Посем бывает вход с кадильницею. Иерей благословляет вход.

Диакон: Прему́дрость, про́сти.

Лик: Све́те тихий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й, те́мже мир Тя сла́вит.

Диакон: Во́нмем.

Священник: Мир всем.

Диакон: Прему́дрость, во́нмем.

Чтец: Проки́мен, глас 4: Ще́др и ми́лостив Госпо́дь, долготерпели́в и многоми́лостив..

Лик: Ще́др и ми́лостив Госпо́дь, долготерпели́в и многоми́лостив.

Чтец, стих: Благослови́ душе́ моя́ Го́спода, и вся́ вну́тренняя моя́, и́мя свято́е Его́.

Лик: Ще́др и ми́лостив Госпо́дь, долготерпели́в и многоми́лостив.

Чтец: Ще́др и ми́лостив Госпо́дь,

Лик:  долготерпели́в и многоми́лостив.

Диакон: Премудрость.

Чтец: Бытия́ чте́ние. [Быт.22:1–18.]

Диакон: Во́нмем.

Чтец: Бы́сть по глаго́лех си́х, Бог искуша́ше Авраа́ма, и рече́ ему́: Авраа́ме, Авраа́ме. и рече́: се́ а́з. И рече́: пойми́ сы́на твоего́ возлю́бленнаго, его́же возлюби́л еси́, Исаа́ка, и иди́ на зе́млю высо́ку, и вознеси́ его́ та́мо во всесожже́ние, на еди́ну от го́р, и́хже ти́ ре́х. Воста́в же Авраа́м у́тро, оседла́ осля́ свое́. поя́т же с собо́ю два́ о́трочища, и Исаа́ка сы́на своего́, и растни́в дрова́ во всесожже́ние, воста́в и́де, и прии́де на ме́сто, е́же рече́ ему́ Бо́г, в тре́тий де́нь. И воззре́в авраа́м очи́ма свои́ма, ви́де ме́сто издале́че. И рече́ Авраа́м отроко́м свои́м: ся́дите зде́ со осля́тем: а́з же и де́тищ по́йдем до о́нде, и поклони́вшеся, возврати́мся к ва́м. Взя́ же Авраа́м дрова́ всесожже́ния, и возложи́ на Исаа́ка сы́на своего́: взя́ же в ру́ки и о́гнь, и но́ж, и идо́ста о́ба вку́пе. Рече́ же Исаа́к ко Авраа́му отцу́ своему́: о́тче. о́н же рече́: что́ есть ча́до? рече́ же: се́ о́гнь и дрова́, где́ есть овча́ е́же во всесожже́ние? Рече́ же Авраа́м: Бог у́зрит Себе́ овча́ во всесожже́ние ча́до. ше́дше же о́ба вку́пе, Приидо́ста на ме́сто, е́же рече́ ему́ Бо́г: и созда́ та́мо Авраа́м же́ртвенник, и возложи́ дрова́: и связа́в Исаа́ка сы́на своего́, возложи́ его́ на же́ртвенник верху́ дро́в. И простре́ авраа́м ру́ку свою́, взя́ти но́ж закла́ти сы́на своего́. И воззва́ и́ А́нгел Госпо́день с небесе́, и рече́: Авраа́ме, Авраа́ме. о́н же рече́: се́ а́з. И рече́: да не возложи́ши руки́ твоея́ на о́трочища, ниже́ да сотвори́ши ему́ что́: ны́не бо позна́х, я́ко бои́шися ты́ Бо́га, и не пощаде́л еси́ сы́на твоего́ возлю́бленнаго Мене́ ра́ди. И воззре́в Авраа́м очи́ма свои́ма ви́де, и се́ ове́н еди́н держи́мый рога́ма в са́де саве́к: и и́де Авраа́м, и взя́ овна́, и вознесе́ его́ во всесожже́ние вме́сто Исаа́ка сы́на своего́. И нарече́ Авраа́м и́мя ме́сту тому́, Госпо́дь ви́де: да реку́т дне́сь, на горе́ Госпо́дь яви́ся. И воззва́ А́нгел Госпо́день Авраа́ма втори́цею с небесе́, Глаго́ля: Мно́ю Саме́м кля́хся, глаго́лет Госпо́дь, его́же ра́ди сотвори́л еси́ глаго́л се́й, и не пощаде́л еси́ Сы́на твоего́ возлю́бленнаго Мене́ ра́ди. Вои́стинну благословя́ благословлю́ тя, и умножа́я умно́жу се́мя твое́, я́ко зве́зды небе́сныя, и я́ко песо́к вскра́й мо́ря, и насле́дит се́мя твое́ гра́ды супоста́тов. И благословя́тся о се́мени твое́м вси́ язы́цы земни́и, зане́же послу́шал еси́ гла́са Моего́.

Диакон: Во́нмем.

Чтец: Проки́мен, глас 4: Я́ко возвели́чишася дела́ Твоя́ Го́споди, вся́ прему́дростию сотвори́л еси́.

Лик: Я́ко возвели́чишася дела́ Твоя́ Го́споди, вся́ прему́дростию сотвори́л еси́.

Чтец, стих: Благослови́ душе́ моя́ Го́спода, Го́споди Бо́же мо́й, возвели́чился еси́ зело́.

Лик: Я́ко возвели́чишася дела́ Твоя́ Го́споди, вся́ прему́дростию сотвори́л еси́.

Чтец: Я́ко возвели́чишася дела́ Твоя́ Го́споди,

Лик: вся́ прему́дростию сотвори́л еси́.

Диакон: Повели́те.

Священник же, взем обема рукама кадильницу, и свещник со свещею, стоит пред святою трапезою, зря к востоком, и назнаменуя крест, глаголет: Прему́дрость, про́сти.

Таже, обратяся на запад к народу, глаголет: Свет Христо́в просвеща́ет всех.

Чтец: При́тчей чте́ние [Притч.17:17–28,18:1–5.]

Диакон: Во́нмем.

Чтец: Бра́тия в ну́ждах поле́зни да бу́дут: сего́ бо ра́ди ражда́ются. Му́ж безу́мен пле́щет и ра́дуется себе́, я́коже поруча́яйся испору́чит дру́га своего́, на свои́х же устна́х о́гнь сокро́вищствует. Грехолю́бец ра́дуется сва́ром: а жестокосе́рдый не усря́щет благи́х. Му́ж удобопрело́жный язы́ком, впаде́т в зла́я: се́рдце же безу́мнаго боле́знь стяжа́вшему е́: Не весели́тся оте́ц о сы́не ненака́заннем: сы́н же му́др весели́т ма́терь свою́. Се́рдце веселя́щееся благоиме́тися твори́т: му́жу же печа́льну засы́шут ко́сти. Прие́млющему да́ры непра́ведно в не́дра не предъуспева́ют путие́: нечести́вый же уклоня́ет пути́ пра́вды. Лице́ разу́мно му́жа прему́дра, о́чи же безу́мнаго на конца́х земли́. Гне́в отцу́ сы́н безу́мен, и боле́знь ро́ждшей его́. Тщеты́ твори́ти му́жу пра́ведну не добро́: ниже́ преподо́бно наве́товати власте́м пра́ведным. И́же щади́т глаго́л произнести́ же́сток, разу́мен: долготерпели́вый же му́ж прему́др, лу́чше и́щущаго нау́ки. Несмы́сленному вопроси́вшу о му́дрости, му́дрость вмени́тся: не́ма же кто́ себе́ твори́т, возмни́тся разу́мен бы́ти. Вины́ и́щет му́ж хотя́ отлучи́тися от друго́в, на вся́кое же вре́мя поноси́мь бу́дет. Не тре́бует прему́дрости му́ж скудоу́мен, зане́ па́че во́дится безу́мием. Егда́ прии́дет нечести́вый во глубину́ зо́л, неради́т: нахо́дит же ему́ безче́стие и поноше́ние. Вода́ глубока́ сло́во в се́рдце му́жа: река́ же изска́чущая и исто́чник жи́зни. Чуди́тися лицу́ нечести́ваго не добро́, ниже́ преподо́бно уклоня́ти пра́ведное на суде́

Священник: Мир ти.

Диакон: Прему́дрость.

Чтец же поет: Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Таже правый и левый лики, и весь предстоящий в церкви народ стоит дондеже чтец пропоет, на коленях молящися. И по пропетии чтеца, первый лик поет тожде:

Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.