Статья 3. О соблюдении соборных правил и святоотеческих преданий

 

1) Кормчая

484 Правило 1. Святых отцов правила, на каждом соборе изложенное, даже и доныне, да держаться твёрдо.

 

485 Правило 2. Преписаные повеления, яже в Никее, яже отцы наши от того собора с собою принесоша, да будут хранимы.

 

Толкование. Нецыи от отцов сего собора, прилучившиеся и на никейском соборе, изложенные святыми отцами правила преписавше, с собою принесоша оттуда. Тако убо правила, и сей святой собор утверждает, и повелевает сохраняти.

 

486 Правило 1. Апостольская вера непреложна, и яже в Никее святых отцов, цела да пребывает, иже ариево веление низвергоша, степени вводящее Божеству, единосущия ради.

 

Толкование. Собор при Иустиниане корконосом собравшийся, и апостольских, и прежде его бывших шести соборов, и поместных девяти, сих всех правилом, твёрдо пребывати повелев, и непреложно, и не превратно хранимым быти. Изложил же и учинённые здесь правила, на исцеление душам, и на врачевание страстям. И первое здесь апостольских правил предание утверждает, потом же и вселенских, и поместных соборов, священные правила запечатлевает.

 

487 Правило 1. Святые правила облобызающе приемлем и держим, святых апостол, и шести вселенских соборов, к сим же и поместных, и ещё же и святых отцов наших, яко единого Святого Духа вдохновенна, их же прокляша, проклинаем, их же извергоша, изметаем. И их же отлучиша, отлучаем, им же запретиша, запрещаем.

 

488 Понеже бо от предварших лет, Божественных писаний глаголы, ови убо от неких инако сказани быша: овиже от неведения, не испытующе си истинная сказания: а еже злейшее всех, и от преобидения и презорства друзии, и паки яко васнь смотрительно творимы, или истиннее рещи и упражняеми, и от иных различных нрав, отовсюду. И сих всех ради, многа пакость привниде житию, и в различной ереси, такожде и прелести распростреся сей лютый недуг. Во врачевание же всех сих от Божественного промысла, якоже и быше рехом сотворена бысть, первее убо всекрасная и великая книга, и в ней сочтана быша к заповедей господних, и сих истинная сказания, яже от Духа Святого святыми отцы истолкована быша. Такожде и Божественная правила от святых соборов. И иные глаголы святых отец, и от тех самых городских законов яко да кождо о хотящих потребное в ключимем чине, и своим временем приплодит пользу. Последняя же паки от сих всех, по последствующей притчи истязания от неких взысканий, или вопрошения ради, в посланиях к вящему разумению и опасному, в сей книге известно, и потонку положена быша от Божественных и праведных писании паки, а не от иного разума, или от неправедна писания. Отнюду же и аще что инако некако кроме сих всех, мудрствует кто, или глаголя, или толкуя, или паче истиннее рещи развращая по прелести своего ума, яко мню смотрительно творя, не малу беду ради всех сих на ся привлечет, якоже в предних предложив покажет слово. Ибо не о неких плотское имущих мудрование сия положена быша, якоже предваривше рехом, но яже от Божественного Духа глаголя, святыми же апостолы, и божественными соборами и всеми святыми отцами. И сего ради первие речем зде: Глаголет бо божественный апостол о сих, аще кто вам благовествует, паче еже прияли есть, анафема да будет. Паки той же, яко аще и мы, или ангел с небес благовестит вам паче еже приясте, анафема да будет. Зриши ли, яко не токмо апостолам, но и тому самому ангелу с небес возбраняет, к вящему мню опасству и утвержению? И зде убо тако. И паки той же Святый и покланяемый Дух вдохнул и научил святым шестым собором, из уст святых в предисловии божественных правил сочетав всех собор, в коемждо колико правил изложил есть. Изволися же и се святому сему собору, добре же и спешнейше яко пребывати отныне тверду и известну к душевному врачеванию, и исцелению страстей, от иже прежде нас святых и блаженных отец приятое, и утверженое. И еще же и преданная нам именем святых и славных апостол правила 55. И понеже в сих правилах вчинено бысть приимати нам в тех же святых апостол, Климентом завещанная, в них же древле от иноверных на пагубу церкви, лестна некая и странна благочестию приложена быша, благолепну доброту, божественных велений нам погубляюща, таковых завещаний по подобию отложение творим христианского стада, к созиданию и утверждению, ни како же вмещающе еретического лжесловесия рождения, и присному апостольскому и совершенному учению прилагающе. Назнаменуем же и прочие все священные правила, иже святыми и блаженными отцами нашими изложенные, сиречь иже в Никее собравшихся, 318 святых и богоносных отцов; и иже во Анкире; и ещё же в новой Кесариии и в Гангре. Также и в Антиохии сирской и иже в Лаодикии фригийской: ещё же, 150, иже в богохранимом городе царском сшедшихся: и 200, иже во ефесской митрополии собравшихся; и иже в Халкидоне, 630 святых и блаженных отцов. Также и в Сардикии, и сущих в Каррагене, и ещё же паки в богохранимом царе городе сшедшихся, при Нектарии, царского сего города наместнике, при Феофиле, бывшем в Александрии архиепископе. Но и Дионисия, бывшего архиепископа Александрийского великого города, Петра, епископа и мученика, Григория, епископа бывшего новой Кесарии и чудотворца, Афанасия, великого архиепископа Александрийского, Василия, архиепископа Кесарии каппадокийской, Григория, епископа нисского, Григория Богослова, Амфилохия иконенского, Тимофея, архиепископа Александрии, великого города и Геннадия, патриарха бывшего богохранимого царского города, Кирилла, архиепископа Александрийского. И ещё же и от Киприана, бывшего архиепископа африканской страны и мученика, и иже с ним 1 собора изложенное правило, еже в предреченных наместник местах точию по преданным обычаям удержа. И ни единому можно быти проявленная развращати правила: или отметати, или иная паче лежащих принимать правила, ложными писаниями от неких сложенные, иже истину корчемствовать начинающих.

 

Аще ли кто обрящется, правило некое от предреченных истощая, или возбранити начиная, повинен будет по таковому правилу, яко же той сказует, запрещение приемля, и с тем, в нём же согрешает да уврачуется. Иже священнически получившие сан, ведения же и исправления правильных завещанию суть воображения, яже приемлюще с радостью с богоповестником Давидом поем к Владыке Богу глаголюще: в пути сведений твоих насладихся яко о всяком богатстве и заповеда правду свидения твоя. Во веки вразуми мя и жив буду.

 

И всякий пророческий глас заповедует нам хранить свидения Божия и жити в них, яве яко недвижима и непоколебима пребывающа: якоже и боговидец Моисей рече, к ним же несть приложити, и от них отъяти. И божественный апостол Пётр в них хваляся вопиет, в ня же желают ангелы приникнути. И аже ангел благовестит вам, паче еже приясте, анафема да будет. Сим сице засвидетельствованным, нам радующимся о них, якоже обрящет кто корысть многу, любезне божественная правила в персех объемлем, и совершенно тех завещание, и непоколебимо утверждаем, и изложенных от святых духовных трудов всехвальных апостол, и иже от святых вселенских соборов, и поместных собравшихся о изложении таковых заповеданий и изложений, и иных святых отцов наших, от единого бо все и того же Святого Духа озарены бывше, повелеша яже на пользу: и их же убо сии святые проклятию предали, и мы проклинаем. И по их же извержению и мы изметаем. И по их же отлучению и мы отлучаем. И по их же запрещению преданному и мы так же предаём, имуще не сребролюбен нрав, но довольни сущими, иже восшедший до третьего неба и слышавший неизреченные глаголы, Павел, божественный апостол, яве вопиет.

 

Сей святой седьмой собор, зри, как и на преднаписанном шестом святом соборе, тот и паче подтверждает убо, сиречь, запечатлевает, все святые вселенские соборы, и предания вселенской церкве. По нем же паки в последних временах, когда соборная церковь восприяла исправление веры, и всякая ересь отступила и освободилась от соблазнов, тогда сей бысть соединения глаголемый, во еже бо свершити вся завещания, приносит проклинания, и глаголет: Вся яже чрез церковного предания и учительства и воображения святых и приснопамятных отец, новосотворенная и соделанная, или по сем содеятися хотящая, анафема. И паки по сем глаголет, кои же в небрежение полагающим священные и божественные правила Божественных отцов наших, яже церковь утверждают, и всё христианское жительство украшают, и к божественной наставляют благобоязни, анафема. Сей святой собор в сих двоих проклинаниях всяко отражает мнение и суетное противословие: Последуяй же прежде его святым соборам, тот собор свят есть. Не последуяй же прежде его святым соборам, не свят, но и скверный есть, и отвержен.

 

Сия же вся преднаписанная, изложения же и от вещания святых соборов: Аще кто от угодных богоносным отцам поколеблет что, не ктому се смотрение нарицаем, но преступление предания велению, и к Богу нечестие. И сия правила, яко же предрекохом, подобне и гражданские законы, сице глаголют, яко еретик есть, и еретическим подлежит законам, аще и мало что уклоняяйся от православной веры. Первая же заповедь, третьего гранеса от новых, еретики глаголет вся не сущия приобщены.

 

То же в книге преподобного Никона Черногорца, слово. 63, лист 559 оборот, и в Тактиконе его, в предисловии, лист 1 первого счёта, и в слове 4, лист 36 второго счёта.

 

2) Беседы св. Иоанна Златоустого на 14 посланий св. апостола Павла

489 Что убо есть анафема? слыши его глаголюща: Аще кто не любит Господа нашего Иисуса Христа, будет анафема. Сиречь, да отлучится от всех, да будет всех чужд. Якоже бо анафеме сиречь дару, возложенному Богом, никто же не дерзнёт просто руками прикоснуться, ни же близь быти: тако и отлучённого от церкви, всех отсецая, и аки наидалече отводя, сим именем от супротивного нарицает, с многою боязнью всем отрицая от того отлучиться, и отскакати. Анафеме бо убо [сиречь дару] чести ради, никто же дерзнул приблизиться, а отсёкшегося (от церкви) от супротивного разума отлучахуся вси. Тако яко разлучение убо едино и подобне и сие и оно от многих отчуждаше, образ же разлучения не един, но и противен сей оному. От оного бо удаляхуся аки возложенного Богови, о сего же аки отчужденного о Бога, и отверзшегося от церкви. Сие убо и Павел являа глаголаше: Молил бых ся анафема быти от Христа. И ни же просто рече, яко хотел бых, но протязая то, глаголет, и молил бых ся. Аще же смущают тя аки немощнешая суща глаголимая, вещь помышляй, не токмо яко разлучитися хотяше, но и вину еяже ради хотяше, и тогда узриши премножество его любве. Елма и обреза, и не бываемому внимаем, но совести, и вине бываемого: и сего ради паче тому чудимся. Не обреза же токмо, но и остриже, и пожре. И не сего ради весьма Иудея их глаголем быти, но за сие убо истое наипаче свободитися Иудейства и чиста быти, и присного Христова служителя. Якоже убо обрезающа его видяй, и жруща, не сего ради осуждаеши и аки Иудействующа, но за сие убо и святое наипаче венчаеши, аки чужда суща Иудейства: тако и зря и желающа анафема быти, не сего ради смущайся, но за сие убо и святое наипаче того проповежд, вину навык еяже ради сие хощет.

 

Аще бо вины не истяжем, и Илию мужеубийцей речем, и Авраама не только мужеубийцей, но и детоубийцей. И Финееса же и Петра убийству напишем паки. И не о святых же токмо, но и о всех, о Бозе, не соблюдаяй сего законна правила, многая, безместная зазрети имат.

 

490 И не рече: от благовествования прелагаетеся, но от призвавшего вас Бога. Еже бо бяше ужаснее, и паче довольно уязвити их, сие положи есть. Иже бо прельщати их хотящии, не внезапу сие творяху, но тихо прелагающе их от вещей, от имен не прелагаху, таковая бо есть дьяволя прелесть, не нагия предлагати льщениа. Аще бо убо рекли быша, отступите от Христа, яко льстецов и губителей хранили бы ся. Ныне же оставльше их в вере еще, и прелести благовествованиа имя возложивше, с многим дерзновением прокоповаху здание, реченых яве, якоже некоими завесами, имены сими крыющими стенопрокопателей. Пониже убо благовествование нарицаху свою прелесть. Добре той и к имени ратует глаголя, в иное благовествование.

 

491 Но аще аз, или Ангел с небесе благовестит вам паче еже приясте, анафема да будет. Зри разума Апостольского да не глаголет бо кто, яко тщеславия ради своя составляет догматы, и себе проклят. Елма же и к саном прибегаху, Иакову и Иоанну, сего ради и Ангелов вспомяну. Да не глаголеши бо ми Иакова рече, и Иоанна, аще бо и от первых Ангелов будет кто сущих с небесе растлевающих проповедь, анафема да будет. И не просто рече с небесе, но понеже и священники Ангелы нарицахуся [уста бо священническая сохранят разум, и закона изыщут от устен его, зане ангел Господа Вседержителя есть] да не сих взнепщуеши Ангелов глаглатися ныне, Небесе приложением горния силы назнамена. И не рече, аще противная возвестят, или превратят все, но, аще и мало нечто благовествуют паче еже благовестихом, аще и худое что подвигнут, Анафема да будут.

 

3) Соборник Большой

492 Колико цари воеваша на церковь? Колико мучителем попущено бысть ратовати, но врата адова не одолеша ей. Человецы бо суть ратующии умирают, и яко един от князь падают, и гроб их обдержит, и клятвами бед увязошася. Проклят разоряяй уставы отеческия, и непременные уставы церковные, яже положиша отцы твои. Подражай, богоутверженый владыко, благочестивым и православным царям, и святым великим отцам и чудотворцам, иже с Богом беседующим. Воззри на первые роды, и виждь святые книги, правоверных отцов, много такого поведающа, и святая возлагания, и церкви, и сосуды и святых индитии по всей земле христианской, от внутренней Индии и Эфиопии и до ринокур, и вечерних стран и полунощия нова христианства, тожде образуют и пребывающе.

 

493 Сим бо образом владыко многа лета поживеши, и приложатся ти лета животу, держащему уставы Божественных отец, по апостольскому преданию, и прежних уставов церковных. Тако веруем в святую Троицу, и честные и святые иконы целуем. А иже убо не хотяще сице веровать, прокляты будут. И иже не исповедуют, далече от церкви отогнаны будут. Сия вера апостольская, сия вера отеческая, сия вера вселенную просвети.

 

А иже убо дерзнет кто инако веровати или развращати, что о законоположивших, или крестного образа, или написания иконного образа шаровы, или ино что сущих в святой церкви держимых, по первым обычаям святых отцов и благочестивых царей. Аще святители суть, да извержены будут и прокляты. Аще ли же иноки или простые люди, тою же клятвою осуждены будут, и святого причащения да отлучатся. Сия уставляем повелением и властью Святого Духа, уставом же и словом, великого архиерея Спаса нашего Иисуса Христа, иже затворив бездну, и запечатлев ю̀ страшным и славным своим повелением, и словом уст своих.

 

4) Евангелие Учительное

494 Нечестивые же и зловерные, и хульники святым иконам, к тому же и все еретики, проклинанию предаем и анафеме. Храняще же и соблюдающе древнее предание соборной церкви, и последующе преданиям первым пределам, и законам святых и богоносных отцов, и учителей наших, и любяще и приемлюще седьмое число святых и вселенских соборов. К тем же и бывшие особные соборы их по местам, святым Духом составленные. Кого же они проклятию предали, проклинаем и мы, и их же паки отлучиша, или извергоша, такожде и мы имамы их. Такожде паки их же прияша почтоша, почитаем их и мы. Проклинающе, и анафематствующе, и отревающе всех еретик, и христианохульники, их же и святохульники нарекоша. Христианы же нарицаем и глаголем и имамы, православных, покоряющихся, и последующих по преданию святой и соборной церкви, якоже и святой великий вселенский седьмой собор, иже Божиею благодатию в никейской митрополии, второе на иконоборющих собрался, елика своими правилы изложи и учини, последующе преданию вселенской церкви, содержит еже предание святого сего вселенского собора.

 

С прочими же некими, и сия тако глаголюще. Со всяким убо опасением, изыскавше и испытавше, и смотрению истинному последовавше, ничтоже отъемлем, и ничтоже прилагаем. Но вся преданная вселенской церкви не вредно соблюдающе, и последующе шести вселенским святым соборам, все церковные предания, писанные и неписанные, узаконенные, предания нам непреложно сохраняюще.

 

495 Смеющих же прочее инако мудрствовати или учити, или по мерзких еретик, церковная предания презирати, нова же некая разумевати или отложити некое от чина церковного, евангелие, или знамение креста, или восписания икон святых, или мощи святых мученик, или разумевать строптиво и коварно, еже развратити что, от обычных преданий, вселенской церкве. К тому же и еще, аще яко общих имети священные сосуды, или честные монастыри. Аще епископи суть или клирицы, изметать повелеваем. Аще ли же иноцы суть, или бельцы, от причащения да отлучатся. Святой собор сия предал есть. Вси убо тако веруем, вси убо тако мудрствуем, вси тако похваливше записахом.

 

Сия вера есть святых апостол. Сия вера есть святых отцов. Таковая вера есть православных всех. Сия вера вселенную укрепи, верующе во единого Бога, в Троице певаемого, и честные иконы целуем. Елицы же тако не мудрствуют, прокляти да будут. Елицы тако не мудрствуют, далече церкве святыя да отженутся. Мы убо древнему законоположению церковному последуем. Мы заповедания святых отцов соблюдаем, мы прилагающих что, или отъемлющих от церкви проклинаем, мы вводимое новозаконение, христианохульников еретиков проклинаем. Мы святым иконам покланяемся. Мы не мудрствующих тако, проклятию и анафеме предаем.

 

5) Зонар с Богом

496 Иже кто не повинуется, ни послушает преданием сим написанным от святых апостолов и богоносных отцов наших, и инако начнет мудрствовати и ходити, и жити кроме сих, писанных правил анафема.

 

497 Нерадящих и преобидящих правила святых богоносных отцов наших, яже изложиша и поставиша Святым Духом, на святых вселенских соборах и на иных прочих соборах, великих церквей, царских палатах, иже на времена совокупльшеся, внутрь Константина города, святые богоносные отцы, и на восточных, и на великих церквах, славных городах. И о сих написанных правилах зело подивишеся ревностию и желанием духовным истинной ради православной веры христианской, яже веруем и исповедуем: яко помощью, силою и действом Святого Духа сия вся изложиша, и рекоша, и поставиша. А неверующим и нерадящим о сих: анафема, анафема, анафема.

 

Все еретики супротивно мыслящие, святым всей вселенной семи соборов да будут прокляты.

 

498 Божественные и священные правила написали, еже есть окормление всему христианскому жительству и краегранесие всему Божественному писанию, и око некоторое, и свещник душевный, и свет, просвещающий всякого человека, без него же хотяй шествовати, яко во тьме заблуждает. Сия же вся ни от пророков, ни от апостолов прияхом; но от святых отцов наших, от святителей и преподобных. А иже не приемлет сих, а иже верен, ни же христианин может быти.

 

499 И еже Христос кая собою и не собою, но божественными апостолы, и святыми отцами предал есть, и тая яже убо отмещай и хуляй кто, всех неверных невернейши есть, и ни же христианин может быти.