свое земное во дни гонения безбожнаго ни во что же вменивши и пролитием крови страдальческой Уральский Афон и вси пределы земли Пермския в Православней вере утвердившии. // Темже молим вас со страхом, умилением и трепетом: святии преподобномученицы Белогорскии Варлааме, Антоние и Сергие, молите Христа Бога мир вселенней даровати и душам нашим велию милость.

 

ВЕЛИЧАНИЕ

Величаем вас, / святии преподобномученицы Белогорскии Варлааме, Антоние и Сергие, / и чтим честная страдания ваша, // вы бо кровьми Истину Православия Христова соблюдше и вся концы земли Пермския                               ко Христу приведше.

 

 

Припев на молебне:

ВЕЛИЧАНИЕ

Величаем вас, / святии священномучениче Василие, преподобномучениче Матфее и мучениче Алексие, / и чтим честная страдания ваша, / яже за Христа претерпели есте.

 

ПРИПЕВ НА МОЛЕБНЕ:

Святии священномучениче Василие, преподобномучениче Матфее и мучениче Алексие, молите Бога о нас!

МОЛИТВА

О, святии Христовы служителие священномучениче Василие, преподобномучениче Матфее и мучениче Алексие, державнии покровители душ и телес наших! Приимите сие малое моление нас, грешных, заблуждших и недостойных чад Божиих, испросите нам у Господа Бога оставление лютых прегрешений наших, вольных и невольных, исцеление от недугов духовных, душевных и телесных, вы бо еси посланы бысть во граде Пермский исследовати со всем тщанием венец мученичества священномученика архиепископа Андроника, сами же бе сего конца страдальческаго             удостоилися есте.  

 

О, святии священномучениче Василие, преподобномучениче Матфее и мучениче Алексие! Умолите Господа Вседержителя веси Пермстей в Вере Истинней Православней в мире спастися, Архипастырем, пастырем, причту церковному, властем и воинству ея, наипаче же народу ея держати дерзновение исповедовати Веру Христову до скончания века, да сподобимся вкупе с вами и со всеми святыми земли Пермския славити и воспевати Пречестное и Великолепое Имя Господне, Отца, и Сына, и Святаго Духа, ныне и присно,   и во веки веков. Аминь.

 

СВЯЩЕННОМУЧЕНИК ПИМЕН (БЕЛОЛИКОВ), ЕПИСКОП

ВЕЛИЧАНИЕ

ВЕЛИЧАЕМ ТЯ, / СВЯЩЕННОМУЧЕНИЧЕ ХРИСТОВ ОТЧЕ НАШ ПИМЕНЕ, / И ЧТИМ ЧЕСТНАЯ СТРАДАНИЯ ТВОЯ, / ЯЖЕ ЗА ХРИСТА ПРЕТЕРПЕЛ ЕСИ.

 

ВЕЛИЧАНИЕ

ВЕЛИЧАЕМ ВАС, // СВЯТИИ СВЯЩЕННОМУЧЕНИЦЫ ХРИСТОВЫ НИКОЛАЕ, ФЕОФАНЕ, ПИМЕНЕ, МАТФЕЕ И СТЕФАНЕ, // И ЧТИМ ЧЕСТНАЯ СТРАДАНИЯ ВАША, ЯЖЕ ЗА ХРИСТА ПРЕТЕРПЕЛИ ЕСТЕ.

ИНОЕ ВЕЛИЧАНИЕ

ВЕЛИЧАЕМ ВАС, // СВЯТИИ СВЯЩЕННОМУЧЕНИЦЫ ХРИСТОВЫ НИКОЛАЕ, ФЕОФАНЕ, ПИМЕНЕ, МАТФЕЕ И СТЕФАНЕ, // И ЧТИМ СВЯТУЮ ПАМЯТЬ ВАШУ, // ОТРОКОВИЦЕМ И ОТРОЦЕМ ОТЦЫ И НАСТАВНИЦЫ ДОБРИИ, И СОБЕСЕДНИЦЫ ШЕСТОКРЫЛАТЫХ ХЕРУВИМОВ ДЕРЗНОВЕНИИ.

 

Тропарь, глас 4

Столпи непоборимии Божественныя церкве, / иереи прехвальнии, / службы приносяще и жертву непорочну, / Владыце Христу Богу нашему, / святии священномученики Алексие, Льве и Александре, / светильницы Красноуфимския земли, / молите от тли и бед избавити ны, / А́нгелом собеседницы // и Троице поборницы.

 

Кондак, глас 3

Яко светильницы разумнаго солнца, / возсияли бо есте сущим во тьме, / мужеством и мудростию пожив Господеви, / святии священномученицы Уральския земли, / правдою, молитвою и целомудрием, / созывающе всех к высоте благочестия; / темже вопием вам: // Радуйтеся, всем верным спасение.

Величание

Величаем вас, / святии священномученицы Алексие, Льве и Александре, / и чтим честная страдания ваша, // яже за Христа претерпели есте.

Молитва

О, святии новомученицы и исповедницы Церкве Российския Алексие, Льве и Александре, услышите усердную мольбу нашу! Вемы, яко неции от вас, еще отроцы суще, послушающе о древлих страстотерпцех, в сердце своем помыслиша, колико прелюбезно и доброхвально есть таковым подражати, ихже ни муки, ни смерть не разлучиша от любве Божия. Благо же вам, яко последователи есте вере и терпению тех, о нихже слышасте и ихже возлюбисте. А понеже на всякое время возможно есть наити на ны испытанием нечаянным, испросите от Господа нам мужества дар, иже толико благопотребен есть в житии человечестем. Вся концы Отечества нашего страданьми своими освятившии, яко общи за вся ны молитвенницы, умолите Бога, избавити люди своя от ига, ужаснейшаго паче всякаго инаго. И да отпустится всему роду нашему грех, на народе Российском тяготеющий: убиение Царя, помазанника Божия, святителей же и пастырей с паствою, и страдания исповедников, и осквернение святынь наших. Да упразднятся расколы в церкве нашей, да будут вси едино, и да изведет Господь на жатву делатели Своя, сие есть да не оскудевает Церковь пастырьми добрыми, иже имут просвещати светом истиныя веры столь великое множество людей, вере не наученных, или от веры отвратившихся. Недостойни есмы милости Божия, обаче страданий ради ваших Христос Бог наш да ущедрит и помилует всех нас, в помощь вас призывающих. Мы же Ему, Спасителю нашему со Отцем и со Святым Духом сокрушение о гресех и благодарение за вся всегда да приносим, славяще Его во веки веков. Аминь.

 

Величание

Ублажа́ем тя,/ преподо́бне о́тче Ку́кшо,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

 

 

Величание

Велича́ем тя,/ священному́чениче Вениами́не,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

 

Молитва:

О, преди́вный святи́телю, богому́дрый и всесвяты́й о́тче на́ш священному́чениче Вениами́не! К тебе́ ны́не прибега́ем ве́рою и любо́вию чту́щии тя́, похвалы́ сия́ принося́ще от всего́ се́рдца и помышле́ния. Мо́лим тя́ приле́жно, страстоте́рпче святы́й, не забу́ди ны́ к тебе́ усе́рдно притека́ющих: утверди́ на́с в ве́ре святе́й правосла́вней, научи́ на́с всегда́ твори́ти за́поведи Бо́жия, исцели́ боле́зни душе́вныя и теле́сныя, бу́ди на́м покрови́телем и прибе́жищем в ско́рбех и напа́стех, заступи́ ны́ от вра́г ви́димых и неви́димых, да и мы́ богоуго́дне преше́дше по́прище сея́ жи́зни, твои́м предста́тельством и богоприя́тными моли́твами бу́дем насле́дницы Ца́рствия Бо́жия и сподо́бимся с тобо́ю предстоя́ти Престо́лу Царя́ Сла́вы, поклоня́яся Ему́ и воспева́я во ве́ки веко́в. Ами́нь.

Величание

Велича́ем тя,/ священному́чениче Агафа́нгеле,/ и чтим святу́ю па́мять твою́,/           ты бо мо́лиши о нас// Христа́ Бо́га на́шего.

 

ВЕЛИЧАНИЕ

ВЕЛИЧАЕМ ТЯ, СВЯЩЕННОМУЧЕНИЧЕ ХРИСТОВ ОТЧЕ НАШ ДИМИТРИЕ, И ЧТИМ СВЯТУЮ ПАМЯТЬ ТВОЮ, ТЫ БО МОЛИШИ О НАС ХРИСТА БОГА НАШЕГО.

 

Молитва

О, священномучениче Христов Павлине! Услыши слезныя молитвы чад твоих и воздыхания наша, сердцами сокрушенными и смиренными приносимыя. Се бо беззаконии омрачихомся и того ради бедами, яко тучами, обложихомся. Но ты, святе Павлине, понеси яко сильный немощи наша, не отлучайся от нас духом, да не разлучимся вконец от любве Божия. Призри милостивно на предстоящия и молящияся пред святою иконою твоею и прошения коегождо яже ко спасению исполни. Веруем бо, яко ты ради страданий за Церковь Божию, Отечество наше и Христоименитыя люди велие дерзновение ко Господу имаши.

 

 

Умоли благость Его, да укрепит ны в Православии и единомыслии,                              а наипаче в непоколебимом исповедании Живоначальныя Троицы и Спасителя мира, Сына Божия, Христа Бога нашего, во плоти пришедшаго, спасшаго нас на кресте, воскресшаго, ко Отцу возшедша и паки грядущаго со славою судити живым и мертвым. Паки просим тя, предстательствуй пред Богом за паству твою и вся православныя христианы, да дарует Господь архипастырем и пастырем нашим духовное трезвение и ревность о спасении своем и врученныя паствы, страну нашу в мире и благоденствии соблюдет, правителем дарует суд и правду, а всем нам братолюбие и любовь. Милостивый святителю, яви ныне всем требующим твоея помощи исцеление душ и телес, мирное устроение, от клеветы и обид заступление. Да тако мы днесь и чрез все житие, твоею помощию спасаеми, восхвалим Подвигоположника Иисуса, Сына Божия. Емуже подобает всякая слава, честь и поклонение, со Безначальным                                          Его Отцем и Святым, Благим и Животворящим Его Духом,                                     ныне и присно, и во веки веков. Аминь.

 

Священномученику Прокопию, архиепископу Херсонскому

Тропарь, глас 1:

Свети́льник всесве́тлый во гра́де Херсо́не яви́лся еси́, па́стырю до́брый, священному́чениче Проко́пие. Любо́вь и милосе́рдие в сердца́х ве́рных насажда́я, тве́рдо стоя́ти во испове́дании ве́ры Правосла́вныя призыва́л еси́. Те́мже со пресви́тером Иоа́нном за Христа́ пострада́л еси́, и ны́не ку́пно с ни́м на небеси́ престо́лу Бо́жию предстоя́, моли́ Ми́лостиваго Бо́га оте́чество на́ше в Правосла́вии и благоче́стии утверди́ти, ми́р Це́ркви дарова́ти и душа́м на́шим ве́лию ми́лость.

Кондак, глас 4:

Во святи́телех благоче́стно пожи́в, и муче́ния пу́ть проше́д, безбо́жия си́лу побежда́я, побо́рник бы́в Херсо́нстей па́стве, богому́дре. Те́мже тя́ почита́юще, та́ко вопие́м ти́: от бе́д изба́ви на́с при́сно твои́ми мольба́ми, о́тче священному́чениче Проко́пие.

 

Величание

Велича́ем тя,/ священному́чениче Проко́пие,/ и чтим святу́ю па́мять твою́,/          ты бо мо́лиши о нас// Христа́ Бо́га на́шего.

Молитва

О, пресла́вный священному́чениче Проко́пие, страстоте́рпче непреодоле́нный, Архиере́ю Бо́жий и о Це́ркви Херсо́нстей хода́таю! При́зри на моле́ние на́с, почита́ющих святу́ю па́мять твою́ и испроси́ на́м у Христа́ Бо́га проще́ния грехо́в на́ших, да не до конца́ прогне́вается на на́с Госпо́дь: согреши́хом бо и недосто́йнии яви́хомся милосе́рдия Бо́жия. Моли́ о на́с Го́спода, да ниспо́слет ми́р на гра́ды и ве́си на́ша, да изба́вит на́с от наше́ствия иноплеме́нников, междоусо́бныя бра́ни и вся́ких раздо́ров, и нестрое́ний. Утверди́, священному́чениче всеблаже́нне, ве́ру и благоче́стие во все́х на́с, и да изба́вит на́с Госпо́дь от ересе́й, раско́лов и вся́каго суеве́рия. О, ми́лостивый на́ш предста́телю! Моли́ся за ны́ ко Го́споду, да сохрани́т на́с от гла́да и вся́ких боле́зней, и да пода́ст вся́ на потре́бу челове́ком поле́зная. Наипа́че же да сподо́бимся моли́твами твои́ми Небе́снаго Ца́рствия Христа́ Бо́га на́шего, Ему́же че́сть и поклоне́ние подоба́ет со Безнача́льным Его́ Отце́м и Пресвяты́м Ду́хом, ны́не и при́сно и во ве́ки веко́в. Ами́нь.

 

Тропарь, глас 5 (священномученику Феофану, епископу Соликамскому (Ильменскому):

Святителю Андронику соревнуя, безбожных обличитель явился еси; в бдениих и постничестве преуспевая, любовию Господнею возсиял еси; мучений тяжких за Христа удостоенный, и ныне Тому предстоиши. Священномучениче Феофане блаженне, не забуди нас грешных, молящихся тебе.

 

Кондак, глас 2 (священномученику Феофану, епископу Соликамскому (Ильменскому):

В годину лютых испытаний святительский жезл приял еси; от храма к храму пешешествуя, молитвою освятил еси пределы архиерейства твоего; Христа враги в узы заточенный, ходатай теплый к Богу за народ явился еси. Темже Церковь тя, мудре, прославляет, яко боголюбца и священномученика.

 

Тропарь, кондак и величание

МОЛИТВЫ

СВЯЩЕННОМУЧЕНИКАМ
НИКОЛАЮ (БЕЛЬТЮКОВУ) И

Стихира, глас № 1

(коленопреклоненная):

    Днесь воспоим, вернии, пресветлую двоицу мучеников Христовых, якоже Агнцев закланных за греховные вины, земли Пермския и селения Култаевскаго Божие прозябение, пастырей добрых вземлющих грехи многих человецев, святых священномучеников Николая и Александра, вы бо молите                        присно о нас почитающих вас любовию, яко наставницев и путевождей к наследию Царства Небеснаго и благ вечных.

 

Величание

    Величаем вас, святии священномученицы отцы наши Николае и Александре, и чтим честная страдания ваша яже за Христа претерпели есте.

 

МОЛИТВА СВЯЩЕННОМУЧЕНИКАМ

НИКОЛАЮ (БЕЛЬТЮКОВУ)

И АЛЕКСАНДРУ (САВЕЛОВУ),

ПРЕСВИТЕРАМ КУЛТАЕВСКИМ

    О, святии священномученицы Христовы, отцы наши Николае и Александре, Духа Святаго цевницы, земли Пермския и селения Култаевскаго светильники преизобильнии!   

    Владыку Христа умолите мир вселенней даровати, слепым же и заблудшим от истинныя православныя веры прозрение подати духовное, душевное и телесное, жити православным христианом   в мире и братолюбии, в покаяннем чувстве и  нелицемерней трезвости проходити поприще временней жизни на пути к Царствию Небесному и наследию благ вечных!

    О, святии священномученицы Култаевские Николае и Александре! Вы бо ни мраз, не  издевательства, не рассечение лютое мечами стойце за Христа прияша научите и нас дерзновенно           с упованием стояти за веру Христову!

    Будьте же вы, священномученицы Николае и Александре, недужным врачи, заблудшим пастыри добрии, немощным заступницы, волнующимся же житейскою бурею будьте миротворцы и покаяния с трезвостию учителие!

    О, святии священномученицы Николае и Александре! Владыку всех умолите нам благ вечных и Царствия Небесного быти наследниками, да сподобимся же вкупе с вами и со всеми святыми, в земле Пермской просиявшими, славити и воспевати Пречестное и Великолепое Имя Господне, Отца, и Сына, и Святаго Духа, ныне и присно, и во веки веков. Аминь.

ВСЕ СВЯТИИ УГОДНИЦЫ БОЖЬИ,

МОЛИТЕ ХРИСТА  БОГА

ДА ПРЕГРЕШЕНИЙ ОСТАВЛЕНИЕ

ПОДАСТ ДУШАМ НАШИМ!

 

 

 

Тропарь праведному Иоанну Кронштадтскому, глас 1

Православныя веры поборниче, / земли Российския печальниче, / пастырем правило и образе верным, / покаяния и жизни во Христе проповедниче, / Божественных Таин благоговейный служителю / и дерзновенный о людех молитвенниче, / отче праведный Иоанне, / целителю и предивный чудотворче, / граду Кронштадту похвало / и Церкве нашея украшение, / моли Всеблагаго Бога // умирити мир и спасти души наша.