Евангелие от Иоанна, зачало 6.

Во вре́мя о́но, брак бысть в Ка́не Галиле́йстей, и бе Ма́ти Иису́сова ту. Зван же бысть Иису́с и ученицы́ Его́ на брак. И не доста́вшу вину́, глаго́ла Ма́ти Иису́сова к Нему́: вина́ не и́мут. Глаго́ла Ей Иису́с: что есть Мне и Тебе́, же́но? Не у́ прии́де час Мой. Глаго́ла Ма́ти Его́ слуга́м: е́же а́ще глаго́лет вам, сотвори́те. Бе́ху же ту водоно́сы ка́менни шесть, лежа́ще по очище́нию иуде́йску, вместя́щия по двема́ или́ трие́м ме́рам. Глаго́ла им Иису́с: напо́лните водоно́сы воды́. И напо́лниша их до верха́. И глаго́ла им: почерпи́те ны́не, и принеси́те архитрикли́нови. И принесо́ша. Я́коже вкуси́ архитрикли́н вина́ бы́вшаго от воды́, [и не ве́дяше отку́ду есть: слуги́ же ве́дяху поче́рпшии во́ду,] пригласи́ жениха́ архитрикли́н. И глаго́ла ему́: всяк челове́к пре́жде до́брое вино́ полага́ет, и егда́ упию́тся, тогда́ ху́ждшее: ты же соблю́л еси́ до́брое вино́ досе́ле. Се сотвори́ нача́ток зна́мением Иису́с в Ка́не Галиле́йстей, и яви́ сла́ву Свою́, и ве́роваша в Него́ ученицы́ Его́.

Священник: Мир ти́, благовеству́ющему.

Лик: Сла́ва Тебе́, Го́споди, сла́ва Тебе́.

 

Диакон: Рцем вси от всея́ души́, и от всего́ помышле́ния на́шего рцем.

Лик: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Лик: Го́споди, поми́луй.

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, имярек, и помина́ет и́хже хо́щет.

Лик: Го́споди, поми́луй, трижды.

Возглас от священника: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

 

Диакон: Го́споду помо́лимся.

Лик: Го́споди, поми́луй.

Священник молитву сию:

Го́споди Бо́же наш, во спаси́тельном Твое́м смотре́нии, сподо́бивый в Ка́не Галиле́йстей, честны́й показа́ти бра́к Твои́м прише́ствием: Сам ны́не рабы́ Твоя́, имярек, и имярек, я́же благоволи́л еси́ сочетава́тися друг дру́гу, в ми́ре и единомы́слии сохрани́, честны́й их брак покажи́, нескве́рное их ло́же соблюди́, непоро́чное их сожи́тельство пребыва́ти благоволи́, и сподо́би я́ в ста́рости масти́тей дости́гнути, чи́стым се́рдцем де́лающа за́поведи Твоя́.

Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, со безнача́льным Твои́м Отце́м, и всесвя́ты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

 

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Дне всего́ соверше́нна, свя́та, ми́рна и безгре́шна, у Го́спода про́сим.

Лик: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших, у Го́спода про́сим.

Лик: Пода́й, Го́споди.

До́брых и поле́зных душа́м нашим, и ми́ра мiрови, у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати.

 

И людие: О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник возглашает: Я́ко Твое́ есть Ца́рство, и си́ла, и сла́ва, Отца́, и Сына́, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ ва́ша Го́сподеви приклони́те.

Лик: Тебе́ Го́споди.

Таже приносится общая чаша, и благословляет ю священник, и глаголет молитву сию:

Диакон: Го́споду помо́лимся.

Лик: Го́споди, поми́луй.

Священник: Бо́же, вся сотвори́вый кре́постию Твое́ю, и утверди́вый вселе́нную, и украси́вый вене́ц всех сотворе́нных от Тебе́, и ча́шу о́бщую сию́ подава́яй сочетава́ющимся ко обще́нию бра́ка, благослови́ благослове́нием духо́вным.

Возгласно: Я́ко благослови́ся Твое́ и́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

 

Таже взем священник в руку общую чашу, преподает им трижды: первее мужу, и потом жене.

И абие прием я священник, куму держащу созади венцы, обращает яко образом круга. И поет священник, или людие настоящия тропари, во глас 5:

Иса́ие, лику́й, / Де́ва име́ во чре́ве / и роди́ Сы́на Емману́ила, / Бо́га же и Челове́ка, / Восто́к и́мя Ему́, / Его́ же велича́юще, / Де́ву ублажа́ем.

Инии, глас 7:

Святи́и му́ченицы, / до́бре страда́льчествовавшии, и венча́вшиися, / моли́теся ко Го́споду, / поми́ловатися душа́м на́шим.

Сла́ва Тебе́, Христе́ Бо́же, / апо́столом похвало́, / му́чеников ра́дование, / и́хже про́поведь, Тро́ица Единосу́щная.

Таже взем венец жениха, глаголет:

Возвели́чися женише́ я́коже Авраа́м, и благослови́ся я́коже Исаа́к, и умно́жися я́коже Иа́ков, ходя́й в ми́ре, и де́лаяй в пра́вде за́поведи Бо́жия.

И внегда взяти венец невесты, глаголет:

И ты, неве́сто, возвели́чися я́коже Са́рра, и возвесели́ся я́коже Реве́кка, и умно́жися я́коже Рахи́ль. Веселя́щися о свое́м му́же, храня́щи преде́лы зако́на: зане́ та́ко бла́говоли́ Бог.

Диакон: Го́споду помо́лимся.

Лик: Го́споди, поми́луй.

Священник молитву:

Бо́же, Бо́же наш, прише́дый в Ка́ну Галиле́йскую, и та́мошний брак благослови́вый, благослови́ и рабы́ Твоя́ сия́, Твои́м про́мыслом ко обще́нию бра́ка сочета́вшияся: благослови́ их вхо́ды и исхо́ды, умно́жи во благи́х живо́т их: восприими́ венцы́ их в Ца́рствии Твое́м, нескве́рны, и непоро́чны, и ненаве́тны соблюда́яй, во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ ва́ша Го́сподеви приклони́те.

Лик: Тебе́ Го́споди.

И молится священник:

Оте́ц, Сын, и Святы́й Дух, всесвята́я, и единосу́щная, и живонача́льная Тро́ица, еди́но Божество́ и ца́рство, да благослови́т вас, и да пода́ст вам долгожи́тие, благоча́дие, преспе́яние живота́ и ве́ры, и да испо́лнит вас всех су́щих на земли́ благи́х: да сподо́бит вас и обеща́нных благ восприя́тия, моли́твами Святы́я Богоро́дицы, и всех святы́х, ами́нь.

Таже входят, и поздравляют их, и целование друг друга, и бывает от священника совершенный отпуст.

Рекшу диакону: Прему́дрость.

[Священник: Пресвята́я Богоро́дице, спаси́ нас.]

Лик: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

Священник отпуст:

И́же в Ка́не Галиле́йстей прише́ствием Свои́м че́стен брак показа́вый, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, святы́х боговенча́нных царе́й и равноапо́столов, Константи́на и Еле́ны, свята́го великому́ченика Проко́пия, и всех святы́х, поми́лует и спасе́т нас, я́ко бла́г и человеколю́бец.

 

 

В оглавление.

 

МОЛИТВА
НА РАЗРЕШЕНИЕ ВЕНЦЕВ,
ВО ОСМЫЙ ДЕНЬ

Священник: Го́споди Бо́же наш, вене́ц ле́та благослови́вый, и сия́ венцы́ возложи́ти преда́вый зако́ном бра́ка, сочетава́ющимся друг дру́гу, и мзду а́ки отдая́ им целому́дрия: зане́ чи́сти ко и́же от Тебе́ узаконоположе́нному бра́ку сочета́шася: Сам и в разреше́нии сих венце́в, сочета́вшихся друг дру́гу благослови́, и сочета́ние их нерастерза́емо соблюди́: да благодаря́т вы́ну всесвято́е и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ ва́ша Го́сподеви приклони́те.

Лик: Тебе́ Го́споди.

Священник: Согла́сная дости́гше раби́ Твои́, Го́споди, и после́дование соверши́вше в Ка́не Галиле́йстей бра́ка, и спря́тавше я́же в нем зна́мения, сла́ву Тебе́ возсыла́ют, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

И отпуст.

 

 

В оглавление.

 

ЧИН, ЕГДА СЛУЧИТСЯ
ВСКОРЕ ВЕЛЬМИ
БОЛЬНОМУ ДАТИ ПРИЧАСТИЕ

Приемлет иерей часть от Святых Таин, влагает в потир и вливает мало вина, якоже мощно больному удобь прияти то.

И начинает: Благослове́н Бог наш всегда́, ны́не и при́сно, и во ве́ки веко́в.

Таже, Трисвятое. По О́тче наш: Го́споди, поми́луй, 12. Прииди́те поклони́мся: трижды.

Символ веры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Таже глаголет:

Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.

Слава: Царю́ Небе́сный, Уте́шителю, Ду́ше И́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

И ныне, Богородичен: Бо́га из Тебе́ воплоти́вшагося разуме́хом, Богоро́дице Де́во, Того́ моли́ спасти́ ду́ши на́ша.

Го́споди, поми́луй, 40.

Таже молитву сию:

Влады́ко Го́споди Иису́се Христе́ Спа́се наш, еди́не име́яй власть отпуща́ти грехи́, я́ко благ и человеколю́бец Бог, пре́зри вся, я́же в ве́дении и неве́дении согреше́ния раба́ Твоего́, имярек, без осужде́ния сподо́би его́ прия́ти пречи́стых Та́ин Твои́х, не в муче́ние, ни в приложе́ние грехо́в, но во очище́ние души́ и те́ла, и во обруче́ние Ца́рствия Твоего́. Я́ко по́мощь еси́, и стена́ тве́рда, и возбране́ние проти́вному, и очище́ние согреше́нием его́. Я́ко ми́лостив и человеколю́бец Бог еси́, и Тебе́ сла́ву возсыла́ем со Отце́м и Святы́м Ду́хом.

Молитва вторая:

Го́споди, вем, я́ко несмь досто́ин, да под кров мой вни́деши, в дом души́ моея́, зане́ вся пуста́ и па́дшаяся есть, и не и́маши во мне ме́ста досто́йна, где главу́ подклони́ти, но поне́же хо́щеши бы́ти со мно́ю, на щедро́ты Твоя́ наде́явся прихожду́ к Тебе́. Повели́ две́ри отве́рсти недосто́йных мои́х уст, да Тебе́ еди́наго насы́щуся; вни́ди в мя, и очи́сти мя от вся́кия скве́рны плотски́я и душе́вныя. Бу́ди ми помо́щник и засту́пник, и сподо́би мя одесну́ю Тебе́ ста́ти моли́твами и моле́нием Пречи́стыя Влады́чицы на́шея Богоро́дицы и Присноде́вы Мари́и и всех святы́х, и́же от ве́ка Тебе́ угоди́вших, я́ко благослове́н еси́ во ве́ки, ами́нь.

Молитва третия:

Госпо́дь Бог преми́лостивый да уще́дрит тя. Госпо́дь Иису́с Христо́с вся́кая проше́ния блага́я да пода́ст тебе́. Госпо́дь всемоги́й да изба́вит тя от вся́кия напа́сти. Госпо́дь да научи́т тя. Госпо́дь да вразуми́т тя. Госпо́дь да помо́жет ти. Госпо́дь да спасе́т тя. Госпо́дь да защити́т тя. Госпо́дь да сохрани́т тя. Госпо́дь да очи́стит тя. Госпо́дь ра́дости духо́вныя да испо́лнит тя. Госпо́дь души́ и те́лу твоему́ да бу́дет засту́пник. Госпо́дь, я́ко милосе́рд и благи́й Человеколю́бец, проще́ние грехо́в да пода́ст тебе́. Госпо́дь Бог Иису́с Христо́с, в де́нь су́дный да поми́лует тя, и да благослови́т тя во вся дни живота́ твоего́. Я́ко Тому́ подоба́ет вся́кая сла́ва, честь и поклоне́ние, со безнача́льным Его́ Отце́м, и с пресвяты́м, благи́м, и животворя́щим Его́ Ду́хом, ны́не и при́сно, и во ве́ки веко́в, ами́нь.

И аще будет больный прежде сего исповедался, то абие причащает его Святых Таин. Аще же ни, повелевает иерей мало отступити ту сущим, и вопрошает его о согрешениих различных и многообразных, тщася, да ничтоже утаено, или срама ради не исповедано будет тогда.

И по исповедании, глаголет иерей молитву сию:

Го́споди Бо́же наш, Петро́ви и блудни́це слеза́ми грехи́ оста́вивый, и мытаря́ позна́вшаго своя́ прегреше́ния оправда́вый, приими́ исповеда́ние раба́ Твоего́ [или рабы́ Твоея́] имярек, и е́же Ти согреши́, во́льныя его́ [или ея́] грехи́ и нево́льныя сло́вом или́ де́лом, или́ помышле́нием, я́ко бла́г пре́зри. Ты бо еди́н власть и́маши отпуща́ти грехи́, я́ко Бог ми́лостем и щедро́там еси́ и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

По причащении глаголет:

Ны́не отпуща́еши раба́ Твоего́, Влады́ко, по глаго́лу Твоему́ с ми́ром, я́ко ви́деста о́чи мои́ спасе́ние Твое́, е́же еси́ угото́вал пред лице́м всех люде́й, свет во открове́ние язы́ков и сла́ву люде́й Твои́х Изра́иля.

Таже. Трисвятое. По О́тче наш: Тропарь дне.

Слава, и ныне, Богородичен:

Моли́твами Го́споди всех святы́х и Богоро́дицы Твой мир даждь нам, и поми́луй нас, я́ко Еди́н Щедр.

Го́споди, поми́луй, трижды. Благослови́.

И отпуст настоящаго дне.

 

 

В оглавление.

 

ПОСЛЕДОВАНИЕ СВЯТАГО ЕЛЕЯ,
ПЕВАЕМОЕ
ОТ СЕДМИ СВЯЩЕННИКОВ,
СОБРАВШИХСЯ В ЦЕРКВИ
ИЛИ В ДОМУ

Поставляется столец, на немже блюдо со пшеницею, и верху пшеницы кандило праздное. Окрест же пшеницы водружают во пшеницу седмь стручец обвитых бумагою к помазанию, и святое Евангелие, и даются священником всем свещи. Ставше же окрест тетрапода, облечени вси в фелони, вземлет первый священников кадильницу с фимиамом, и кадит окрест стола елей на нем сущий, и всю церковь, или дом, и люди: и став пред столом, зря к востоком, начинает:

Священник: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь. Трисвятое. Пресвята́я Тро́ице: О́тче наш: Священник: Я́ко Твое́ есть Ца́рство: Чтец: Ами́нь. Го́споди, поми́луй, 12. Прииди́те, поклони́мся: трижды.

И псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Слава, и ныне: Аллилу́иа, трижды.

Диакон же глаголет малую ектению:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглашает священник: Я́ко подоба́ет Тебе́ вся́кая сла́ва, честь, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.