Статья 2. О неизменяемости символа веры

 

1) Кормчая

468 Правило 7. Иже к никейстей вере иную прилагает, епископ убо чужд епископии: мирской же человек, отвержен.

 

Толкование. Иже паче веры, юже святые отцы никейстии, сшедшеся изложиша, еже есть, верую во единого Бога, к сему аще ино сложеши, зловерно приложит кто, на развращение и на погибель, иже от еллин, или от жидов, или от иной ереси обращающихся в разум истинный: аще же есть епископ, или причетник, от епископии да будет изгнан, и от сана извержен.

 

2) Книга Кириллова

469 Тако бо и на всех седьми вселенских соборех всеми святыми отцы утвержено писанием, и царскими златыми печатями, что во исповедании православной веры, еже есть, верую во единого Бога, не приложити или отъяти. Аще кто смеет приложити, или отъяти, или пременити, да будет проклят.

 

470 А якоже нецыи от мирских, паче же старейшины, фарисейски тщеславием, и высокоумия гордостию недугующе, дерзостно преступают церковное Духом Святым предание, повелевают себе по своему умышлению тайны Христовы давати, и учителей таковых ищуще себе избирают. Правоверному же не только предваряти Духом святым преданное, еже всегда непреложно пребывает; но и помыслить о том страшно, и трепетно есть. Ибо Христос за вся верующия в онь, равно претерпе. У него же лицу приятия несть. Раб и владыка купно предстанут ему, и кождо от своих дел или прославится, или постыдится. Тем же всякому подобает всею силою держатися церковного предания, от божественных апостол Духом Святым уставленнаго. И от столь множества преподобных и богоносных отец седмищи на вселенских соборех собравшихся утверженаго и соблюдаемого. Прикладающих же что, или отъемлющих, или инако претворяющих, аще и сам будет крайнейший учитель кто; никакоже слушати, но удалятися такового. Якоже божественнии апостоли научают нас сице глаголюще: аще и мы, или ангел с небесе, благовестит вам, паче еже благовестихом вам, анафема да будет, и прочая, закон бо господень непорочен, николиже исправления требует. Словеса бо Господня, рече, словеса чиста суть, ничто же в них стропотно, ни развращено, но вся права суть разумевающим истину, и здрава обретающим разум. Множицею убо сами недугующии огницею, и здравых, приседящих им, своим недугованием поражают. Или паче рещи, яко приседящии недужным, сами на ся немощи их привлачают. От сего убо яве есть, яко дерзающии переправливати закон, еже Духом Святым утверженый, то сами те плотским мудрованием недугуют, якоже бо здравому лекарство не пользует, но паче повреждает его. Сице и правое поправляющие, паче кривят, нежели правят. Тем же подобаше таковым самех себе исправити, еже по закону божественному житие свое устроити, а не закон Божественный своими суемудреными умыслами развращати, и по своих похотех кривити. Но якое же блаженный Златоуст в беседах евангельских воспоминает, аще рече: в злобе живем, и аще и ни един о нас зло глаголяи будет, всех человек окаяннейши есмы. Ни же бо злоглаголанию лукавых, но добродетели жития внимают. Ибо всякоя трубы велегласнейше, еже самеми делы показание, и света самого чистейши и явственнейши, житие чисто. Се есть полезное поучение истинных пастырей, и просвещение прочим о них христоименитым людем, множае паче нежели словесное учение. Яко да видевше, рече, добрая дела ваша, и прославят отца вашего иже на небесех. Ащели и не бо всех могии делы показовати, вси бо страстни есмы человецы? Но всяко тщатися и трудитися подобает о сем, Богу поспешествующу елика сила? А не дерзнути превращати законоположения, Духом Святым приданного. Не предлагай бо, рече, предел вечных, яже положиша отцы твои. Или не явно есть преступление таковых, еже святыми богоносными отцы писаное Духом святым предание и чины, во времена подобные положеные развращати, своя же некая мняще быти, паче Духа Святого лучшая учения вносити? Како не во отступницех Божиих вменятся таковии. И язы́цы бо, сиречь турцы, и скифове, и богоубийцы июдеи, и прочии им подобные еретики отступницы Божии поработившеся чревному сладострастию, и славою века сего помрачившеся, кождо о сих своя учения мнят паче всех народов лучша. И учения их или обычаи или законы и нравы многим неразсудным человеком красна и сладка быти мнятся. Но всяко не истинна, и горка в конец обретаются, и вечной муце ходатаи бывают. Истина бо упестрения не требует, обаче же сластолюбивым неблагодарна является. Тем же и апостол глаголет: аще ли есть покровено благовествование наше? В гибнущих есть покровено, в них же Бог века сего ослепи разумы неверных, во еже не восияти им свету благовествования славы Христовы. Сего ради благоволи Бог по вознесении своим на небеса и по преставлении Божественных ученик своих, и прочих святых апостол, когда первого царя от неверия в веру преложи и царство христианское воздвиг, и собратися отовсюду устрояя, учителем и богословцем вселенским, иже от божественных апостол и от преемников их, повсюду поставленным, и множеству подобных отец, и богоносных мужей пустынножителей, великих чудотворцев, равноангельных житием, иже собеседницы ангелом быша. И в разные лета и при разных благочестивых царях, Божиим благоволением, до семи крат на вселенские соборы собирающеся, просвещением Святого да озарени суще, истинную веру очистивше о гнусных ересей, сосудами лукавого врага насеянной. Их же яко плевелы от пшеницы, от непорочной веры истребиша. И самех тех плевелосеятелей скверных еретиков обличиша, и чудотворне низлагающе посрамиша, и вечному огню проклятием осудиша. Самую же истинную веру по глаголу божественного Пророка, яко сребро разжженое искушенное от земли, очищено седмерицею утвердиша и запечатлеша, яко ни отъяти что ни же приложити кому мощно бе.

 

Тем же всяк, кто претворяя или прилагая к сим или отъемля что, яве обретается, яко не Божественным Духом сие творит, но плотским мудрованием недугуя прельщается, тако, якоже и прочии отступницы Божии заблуждающе от чрева составляют лжю. душевен бо, рече, человек не приемлет еже от Духа Божия, юродство бо ему есть, и не может разумети.

 

471 Како убо не явствене лжут, глаголющии, не подвигнути ничто же от Божественного евангелия? иже столь грозную и высокую догму от Христа убо учеником гласом живым преданую, последи паки по летех неколицех вознесения спасова на небеса, от блаженного Иоанна, в памте {Патмосе?} острове Духом Святым и укончану и запечатлену, не устрашаются преписующе, и приложением гласа чужого во священном исповедании веры растлевающе; или како похвалятся к тому яко с Христом сбирают, учительство его не соблюдающе? Како не вменятся тати и разбойницы, не евангельскою дверью во двор овчий входяще? или како истиною свободятся от мук бесконечных, иже истине евангельской не повинуются, о толиких и столь великих богоносных отец, и леты богоприятных свидетельствовано и утвержено? како же и от любве спасовой не отлучатся, не хотящии его богословии о Святем Дусе послушати.

 

472 Но да возвратим слово откуду изыде извлечено, и да услышим иных блаженных отец, что нам повелевают, о еже соблюдати цело и неподвижно священное исповедание веры, ни прилагающим что, ни же отемлющим от того. При Феодосии бо юном, святым и вселенским третьим собором в Ефесе собранном, и злочестивого Нестория от общества верных отсекшим, начальником пресвятейшим Кириллом, и место, и достоинство держащим преблаженнейшего Клестина, папы римского. Таковое к священному сему собору пишет преблаженнейший Келестин, о божественном и священном исповедании веры, еже и доныне соблюдается у нас цело благодатию Христовою. Глаголет же сице: Кто убо когда не достоин, анафемате осужден бысть, отъемля нечто, или прилагая в вере? Яже бо полне и явствене предавая нам от святых отец, ниже приложение, ни же убавление приемлют. Чтохом бо в книгах наших, ни же приложити подобает, ни же убавити. Великою бо и прилагающого и убавляющого мукою связуют. Темже и огнь, и железо приготоваем, понеже инако не суть исцеляемы язвы. Слышиши ли Николае, яко полне и явствене, сиречь, совершеннейша и светлейша, и якоже мощно бе им уразумети и нам вместити. Такожде и явствене, сиречь, чистейше, и никоего к тому просветления требующая богословием речена суть от блаженных отец догмата, яже нам предана суть в священном исповедании веры. Но и анафемате осуждают иже таковое что смети восхощет, сиречь, пременити и приложити, или убавити. И огнем, и железом, сиречь, прокляти и отлучити, и от верных общества отсецают. Сему убо согласуя и блаженный Кирилл таковая глаголет, яко от священного его собора, в единой епистолии своей, еяже послал ко Иоанну, патриарху антиохийскому, себя оправдая, о них же Феодорит, епископ Кира города, оклеветал его, глаголя, и от сына догматствуща Духа Святого присносущне и существенне происходити. Супротиво тех отвещая таковая рече: ни по коему чину, глаголет, подвигнуться подъемлем преданную от отец наших веру, сиречь веры нашей исповедание, ни же попущаем себе, или иным, ни же глаголание пременити от них же лежат ту, или един преступити склад. Поминающе глаголющого, да не прелагаеши предел вечных, яже положиша отцы твои. Не беша бо тии глаголющии, но Дух, иже от Бога и Отца, иже убо исходит от него, есть же не чуж от Сына по слову существа. Слышиши ли, яко не токмо разума, но и речение и склад возбраняет пременяти, и преступати не попущает, глаголя, ни сам себе или иным, яко от лица всего собора. Ибо вселенский собор бе, и тии предел положиша запрещения и страшные о нех клятвы прогласиша, яже содержатся в соборной книге. Аще убо себе не попущают, какоже попустят тебе? к сим назнаменуемо есть, о, премудрейший Феодоре, яко патриарх антиохийский Иоанн и иже с ним восточнии епископи такову епистолию приемше, известившеся от о православии кирилове мир объяша, и между себе согласишася, прежде разлучени бывше. Глаголют убо сия, Феодоритом пищущим во общем. Почетше епископи сия епистолии, и испытавше прилежне разум ея, обретохом согласна реченым яже оттуда послана быша, евангельским бо благородием украшаются. И Бог совершен и человек, Господь наш Иисус Христос в них проповедается, и Дух же Святой не от Сына или Сыном существо имея, но от Отца исходя. Свой же Сыну аки единосущен именуем. Что сего свидетельства явственейши и добровернейши противу латинского противления? Епископи оклеветаху блаженного Кирилла, яко дοгматствует Духа и от Сына, и Сыном имети присносущие существо, сиречь, происходит. Он же оклеветание сие от свилая оправдает себе явствене не мудрствовати таковая, но от Отца исходити его преданию священных писаний. Быти же и от Сына не чужу по словеси существа, сиречь, яко тогожде существа и естества сын, а не и по чину бытия, сиречь, происхождения. Епископи гласы тии приимше и похваливше, глаголют Феодоритом. И Дух же Святой не от Сына или сыном существо имея, но от Отца происходя. Свой же сыну именуем яко единосущен. Се како явствено мудрование блаженного Кирилла, еже имеяше о происхождении Духа святого отвсюду является. Латини же и с тем сопротивная покушаются показати, и не срамляются противу сицевыя явственой истины борюще. Но блаженный убо Кирилл сице мудрствует.

 

473 Что же и собор четвёртый, в Халкидоне собранный на Евтихия и Диоскора, при Маркиане царе, повелел о священном исповедании веры, да слышим. Которого собора Лев, преблаженнейший папа римский, украшая и утверждая Паскасием, Ликинсием, и Вонифатием, освященными наместниками своими, глаголет убо, по прочтении священного исповедания веры, еже составиша первый и второй собор, а третий утвердил. Повелел святой и вселенский собор сей иную веру никому же попущену быти износити, или списывати, или составляти, или учити, или показовати.

 

А иже смеют иную веру списовати или составляти, или износити, тии аще епископи будут или клирицы, да лишени будут, епископи убо от епископства, клирицы же от клироса. Аще же простые будут, да проклянутся тии. Так же и теми же словами и прочие соборы повелевают, и пятый, и шестой, и седьмой, иже вопит светлым гласом, глаголя. Мы законы церковные соблюдаем, мы пределы отеческие храним, мы прилагающих нечто, или отъемлющих от церкви, проклинаем. И паки, аще кто все предание церковное, написанное или неписаное отметает, да будет анафема. Что убо к сим рекут истины супостаты? Како же и от анафематы толиких и столь великих блаженных отец себе изъяти возмогут, и аще бесчислене славятся о Риме и величестве его? Не бо от град и престолов апостольское величество и область состоится, но от догмат правых веры и сожития божественного, апостольскими и отеческими учительствами управляемо и есть и познаётся. Зане ни же врача убо наречем Дóндеже праве мудрствуем, иже убо ризами врачевскими одеян есть вне уду, ведения же врачевского не имать в себе согласна одеянием. Но ведущего свидением известным яже художества суть действовати, по преданию премудрейших врачей прежде его бывших, того наречем врача, и ко исцелению недугов призываем, аще убо о своем здравии попечение имеем. Но да слышим, что блаженный Иоанн иже от Дамаска заповедает нам о тех.

 

Глаголет бо сице: вся преданая нам и законом, и пророки, и евангелисты и познаваем и чествуем ничтоже дале ищуще. Бог бо сый благ и всякого блага податель. Еже бо угодно бе нам разумети, открыл. А еже не могохом понести, премолчания мы да возлюбим, и в тех да пребываем не прелагающе предел вечных, ниже преступающе Божественное предание. Иже бо мало что или велико от Божественных отметает, весь отметает закон и считается вкупе с преступающими его. Се и Божественный сей преславный просветитель вселенней, церковный славний, сладкопесненый орган пресвятого Духа, вся глаголет, приемлем и познаваем, и чествуем, и паче сих ничтоже взыскуем ни испытуем. Что же ли ради? Зане глаголет: Бог благ сый, яже весть нам полезна быти открыл. Сего ради и довлимся сими, сиречь, да почием в сих яко от Бога уставленных. И аще излишнюю честь подати восхощем, поне повелеваемым земскими цари равночестна да непщуем сия, и не испытовательне сия яко и о̀на благопокорне да удержим. Но и римляне к сим глухи суть, по подобию аспида глуха затыкающего уши свои, и не хотят восприяти цельбы, но единою надмени кичениим и тщетным мнением, что не падает под диалектическими нуждами злохитренными, аки гнило отметают с великим презорством.

 

474 Но сия убо по сем, иные же яже пристоят к приложению нашему, разсмотряем. При Василии убо, царе константинопольском, нарицаемом македонянине и Фотии, пресвятейшем патриархе, когда Иоанн пресвятейший, папа римский, патриаршеския кормила правяще, всяким православием в нем и честностию, евангельского жития украшен, собор вселенский собран бысть в Константинополе, повелением царевым и святых патриарх по утверждению святого седьмого собора, и к разорению нововозвышенной латинской ереси, по подобию сильной бури, и святую Божию церковь смущаша. В нем же послании беша от пресвятейшего папы Иоанна, наместники его, Павел и Евгений, божественные епископы, и третий с ними Пётр пресвитер и кардинал. Сей же убо священный собор, по утверждении седьмого собора, и латинскую ересь довольно обличив, и укрепляющих ту анафемате предав, таковое повелении изнесе на тех, иже смеяша приложити нечто во исповедании веры. Аще бо кто глаголет кроме сего священного исповедания веры смеет ино писати, или приложити, или отъяти, и заповедь соборну дерзнет именовати, да будет осужден и от всякого христианского сожития отвержен. Сия убо божественный священный собор отсечение изъявил против беззакония того. О них же Иоанн, преблаженнейший папа, возвеселившись, таковое пишет ко святейшему патриарху Фотию, пространнее и чистее, приложение еже священном исповедании веры отнюд отверг, рече бо. Ибо твое братство добре весть, яко когда прииде к нам, иже мало прежде послан бысть от того, и о святем исповедании веры нас испытал, обрел нас соблюдающих цело, якоже от начала нам предано бысть, ниже прилагающи что, ниже отъемлющих. Известно ведущих, яко таковая дерзающи тяжчайшее осуждение ждущее соблюдается. И сего ради паки изъявляем святыни твоей, да имеет известно о мудровании, о нем же случишася соблазны посреде церквей Божиих, яко не токмо не глаголем сего, но и тех иже первее смеяша своим кичением сие творити, яко преступники Божиих глагол, и претворители деологии Господа Иисуса Христа, и прочих отец, иже соборне собрани, предаша святое исповедание веры. И с Июдою счиняем, зане то же что и той дерзнуша, не предавше в смерть господское тело, но верны, иже суть уды телесе того отсекше, и разделивше друг от друга, и тако в вечную смерть пославше, и наипаче себе, якоже не праве сотвори реченный ученик.

 

Се коль известно преблаженнейший той отец краткими словесы сими, ненавидиму и отбегаему показа ересь. Яко с Июдою соучиняти начавших, и после тех укрепляющих ю̀. Что убо к сим паки возмогут вопреки глаголати супостати.

 

То же и в первом послании Мелетия, патриарха Александрийского о Святой Троице, лист 426.

 

475 Но вопрошаемы латиняне от православных: почему приложение от сына умыслили? Смотрительно сие творим, отвечают, то есть сына равным отцу во всех и всесильного показать стараемся. Сей есть формальный и неумный латинский ответ. И не разумеют, что там смотрения творить нельзя, в них же уставы Божественные соборные, изначала не положены были, или где устроение бываемо не в самую главу вере, глаголю же, в богодохновенное учение, еже о Божественных догматах и апостольских повелениях повреждение наносит.

 

И свидетель глаголемых достоверен блаженный Кирилл, иже в священном третьем соборе священной веры сложение запечатлел заповедями и клятвами прегрознейшими, после которых приводит: если кто подвизает нечто от догматов святых и Божественных отец, сие ктому не подобает звати смотрение, но преступление и предание догмат, и на Бога нечестие.

 

Блаженный же Златоуст, и большее богобоязние хотя в нас положити о Божественных словесах так глаголет: яко в царских златницах, иже мало что от образа отсечет, всю златницу содела. Тако иже от здравой веры и малейшее преложив, всю веру повреждает.

 

Им же и пилусийский божественный Исидор последуя глаголет: отъемлющие, или что приложить смеющие к богодухновенным словесам единым от двух недугуют: или убо не вероваша Духом Святым реченых бывши святых писании, или суть неверни, или себе непщуют мудрейших святого Духа. И что иное? токмо беснуются.

 

476 Кто убо когда осужден и проклятию будет достоин? Только тот, иже отъемлет и прикладает к вере. Ибо исполнь яве предана нам от святых отец, ни же приложение, ни же уимование примлют, якоже писано обретаем во священных книгах наших. Велия бо мука уготована есть прилагающему или отъемлющему. Темже и мы сицевого отсекаем о святой церкви, понеже не исцелены суть раны его.

 

477 Да рекут убо иже с нами не мудрствующие чии суть сынове. Отцев убо онех святых и боголюбезных не быти им чады. И новыя бо имена их знамения обличают. Когда станем вси страшному престолу предстояще, коих познают своих отцы? Отеческую ли веру и богодухновенная святых отец предания отвергших, или нас, православных, иже ничтоже ни в чем изменьших. Не онех мню? Но нас. Сложение веры иже всех изряднии богоноснии отцы онии сложиша. Сиречь, верую во единаго Бога. Сим известно знамение сложении своих, еже к ним присвоения, назнаменоваше. Сиеже во иных убо ныне инако, в нас же Божиею благодатию непременно хранится. Предаша предания, но и предания отвергоша, и отревают многочастне и многообразне.

 

478 Что на то отвечаем по истине судящи? Либо поглотим и запрещения сия, яко и проклинания оные, божественного апостола Павла об обновлениях. И святых соборов о приложениях к символу. И кто ли избавит дерзопреступников от праведного мучения, римский ли папа? Но един не бе доволен, предел многих разрешати, и римских прежде бывших блаженнейших пап, и прочих святейших патриархов. Ни же избавит повинных у престола Христова. Но обратитеся, сынове отступившии, глаголет Господь Исаией пророком призывая вас. Аще убо обратятся, о боголюбивии князи и господа, сию токмо едину вину отступления, а иного ничтоже имуще да улучат прощение, прощения первее просяще, и укоряюще себе яко удобь прельстишася? Сия сотворше, да будут прощены от вашей церкви, и от всякого человеколюбия. Пребывающие же в вине, священства да отлучатся, и да пребудут праздны отнюдь, по правилу десятому иже в Никее 318 богоносных отцов.

 

479 Повелеваем ни по коемуждо, нраву церковных ради вещей быти собору с ветхого Рима людьми. Сущим бо восточной церкви догматом же и обычаем вселенскими соборы проповеданным, и обычаем же всем отеческим сущим преданием, не изволяем всяко рассуждати сия, но сие единою судихом, еже во отеческих догматех же и обычаех пребывати. Ведуще яко яже двема вселенскими соборы церкви предана быша, в них же и восточнии и западнии отцы быша, тогда житием и мудростию светли и всеславни. Сия словеса суть Бога Вседержителя, сам бо рече: идеже аще будут два или три о имени моем, ту есмь посреде их. Мы же не двух, ни же трех токмо, но мнозех и многих отцов соборы наших догмат и обычаев имамы повелителя и учителя. И толиким временем утвержено, еже изысковати, и сумнетися о сих, буйство есть явственное. Но и анафемы боимся, на иже отъятие или отложение дерзающим помыслити повешеныя. И негодование Божественного гласа, еже не преходити повелевающего предел вечных, яже положиша отцы.

 

3) Книга о вере

480 Аще же хотят противнии о восьмом вселенском соборе ведати и писати, имут сей истины, в лето, 874, в Константине граде, при царе Василии македонянине, и при папе Иоанне и при патриархе Фотии Царьграда, идеже послов папежских было три иже на том соборе яве исповедаша, яко Святый Дух от самого отца исходит. И потом твердо закрепиша, яко во исповедании веры не прилагати оного приложения и от Сына. И прокляли тех, иже прилагали что, или уймовали. Воспоминает о сем соборе и Бароний в лето 1807.

 

481 Сильвестр папеж имене того вторый, символ Никейский константинопольский, приложением нарушив и вредив. И посланий соединительных от римских папежев к патриархам по-прежнему не послал. Попрал святых вселенских соборов предания, презрел прежде себя бывших римских епископов, на таковых попрателей соборно уложивших проклятие, мимо правду, мимо достоинство, мимо Божие и людское право, сие еже на вечное наслаждение, и ненарушимое хранение, и на исповедание сообщения. И на указание известное соединения церкви Христовой от святых отцов преданое, седмократным проклятьем соборным на тех, иже прилагают или отнимают, нарушить подвизалися, еже было повелено отменивше, и приложением исказивше, не без духа гордости любоначалия. Сими же всеми большую подал вину отступлению, в нем же и стоит доднесь со всеми своими.

 

4) Катехизис Великий

482 Потом и от вселенских соборов, иже глаголаша о священном символе сице: иже аще убавит что, или прибавит к сему сложению соборному никейскому и цареградскому, аще причетник, да извержется, аще ли мирский человек, да отлучится. И паки аще кто пременяет, или паки переписует, сие сложение: еже верую во единого Бога, да будет проклят.

 

5) Книга Зиновия мниха, ученика преподобного Максима Грека

483 Святой же седьмой великий собор заклял не просто всякую книгу не писать, но святой веры изображения иной не писать. Но всем христианам крепко держать изображение веры, которую написали те отцы первого вселенского собора и к тому ни приложить что, ни отнять от того, что есть в верую во единого Бога Отца Вседержителя. Не седьмой же только собор это заклял, но прежде его святой вселенский собор проклял пишущих новое что в «верую», паче изложенного изображения от святых отец, первого вселенского собора, иже в Никее бывшего.

 

Бысть же заклятие таковое вины ради сея: царь Константин, сын великого Константина, развратился от Евсевия митрополита, в арианство впал, покусился превратить святой веры изображение, которое святые отцы изложили. Написал же Константин с Евсевием изображение веры по ариевой ереси, отъяв единосущие от него, и некое в нём приложил. Собрался же собор великий, хотя утвердить изложенное по ариевой ереси, что написал со евсевиевой чадию изображение, предложил сие собору иже всредце. Его же святые отцы видевше отринули, утвердили правоверие. Потом же второй вселенский святой собор таковое нечестие истребил, проклятию предал и заклял в прочем ни приложить, ни отъять что в святом изображении правой веры, от того, что в Никейском соборе написано. Ни писати иного символа паче писанного в Никее в первом соборе, яко дерзнул писати Константин с Евсевием. Оттоле да никто не дерзнёт сотворити таковое писание.

 

Но да твёрдо хранима будет православная вера, которую апостолы научиша юже мученики исповедали и отцы святые утвердили. От пророков проповеданное искони без всякого приложения и отъятия.

 

Это святой второй вселенский собор утвердил святую веру, а не после седьмого собора. Проклял же и Македония, яко похулил Духа Святого, преступив святой веры изложение.

 

Так же святой вселенский третий собор по первому и по второму собору Нестория проклял, преступившего святую веру.

 

Так же святой вселенский четвёртый собор, по первому собору единовольников проклял.

 

Так же святой вселенский пятый собор по прежде бывшим соборам утвердил. Иустиниан, царь благочестивый зело, теплейшею любовью к пресвятой богородице сы(й), восхотел приложить в святом символе, «присно», едино токмо, еже сошедшего с небес и воплотившегося от Духа Святого, и Марии Девы. Иустиниан же много молил святых отцов пятого собора приложить «присно», и глаголать «сошедшего с небес и воплощшася от Духа Свята и Марии присно девы».

 

Святые же отцы, твёрдо храня преданный символ первым вселенским собором, царёво моление отринули, и символ невредимым соблюли, не приложив в него «присно», но целым, как и прежде, утвердили: «воплощшася от Духа Святаго и Марии девы». Судили право, что не передвигать предел, отцами положенный. И закляли, что никому не сметь приложить или отъять что в святом символе, который есть «верую во единого Бога...», но так соблюдать целым и непоколебимым.

 

Так же и в шестом соборе написали отцы святые. Так же и святой вселенский 6 собор и вселенский седьмой собор. Так же утвердили и закляли ни приложить, ни отъять что от святого символа, но невредно соблюдать святого вселенского первого собора писание изображения святой веры.