Канон Игнатия святого Иакова, глас 2.

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

К тропарем стихи припеваются по ликом сии:

Стих: Госпо́дь, ца́рствуяй ве́ки, и на век, и еще́, егда́ вни́де конь фарао́нов с колесни́цами и вса́дники в мо́ре.

Тропарь: Просвеще́ние Тро́йческое, Иа́кове, в ду́шу прие́м,/ ми́ра оста́вил еси́ те́мную пре́лесть/ и преми́рную сла́ву получи́л еси́.

Стих: И наведе́ на ня Госпо́дь во́ду морску́ю, сы́нове же Изра́илевы проидо́ша су́шею посреде́ мо́ря.

Тропарь: Ты, крест на ра́мо взем,/ Распе́ншемуся, преподо́бне, после́довал еси́/ и, мона́шествовав прему́дре,/ стра́сти воздержа́нием, о́тче, изсуши́л еси́.

Сла́ва Отцу́ и Сы́ну и Свято́му Ду́ху.

Тропарь: Вмести́телен дарова́ний Ду́ха от млады́х ногте́й твои́х сосу́д был еси́/ и Вы́шняго граждани́н Сио́на и насле́дник, блаже́нне Иа́кове.

И ны́не и при́сно и во ве́ки веко́в. Ами́нь.

Богородичен: Еди́на Бо́га, все́ми су́ща невмести́ма,/ Тебе́ вме́стна бы́вша за бла́гость, родила́ еси́, Отрокови́це,/ Его́же моли́ спасти́ воспева́ющия Тя.

Песнь 3.

Канон Игнатия святого Иакова, глас 2.

Стих: Госпо́дь взы́де на небеса́ и возгреме́, Той су́дит конце́м земли́, Пра́веден сый.

Тропарь: Житие́ твое́ красно́,/ сло́во со́лию любве́, Богому́дре, растворе́но,/ се́рдце благоумиле́нно:/ сего́ ра́ди тя ве́рою ублажа́ем.

Стих: И даст кре́пость царю́ на́шему, и вознесе́т рог христа́ Своего́.

Тропарь: Христа́, нас ра́ди я́вльшагося пло́тию, Боже́ственный почита́я о́браз,/ гоне́ния, о́тче, претерпе́л еси́,/ и беды́, и ско́рби, всеблаже́нне.

Сла́ва Отцу́ и Сы́ну и Свято́му Ду́ху.

Тропарь: Я́ко же́ртву чи́сту, тебе́ сама́го прине́сл еси́ Го́сподеви умерщвле́нием греха́/ и же́ртвы безкро́вныя Тому́, я́ко святи́тель зако́нен, прине́сл еси́.

И ны́не и при́сно и во ве́ки веко́в. Ами́нь.

Богородичен: Зла́ту я́ко вои́стинну кади́льницу,/ и ста́мну ма́нны,/ и Боже́ственную го́ру,/ и пала́ту прекра́снейшую Бо́жию Тя, Де́во, имену́ем.

Ирмос Минеи, глас 2: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Ектения малая:

Па́ки и па́ки ми́ром Господу помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Ты еси́ Бог наш и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Седа́лен, глас 4.

Подо́бен: Ско́ро предвари́:

Христу́ после́довал еси́, мир оста́вив/ и пло́ть покори́в воздержа́нием я́ве, преблаже́нне Иа́кове,/ отню́дуже свяще́нства пома́зание свято́е име́л еси́,/ ны́не же к невеще́ственным преста́вился еси́ лико́м,/ моля́ о всех нас, восхваля́ющих тя.

Слава Отцу́ и Сы́ну и Свято́му Ду́ху, и ныне и при́сно и во ве́ки веко́в. Ами́нь.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко – Жи́знь всех – вкуша́еши сме́рти,/ оживи́ти ме́ртвыя хотя́, я́ко Благоутро́бен?

Песнь 4

Ирмос: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Стих: Госпо́дь Бог мой, си́ла моя и учини́т но́зе мои́ на соверше́ние.

Тропарь: Всено́щными мольба́ми сла́сти теле́сныя умертви́в,/ безстра́стия яви́лся еси́ свети́льник неусы́пный, преподо́бне.

Стих: И на высо́кая возво́дит мя, победи́ти ми в пе́сни Его́.

Тропарь: Слез тече́ньми всегда́ омыва́яся, преблаже́нне,/ чи́сто прия́телище яви́лся еси́ Свята́го Ду́ха.

Сла́ва Отцу́ и Сы́ну и Свято́му Ду́ху.

Тропарь: Смире́н же, и кро́ток, и сострада́телен, и незло́бив,/ и целому́др святи́тель, преподо́бне, был еси́.

И ны́не и при́сно и во ве́ки веко́в. Ами́нь.

Богородичен: Неискусобра́чная Влады́чице, Я́же Бо́га во чре́ве заче́нши,/ напа́стей и печа́лей вся изба́ви.

Песнь 5

От но́щи у́тренюет дух мой к Тебе́, Бо́же, зане́ свет повеле́ния Твоя́ на земли́.

Пра́вде научи́теся, живу́щии на земли́, преста́ бо нечести́вый, не научи́тся пра́вде, на земли́ и́стины не сотвори́т.

Да во́змется нечести́вый, да не ви́дит сла́вы Госпо́дни.

Го́споди, высока́ Твоя́ мы́шца, и не ве́деша, разуме́вше же постыдя́тся.

За́висть прии́мет лю́ди ненака́занныя, и ны́не огнь супоста́ты поя́ст.

Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Стих: Го́споди, Бо́же наш, мир да́ждь нам, вся бо возда́л еси́ нам.

Тропарь: Сла́вы жела́ний вои́стинну, е́же в челове́цех высо́каго, преподо́бне,/ прея́вственно, о́тче, возгнуша́лся еси́/ и был еси́ свети́льник, смиренному́дрия сия́я све́тлостию.

Стих: Го́споди, Бо́же наш, стяжи́ ны, Го́споди, ра́зве Тебе́ ино́го не ве́мы, и́мя Твое́ имену́ем.

Тропарь: Сла́вы жела́ний вои́стинну, е́же в челове́цех высо́каго, преподо́бне,/ прея́вственно, о́тче, возгнуша́лся еси́/ и был еси́ свети́льник, смиренному́дрия сия́я све́тлостию.

Стих: Ме́ртвии же живота́ не и́мут ви́дети, ниже́ вра́чеве воскреся́т.

Тропарь: Воздержа́нием мно́гим и во бде́нии приле́жнем, преподо́бне,/ в моли́тве и в злострада́нии взыска́л еси́ Бо́га,/ тя к Вы́шним оби́телем преложи́вшаго.

Стих: Сего́ ра́ди наве́л еси́ и погуби́л и взял еси́ всяк му́жеск пол их.

Тропарь: Упражня́я себе́ всено́щными моли́твами, стоя́л еси́,/ душе́вным о́ком Боже́ственныя прие́мля зари́,/ о́тче святи́телю Богому́дре Иа́кове.

Стих: Приложи́ им зла, Го́споди, приложи́ зла сла́вным земли́.

И Богородичен: Уязви́вшееся прило́ги лука́ваго, Пречи́стая,/ я́ко сострада́тельна, уврачу́й се́рдце мое́,/ Су́щаго, на Кресте́ пло́тию уя́звленнаго, неизрече́нно ро́ждшая.

Зде чтется Триоди трипеснец, глас 1:

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Стих: Го́споди, в ско́рби помяну́хом Тя, в ско́рби ма́ле наказа́ние Твое́ нам.

Тропарь: Простры́й не́бо я́ко ко́жу, просте́рл еси́ дла́ни на Кресте́ Иису́се преблаги́й: те́мже молю́ Тя, просте́рта мя́ вра́жиими искуше́нии, уще́дри.

Стих: И я́ко боля́щая приближа́ется роди́ти, и в боле́зни свое́й вопия́ше, та́ко бы́хом возлю́бленному Твоему́.

Тропарь: Усну́л еси́ на Кресте́ Иису́се преблаги́й, бо́дрость спасе́ния на́м подая́ лежа́щым Го́споди, в до́льнейшей поги́бели: те́мже Тя́ ве́рою сла́вим.

Стих: Стра́ха ра́ди Твоего́, Го́споди, во чре́ве прия́хом, и поболе́хом, и роди́хом дух спасе́ния, его́же сотвори́хом на земли́.

Тропарь: Стра́сти Твоея́ ви́дети де́нь, сподо́би рабы́ Твоя́ провеще́нны се́рдца све́тлостию, и живоно́сное Твое́ Спа́се Воскре́сние, пою́щыя держа́ву Ца́рствия Твоего́.

Стих: Не паде́м, но паду́т живу́щии на земли́.

Богородичен: Зря́щи Тя́ воздви́жена на Кресте́ Всечи́стая восклица́ше уязвля́ема утро́бою, и глаго́лаше: за милосе́рдие Го́споди Твои́х щедро́т, страда́ти претерпе́л еси́, все́м подая́й безстра́стие.

И́ный трипе́снец господи́на Фео́дора, гла́с 6.

Ирмо́с: От нощи́ у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́: и научи́ мя Спа́се, твори́ти во́лю Твою́.

Стих: Воскре́снут ме́ртвии, и воста́нут и́же во гробе́х, и возвеселя́тся и́же на земли́.

Тропарь: На Кресте́ ру́це Твои́ Человеколю́бче распросте́рл еси́, и гвоздьми́ пригвозди́ша, и ре́бра копие́м прободо́ша иуде́е, и терпи́ши вся́ Христе́, да мы́ спасе́мся.

Стих: Ро́са бо, я́же от Тебе́, исцеле́ние им есть, земля́ же нечести́вых паде́т.

Тропарь: Дре́ва сне́дию у́мре иногда́ Ада́м, па́ки же обре́те Дре́вом кре́стным жи́знь, и́мже щедро́т наслажда́ется пи́щи вну́трь рая́.

Сла́ва Отцу́ и Сы́ну и Свято́му Ду́ху.

Тро́ичен: Еди́ну естество́м Тя́ Тро́ице воспева́ю, безнача́льную, несозда́нную, нача́льственную, ца́рственную, пресоверше́нную Еди́ницу, Бо́га, и Све́т, и Жи́знь, Зижди́теля ми́ру.

И ны́не и при́сно и во ве́ки веко́в. Ами́нь.

Богоро́дичен: В преесте́ственном Твое́м рождестве́ Чи́стая, зако́ны естества́ Тобо́ю разреша́ются я́ве: и́бо безсе́менно ражда́еши преве́чнаго Бо́га, от Отца́ рожде́ннаго.

Сла́ва Тебе́, Бо́же наш, сла́ва Тебе́.

Тропарь: Кре́ст, копие́, и гво́здия Твоя́ почита́ем Влады́ко: те́ми бо от тли́ на́с изба́вил еси́, Твое́ю стра́стию Христе́, обезсме́ртствовавшихся.

Ирмо́с, глас 1: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.

Песнь 6

Зде ирмос Минеи святаго не поется, но поем оный по конце песни, к тропарем же стихи припеваются по чину:

Стих: Храня́щии су́етная и ло́жная, ми́лость свою́ оста́виша.

Тропарь: То́ки слез твои́х, преподо́бне, мо́ре лю́тых страсте́й изсуши́ша/ и та́мошнее утеше́ние честне́й твое́й души́ исхода́таиша.

Стих: Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́ Го́сподеви.

Тропарь: Незло́бив, кро́ток, цел, преподо́бен,/ сла́док, смиренному́др, и тих, и просвеще́ния испо́лнен,/ пресла́вне о́тче, был еси́.

Сла́ва Отцу́, и Сы́ну и Свято́му Ду́ху.

Тропарь: С Боже́ственными па́стыри па́мять твоя́, о́тче, спросла́вися,/ я́коже па́стыря до́браго, па́стырю му́дре Иа́кове,/ я́ко преподо́бне ста́до упа́сл еси́.

И ны́не и при́сно и во ве́ки веко́в. Ами́нь.

Богородичен: Во́лею вся соде́лавый во утро́бу, восхоте́в, неискусобра́чную всели́ся,/ тле́нием неду́говавшия нетле́нием почти́в, я́ко Милосе́рд.

Ирмос: В бе́здне грехо́вней валя́яйся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ектения малая:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Марию, со все́ми святы́ми помяну́вше, са́ми себе́ и друг дру́га, и весь живо́т наш Христу Бо́гу предади́м.

Лик: Тебе́, Го́споди.

Священник: Ты бо еси́ Царь ми́ра и Спас душ на́ших, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Мученичен Триоди, глас 8:

Воздержанием страстей огнепальныя умертвивше зраки и движения, Христовы мученицы прияша благодать недуги отгоняти немощных, и живше, и по кончине чудодействовати. Воистинну чудо преславно, яко кости наги источают исцеления; слава Единому и Создателю Богу.

Песнь 7

Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Стих: Благослове́н еси́ на престо́ле сла́вы Ца́рствия Твоего́, препе́тый и превозноси́мый во ве́ки.

Тропарь: Мно́гая гоне́ния и неосла́бная искуше́ния претерпе́л еси́,/ иконобо́рцы побежда́я, правосла́вием сия́я,/ вся зря́щия просвеща́я и взыва́я, Иа́кове:/ благослове́н еси́, Бо́же оте́ц на́ших.

Стих: Благослове́н еси́ на тве́рди небе́сней, препе́тый и превозноси́мый во ве́ки.

Тропарь: Христо́во стра́шное прише́ствие помышля́я, во умиле́нии все житие́ сконча́л еси́,/ до́ндеже обре́л еси́, блаже́нне, очище́ние прегреше́ний соверше́нное/ и ве́чное утеше́ние, просвеще́ние и́стинное и сла́ву неизрече́нную.

Сла́ва Отцу́ и Сы́ну и Свято́му Ду́ху.

Тропарь: Па́стыря Христа́ в кро́тости души́ яви́лся еси́ а́гня/ и, Сим наставля́емь, па́стырь ове́ц в ду́се, о́тче, слове́сных позна́лся еси́,/ с ни́ми поя́ всегда́:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́во сла́вная, Неискусобра́чная Чи́стая, Благослове́нная,/ па́дающих исправле́ние, согреша́ющих избавле́ние,/ спаси́ мя, блу́днаго, спаси́, Сы́ну Твоему́ зову́ща:/ благослове́н еси́, Бо́же оте́ц на́ших.

Песнь 8

Благослови́те вся дела́ Госпо́дня, Го́спода, по́йте и превозноси́те Его во ве́ки.

Благослови́те А́нгели Госпо́дни, небеса́ Госпо́дня, Го́спода, по́йте и превозноси́те Его во ве́ки.

Благослови́те во́ды вся, я́же превы́ше небе́с, вся си́лы Госпо́дни, Го́спода, по́йте и превозноси́те Его во ве́ки.

Благослови́те со́лнце и ме́сяц, зве́зды небе́сныя, Го́спода, по́йте и превозноси́те Его во ве́ки.

Благослови́те всяк дождь и роса́, вси ду́си, Го́спода, по́йте и превозноси́те Его во ве́ки.

Благослови́те огнь и вар, студь и зной, Го́спода, по́йте и превозноси́те Его во ве́ки.

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Стих: Благослови́те ро́сы и и́ней, ле́ди и мраз, Го́спода, по́йте и превозноси́те Его во ве́ки.

Тропарь: Чисте́йший твой ум, чистото́ю Боже́ственною просвеще́н,/ бесо́вския тьмы́ и мглы страсте́й разу́мно уклони́ся, преподо́бне, зовы́й:/ по́йте, вся дела́, Го́спода и превозноси́те во вся ве́ки

Стих: Благослови́те сла́ны и сне́зи, но́щи и дни́е, Го́спода, по́йте и превозноси́те Его во ве́ки.

Тропарь: Чисте́йший твой ум, чистото́ю Боже́ственною просвеще́н,/ бесо́вския тьмы́ и мглы страсте́й разу́мно уклони́ся, преподо́бне, зовы́й:/ по́йте, вся дела́, Го́спода и превозноси́те во вся ве́ки

Стих: Благослови́те свет и тьма, мо́лния и о́блацы, Го́спода, по́йте и превозноси́те Его во ве́ки.

Тропарь: Разжже́нныя врага́ стре́лы угаси́л еси́, му́дре, одожде́ньми непреста́нных слез/ и, разжже́гся Христо́вою любо́вию, всеблаже́нне,/ попали́л еси́ вещенеи́стовное сласте́й те́рние.

Стих: Благослови́те земля́, го́ры и хо́лми, и вся прозяба́ющая на ней, Го́спода, по́йте и превозноси́те Его во ве́ки.

Тропарь: Сие́ ста́до, прему́дре, е́же собра́л еси́ твои́ми уче́нии,/ и ве́рою соверша́ющия свяще́нную, и честну́ю,/ и по́лну све́та Боже́ственную па́мять твою́/ сохрани́ моли́твами твои́ми от искуше́ний и бед.

Стих: Благослови́те исто́чницы, моря́ и ре́ки, ки́ти и вся дви́жущаяся в вода́х, Го́спода, по́йте и превозноси́те Его во ве́ки.

Богородичен: Живы́й су́щи исто́чник, Я́же во́ду жи́зни ро́ждшая,/ ду́шу мою́, иста́явшую грехо́вным пла́менем, Де́во Богоро́дице, напо́й,/ да Тя сла́влю во вся ве́ки.