Статья 2. О том, что восьмой век, по писанию, настанет по скончании мира сего, а посему в текущей восьмой тысяче лет и не мог настать, яко несправедливо некоторые мудрствуют

1) Минея Служебная Январь

626 Осмаго века нося образ будущаго, твоею Христе просвещается и освящается волною нищетою, в сейбо законно обрезася плотию.

 

627 Будущую непрестанную осмаго века жизнь изображает, в ню же владыка обрезася плотию.

 

2) Триодь Цветная

628 Яко первый есть днем и началный светоносный сей, в оньже радоватися достойно новым и Божественным людем с трепетом. Приносит бо века образ, яко осмицы совершая будущаго, в онь же воспеваем: превозносимый отцем Бог, благословен еси.

 

629 Осмая паки, яко во образ учиняется безконечного оного дне, иже в будущий век, иже и первый и един будет, всяко нощию не разсекаем.

 

3) Благовестник

630 Из евангелия. Аминь же, глаголю вам, яко ктому не имам нити от плода лозного до дне того, когда его пию ново во царствии Божии.

 

Из толкования. Разумей же сице: виноград Господь сам, плод же винограда тайный разум сокровен, иже сам раждает, учай человека разуму. В царствии же Божии; сиречь во Осмом веце.

 

631 Лежит тридесять и осмь лет боляй. Ни в святую бо Троицу веры здравы име, ниже осмаго века воскресения глаголю, и суда живым и мертвым известно верова быти, и того ради не обреташе исцеления.

 

4) Евангелие Учительное

632 Обаче же купно седмих воскресений (выше перечисленных) смерть паки прият, осмое же выше смерти пребысть: ибо во осмый век хотящее быти мертвых воскресение ктому смертию не пресечено будет, но неразрушимо имать быти и вечно.

 

5) Октай первого гласа

633 Сице и суббота наша есть день телесе погребения, ту бо субботствует поистине естество человеческое от дел и труда, и ожидает осмоперваго дни, еже есть, во осмом веку великия недели, воскресения от мертвых телесе храмины, повелением господним, возвращения на первое достояние и тления на нетление пременения, в живот бесконечный с Господом Богом быти. Сию истинную неделю таинством днесь изображаем в перво-осмом седмичном дни, первобытную в приидущем веце, светлость и радость неизреченную.

 

6) Соборник Большой

634 Что убо глаголет, не первая ли неделя обновления беяше, яже по священей нощи и просвещении, но и днешнему да даваеши, о любοпраздньственный ты, многа умышляя светлования. Она спасительство беяше, сия спасения рожество. Она убо есть междупределение погребению и воскресению, сия же чисте второго бытия. Да якоже первая тварь начало от недели приемлет, яве же от тоя бо седмый суббота бывает, покоище сущо делом. Тако и вторая паки от тояжде начинается. Первая сущи еже по ней: и осмая о прежде тоя сущих, высокия высши и дивной дивнейши, к вышнему ведет составлению, еже и премудрый Соломон приказовает, и мнитмися даяти часть седмим, жизни сея законополагая, и убо осмим, будущему от здешняго благодейства и еже тамо устроения.

 

635 Сего ради аще хочет кто ссудити новую неделю к неделе воскресения, высочайшу новую сию неделю речет и дивнейшу, яко начальна сущи невещественной оной и блаженной жизни, осмого и не преемлемого века.

 

636 Ей же (новой неделе) и Соломон вообразует, когда глаголет, даждь часть седмим, и убо осмим. Седмь убо именовав, житие се совершаемое седмеричным числом. Осмым же именова, будущему (житию).

 

7) Просветитель преподобного Иосифа Волоколамского

637 Еретики жидовская мудрствующе, и сопротивная глаголют.., яко святые отцы написали, что седмь тысящ лет здешнего жития, а осьмая тысяща будущаго века, а ныне семь тысящ лет прошло, а конца несть святых отец писания ложна суть и подобает сих писание огнем сожещи.

 

Мы же имамы свидетельство от Божественных писаний, яко святых отец писания истинна суть, понеже согласна суть пророческим и апостольским писанием. Мы же покажем от Божественных писаний, яко аще кто речет, яко ложна суть святых отец писания, и ти суть уста отца их сатаны, яко не хотяще потрудитися в ширине Божественного писания, и поискати в нем Божественного Духа сокровенных тайн, и дерзают рещи яко святии отцы солга. Се же убо святии и божественнии отцы наши и уители любомудрствоваша, и предаша нам от иных многих. Имже несть числа и глаголаша и научиша вся согласна пророческому, и евангельскому, и апостольскому учению сказаша и написаша. И ныне такоже и о сем написаша согласно пророческим и евангельским речам. Рече бо премудрый Соломон: дай же часть бо седмым тогда и осмым. Сему согласуют вси святии отцы наши, и учители. Рече бо негде в Божественных писаниях его великого Василия: земля убо наше смещение. И земля покрывает сего паки, и земля паки востание. Ибо сугубая десяторица погибе по седьмой осмая же будущаго века воображает растворение. Богослов же Григорий глаголет, яко даяти часть седмым и убо осмым, якоже неции прежде нас Соломоново восприяша. Инде той же рече иже и божественный Соломон приказыватися мнитмися, даяти часть седьмым жизни сей, и убо осмым будущему. От здешнего благодетельства иже тамо устроение. Великий Златоуст сице рече: ибо во осмый век хотящее быти мертвым воскреснет, и ктому смертию не пресечено будет, но неразрушимо будет и вечно. Святый же Иоанн Дамаскин глаголет сице, глаголет же сия убо сего мира седмеричен век, рекше от небесного и земного сотворения, даже и до общего человекам восстания, есть бо скончание особно своя комуждо смерть. Есть же и общее всему скончание, когда приидет быти общему человеком востанию, осмый век приходяй.

 

Премудрый же Максим исповедник рече, яко Господа во осмом дни являющегося, сиречь в пришествии его. И праведным убо присно благо быти дающа и грешником присно увы подающа.

 

И святой Исаак сириянин глаголет: в сем веце несть осмый. Зри что глаголет, яко в сем веце несть осмый. Сиречь несть осмый век, но аще и осмая тысяща настанет. Но век седмеричен есть.

 

И блаженный Анастасий синайской горы глаголет. Осмое племя писание глаголет еже по седьмом настоящего века, еже хотящего быти живота нашего и пребывания яко предгласи, осмодневная обрезания. Об осмой премудрый Соломон нас наказует, глаголя, дай же часть седьмому такоже и осмому, яко же бо рещи попечемся в житии сем о хотящем и пребывающем житии.

 

Глаголет же святой Иоанн Лествичник. Седмь убо седьмого нынешняго века суть делания, осмое будущого века назнаметено есть. Видиши ли яко вси вещают равно и полагают, 7 веков нынешних, а не тысящ семь. А будущий осмый век, а не тысящу осмую глаголют. Премудрый же Максим не нарече его будущий век осмый, или тысящу осмую, но и осмый день по истинне же чудно нарече его день, яко тогда еже не будет нощь. Но аще Господь восхощет и сие тебе от Божественных писаний скажем помалу. И что есть век, и что есть тысяща, и чего ради глаголется нынешний век седмеричен, будущий же осмый полагают. Ныне же зри пророческого речения премудрого Соломона, рекл же есть Соломон: даждь часть седмым, сиречь седмеричну сему веку. Ибо от начала мира сего седмерично есть число Бог паче всех чисел предпочте. Того ради седмеричен век сей именовался. В шесть бо дний составив же и вообразив и украсил всякими виды мира сего сотворил. И в седьмой день от дел почивает, сиречь в субботу. Суббота еврейский покой именуется, по субботе же покой починается, 1 день, сиречь неделя и доходит паки до седьмого дня, сиречь до субботы и тако обращается седмица. От недельного дня починается и даже субботы достигает. И тако Бог повеле всему миру сему в нынешнем веце сими седмими днями строится. Потому же Бог Моисею повелел израильтянам заповедати седмый день почитати еже есть суббота и в летех же повелел им самое лето почитати, и не точию се но и в седми седмицах, сиречь да исчисливши в себе семь лет седмищи, и будут ти 40 и 9 лет, и освяти лето осмое, еже израильтяне нарекоша юбилей, сказаемо оставление, иные нарекоша богозванный день, и единому же день не доставшу на совершение прияхом се и от будущаго века. Осмый же суще не 1 но 7. Седмый бо сей век, иже седмицами числится. А егда же приидет будущий век, иже не числится ни седмицами, ни деньми ни нощми, ни западом солнце разоряется, но имуща незаходимого солнца. Того ради нарекоша осмый век, занеже по седмеричном численом сем веце настанет. Многа же убо свидетельства в Божественном писании обрящеши, извещения яко седьмеричен век сей глаголет. Яко седьмеричное число паче всех препочте Бог. И аще о сих всех глаголати начну ныне, еже где в писании седьмеричное число поставлено есть, много имам о сих писати. но сия не нынешнему времени ключима суть, ныне же о сих умолчим. Но аще кто восхощет поискати и сам обрящет в Божественных книгах. Ныне же еще о сем речем, о нем же прежде глаголахом, яко седьмеричен век сей, ибо седмицами числим. И месяцы седмицами числим, и годы, яко писано есть о Пророке Данииле, яко прииде к нему ангел Гавриил и рече: Данииле, Данииле да увериси и разумееши, еже создатися Иерусалиму до Христа игумена. Седмиц семь, и седмиц 60 и 2. Βидиши ли яко ангел Гавриил седмицами числит лета нынешнего века, сих ради и иных многих свидетельств, еже в Божественном писании вси святии нарекоша. Того ради седмеричный век сей, того ради рече: дай часть седьмым и тогда осмым. И вси святии отцы наши и учители подобно тому рекоша. Ни един же от них рече яко семь тысящ лет жити, а когда настает осмая тысяща, тогда будет конец, но вси полагают настоящий век, а не тысящу, и будущий век а не тысящами числя.

 

638 Аще ли же иные приводят на свидетельство, еже в мясопустном синаксари написал Никифор Ксанфопул, той бо рече. Глаголят же ся яко по седми тысящ лет будет приход его, виждь что рече глаголетжеся. А не вемы кто глаголет не убо рече яко Пророк глаголет, или Апостол, или кто от прочих святых. Обычай бо есть Божественному писанию глаголать тако о неведомых вещах, сие убо речение ничтоже имат известно.

 

639 И аще бы минуло после Христова пришествия его пять тысящ и пятьсот лет елико же бы прежде пришествия его, и тогда бы не смел о сем глаголати ни истязати человек бо сый ниже свое естество веси како бысть человек, и колико лет живота твоего, и что будет кончина твоя.

 

8) Блаженного Симеона Солунского

640 Еже даждь часть седми, и осми же о будущем веце разумеют святии, яко и Богослов Григорий. Седмь убо, седмищное сие глаголюще время. Осмое же будущее яко безконечное. За юже вину глаголют, и един, рече Моисей, день первый, яко первый сущ к седмому саввату (т. е. к субботе) явлено яко: осмый же по седьмом в нем же и восста Господь, и последний день общего востания будет: по нем же не будет ктому нощь но самый токмо един будет день.