И 2й тропарь канона Минеи святаго.

Стих: Благослови́те земля́, го́ры и хо́лми и вся, прозяба́ющая на ней, Го́спода, по́йте и превозноси́те Его во ве́ки.

И 3й тропарь канона Минеи святаго.

Стих: Благослови́те исто́чницы, моря́ и ре́ки, ки́ти и вся, дви́жущаяся в вода́х, Го́спода, по́йте и превозноси́те Его во ве́ки.

И Богородичен канона Минеи святаго.

Стих: Благослови́те вся пти́цы небе́сныя, зве́рие и вси ско́ти, Го́спода, по́йте и превозноси́те Его во ве́ки.

И чтутся тропари трипеснца Триоди:

Ижди́в бога́тство оте́ческое со блудни́цами, изгна́н бы́х от преддве́рий благода́ти окая́нный: но приими́ мя́ о́тче, за безчи́сленную ми́лость.

Стих: Благослови́те сы́нове челове́честии, да благослови́т Израиль, Го́спода, по́йте и превозносите Его во ве́ки.

Во светле́йшем поста́ светозаре́нии моли́тв просвети́вшеся, светови́дни бу́дем, я́ко да грехо́вныя тьмы́ избе́гнем.

Стих: Благослови́те свяще́нницы Господин, раби́ Госпо́дни, Го́спода, по́йте и превозноси́те Его во ве́ки.

Мо́лит Тя́ ли́к безпло́тных, херуви́ми мо́лят, и святы́х чи́нове, ду́шы на́шя спаси́ Христе́, Многоми́лостиве.

Стих: Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его во ве́ки.

Богородичен: Неде́ланный гро́зд заче́ншая, омраче́нна мя́ пия́нством греха́ уцелому́дри Богоро́дице Де́во, наде́ждо ду́ш на́ших.

Стих: Благослови́те Ана́ния, Аза́рия, Мисаи́л, Го́спода, по́йте и превозноси́те Его во ве́ки.

Иный трипеснец Триоди:

Оте́ческаго сокро́вища, име́ния чу́днаго, ма́тере все́х послужи́вших Влады́це Христу́, прииди́те наслади́мся бра́тие поста́: и́бо се́й укрепля́ет те́ло, и просвеща́ет у́м и се́рдце.

Стих: Благослови́те апо́столи, проро́цы и му́ченицы Господни, Го́спода, по́йте и превозноси́те Его во ве́ки.

Гедео́на чу́днаго подража́ющи душе́, доброде́тели нося́щи, ве́ру, наде́жду и любо́вь Христо́ву, изы́ди убива́ющи иноплеме́нныя стра́сти, я́коже о́ный с треми́ сты́, Мадиа́мский язы́к потребля́я.

Благослови́м Отца́ и Сы́на и Свята́го Духа, Го́спода.

Троичен: И Тро́ицу сла́влю Тя́, и я́ко Еди́ницу пою́ Тя́, Божество́ еди́но, О́тче Вседержи́телю, и Единонача́льне Сы́не, Ду́ше Святы́й, и Всевлады́чняя держа́во, еди́но Естество́, еди́но Ца́рство, в трие́х начерта́ниих же покланя́емое.

И ны́не и при́сно и во ве́ки веко́в. Ами́нь.

Богородичен: Я́же в рождестве́ убеже́ боле́зни преесте́ственно, в Твое́й честне́й стра́сти позна́ Ро́ждшая Тя́, и боле́зноваше зря́щи на Кресте́ Тя́ пригвожде́на во́лею от иуде́ев, на вода́х зе́млю основа́вшаго.

Сла́ва Тебе́, Бо́же наш, сла́ва Тебе́.

Егда́ прии́деши во сла́ве Твое́й суди́ти все́й земли́, с ты́сящами и тьма́ми си́л Твои́х: тогда́ мя́ Го́споди пощади́, осла́би, и изба́ви осужде́ния, не посрами́ мене́, ниже́ осуди́ огню́ ве́чному.

Хва́лим, благослови́м, покланяемся Го́сподеви, пою́ще и превознося́ще во вся ве́ки.

Триоди Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Священник: Богоро́дицу и Ма́терь Све́та в пе́снех возвели́чим.

Лик: Вели́чит душа́ Моя Го́спода, и возра́довася дух Мой о Бо́зе, Спа́се Мое́м.

Честне́йшую Херуви́м и сла́внейшую без сравне́ния Серафим, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко призре́ на смире́ние Ра́бы Своея́, се бо от ны́не ублажа́т Мя вси ро́ди.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко сотвори́ Мне вели́чие Сильный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Восприя́т Изра́иля о́трока Своего́, помяну́ти милости, я́коже глаго́ла ко отце́м на́шим, Авраа́му и се́мени его да́же до ве́ка.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Песнь 9

Лик поет ирмос канона Минеи святаго.

Стих: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Своим.