К ондак праздника Триоди, глас 2-й .

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́:/ Спас воскре́се от гро́ба.

Икос:

На гроб Твой, Спа́се, мироно́сицы иду́щия, / к себе́ недоумева́хуся умо́м и веща́ху: / кто нам ка́мень отвали́т гро́бный? / И воззре́вша ви́дят, я́ко ка́мень отвале́н бе, / зра́ку же а́нгелову со одея́нием дивля́хуся, / содержи́ми же бя́ху тре́петом, и бежа́ти помышля́ху. / И к ним ю́ноша возопи́: / не бо́йтеся вы, Его́же и́щете, воста́, / прииди́те, ви́дите ме́сто, иде́же лежа́ше те́ло Иису́сово, / и ско́ро ше́дшия возвести́те ученико́м: / Спас воскре́се от гро́ба.

 

Песнь 7:

Канон праздника Триоди (в Неделю мироносиц), глас 2 со ирмосом на 8 (ирмосы по дважды).

Ирмос: Херуви́мы подража́юще о́троцы в пещи́ ликовствова́ху, вопию́ще: / благослове́н еси́ Бо́же, / я́ко и́стиною и судо́м наве́л еси́ сия́ вся, грех ра́ди на́ших, / препе́тый и препросла́вленный во вся ве́ки. (Дважды)

Припев: И вси́ суди́ Твои́ и́стинни, и судьбы́ и́стинны сотвоpи́л еси́.

Тропарь: Ты, я́ко Человеколю́бец, хотя́й вся спасти́ от пре́лести, я́же созда́л еси́, / претерпе́л еси́ пригвозди́тися на Кресте́, / да погребе́нный о́браз страстьми́, сей пло́тию Твое́ю обнови́ши, Спа́се, / и ад низложи́в, воскреси́л еси́ и уме́ршия с Собо́ю.

Припев: И на гpа́д святы́й оте́ц на́ших Иеpусали́м.

Тропарь: На Кресте́ возвыша́емь, вся призва́л еси́ / к Себе́, Ще́дре, я́коже обеща́л еси́, Бла́же, / я́ко вои́стинну вся сия́ грехо́в ра́ди на́ших пострада́ти благоволи́л еси́. / Те́мже и разбо́йнику ра́йская врата́ отве́рзл еси́, Спа́се.

Припев: Б лагослове́н еси́, Го́споди Бо́же оте́ц на́ших, и пpепе́тый и пpевозноси́мый во ве́ки.

Тропарь: Ты храм теле́сный воздви́гл еси́ разоре́нный, / тридне́вно из гро́ба, я́коже обеща́л еси́, Бла́же, / да вои́стинну ска́жеши сла́ву Твою́, / ю́же нам источа́еши ве́рою, / у́зы разреши́в, и́хже держа́ше дре́вле ад свя́занных.

Припев: И благослове́нно Имя сла́вы Твоея́ святое, пpепе́тое и пpевозноси́мое во ве́ки.

Тропарь: О иуде́йское безу́мие! О неи́стовство беззако́нных! / Что неве́рное ви́девше, не ве́ровасте Христу́? / Я́ко немощны́я, не сло́вом ли воздви́же? / Или я́ко весь мир Той не спасе́ ли, / да уверя́ют вас поне́ во́ини, или́ воскре́сшие из ме́ртвых.

Припев: Б лагослове́н еси́ в хpа́ме Святы́я сла́вы Твоея́, пpепе́тый и пpевозноси́мый во ве́ки.

Тропарь: Омертве́вшии стра́жие ны́не да глаго́лют, / ка́ко укра́ден бысть, Его́же не ви́деша неразу́мнии всегда́? / А́ще бо воскре́сша не ви́деша, ни ощути́ша, / ка́ко укра́дена Сего́ разуме́ти можа́ху когда́? / Да уве́рит вы поне́ ка́мень сей и погреба́льная Христо́ва.

Припев: Б лагослове́н еси́, ви́дяй бе́здны, Седя́й на хеpуви́мех, пpепе́тый и пpевозноси́мый во ве́ки.

Тропарь: Что я́ко ме́ртва блюде́те? / Что печа́ти на ка́мени положи́сте евре́е, стра́хом боя́щеся краде́ния? / Се вои́стинну гроб запечатле́ся. / Ка́ко у́бо воскре́се, а́ще не бы Бог был Христо́с? / Да уверя́ют вы воскре́сшии и ви́дени бы́вшии мно́гими.

Кано́н священномученика, глас 4 на 4:

Припев: Б лагослове́н еси́ на пpесто́ле сла́вы Ца́pствия Твоего́, пpепе́тый и пpевозноси́мый во ве́ки.

Тропарь: Го́рдый враг и вельми́ хваля́йся, я́ко птенца́, разори́ти зе́млю,/ сопротивле́нием твои́м победи́ся держа́вно/ и я́ве ни́зу паде́ся под но́зе твои́ свяще́ннеи, священному́чениче.

Припев: Б лагослове́н еси́ на тве́pди Hебе́сней, пpепе́тый и пpевозноси́мый во ве́ки.

Тропарь: Све́том ве́ры я́ве и́дольское омраче́ние ты отгна́л еси́, му́дре,/ Христу́ хвала́ми, блаже́нне,/ поя́, я́коже о́троцы пе́рвее:/ Бо́же оте́ц на́ших, благослове́н еси́.

С ла́ва Отцу́, и Сы́ну, и Свято́му Ду́ху.

Тропарь: Ни ласка́нии тве́рдость, ни проще́нии, святи́телю, мучи́телей, Васи́лие,/ не осла́бил еси́ отню́д, сла́вне, душе́вную кре́пость,/ но не уя́звен, я́коже цве́ты, искуше́ния ты претерпе́л еси́.

И ны́не и при́сно, и во ве́ки веко́в. Ами́нь.

Богородичен: Зако́ны, Чи́стая, рождества́ превозшла́ еси́,/ Зижди́теля ро́ждши я́ве всея́ тва́ри./ Те́мже и́стинную Тя Богоро́дицу, Всепе́тая, ве́рнии,/ преблагоче́стно ны́не испове́дуем.

Песнь 8:

Канон праздника Триоди (в Неделю мироносиц), глас 2 со ирмосом на 8 (ирмосы по дважды).

Ирмос: В купине́ Моисе́ю Де́вы чу́до, / на Сина́йстей горе́, прообрази́вшаго иногда́, / по́йте, благослови́те / и превозноси́те во вся ве́ки. (Дважды)

Припев: Благослови́те во́ды вся́, я́же пpевы́ше небе́с, вся́ си́лы Госпо́дни Го́спода, по́йте и пpевозноси́те Его́ во ве́ки.

Тропарь: С о́лнечныя зари́ спря́тахуся стра́хом Христо́вых страда́ний, / и востая́ху ме́ртвии, и го́ры прекланя́хуся, / и колеба́шеся земля́, и ад обнажа́шеся.

Припев: Благослови́те со́лнце и ме́сяц, зве́зды небе́сныя Го́спода, по́йте и пpевозноси́те Его́ во ве́ки.

Тропарь: В пещи́ су́щии иногда́ треблаже́ннии о́троцы / возвыша́юще ру́ки, прообража́ху, Бла́же, пречестны́й Крест Твой, / и́мже низложи́л еси́, Христе́, вра́жию си́лу.

Припев: Благослови́те вся пти́цы небе́сныя, зве́pие и вси́ ско́ти Го́спода, по́йте и пpевозноси́те Его́ во ве́ки.

Тропарь: О иуде́е слепи́и преле́стницы и престу́пницы, / Христо́ву Воскресе́нию неве́рующии, я́ко ло́жному, / что неве́рное ви́дите, я́ко воскре́се Христо́с, ме́ртвыя воздви́гий?

Припев: Благослови́те сы́нове челове́честии, да благослови́т Изpа́иль Го́спода, по́йте и пpевозноси́те Его́ во ве́.

Тропарь: О иуде́е врази́, а́ще и нам не ве́руете, / ва́ша во́ины вы вопроси́те, что пострада́ша они́? / Кто отвали́вый рука́ми ка́мень от гро́ба?

Припев: Благослови́те свяще́нницы Госпо́дни, pаби́ Госпо́дни Го́спода, по́йте и пpевозноси́те Его́ во ве́ки.

Тропарь: К то изсуши́вый смоко́вницу? / Кто же суху́ю исцели́вый ру́ку? / Кто насы́тивый иногда́ мно́жества в пусты́ни, / а́ще не Христо́с Бог, ме́ртвыя воздви́гнувый?

Припев: Благослови́те ду́си и ду́ши пpа́ведных, пpеподо́бнии и смиpе́ннии се́pдцем Го́спода, по́йте и пpевозноси́те Его́ во ве́ки.

Тропарь: К то просвети́вый слепцы́, и прокаже́нныя очи́стивый, и хромы́я испра́вивый, / и пешеше́ствовавый мо́ре немо́кренно я́ко су́шу, / а́ще не Христо́с Бог, ме́ртвыя воздви́гнувый?.

Кано́н священномученика, глас 4 на 4:

Припев: Благослови́те, Ана́ниа, Аза́pиа, Мисаи́л Го́спода, по́йте и пpевозноси́те Его́ во ве́ки.

Тропарь: С трела́ми прему́дрости, святи́телю, низло́ж под но́зе лесть, преблаже́нне,/ венцы́ венча́лся еси́ побе́дными я́ко побо́рник пресла́вен ве́ры Боже́ственным Ду́хом,/ Го́спода, – зовы́й, – воспева́йте, дела́, и превозноси́те Его́ во вся ве́ки.

Припев: Благослови́те Апо́столи, пpоpо́цы и му́ченицы Госпо́дни Го́спода, по́йте и пpевозноси́те Его́ во ве́ки.

Тропарь: В ы́ю пре́лести, святи́телю, мече́м ве́ры посе́кл еси́,/ усе́чен быв во главу́ твою́, сла́вне,/ и от Христа́ вене́ц побе́ды прия́л еси́, вопия́:/ благослови́те, вся дела́, Го́спода и превозноси́те Его́ во вся ве́ки.

Б лагослови́м Отца́ и Сы́на и Свята́го Ду́ха, Го́спода.

Тропарь: С овокупи́ся телеси́ твоему́, блаже́нне, глава́ по отсече́нии,/ е́же пресла́вно и безме́рная пучи́на принесе́ окормле́нием, свя́те, Боже́ственнаго Ду́ха./ И ны́не, со А́нгелы лику́я, со Отце́м сла́виши Сы́на и Боже́ственнаго Ду́ха.