Евангелие от Матфеа, зачало 30.

Во вре́мя о́но, преходя́ Иису́с, ви́де челове́ка седя́ща на мы́тнице, Матфе́а глаго́лема, и глаго́ла ему́: по Мне гряди́. И воста́в по Нем и́де. И бысть Ему́ возлежа́щу в дому́, и се, мно́зи мытари́ и гре́шницы прише́дше возлежа́ху со Иису́сом, и со ученики́ Его́. И ви́девше фарисе́е, глаго́лаху ученико́м Его́: почто́ с мытари́ и гре́шники Учи́тель ваш яст и пие́т? Иису́с же слы́шав, рече́ им: не тре́буют здра́вии врача́, но боля́щии; ше́дше же научи́теся, что есть: ми́лости хощу́, а не же́ртвы; не приидо́х бо призва́ти пра́ведники, но гре́шники на покая́ние.

Лик: Сла́ва Тебе́, Го́споди, сла́ва Тебе́.

 

Таже диакон глаголет ектению:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в раба́ Бо́жия [или рабы́ Бо́жия], имярек.

Лик: Го́споди, поми́луй, трижды.

О е́же прости́тися ему́ [или ей] вся́кому согреше́нию, во́льному и нево́льному, Го́споду помо́лимся.

Лик: Го́споди, поми́луй, трижды.

Возглас от священника: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

 

Диакон: Го́споду помо́лимся:

Лик: Го́споди, поми́луй.

Священник чтет молитву сию:

Влады́ко Го́споди Бо́же наш, Врачу́ душ и теле́с, вре́менныя стра́сти уврачева́вый, исцеля́яй всяк неду́г и вся́кую я́зю в лю́дех, хотя́й всем челове́ком спасти́ся, и в позна́ние и́стины приити́, не хотя́й сме́рти гре́шника, но я́ко обрати́тися, и жи́ву бы́ти ему́. Ты бо, Го́споди, в Ве́тхом Заве́те положи́л еси́ покая́ние гре́шным, Дави́ду, и Ниневи́тяном, и пре́жде тех бы́вшим; но и во прише́ствии плотска́го Твоего́ смотре́ния, не призва́л еси́ пра́ведныя, но гре́шныя в покая́ние; я́коже мытаря́, я́коже блудни́цу, разбо́йника, и ху́льнаго гони́теля, вели́каго Па́вла покая́нием прие́мый. Петра́ верхо́внаго и апо́стола Твоего́, отве́ргшагося Тебе́ три́жды, покая́нием прия́л еси́, и обеща́л еси́ ему́, глаго́ля: ты еси́ Петр, и на сем ка́мени сози́жду Це́рковь Мою́, и врата́ а́дова не одоле́ют ей, и дам тебе́ ключи́ Ца́рствия Небе́снаго. Сего́ ра́ди и мы, Бла́же и Человеколю́бче, по нело́жным Твои́м обеща́нием дерза́юще, мо́лимся Тебе́, и про́сим в час сей: услы́ши моле́ние на́ше, и приими́ е́, я́коже кади́ло приноси́мое Тебе́, и посети́ раба́ Твоего́ [или рабу́ Твою́] имярек, и а́ще что согреши́ сло́вом, или́ де́лом, или́ помышле́нием, или́ в нощи́, или́ во дни; или́ под кля́тву свяще́нническую, или́ своему́ прокля́тию подпаде́: или́ кля́твою огорчи́ся, и прокля́т себе́; Тебе́ про́сим, и Тебе́ мо́лимся, осла́би, оста́ви, прости́ ему́ [или ей], Бо́же, презира́я беззако́ния его́ [или ея́] и грехи́, и я́же в ве́дении и не в ве́дении бы́вшая от него́ [или нея́]. И а́ще что от за́поведей Твои́х преступи́, или́ согреши́, я́ко пло́ть нося́й, и в мiре живы́й, или́ от де́йства диа́вольскаго; Сам, я́ко благ и человеколю́бец Бог прости́; я́ко несть челове́ка, и́же поживе́т, и не согреши́т. Ты бо еди́н еси́ безгре́шен; пра́вда Твоя́ пра́вда в век и сло́во Твое́ и́стина. Не бо созда́л еси́ челове́ка в поги́бель, но в снабде́ние за́поведей Твои́х, и живота́ нетле́ннаго насле́дие; и Тебе́ сла́ву возсыла́ем, со Отце́м, и Святы́м Ду́хом, ны́не и при́сно, и во ве́ки веко́в, ами́нь.

 

По молитве же седмый иерей вземлет стручец седмый, и омочив и́ во святый елей, помазует болящаго, глаголя молитву: О́тче Святы́й, Врачу́ душ и теле́с:

По скончании же сего больный приемляй елеосвящение, аще может, сам входит посреде священников, или держимь от своих си стоит, или седит. Аще же не может сам, священницы сами обстоят его на одре лежащаго. Настоятель же взем святое Евангелие, и разгнув е, возлагает писмены на главе больнаго, придержащим всем священником. Начальствуяй же не возлагает руку, но велегласно глаголет молитву сию:

Царю́ Святы́й, благоутро́бне и многоми́лостиве Го́споди Иису́се Христе́, Сы́не и Сло́ве Бо́га Жива́го, не хотя́й сме́рти гре́шнаго, но я́ко обрати́тися, и жи́ву бы́ти ему́: не полага́ю ру́ку мою́ гре́шную на главу́ прише́дшаго [или прише́дшия] к Тебе́ во гресе́х, и прося́щаго [или прося́щия] у Тебе́ на́ми оставле́ние грехо́в; но Твою́ ру́ку кре́пкую и си́льную, я́же во свято́м Ева́нгелии сем, е́же сослужи́тели мои́ держа́т на главе́ раба́ Твоего́ [или рабы́ Твоея́] имярек, и молю́ся с ни́ми, и прошу́ ми́лостивное и непамятозло́бное человеколю́бие Твое́, Бо́же, Спаси́телю наш, проро́ком Твои́м Нафа́ном, пока́явшемуся Дави́ду о свои́х согреше́ниих оставле́ние дарова́вый, и Манасси́ину е́же о покая́нии моли́тву прие́мый; Сам и раба́ Твоего́ [или рабу́ Твою́] имярек, ка́ющагося [или ка́ющуюся] о свои́х си согреше́ниих приими́ обы́чным Твои́м человеколю́бием, презира́яй вся его́ [или ея́] прегреше́ния. Ты бо еси́ Бог наш, и́же и се́дмьдесят крат седмери́цею оставля́ти повеле́вый, па́дающим в грехи́: зане́ я́ко вели́чество Твое́, та́ко и ми́лость Твоя́, и Тебе́ подоба́ет вся́кая сла́ва, честь и поклоне́ние, ны́не и при́сно, и во ве́ки веко́в, ами́нь.

Снемше же Евангелие с главы больнаго, дают целовати е.

Диакон же абие глаголет ектению сию:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в раба́ Бо́жия [или рабы́ Бо́жия], имярек.

Лик: Го́споди, поми́луй, трижды.

О е́же прости́тися ему́ [или ей] вся́кому согреше́нию, во́льному и нево́льному, Го́споду помо́лимся.

Лик: Го́споди, поми́луй, трижды.

Возглас от священника: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Таже поют самогласен, глас 4:

Слава: Исто́чник исцеле́ний, иму́ще святи́и безсре́бреницы, / исцеле́ния подава́ете всем тре́бующим, / я́ко преве́лиих дарова́ний сподо́бльшиися / от приснотеку́щаго Исто́чника, Спа́са на́шего. / Глаго́лет бо к вам Госпо́дь, / я́ко единоревни́телем апо́стольским: / се дах вам власть на ду́хи нечи́стыя, / я́коже тех изгони́ти, / и цели́ти всяк неду́г, и вся́ку я́зю; / те́мже в повеле́ниих Его́ до́бре жи́тельствовавше, / ту́не прия́сте, ту́не подава́ете, / исцеля́юще стра́сти душ и теле́с на́ших.

И ныне, глас тойже: При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи; / Тя бо Еди́ну тве́рдое и изве́стное утвержде́ние и́мамы, / и Твое́ предста́тельство стяжа́хом, / да не постыди́мся, Влады́чице, Тя призыва́ющии. / Потщи́ся на умоле́ние, Тебе́ ве́рно вопию́щих: / ра́дуйся, Влады́чице, / всех по́моще, ра́досте и покро́ве, / и спасе́ние душ на́ших.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Посем лик: Слава, и ныне: Го́споди, поми́луй, трижды. Благослови́.

И отпуст:

Христо́с, и́стинный Бог наш, моли́твами Пречи́стыя Своея́ Ма́тере; си́лою честна́го и животворя́щаго Креста́; свята́го сла́внаго и всехва́льнаго апо́стола Иа́кова, и пе́рваго архиере́а Иерусали́мскаго, бра́та Бо́жия, и всех святы́х, спасе́т и поми́лует нас, я́ко благ и человеколю́бец.

Посем лик: Го́споди, поми́луй. (Трижды.)

И полагает поклон приемый молитвомаслие, глаголя:

Благослови́те, отцы́ святи́и, прости́те мя, гре́шнаго [или гре́шную]. Трижды.

И приим от них благословение и прощение, отходит благодаря Бога.

 

 

В оглавление.

 

ПОСЛЕДОВАНИЕ
МЕРТВЕННОЕ МIРСКИХ ТЕЛ

Скончавшуся кому от православных, абие призывают сродницы его священника, иже пришед в дом, в немже мощи усопшаго лежат, и возложив епитрахиль, и вложив фимиам в кадильницу, кадит тело мертваго, и предстоящих, и начинает обычно:

Литиа.

Диакон: Благослови́, влады́ко.

Священник: Благослове́н Бог наш всегда́, ны́не и при́сно, и во ве́ки веко́в.

Лик: Ами́нь.

И начинают сопредстоящии: Святы́й Бо́же: Пресвята́я Тро́ице: О́тче наш: Священник: Я́ко Твое́ есть Ца́рство: Чтец: Ами́нь.

И абие поют тропари сия. Глас 4:

Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.

В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́ [или рабы́ Твоея́], я́ко еди́н еси́ Человеколю́бец.

Слава: Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ [или рабы́ Твоея́] упоко́й.

И ныне: Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].

Диакон глаголет:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

 

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

 

Диакон: Прему́дрость.

Лик: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

И абие бывает от священника сицевый отпуст:

Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х Свои́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих святы́х всели́т, и с пра́ведными причте́т, и нас поми́лует, я́ко Благ и Человеколю́бец.

Или иный:

Живы́ми и ме́ртвыми облада́яй, воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, преподо́бных и богоно́сных оте́ц на́ших и всех святы́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих пра́ведных учини́т, в не́дрех Авраа́ма упоко́ит и с пра́ведными причте́т, и нас поми́лует, я́ко Благ и Человеколю́бец.

 

И аще убо готова суть вся, яже ко исходу, творит паки священник начало:

Благослове́н Бог наш всегда́, ны́не и при́сно, и во ве́ки веко́в.

И начинаем пети: Святы́й Бо́же: со страхом, и всяким умилением.

И вземше мощи усопшаго, отходим в храм, предыдущим священником со свещами, диакону с кадильницею.

Егда же приидут в храм, мощи убо полагаются в паперти, [или в храме, якоже зде в велицей России обыче.]

И начинают псалом 90:

Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твое́й ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́; Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́; на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя Мое́. Воззове́т ко Мне, и услы́шу его́, с ним есмь в ско́рби, изму́ его́ и просла́влю его́, долгото́ю дней испо́лню его́ и явлю́ ему́ спасе́ние Мое́.

Непорочны.

И посем вышшим гласом поют:

Благослове́н еси́, Го́споди, / научи́ мя оправда́нием Твои́м.

Непоро́чнии в пу́ть: / Аллилу́иа.

И поется первая статия непорочных, во глас 6: в концы же коегождо стиха поем: Аллилу́иа.

1. Блаже́ни непоро́чнии в путь, / ходя́щии в зако́не Госпо́дни. / Аллилу́иа.

2. Блаже́ни испыта́ющии свидения Его́, / всем се́рдцем взы́щут Его́. / Аллилу́иа.

И прочее псалма:

3. Не де́лающии бо беззако́ния / в путе́х Его́ ходи́ша. / Аллилу́иа.

4. Ты запове́дал еси́ за́поведи Твоя́ / сохрани́ти зело́. / Аллилу́иа.

5. Дабы́ испра́вилися путие́ мои́, / сохрани́ти оправда́ния Твоя́. / Аллилу́иа.

6. Тогда́ не постыжу́ся, / внегда́ призре́ти ми на вся за́поведи Твоя́. / Аллилу́иа.

7. Испове́мся Тебе́ в пра́вости се́рдца, / внегда́ научи́ти ми ся судьба́м пра́вды Твоея́. / Аллилу́иа.

8. Оправда́ния Твоя́ сохраню́, / не оста́ви мене́ до зела́. / Аллилу́иа.

9. В чесо́м испра́вит юне́йший путь свой? / Внегда́ сохрани́ти словеса́ Твоя́. / Аллилу́иа.

10. Всем се́рдцем мои́м взыска́х Тебе́, / не отри́ни мене́ от за́поведей Твои́х. / Аллилу́иа.

11. В се́рдце моем скрых словеса Твоя́, / я́ко да не согрешу Тебе́. / Аллилу́иа.

12. Благослове́н еси́, Го́споди, / научи́ мя оправда́нием Твои́м. / Аллилу́иа.

13. Устна́ма мои́ма возвести́х / вся судьбы́ уст Твои́х. / Аллилу́иа.

14. На пути́ свиде́ний Твои́х наслади́хся, / я́ко о вся́ком бога́тстве. / Аллилу́иа.

15. В за́поведех Твои́х поглумлю́ся, / и уразуме́ю пути́ Твоя́. / Аллилу́иа.

16. Во оправда́ниих Твои́х поучуся, / не забуду словес Твои́х. / Аллилу́иа.

17. Возда́ждь рабу́ Твоему́, живи́ мя, / и сохраню́ словеса́ Твоя́. / Аллилу́иа.

18. Откры́й о́чи мои́, / и уразуме́ю чудеса́ от зако́на Твоего́. / Аллилу́иа.

19. Пришле́ц аз семь на земли́, / не скрый от мене́ за́поведи Твоя́. / Аллилу́иа.

20. Возлюби́, душа́ моя́, / возжела́ти судьбы́ Твоя́ на вся́кое вре́мя. / Аллилу́иа.

21. Запрети́л еси́ го́рдым, / про́кляти уклоня́ющиися от за́поведей Твои́х. / Аллилу́иа.

22. Отыми́ от мене́ поно́с и уничиже́ние, / я́ко свиде́ний Твои́х взыска́х. / Аллилу́иа.

23. И́бо седо́ша кня́зи, и на мя клевета́ху: / раб же Твой глумля́шеся во оправда́ниих Твои́х. / Аллилу́иа.

24. И́бо свиде́ния Твоя́ поуче́ние мое́ есть, / и сове́ти мои́ оправда́ния Твоя́. / Аллилу́иа.

25. Прильпе́ земли́ душа́ моя́, / живи́ мя по словеси́ Твоему́. / Аллилу́иа.

26. Пути́ моя́ возвести́х, и услы́шал мя еси́, / научи́ мя оправда́нием Твои́м. / Аллилу́иа.

27. Путь оправда́ний Твои́х вразуми́ ми, / и поглумлю́ся в чудесе́х Твои́х. / Аллилу́иа.

28. Воздрема́ душа́ моя́ от уны́ния, / утверди́ мя в словесе́х Твои́х. / Аллилу́иа.

29. Путь непра́вды отста́ви от мене́, / и зако́ном Твои́м поми́луй мя. / Аллилу́иа.

30. Путь и́стины изво́лих, / и судьбы́ Твоя́ не забы́х. / Аллилу́иа.

31. Прилепи́хся свиде́нием Твои́м, Го́споди, / не посрами́ мене́. / Аллилу́иа.

32. Путь за́поведей Твои́х теко́х, / егда́ разшири́л еси́ се́рдце мое́. / Аллилу́иа.

33. Законоположи́ мне, Го́споди, путь оправда́ний Твои́х, / и взыщу́ и́ вы́ну. / Аллилу́иа.

34. Вразуми́ мя, и испыта́ю зако́н Твой, / и сохраню́ и́ всем се́рдцем мои́м. / Аллилу́иа.

35. Наста́ви мя на стезю́ за́поведей Твои́х, / я́ко ту́ю восхоте́х. / Аллилу́иа.

36. Приклони́ се́рдце мое́ во свиде́ния Твоя́, / а не в лихои́мство. / Аллилу́иа.

37. Отврати́ о́чи мои́, е́же не ви́дети суеты́, / в пути́ Твое́м живи́ мя. / Аллилу́иа.

38. Поста́ви рабу́ Твоему́ / сло́во Твое́ в страх Твой. / Аллилу́иа.

39. Отыми́ поноше́ние мое́, е́же непщева́х, / я́ко судьбы́ Твоя́ бла́ги. / Аллилу́иа.

40. Се возжела́х за́поведи Твоя́, / в пра́вде Твое́й живи́ мя. / Аллилу́иа.

41. И да прии́дет на мя ми́лость твоя́, Го́споди, / спасе́ние Твое́ по словеси́ Твоему́. / Аллилу́иа.

42. И отвеща́ю поноша́ющим ми сло́во, / я́ко упова́х на словеса́ Твоя́. / Аллилу́иа.

43. И не отыми́ от уст мои́х словесе́ и́стинна до зела́, / я́ко на судьбы́ Твоя́ упова́х. / Аллилу́иа.

44. И сохраню́ зако́н Твой вы́ну / в век, и в век ве́ка. / Аллилу́иа.

45. И хожда́х в широте́, / я́ко за́поведи Твоя́ взыска́х. / Аллилу́иа.

46. И глаго́лах о свиде́ниих Твои́х / пред цари́, и не стыдя́хся. / Аллилу́иа.

47. И поуча́хся в за́поведех Твои́х, / я́же возлюби́х зело́. / Аллилу́иа.

48. И воздвиго́х ру́це мои́ / к за́поведем Твои́м, я́же возлюби́х. / Аллилу́иа.

48. И глумля́хся / во оправда́ниих Твои́х. / Аллилу́иа.

49. Помяни́ словеса́ Твоя́ рабу́ Твоему́, / и́хже упова́ние дал ми еси́. / Аллилу́иа.

50. То мя уте́ши во смире́нии мое́м, / я́ко сло́во Твое́ живи́ мя. / Аллилу́иа.

51. Го́рдии законопреступова́ху до зела́, / от зако́на же Твоего́ не уклони́хся. / Аллилу́иа.

52. Помяну́х судьбы́ Твоя́ от ве́ка, Го́споди, / и уте́шихся. / Аллилу́иа.

53. Печа́ль прия́т мя от гре́шник, / оставля́ющих зако́н Твой. / Аллилу́иа.

54. Пе́та бя́ху мне оправда́ния Твоя́ / на ме́сте прише́льствия моего́. / Аллилу́иа.

55. Помяну́х в нощи́ и́мя Твое́, Го́споди, / и сохрани́х зако́н Твой. / Аллилу́иа.

56. Сей бысть мне, / я́ко оправда́ний Твои́х взыска́х. / Аллилу́иа.

57. Часть моя́ еси́, Го́споди, / рех сохрани́ти зако́н Твой. / Аллилу́иа.

58. Помоли́хся Лицу́ Твоему́ всем се́рдцем мои́м, / поми́луй мя по словеси́ Твоему́. / Аллилу́иа.

59. Помы́слих пути́ Твоя́, / и возврати́х но́зе мои́ во свиде́ния Твоя́. / Аллилу́иа.

60. Угото́вихся и не смути́хся, / сохрани́ти за́поведи Твоя́. / Аллилу́иа.

61. У́жа гре́шник обяза́шеся мне, / и зако́на Твоего́ не забы́х. / Аллилу́иа.

62. Полу́нощи воста́х испове́датися Тебе́ / о судьба́х пра́вды Твоея́. / Аллилу́иа.

63. Прича́стник аз есмь всем боя́щимся Тебе́, / и храня́щим за́поведи Твоя́. / Аллилу́иа.

64. Ми́лости Твоея́, Го́споди, испо́лнь земля́, / оправда́нием Твои́м научи́ мя. / Аллилу́иа.

65. Бла́гость сотвори́л еси́ с рабо́м Твои́м, Го́споди, / по словеси́ Твоему́. / Аллилу́иа.

66. Бла́гости и наказа́нию, и ра́зуму научи́ мя, / я́ко за́поведем Твои́м ве́ровах. / Аллилу́иа.

67. Пре́жде да́же не смири́ти ми ся, аз прегреши́х, / сего́ ра́ди сло́во Твое́ сохрани́х. / Аллилу́иа.

68. Благ еси́ Ты, Го́споди, / и бла́гостию Твое́ю научи́ мя оправда́нием Твои́м. / Аллилу́иа.

69. Умно́жися на мя непра́вда го́рдых, / аз же всем се́рдцем мои́м испыта́ю за́поведи Твоя́. / Аллилу́иа.

70. Усыри́ся я́ко млеко́ се́рдце их, / аз же зако́ну Твоему́ поучи́хся. / Аллилу́иа.

71. Бла́го мне, я́ко смири́л мя еси́, / я́ко да научу́ся оправда́нием Твои́м. / Аллилу́иа.

72. Благ мне зако́н уст Твои́х, / па́че ты́сящ зла́та и сребра́. / Аллилу́иа.

Сла́ва: Аллилу́иа.

И ны́не: Аллилу́иа.

 

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

 

Диакон: Го́споду помо́лимся.

Лик: Го́споди, поми́луй.

Священник глаголет молитву сию: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

 

И посем начинаем вторую статию на глас 5: на коемждо же конце стиха глаголем:

Поми́луй раба́ Твоего́ [или рабу́ Твою́].

Лик начинает: За́поведи Твоя́: / Поми́луй раба́ Твоего́ [или рабу́ Твою́].

Паки тойже лик:

73. Ру́це Твои́ сотвори́сте мя, и созда́сте мя; / вразуми́ мя, и научу́ся за́поведем Твои́м. / Поми́луй раба́ Твоего́ [или рабу́ Твою́].

74. Боя́щиися Тебе́ у́зрят мя и возвеселя́тся, / я́ко на словеса́ Твоя́ упова́х. / Поми́луй раба́ Твоего́ [или рабу́ Твою́].

И прочее псалма:

75. Разуме́х, Го́споди, я́ко пра́вда судьбы́ Твоя́, / и вои́стинну смири́л мя еси́. / Поми́луй раба́ Твоего́ [или рабу́ Твою́].

76. Бу́ди же ми́лость Твоя́, да уте́шит мя, / по словеси́ Твоему́ рабу́ Твоему́. / Поми́луй раба́ Твоего́ [или рабу́ Твою́].

77. Да прии́дут мне щедро́ты Твоя́, и жив бу́ду, / я́ко зако́н Твой поуче́ние мое́ есть. / Поми́луй раба́ Твоего́ [или рабу́ Твою́].

78. Да постыдя́тся го́рдии, / я́ко непра́ведно беззако́нноваша на мя, / аз же поглумлю́ся в за́поведех Твои́х. / Поми́луй раба́ Твоего́ [или рабу́ Твою́].

79. Да обратя́т мя боя́щиися Тебе́, / и ве́дящии свиде́ния Твоя́. / Поми́луй раба́ Твоего́ [или рабу́ Твою́].

80. Бу́ди се́рдце мое́ непоро́чно во оправда́ниих Твои́х, / я́ко да не постыжу́ся. / Поми́луй раба́ Твоего́ [или рабу́ Твою́].

81. Исчеза́ет во спасе́ние Твое́ душа́ моя́, / на словеса́ Твоя́ упова́х. / Поми́луй раба́ Твоего́ [или рабу́ Твою́].

82. Исчезо́ша о́чи мои́ в сло́во Твое́, глаго́люще: / когда́ уте́шиши мя? / Поми́луй раба́ Твоего́ [или рабу́ Твою́].

83. Зане́ бых я́ко мех на сла́не, / оправда́ний Твои́х не забы́х. / Поми́луй раба́ Твоего́ [или рабу́ Твою́].

84. Коли́ко есть дней раба́ Твоего́? / Когда́ сотвори́ши ми от гоня́щих мя суд? / Поми́луй раба́ Твоего́ [или рабу́ Твою́].

85. Пове́даша мне законопресту́пницы глумле́ния, / но не я́ко закон Твой, Го́споди. / Поми́луй раба́ Твоего́ [или рабу́ Твою́].

86. Вся за́поведи Твоя́ и́стина, / непра́ведно погна́ша мя, помози́ ми. / Поми́луй раба́ Твоего́ [или рабу́ Твою́].

87. Вма́ле не сконча́ша мене́ на земли́: / аз же не оста́вих за́поведей Твои́х. / Поми́луй раба́ Твоего́ [или рабу́ Твою́].

88. По ми́лости Твое́й живи́ мя, / и сохраню́ свиде́ния уст Твои́х. / Поми́луй раба́ Твоего́ [или рабу́ Твою́].

89. Во век Го́споди, сло́во Твое́ / пребыва́ет на небеси́. / Поми́луй раба́ Твоего́ [или рабу́ Твою́].

90. В род и род и́стина Твоя́, / основа́л еси́ зе́млю, и пребыва́ет. / Поми́луй раба́ Твоего́ [или рабу́ Твою́].

91. Учине́нием Твои́м пребыва́ет день, / я́ко вся́ческая рабо́тна Тебе́. / Поми́луй раба́ Твоего́ [или рабу́ Твою́].

92. Я́ко а́ще бы не зако́н Твой поуче́ние мое́ был, / тогда́ у́бо поги́бл бых во смире́нии мое́м. / Поми́луй раба́ Твоего́ [или рабу́ Твою́].

93. Во век не забу́ду оправда́ний Твои́х, / я́ко в них оживи́л мя еси́. / Поми́луй раба́ Твоего́ [или рабу́ Твою́].

94. Твой есмь аз, спаси́ мя, / я́ко оправда́ний Твои́х взыска́х. / Поми́луй раба́ Твоего́ [или рабу́ Твою́].

95. Мене́ жда́ша гре́шницы погуби́ти мя, / свиде́ния Твоя́ разуме́х. / Поми́луй раба́ Твоего́ [или рабу́ Твою́].

96. Вся́кия кончи́ны ви́дех коне́ц, / широка́ за́поведь Твоя́ зело́. / Поми́луй раба́ Твоего́ [или рабу́ Твою́].

97. Коль возлюби́х зако́н Твой Го́споди, / весь день поуче́ние мое́ есть. / Поми́луй раба́ Твоего́ [или рабу́ Твою́].

98. Па́че враг мои́х умудри́л мя еси́ за́поведию Твое́ю, / я́ко в век моя́ есть. / Поми́луй раба́ Твоего́ [или рабу́ Твою́].

99. Па́че всех уча́щих мя разуме́х, / я́ко свиде́ния Твоя́ поуче́ние мое́ есть. / Поми́луй раба́ Твоего́ [или рабу́ Твою́].

100. Па́че ста́рец разуме́х, / я́ко за́поведи Твоя́ взыска́х. / Поми́луй раба́ Твоего́ [или рабу́ Твою́].

101. От вся́каго пути́ лука́ва возбрани́х нога́м мои́м, / я́ко да сохраню́ словеса́ Твоя́. / Поми́луй раба́ Твоего́ [или рабу́ Твою́].

102. От суде́б Твои́х не уклони́хся, / я́ко Ты законоположи́л ми еси́. / Поми́луй раба́ Твоего́ [или рабу́ Твою́].

103. Коль сладка́ горта́ни моему́ словеса́ Твоя́, / па́че ме́да усто́м мои́м. / Поми́луй раба́ Твоего́ [или рабу́ Твою́].

104. От за́поведей Твои́х разуме́х, / сего́ ра́ди возненави́дех всяк путь непра́вды. / Поми́луй раба́ Твоего́ [или рабу́ Твою́].

105. Свети́льник нога́ма мои́ма зако́н Твой, / и свет стезя́м мои́м. / Поми́луй раба́ Твоего́ [или рабу́ Твою́].

106. Кля́хся, и поста́вих / сохрани́ти судьбы́ пра́вды Твоея́. / Поми́луй раба́ Твоего́ [или рабу́ Твою́].

107. Смири́хся до зела́ Го́споди, / живи́ мя по словеси́ Твоему́. / Поми́луй раба́ Твоего́ [или рабу́ Твою́].

108. Во́льная уст мои́х благоволи́ же, Го́споди, / и судьба́м Твои́м научи́ мя. / Поми́луй раба́ Твоего́ [или рабу́ Твою́].

109. Душа́ моя́ в руку́ Твое́ю вы́ну, / и зако́на Твоего́ не забы́х. / Поми́луй раба́ Твоего́ [или рабу́ Твою́].

110. Положи́ша гре́шницы сеть мне, / и от за́поведей Твои́х не заблуди́х. / Поми́луй раба́ Твоего́ [или рабу́ Твою́].

111. Насле́довах свиде́ния Твоя́ во век, / я́ко ра́дование се́рдца моего́ суть. / Поми́луй раба́ Твоего́ [или рабу́ Твою́].

112. Приклони́х се́рдце мое́, / сотвори́ти оправда́ния Твоя́ в век за воздая́ние. / Поми́луй раба́ Твоего́ [или рабу́ Твою́].

113. Законопресту́пныя возненави́дех, / зако́н же Твой возлюби́х. / Поми́луй раба́ Твоего́ [или рабу́ Твою́].

114. Помо́щник мой, и Засту́пник мой еси́ Ты, / на словеса́ Твоя́ упова́х. / Поми́луй раба́ Твоего́ [или рабу́ Твою́].

115. Уклони́теся от мене́, лука́внующии, / и испыта́ю за́поведи Бо́га моего́. / Поми́луй раба́ Твоего́ [или рабу́ Твою́].

116. Заступи́ мя по словеси́ Твоему́ и жив бу́ду, / и не посрами́ мене́ от ча́яния моего́. / Поми́луй раба́ Твоего́ [или рабу́ Твою́].

117. Помози́ ми, и спасу́ся, / и поучу́ся во оправда́ниих Твои́х вы́ну. / Поми́луй раба́ Твоего́ [или рабу́ Твою́].

118. Уничижи́л еси́ вся отступа́ющия от оправда́ний Твои́х, / я́ко непра́ведно помышле́ние их. / Поми́луй раба́ Твоего́ [или рабу́ Твою́].

119. Преступа́ющия непщева́х вся гре́шныя земли́: / сего́ ра́ди возлюби́х свиде́ния Твоя́. / Поми́луй раба́ Твоего́ [или рабу́ Твою́].

120. Пригвозди́ стра́ху Твоему́ пло́ти моя́, / от суде́б бо Твои́х убоя́хся. / Поми́луй раба́ Твоего́ [или рабу́ Твою́].

121. Сотвори́х суд и пра́вду, / не преда́ждь мене́ оби́дящим мя. / Поми́луй раба́ Твоего́ [или рабу́ Твою́].

122. Восприими́ раба́ Твоего́ во бла́го, / да не оклевета́ют мене́ го́рдии. / Поми́луй раба́ Твоего́ [или рабу́ Твою́].

123. О́чи мои́ исчезо́сте во спасе́ние Твое́, / и в сло́во пра́вды Твоея́. / Поми́луй раба́ Твоего́ [или рабу́ Твою́].

124. Сотвори́ с рабо́м Твои́м по ми́лости Твое́й / и оправда́нием Твои́м научи́ мя. / Поми́луй раба́ Твоего́ [или рабу́ Твою́].

125. Раб Твой есмь аз, вразуми́ мя, / и уве́м свиде́ния Твоя́. / Поми́луй раба́ Твоего́ [или рабу́ Твою́].

126. Вре́мя сотвори́ти Го́сподеви, / разори́ша зако́н Твой. / Поми́луй раба́ Твоего́ [или рабу́ Твою́].

127. Сего́ ра́ди возлюби́х за́поведи Твоя́ / па́че зла́та и топа́зия. / Поми́луй раба́ Твоего́ [или рабу́ Твою́].

128. Сего́ ра́ди ко всем за́поведем Твои́м направля́хся, / всяк путь непра́вды возненави́дех. / Поми́луй раба́ Твоего́ [или рабу́ Твою́].

129. Ди́вна свиде́ния Твоя́, / сего́ ра́ди испыта́ я́ душа́ моя́. / Поми́луй раба́ Твоего́ [или рабу́ Твою́].

130. Я́вление слове́с Твои́х / просвеща́ет, и вразумля́ет младе́нцы. / Поми́луй раба́ Твоего́ [или рабу́ Твою́].

131. Уста́ моя́ отверзо́х, и привлеко́х дух, / я́ко за́поведей Твои́х жела́х. / Поми́луй раба́ Твоего́ [или рабу́ Твою́].

Сла́ва: Поми́луй раба́ Твоего́ [или рабу́ Твою́].

И ны́не: Поми́луй раба́ Твоего́ [или рабу́ Твою́].

 

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

 

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и по