От зде начинаем стихи держати на 14. И чтется канон Минеи прилучившемуся святому со ирмосом на 6.

Стих: Огусте́ша, я́ко стена́, во́ды, огусте́ша и во́лны посреде́ мо́ря.

И поет лик ирмос канона Минеи святаго.

К тропарем же канона стихи по ликом припеваются сии:

Стих: Рече́ враг: гнав пости́гну, разделы́ коры́сть, испо́лню ду́шу мою́, убию́ мече́м моим, госпо́дствовати бу́дет рука́ моя́.

И 1й тропарь канона Минеи святаго.

Стих: Посла́л еси́ дух Твой, покры́ я́ мо́ре, погрязо́ша, я́ко о́лово, в воде́ зе́льней.

И паки 1й тропарь канона Минеи святаго.

Стих: Кто подо́бен Тебе́ в бозе́х, Го́споди, кто подо́бен Тебе́? Просла́влен во святы́х, дивен, сла́вно творя́й чудеса́.

И 2й тропарь канона Минеи святаго.

Стих: Просте́рл еси́ десни́цу Твою, пожре́ я́ земля́. Наста́вил еси́ пра́вдою Твое́ю люди Твоя́ сия́, я́же изба́вил еси́.

И 3й тропарь канона Минеи святаго.

Стих: Уте́шил еси́ кре́постию Твое́ю во оби́тель святу́ю Твою. Слы́шаша язы́цы и прогне́вашася, боле́зни прия́ша живу́щии в Филисти́ме.

И Богородичен канона Минеи святаго.

Стих: Тогда́ потща́шася влады́ки Едо́мстии, и князе́й Моави́тских, прия́т я тре́пет, раста́яша вси живу́щии в Ханаа́не.

От зде начинаем трипеснец Триоди, господина Иосифа, глас 3:

На́ша помышле́ния Боже́ственным ра́лом возде́лавше Боже́ственнаго поще́ния, доброде́телей кла́с плодопринесе́м, я́ко да не вза́лчем во ве́ки, наслажда́ющеся сла́достию неиждива́емою ра́дующеся

Стих: Нападе́т на ня страх и тре́пет, вели́чием мышцы Твоея́ да ока́менятся.

Многоле́тныя стра́сти вну́трь ношу́, омрача́ющыя окая́нную ду́шу мою́, к Твое́й безле́тне Сло́ве, безнача́льнаго Отца́ си́ле непобеди́мей, сокруше́нным се́рдцем припа́даю и молю́ся: уще́дри, и спаси́ мя.

Стих: До́ндеже про́йдут лю́дие Твои́, Го́споди, до́ндеже про́йдут лю́дие Твои́ си́и, я́же стяжа́л еси́.

До́брое поще́ние пита́ет сердца́, умаща́ющее помышле́ния богоуго́дная, и страсте́й бе́здну изсуша́ющее, ту́чами умиле́ния очища́ет, ве́рою хвалу́ принося́щих Вседержи́телю.

Стих: Введ, насади́ я́ в го́ру достоя́ния Твоего́, в гото́вое жили́ще Твое́, е́же соде́лал еси́, Го́споди, святы́ню, ю́же угото́васте ру́це Твои́.

Богородичен: Многоимени́тая Отрокови́це, ра́дуйся Свята́я Де́во, Богороди́тельнице Мари́е, ве́рных Похвало́, кля́твы Избавле́ние, Ле́ствице Небе́сная, Недомы́сленное Чу́до, Купино́ Неопали́мая, Земле́ Неде́ланная.

Иный трипеснец, господина Феодора, глас 7:

Стих: Госпо́дь, ца́рствуяй ве́ки, и на век, и еще́, егда́ вни́де конь фарао́нов с колесницами и вса́дники в мо́ре.

Живоно́сному дре́ву поклони́вшеся, отсю́ду и́дем путе́м поще́ния к стра́сти Христо́вой ра́дующеся.

Стих: И наведе́ на ня Госпо́дь во́ду морску́ю, сы́нове же Изра́илевы проидо́ша су́шею посреде́ мо́ря.

Христу́ после́дующе, отве́ржемся ми́ра, и во́змем кре́ст на ра́мо, сообража́ющеся Его́ Боже́ственным страсте́м.

Сла́ва Отцу́ и Сы́ну и Свято́му Ду́ху.

Троичен: В Тре́х Ли́цех, Пресу́щное Еди́но Божество́, воспои́м вси́ Отца́, и Сы́на, и Свята́го Ду́ха.

И ны́не и при́сно и во ве́ки веко́в. Ами́нь.

Богородичен: Его́же родила́ еси́ недомы́сленно, тле́ния не разуме́вши Чи́стая, Иису́са Спа́са уми́лостиви ны́не о рабе́х Твои́х.

Сла́ва Тебе́, Бо́же наш, сла́ва Тебе́.

Егда́ в сла́ве прии́деши со А́нгелы, суди́ти вся́ческим, до́брый отве́т да́ти Тебе́ Христе́, на́с сподо́би.

Ирмос, глас 7: Пои́м Го́сподеви,/ погрузи́вшему всю́ си́лу фарао́нову в мо́ри, \ побе́дную пе́снь, я́ко просла́вися.

Песнь 3

Зде ирмос Минеи святаго не поется, но поем оный по конце песни.

К тропарем же стихи припеваются по чину.

Стих: Госпо́дь взы́де на небеса́ и возгреме́, Той су́дит конце́м земли́, Пра́веден сый.

И 1й тропарь канона Минеи святаго.

Стих: И даст кре́пость царю на́шему, и вознесе́т рог христа́ Своего́.

И 2й тропарь канона Минеи святаго.

Сла́ва Отцу́ и Сы́ну и Свято́му Ду́ху.

И 3й тропарь канона Минеи святаго.

И ны́не и при́сно и во ве́ки веко́в. Ами́нь.

И Богородичен канона Минеи святаго.

Лик поет ирмос Минеи, третия песни.

Ектения малая:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святыми помяну́вше, са́ми себе́ и друг дру́га, и весь живо́т наш Христу́ Бо́гу предадим.

Лик: Тебе́, Го́споди.

Священник: Я́ко Ты еси́ Бог наш и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Чтец: Седален Минеи святаго (единожды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен егоже.

Песнь 4

Лик поет ирмос канона Минеи святаго, стихи же к тропарем припеваются по чину:

Стих: Госпо́дь Бог мой, си́ла моя и учини́т но́зе мои́ на соверше́ние.