И стихиры Пасхи с припевы их, глас 5.

Стих: Да воскре́снет Бог, / и расточа́тся врази́ Его́.

Па́сха / свяще́нная нам днесь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския нам отверза́ющая. / Па́сха всех освяща́ющая ве́рных.

Стих: Я́ко исчеза́ет дым, / да исче́знут.

Прииди́те / от виде́ния жены́ благове́стницы, / и Сио́ну рцы́те: / приими́ / от нас ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.

Стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́, / предста́вша гро́бу Живода́вца, / обрето́ша А́нгела / на ка́мени седя́ща, / и той провеща́в им, / си́це глаго́лаше: / что и́щете Жива́го с ме́ртвыми; / что пла́чете Нетле́ннаго во тли? / Ше́дше, пропове́дите ученико́м Его́.

Стих: Сей день, его́же сотвори Госпо́дь, / возра́дуемся и возвесели́мся в онь.

Па́сха кра́сная, / Па́сха, Госпо́дня Па́сха! / Па́сха всечестна́я / нам возсия́. Па́сха, / ра́достию друг дру́га обы́мем. / О Па́сха! / Избавле́ние ско́рби, / и́бо из гро́ба днесь, / я́ко от черто́га / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Слава, и ныне, глас 5: Воскресе́ния день, / и просвети́мся торжество́м, / и друг дру́га обы́мем. / Рцем бра́тие, / и ненави́дящим нас, / прости́м вся Воскресе́нием, / и та́ко возопии́м: / Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

Таже настоящий тропарь,
во глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И ектении, и отпуст. И час 1-й. Сице же бывает служба Утрени во всю седмицу Светлую. Творим же и литию вне обители.

Подобает ведати, я́ко творим исхождение днесь вне монастыря, предносяще хоругви. В руках же держаще святое Евангелие, честный Крест, и иконы Воскресе́ния Христо́ва, Пречистыя Богоро́дицы. Поем канон Пасхи с Богородичны, на 8. И Катавасия, ирмос тойже. По 6-й песни, последи Евангелиа глаголем: Воскресе́ние Христо́во ви́девше: трижды. Таже, стихира: Воскрес Иису́с от гро́ба: трижды. Таже, 7-я, 8-я и 9-я песни. И прочее молебна.

НА ЛИТУРГИИ

Антифоны Пасхи непременно, якоже указася в Неделю Пасхи.

Прокимен Апостола, глас 8: Во всю зе́млю изы́де веща́ние их, / и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Апостол в Деяниих, зачало 2.
[Деян. 1, 12 – 17, 21 – 26.]

Во дни о́ны, возврати́шася апо́столи во Иерусали́м от горы́ нарица́емыя Елео́н, я́же есть близ Иерусали́ма, суббо́ты иму́щия путь. И егда́ внидо́ша, взыдо́ша на го́рницу, иде́же бя́ху пребыва́юще, Петр же и Иа́ков, и Иоа́нн, и Андре́й, Фили́пп и Фома́, Варфоломе́й и Матфе́й, Иа́ков Алфе́ов и Си́мон Зило́т, и Иу́да Иа́ковль. Си́и вси бя́ху терпя́ще единоду́шно в моли́тве и моле́нии, с жена́ми и Мари́ею Ма́терию Иису́совою, и с бра́тиею Его́. И во дни ты́я воста́в Петр посреде́ учени́к, рече́, бе же име́н наро́да вку́пе я́ко сто и два́десять: му́жие бра́тие, подоба́ше сконча́тися Писа́нию сему́, е́же предрече́ Дух Святы́й усты́ Дави́довыми о Иу́де, бы́вшем вожди́ е́мшим Иису́са, я́ко причте́н бе с на́ми и прия́л бя́ше жре́бий слу́жбы сея́. Подоба́ет у́бо от сходи́вшихся с на́ми муже́й во вся́ко ле́то, в не́же вни́де и изы́де в нас Госпо́дь Иису́с, наче́н от креще́ния Иоа́ннова да́же до дне, во́ньже вознесе́ся (на не́бо) от нас, свиде́телю воскресе́ния Его́ бы́ти с на́ми еди́ному от сих. И поста́виша два, Ио́сифа нарица́емаго Варса́ву, и́же нарече́н бысть Иу́ст, и Матфи́а. И помоли́вшеся ре́ша: Ты, Го́споди, Сердцеве́дче всех, покажи́, его́же избра́л еси́ от сею́ двою́ еди́наго, прия́ти жре́бий служе́ния сего́ и апо́стольства, из него́же испаде́ Иу́да, ити́ в ме́сто свое́. И да́ша жре́бия и́ма, и паде́ жре́бий на Матфи́а, и причте́н бысть ко единона́десяти апо́столом.

Аллилуиа, глас 1: Испове́дят небеса́ чудеса́ Твоя́, Го́споди. Стих: Бог прославля́емь в сове́те святы́х.

Евангелие от Иоанна, зачало 2.
[Ин. 1, 18 – 28.]

Бо́га никто́же ви́де нигде́же: Единоро́дный Сын, сый в ло́не О́тчи, Той испове́да. И сие́ есть свиде́тельство Иоа́нново, егда́ посла́ша жи́дове от Иерусали́ма иере́ев и леви́тов, да вопро́сят его́: ты кто еси́? И испове́да и не отве́ржеся: и испове́да, я́ко несмь аз Христо́с. И вопроси́ша его́: что у́бо? Илиа́ ли еси́ ты? И глаго́ла: несмь. Проро́к ли еси́? И отвеща́: ни. Ре́ша же ему́: кто еси́? Да отве́т да́мы посла́вшим ны. Что глаго́леши о тебе́ само́м? Рече́: аз глас вопию́щаго в пусты́ни, испра́вите путь Госпо́день, я́коже рече́ Иса́иа проро́к. И по́сланнии бе́ху от фарисе́й. И вопроси́ша его́ и ре́ша ему́: что у́бо креща́еши, а́ще ты не́си Христо́с, ни Илиа́, ни проро́к? Отвеща́ им Иоа́нн, глаго́ля: аз креща́ю водо́ю, посреде́ же вас стои́т, Его́же вы не ве́сте. Той есть Гряды́й по мне, И́же предо мно́ю бысть, Ему́же несмь аз досто́ин, да отрешу́ реме́нь сапогу́ Его́. Сия́ в Вифава́ре бы́ша об он пол Иорда́на, иде́же бе Иоа́нн крестя́.

Причастный:

Те́ло Христо́во приими́те, / исто́чника безсме́ртнаго вкуси́те. / Аллилу́иа. трижды.

На трапезе бывает утешение великое братии.

В оглавление

НЕДЕЛЯ АНТИПАСХИ

Еже есть осязание святаго славнаго апостола Фомы. Ведати подобает, яко в сей святой второй Недели Антипасхи не поются воскресная, но вся праздника.

В СУББОТУ ВЕЧЕРА

Клеплет параекклисиарх, и собравшеся в притвор, благословившу иерею, глаголем: Христо́с воскре́се: трижды. И обычный 9-й час трипсалмный, якоже на всяк день.