Месяца декабря в 7 день преставление преподобнаго отца нашего Нила Столобеньскаго Новьгородскаго Новаго чюдотворца.

И приим извещение от владыки Христа о исхожении от телесных союз разрешитися и отити ко Господу, к Нему же имяше желание от юности, помышляше в себе и моляшеся Богу со слезами, глаголя: «Господи Вседержителю, услыши молитву мою, недостойнаго ра//(л. 42 об.)ба твоего, сподоби мя быти причастника пречистых твоих таин, животворящаго тела и крови Христа Бога Нашего.

По смотрению Божию в то время прииде на остров той Никольского монастыря срошку игумен Сергии посещания ради преподобнаго. Бе бо игумен той отец духовныи преподобному и, яко увиде блаженныи игумена Сергия, радости много исполнися, яко желаемое обрете, и облобызаста друг друга святым целованием,//(л. 43) и молитву сотворше по обычаю, и начат глаголати преподобныи ко игумену Сергию: «Молю тя, отче святыи, да отимеши грехи моя от мене чистым исповеданием, и аще Бог изволит и святость твоя, да сподобиши мя причаститися святых таин причастия пречистаго тела и крови Христа Владыки моего и Бога, вельми бо желаю напитатися душепитательною сею пищею, да мя очистиши, иже от юности согреших словом, и делом, и помышлением во всей жизни от роже//(л. 43 об.)ния моего даже и до днесь». И отвеща игумен Сергии преподобному Нилу: «Бог да простит тя, отче святыи». И намнозе стоя молча преподобныи, и воздвиг руце свои со многим удивлением и слезами. Игумен же глаголаше преподобному: «Да бых имел, отче, грехи твоя во очищение моего нерадения, и много беседоваша о духовне. И прирек же преподобныи и сие к игумену: «Отче святыи, по моем отшествии на острове сем имать Бог храм воздвигнути во имя свое, и место святое//(л. 44) сие будет жилище иноком», еже и бысть по преставлении святаго по четыредесятих летех и больши, яже напреди сказано будет, ныне же настоящее да глаголется.

По мнозей же духовней беседе глагола преподобный ко игумену: «Времени наставшу, и концу приближающуся моего жития отшествие, молюся твоей святыни, да подаси ми комкание пречистаго бисера тела и крови Господа Нашего Иисуса Христа, да не умедлиши ни в мале». Игумен же, слышав от него//(л. 44 об.) известно отшествие, яже ко Господу, и причасти его пречистаго тела и крови Господня, и целование о Христе дав. И рад бысть преподобныи, получив желание пречистаго тела и крови Господа Бога и Спаса Нашего Иисуса Христа. И егда хотяше игумен отити, рече преподобныи ко игумену: «Отче святыи, прииди паки и посети мя грешнаго, прииди, Господа ради прииди». Игумен же обещася приити паки, и тако отиде игумен.

Преподобныи же, вшед в келию, затвори себе и на правило уклонися//(л. 45) всю нощь, обычная пения исполнив, кадилницу восприим, и фимиян на углие изсыпа, и покажение святым иконам сотвори, и поне мало изнеможе, и восклонився пазухами своими на крюки (бе бо у преподобнаго два крюка великии в стену водружена в кресл место). Он же ото многаго труда на крюках тех, пазухами опершеся, мало сна приимаше, на ребрех же своих никогда же почиваше, тако и преставися, на крюках//(л. 45 об.) тех руками облегше, усну вечным сном, на молитве Богови предстоя.

Прииде же прежепомянутыи игумен Серьгии з братиею своею его паствы, и обретоша преподобнаго о Господе сконьчавшася, келия же его благоухания неизреченнаго исполнена, тело же святаго светлости исполнено, светлее того, егда в жизни бе. И вземше честное тело преподобнаго Нила, положиша честно в созданнем от него гробе, и надгробныя песни сотворивше,//(л. 46) погребоша в часовне, яже бе ископа своима рукама в погребение себе, и вдаша перьсть перьсти лета 7063-го (1555) месяца декабря в седмыи день на память, иже во святых отца нашего Амбросиа Медиаламскаго. Игумен же Сергии и с своею ему братиею воздаша хвалу Богови, творящая дивная святым своим угодником и дарующа толика терьпение. И тако отоидоста во своя си, носяще с собою, яко сокровище многоценное,//(л. 46 об.) молитвы преподобнаго Нила и радуяся духом, яко такову святу мужу сподобишася послужити.

Поживе же преподобныи в непроходимои пустыни на Рженском устие и у Черемхи реки тринадесят лет, а во всю четыредесят лет не исходил во град и в веси, и до отшествия своего к Богу, но един единому Богу в безмолвии предстоя, во дни и в нощи нерпестанныя молитвы возсыла//(л. 47)ше, дондеже обрете неизреченных благ восприятие, «ихже око не виде, и ухо не слыше, и на сердце человеку не взыде, яже уготова Бог любящим его» (1 Кор 2:9). По преставлении же преподобнаго Нила прихожаху на место то иноки от различных мест и жительствоваху в келии преподобнаго Нила един по единому на время. Ов убо поживе год времяни, ин же колико восхоте, а прочее реку: «Елико Бог кому повеле».//(л. 47 об.)