Помилуй мя, Боже, по велицей милости Твоей, и по множеству щедрот Твоих очисти беззаконие мое.

Сей день Господень,/ радуйтеся, людие:/ се бо Света чертог/ и книга Слова Животнаго/ из утробы произыде,/ и Яже к востоком дверь, рождшися,/ ожидает входа Святителя великаго,/ eдина и Eдинаго вводящи Христа во вселенную,// во спасение душ наших.

 

Канон праздника:

Во время помазания прихожан елеем читается канон Рождества Пресвятой Богородицы, в котором раскрывается смысл и красота празднуемых сегодня Церковью событий. Ниже приведены ирмосы, предваряющие каждую песнь.

Песнь 1: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,// яко прославися.

Песнь 3: Утверди нас в Тебе, Господи,/ Древом умерщвлей грех,/ и страх Твой всади// в сердца нас, поющих Тя.

Песнь 4: Услышах, Господи,/ слух Твоего смотрения/ и прославих Тя,// Едине Человеколюбче.

Песнь 5: Сеннописанный мрак гаданий разорив/ и верных прибытием истины,/ Богоотроковицею, озарив сердца,// и нас светом Твоим, Христе, настави.

Песнь 6: Ко Господу от кита Иона возопи:/ Ты мя возведи из глубины ада, молюся,/ да яко Избавителю, во гласе хваления,// истины же духом пожру Тебе.

Кондак праздника, глас 4: Иоаким и Анна поношения безчадства/ и Адам и Éва от тли смертныя свободистася, Пречистая,/ во святем рождестве Твоем./ То празднуют и людие Твои,/ вины прегрешений избавльшеся,/ внегда звати Ти:// неплоды раждает Богородицу и Питательницу Жизни нашея.

Песнь 7: Купина в горе огненеопальная и росоносная пещь халдейская/ яве предписа Тя, Богоневесто,/ Божественный бо невещественный в вещественнем чреве Огнь неопально прияла еси./ Темже из Тебе Рождшемуся поем:// благословен еси, Боже отец наших.

Песнь 8: В пещи отрочестей прообразил еси иногда Твою Матерь, Господи,/ образ же Сия из огня изымаше неопально входящия,/ Юже поем, явльшуюся Тобою концем днесь,// и превозносим во вся веки.

Катавасия: Хвалим, благословим, покланяемся Господеви, поюще и превозносяще во вся веки.

Благословите, отроцы,/ Троицы равночисленнии,/ Содетеля Отца Бога,/ пойте снизшедшее Слово,/ и огнь в росу претворшее,/ и превозносите всем жизнь подавающаго// Духа Всесвятаго во веки.

 

Песнь Пресвятой Богородицы:

Величит душа Моя Господа и возрадовася дух Мой о Бозе Спасе Моем

Честнейшую Херувим / и славнейшую без сравнения Серафим, /

без истления Бога Слова рождшую, / сущую Богородицу, Тя величаем.

Яко призре на смирение рабы Своея, / се бо, от ныне ублажат Мя вси роди.

Яко сотвори Мне величие Сильный, и свято имя Его, и милость Его в роды родов боящимся Его.

Сотвори державу мышцею Своею, / расточи гордыя мыслию сердца их.

Низложи сильныя со престол, и вознесе смиренныя, алчущия исполни благ, и богатящияся отпусти тщи

Восприят Израиля отрока Своего, / помянути милости, / якоже глагола ко отцем нашим, / Аврааму и семени его даже до века.

Песнь 9: Яже прежде Солнца Светильника Бога возсиявшаго,/ плотски к нам пришедшаго,/ из боку Девичу неизреченно воплотившая,/ Благословенная Всечистая,// Тя, Богородице, величаем.

Величай, душе моя,/ преславное рождество Божия Матере.

Чужде матерем девство,/ и странно девам деторождение;/ на Тебе, Богородице,/ обоя устроишася./ Тем Тя, вся племена земная,// непрестанно величаем.

 

Стихиры на хвалитех [Праздника, глас 1]:

Всякое дыхание да хвалит Господа.

Хвалите Господа с небес,/ хвалите Его в вышних.// Тебе подобает песнь Богу.

Хвалите Его вси ангели Его,/ хвалите Его вся силы Его.// Тебе подобает песнь Богу.

Хвалите Его на силах Его,/ хвалите Его по множеству величествия Его.

О, дивнаго чудесе!/ Источник Жизни/ от неплодныя раждается,/ и благодать плодородити светло начинается,/ веселися, Иоакиме,/ Богородицы быв родитель:/ несть ин, якоже ты,/ земнородных родителей, богоприятне:/ боговместимая бо Oтроковица,/ Божие селение, пресвятая гора// тобою нам даровася.

Хвалите Его во гласе трубнем,/ хвалите Его во псалтири и гуслех. – повтор стихиры..

Хвалите Его в тимпане и лице,/ хвалите Его во струнах и органе.

О, дивнаго чудесе!/ От неплодове плод возсия/ мановением всех Содетеля и Вседержителя,/ доблественно мирское благих разреши неплодство./ Матeри с материю Богородичною ликуйте, зовуще:/ Обрадованная, радуйся, с Тобою Господь,// подаяй миру Тобою велию милость.

Хвалите Его в кимвалех доброгласных, хвалите Его в кимвалех восклицания./ Всякое дыхание да хвалит Господа.

Столп целомудрия одушевлен/ и светлое приятелище, блистающееся благодатию,/ Анна благославная явльшися,/ породи забрало воистинну девства,/ Божественное процветение:/ Яже всем девствeнным/ и девства желающим дарование,/ девства доброту яве подающую,// и дарующую всем верным велию милость.

Слава Отцу и Сыну и Святому Духу и ныне и присно и во веки веков. Аминь. [Глас 6]:

Сей день Господень,/ радуйтеся, людие:/ се бо Света чертог/ и книга Слова Животнаго/ из утробы произыде,/ и Яже к востоком дверь, рождшися,/ ожидает входа Святителя великаго,/ eдина и Eдинаго вводящи Христа во вселенную,// во спасение душ наших.

Слава Тебе, показавшему нам свет! – поется великое славословие…

 

Тропарь праздника, глас 4:

Рождество Твое, Богородице Дево,/ радость возвести всей вселенней:/ из Тебе бо возсия Солнце Правды, Христос Бог наш,/ и, разрушив клятву, даде благословение,// и, упразднив смерть, дарова нам живот вечный.

 

Литургия

1-й антифон:

Благослови, душе моя, Господа, Благословен еси, Господи.

Благослови, душе моя, Господа, и вся внутренняя моя, имя святое Его.

Благослови, душе моя, Господа, и не забывай всех воздаяний Его.

Очищающаго вся беззакония твоя, исцеляющаго вся недуги твоя.

Избавляющаго от истления живот твой, венчающаго тя милостию и щедротами.

Исполняющаго во благих желание твое: обновится яко орля юность твоя.

Щедр и милостив Господь, долготерпелив и многомилостив.

Благослови, душе моя, Господа, и вся внутренняя моя, имя святое Его.

Благословен еси, Господи.

2-й антифон:

Хвали, душе моя, Господа.

Восхвалю Господа в животе моем, пою Богу моему, дондеже есмь

Не надейтеся на князи, на сыны человеческия, в них же несть спасения.

Изыдет дух его, и возвратится в землю свою: в той день погибнут вся помышления его.

Блажен, емуже Бог Иаковль помощник его, упование его на Господа Бога своего,

сотворшаго небо и землю, море и вся, яже в них;

хранящаго истину в век, творящаго суд обидимым, дающаго пищу алчущим.

Господь решит окованныя; Господь умудряет слепцы;

Господь возводит низверженныя; Господь любит праведники;

Господь хранит пришельцы, сира и вдову приимет и путь грешных погубит.

Воцарится Господь во век. Бог твой, Сионе, в род и род.

Единородный Сыне, и Слове Божий, безсмертен Сый, и изволивый спасения нашего ради воплотитися от святыя Богородицы и Приснодевы Марии, непреложно вочеловечивыйся, распныйся же Христе Боже, смертию смерть поправый, Един Сый Святыя Троицы, спрославляемый Отцу и Святому Духу, спаси нас.

 

Блаженны:

Во Царствии Твоем помяни нас, Господи, егда приидеши во Царствии Твоем.

Блажени нищии духом, яко тех есть Царство Небесное.

Блажени плачущии, яко тии утешатся.

Блажени кротцыи, яко тии наследят землю.

Блажени алчущии и жаждущии правды, яко тии насытятся.

Блажени милостивии, яко тии помиловани будут.

Блажени чистии сердцем, яко тии Бога узрят.

Блажени миротворцы, яко тии сынове Божии нарекутся.

Блажени изгнани правды ради, яко тех есть Царство Небесное.

Блажени есте, егда поносят вам, и изженут, и рекут всяк зол глагол, на вы лжуще Мене ради.

Радуйтеся и веселитеся, яко мзда ваша многа на небесех.

Во время малого входа с Евангелием:

Приидите, поклонимся и припадем ко Христу.

Спаси ны, Сыне Божий, молитвами Богородицы, поющия Ти: аллилуиа.

 

Тропарь праздника Рождества Богородицы, глас 4:

Рождество Твое, Богородице Дево,/ радость возвести всей вселенней:/ из Тебе бо возсия Солнце Правды, Христос Бог наш,/ и, разрушив клятву, даде благословение,// и, упразднив смерть, дарова нам живот вечный.

 

Кондак праздника, глас 4:

Иоаким и Анна поношения безчадства/ и Адам и Ева от тли смертныя свободистася, Пречистая,/ во святем рождестве Твоем./ То празднуют и людие Твои,/ вины прегрешений избавльшеся,/ внегда звати Ти:// неплоды раждает Богородицу и Питательницу Жизни нашея.

 

Прокимен, глас 3, песнь Богородицы:

Величит душа Моя Господа,/

и возрадовася дух Мой о Бозе Спасе Моем.

 

Стих:

Яко призре на смирение Рабы Своея, се бо отныне ублажат Мя вси роди.