И тропари трипеснца Триоди, глас 1.

Ирмо́с: Чу́да преесте́ственнаго росода́тельная изобрази́ пе́щь о́браз: не бо́ я́же прия́т пали́т ю́ныя, я́ко ниже́ о́гнь Божества́ Девы, в ню́же вни́де утробу́. Те́м воспева́юще воспое́м: да благослови́т тва́рь вся́ Го́спода, и превозно́сит во вся́ ве́ки.

Стих: Благослови́те вся пти́цы небе́сныя, зве́рие и вси ско́ти, Го́спода, по́йте и превозноси́те Его во ве́ки.

Тропарь: Притупи́л еси́ лука́ваго Спа́се, жа́ла, пригвожде́н гвоздьми́ на Дре́ве, терно́вным венце́м оде́ялся еси́ укори́зны, искореня́я преступле́ния те́рние. Те́мже воспева́юще тебе́ зове́м: да благослови́т тва́рь вся́ Го́спода, и превозно́сит во вся́ ве́ки.

Стих: Благослови́те сы́нове челове́честии, да благослови́т Изра́иль Го́спода, по́йте и превозноси́те Его во ве́ки.

Тропарь: Просте́рл еси́ на Кресте́ Христе́ дла́ни, челове́чество собира́я к твоему́ позна́нию, и копие́м Твои́м ре́бром пробости́ся претерпе́л еси́, источи́в на́м исто́чник спасе́ния, воспева́ющым: да благослови́т тва́рь вся́ Го́спода, и превозно́сит во вся́ ве́ки.

Стих: Благослови́те свяще́нницы Госпо́дни, раби́ Госпо́дни, Го́спода, по́йте и превозноси́те Его во ве́ки.

Тропарь: Струя́ми благоутро́бия Твоего́ Христе́ Ще́дре, очи́сти мое́ се́рдце, грехо́вным угрызе́нием оскверни́вшееся, и ре́ки умиле́ния источи́ти сподо́би мя́ Христе́ Иису́се, да зову́ Тебе́: да благослови́т тва́рь вся́ Го́спода, и превозно́сит во вся́ ве́ки.

Стих: Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его во ве́ки.

Богородичен: Ста́мну Тя́ Боже́ственную, ма́нну иму́щую Божества́, позна́хом Отрокови́це, ковче́г и трапе́зу и све́щник престо́л Бо́жий и пала́ту, и мо́ст, преводя́щий к Боже́ственной жи́зни, пою́щыя: да благослови́т тва́рь вся́ Го́спода, и превозно́сит во вся́ ве́ки.

И тропари инаго трипеснца Триоди, глас 6:

Ирмо́с: Отроко́в пе́снь воспои́м Христу́, пою́ще с ни́ми: да благослови́т вся́ тва́рь Го́спода, и превозно́сит во вся́ ве́ки.

Стих: Благослови́те Ана́ния, Аза́рия, Мисаи́л, Го́спода, по́йте и превозноси́те Его во ве́ки.

Тропарь: Распина́ется Христо́с, и оживля́емь а́з пою́ со о́троки: благослови́те дела́ Госпо́дня Го́спода и превозноси́те Его́ во ве́ки.

Стих: Благослови́те апо́столи, проро́цы и му́ченицы Госпо́дни, Го́спода, по́йте и превозноси́те Его во ве́ки.

Тропарь: Ми́р от тли́ распя́тием Твои́м изба́вивыйся, пое́т со о́троки: благослови́те дела́ Госпо́дня Го́спода и превозноси́те Его́ во ве́ки.

Благослови́м Отца́ и Сы́на и Свята́го Ду́ха, Го́спода.

Троичен: Тро́ице равносла́вимая, пресу́щная Еди́нице, О́тче, и Сы́не, и Ду́ше, спаси́ ве́рою пою́щыя Тя́.

И ны́не и при́сно и во ве́ки веко́в. Ами́нь.

Богородичен: Рождеству́ Чи́стыя Богоро́дицы покланя́юся, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Сла́ва Тебе́, Бо́же наш, сла́ва Тебе́.

Тропарь: Пою́ Тво́й Кре́ст, и́мже спа́сл мя́ еси́ Христе́, поя́ со о́троки: благослови́те дела́ Госпо́дня Го́спода, и превозноси́те Его́ во ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмос, глас 6: Отроко́в пе́снь воспои́м Христу́, пою́ще с ни́ми: да благослови́т вся́ тва́рь Го́спода, и превозно́сит во вся́ ве́ки.

Священник: Богоро́дицу и Ма́терь Све́та в пе́снех возвели́чим.

Песнь Богородицы.

Лик: Вели́чит душа́ Моя Го́спода, и возра́довася дух Мой о Бо́зе, Спа́се Мое́м.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко призре́ на смире́ние Ра́бы Своея́, се бо от ны́не ублажа́т Мя вси ро́ди.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его да́же до ве́ка.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Песнь 9

Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Стих: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

Тропарь: По мно́гих труде́х и боле́знех безчи́сленных,/ по́тех же и ско́рбех вои́стинну,/ в приста́нищи почи́л еси́, Небе́сное нося́ бога́тство Боже́ственных доброде́телей,/ свяще́ннейше о́тче, преподо́бных удобре́ние.

Стих: И воздви́же рог спасе́ния нам, в дому́ Дави́дове о́трока Своего́.

Тропарь: Разсужде́ния свети́льник, чу́вствия престо́л,/ незло́бив, кро́ток, и ми́лостив, и благоуми́лен был еси́,/ рыда́яй же и омыва́я одр, я́коже рече́ Дави́д,/ с ни́мже вся, ве́рою чту́щия тя, помина́й.

Стих: Я́коже глаго́ла усты́ святы́х, су́щих от ве́ка проро́к Его́.

Тропарь: Я́ко дневну́ю звезду́, я́ко Ду́ха храм,/ я́ко ши́пок благово́ния та́инственнаго, о́тче, сын испо́лнен,/ я́ко высокове́твенно дре́во, я́ко сла́вы ве́чныя о́бщника/ и я́ко му́дра святи́теля чтим тя, Иа́кове.

Стих: Спа́сение от враг на́ших и из руки́ всех ненави́дящих нас.

Тропарь: Сле́зныя пото́ки, в зе́млю се́рдца посыла́емы бога́тно,/ вои́стинну клас возрасти́ша зрел,/ ду́ши пита́ющ ве́рою чту́щия тя при́сно,/ святи́телю Богому́дре, о́тче наш Иа́кове.

Стих: Сотвори́ти ми́лость со отцы́ на́шими и помяну́ти заве́т святы́й Свой.

Богородичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во о́гнь, ни я́ростию Твое́ю обличи́ мене́, –/ мо́лит Тя Де́ва, ро́ждшая Тя, Христе́,/ А́нгел мно́жества и с преподо́бными му́ченики.

И чтется трипеснец Триоди, глас 1:

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Стих: Кля́тву, е́юже кля́тся ко Авраа́му отцу́ на́шему, да́ти нам без стра́ха, из руки́ враг на́ших изба́вльшимся.

Тропарь: Ви́де Илиа́ Го́спода в то́нце ве́тре, истончи́в пе́рвее пло́ть моли́твами и посто́м: ему́же поревнова́вши душе́ моя́, отве́ржи сла́дости дебельства́, я́ко да у́зриши жела́емаго.

Стих: Служи́ти Ему́ преподо́бием и пра́вдою пред Ним вся дни живота́ на́шего.

Тропарь: На дре́во возне́с пе́рвее Моисе́й зми́я Спа́се, вообража́ше Твое́ воздви́жение, е́же на Кресте́ Преблаги́й: и́мже ядови́тыя зло́бы зми́евы, изба́вил еси́ вся́ язы́ки покланя́ющыяся Тебе́.

Стих: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.

Тропарь: Во гро́бе уны́ния лежа́, отягча́ющий име́я ка́мень недоуме́ния: присноживо́тнаго не разуме́я, Спа́се сло́ва Твоего́, и стра́ха Твоего́ не чу́вствуя, уще́дри мя́ и спаси́ Твое́ю бла́гостию, Многоми́лостиве.

Стих: Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

Богородичен: Все́х превы́шшая Влады́чице, страсте́й мя́ зло́бы вы́шша покажи́, сла́вяща Тя́ всеи́стинную Богоро́дицу, и пою́ща Рождество́ Твое́ Чи́стая, непостиже́нием, Богора́дованная, почита́емое.

Иный трипеснец Триоди, глас 6:

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Стих: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.

Тропарь: Распина́ешися, и спаса́еши мя́: умира́еши, и оживля́еши мя́. О благоутро́бия, о человеколю́бия Твоего́! кто́ ви́де, кто́ слы́ша, Влады́ку за раба́ прие́млюща сме́рть поно́сную? Но сла́ва неизрече́нней бла́гости Твое́й Го́споди.

Стих: Напра́вити но́ги наша на путь ми́рен.

Тропарь: Со́лнце я́ко ви́де Тя́ распина́ема, за́йде: ка́ко бо сия́ло бы, укори́зну ви́дя Зижди́теля своего́? я́ко и тва́рь вся́ преклоня́ема, распина́телем вопия́ше молча́щи: я́ко Ты́ Бог еси́ все́х, а́ще и пло́тию стра́стен.

Сла́ва Отцу́ и Сы́ну и Святому Ду́ху.

Троичен: Еди́наго единороди́телю, единоро́днаго Сы́на О́тче: и еди́не еди́наго све́те, све́та сия́ние: и еди́ный еди́не еди́наго Бо́га, Святы́й Ду́ше, Го́спода Госпо́дь, вои́стинну сы́й: о Тро́ице Еди́нице Свята́я, спаси́ мя богосло́вяща Тя́.

И ны́не и при́сно и во ве́ки веко́в. Ами́нь.

Богородичен: Чу́до рождества́ Твоего́ удивля́ет мя́ Всенепоро́чная, ка́ко зачина́еши безсе́менно необъиме́ннаго? рцы́, ка́ко де́вствуеши, ро́ждши я́ко Ма́ти? Е́же па́че естества́ ве́рою прие́мь, Рожде́нному поклони́ся: ели́ка хо́щет бо, и мо́жет.

Сла́ва Тебе́, Бо́же наш, сла́ва Тебе́.

Тропарь: На́с ра́ди подъя́т Тво́й ки́йждо у́д стра́сть: ударе́ние, глава́: лани́ты, зауше́ние: ру́це, пригвожде́ние, и ре́бра копие́: изря́днее же кре́ст. Но сла́ва неизрече́нному благоутро́бию Твоему́ Спа́се на́ш.

Ирмо́с, глас 6: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Лик: Досто́йно есть я́ко вои́стинну блажи́ти Тя Богоро́дицу, При́сноблаженную, и Пренепоро́чную, и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем. (И поклон.)

Таже ектения малая:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Тя хва́лят вся си́лы небе́сныя и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Светилен, глас 8.

Све́т сы́й Христе́, просвети́ мя тобо́ю, Си́лою Го́споди, Креста́ твоего́, и спаси́ мя.