Раськень морось – эрзянь оймевиень невтема

Лиясто арсезеват: кодамо сон ульнесь, кезэрень эрзянь морось, ды мекс, зярдо нейгак марят ламо вайгельсэ кувака эрзянь морамо, талнозеви, скирьк мери оймесь? Мерят, мезе-бути леди мелезэть— васолонь, малавикс ды содавикс… Кортыть, весе те моли «генной паметьстэнек»: верьсэнек ули мезе-бути, мезесь сюлми эйсэнек васоло шкань покштянок-покшаванок марто. Истямо виесь ули тиринь валтнэсэ. Моросонть сон седеяк виев: тосо аволь ансяк тиринь кельсэ валт, тосо ули мелодия-моравкс, гайгема, тосо морыцянь ойме… Сынь вейсэ, паряк, минек седейтнень талновтытькак… 7-8 вайгельть кезэрень морамосонть вастневкшнесь. Пек аламонь лия  народонь раськень морамонь лувсонть ули истямось!

Эрзятне сравтовозь весе Россиянть келес. Те тувталось теи ве ёнов а молицякс аволь ансяк кортавксонок, моронокак. Теке вейке морось, эрси, ламо таркава морави лиякс лиякс. Лисни, вейке моронть ламо вариантонзо. Истя вана, невтемга, «Самсон леляй» раськень моронть вастневить кеменде ламо вариантонзо.

Морыцятне теить раськень моротнень вейсэ, ды эрьвась путы эйзэст оймевиень пелькскензэ. Моротнень кунсолозь, несак, кодамо раськенть обуцязо. Эрзятне моротнесэяк невтевить мазыекс, важодемань вечкицякс, ёроковокс, пейдицякс (юмор марто) ломанекс.Раськень моротнень сюжетэст пек шождат. Эйсэст ёвтневи кодамояк эрямонь тевде, ёжомарямодо, ёвтневи аламо валсо. Сехте ламо морот чиямодо, мирденень лисемань ды урьвакстомань мельтнеде.

Морамсто валтнэ ды валрисьметне моравить ламоксть, сынь эрьва кода човорявить, мазыйстэ сюлмавить мелодиянть марто.

Раськень моронь морамонь пельксэнть панжизе «Пизёлнэсь». Ютазь иестэ сонензэ топодсть 20 иеть. 7 иеде икеле сон ульнесь мик Эстониясо – невтсь тосо эрзянь моронть мазычинзэ. Народной анамблянть репертуарсо кеменде ламо раськень морот. Покшчинть концертсэнтькак аватне морызь «Ульяна», «Эх, урякай» ды  «Самсон леляй»эрзянь моротнень.   

Паро мельсэ тешкстаса: минек райононь Культурань кудосо важодить моронь вечкиця ды пек мазыйстэ морыця ломанть. Сынь сайнить васенце таркат, лауреатонь лемть эрьва кодамо конкурссо ды пелькстамосо. Вечксызь эрзянь моротненьгак, морсить сынст эстрадань лувсо. Пек ёроковсто морсить минек РДК «Светлица», «Толнэ» ансамблятне Мордовиясо неень шкань эрзянь ды мокшонь «Од вий!» эстрадань моронь фестивальсэнтькак. Ламоксть сайнесть тосо 1 тарка ды Лауреатонь лементь.Концертсэнек «Толнэ» ансамблясь пек мазыйстэ невтинзе «Пандо прясо тол палы», «Косо зорят палыть» ды «Кавто цёрат тикше ледить» эрзянь моротнень.

Весенень пек вечкевсь, кода Дмитрий Говенко морызе «Адядо, ялгат, розь паксяв» раськень моронть.

Арсян, сехте содавикс весе эрзянь ломантненень нейгак маряви «Авкай, молян мон вирев» народной морось. Сонзэ морызе пек гайтев вайгельсэнзэ Нина Бородачёва.

Пётр Андреевич Мамаев седясь баянсо эрзянь раськень моронь пурнавкс (попурри).