Статья 12. Только беспечно живущие не уразумеют воцарения антихристова.

1) Беседы св. Иоанна Златоустого на евангелие

611 Якоже беху во дни Ноевы, ядуще и пище, женящеся и посягающе, до него же дне вниде Ное в ковчег, и не уведеша, Дóндеже прииде вода, и взят вся: тако будет и пришествие Сына человеческого.

Сия же рече являя, яко внезапу приидет и нечаяние, и множайшим в сластех живущим. Ибо Павел о сем пиша тако глаголет: Егда рекут: мир и утверждение, тогда внезапу нападет на них всегубительство. И яко то будет нечаянно, являя глаше: якоже болезнь во чреве имущей.

Како убо рече по скорби дней онех? Аще бо наслаждении тогда, и мир, и утверждении, якоже Павел рече, како глаголет по скорби дней онех? Аще наслаждение, како скорбь? Наслаждение нечувственне пребывающим и мир. Сего бо ради не рече, когда же будет мир, но когда рекут мир и утверждение, нечувствие их показуя, якоже бывших при Ное, когда в таковых злых наслаждахуся. Праведнии же не тако, но в скорби и печали они пребываху. Отсюду показует, яко Антихристу пришедшу, безместные сласти умножатся в законопреступных и своего спасения отчаявшихся. Тогда чревообъядение и козлогласования, тогда и пиянство. Темже и наипаче указание полагает приличествующее вещи. Якоже бо ковчегу бываему не вероваху, рече, но предлежаше ковчег посреде, будущая предвозвещая злая. Они же зряще его, яко ни единому же быти имущу злу, тако наслаждахуся: тако и ныне, аще и явится Антихрист, по нем же и скончание, и муки в скончании, и мучения нестерпимая. Обаче пиянством злобы содержимии ниже страх ощутят быти имущих. Тем же и Павел рече: якоже болезнь во чреве имущей, тако им предстанут страшная оная и неизбежная.

И чесо ради не рече бывшая в Содомех злая? Всеобщее восхоте предложити указание, ему же и по предлаголании не вероваху. Сего убо ради, понеже от многих будущая не веруются, от пришедших сия уверяет, подвизая их мысль. С реченными же и то показует, яко и прежде бывшая он сотворил есть.

2) Благовестник

612 Евангелие. Зачало 57. И якоже бысть во дни Ноевы, тако будет и во дни сына человеческа, ядяху пияху, женяхуся, посягаху, до него же дне вниде Ной в ковчег, и прииде потоп и погуби вся. Такожде, и якоже бысть во дни лотовы, Ядяху, пияху, куповаху, продаяху, саждаху, здааху, в онь же день изыде Лот от содомлян, одожди камы горяща, и огнь с небесе, и погуби вся. По тому же будет и в день, в оньже сын человеческий явится.

Толкование: Сего ради внезапу и нечаемо свое пришествие являет, якоже при Ное внезапу прииде потоп, и потопи вся: тако будет и пришествие его. Являет же указа ради и сего потопом на человеки, и еже на содомляны, яко антихристу пришедшу, безместными сластьми обложши будут человецы: блудницы будут, и в беззакония сласти отдадятся, еже и апостолом рече, яко в последние дни будут человецы, сластолюбцы паче, нежели боголюбцы. И достойно в царьство льстеца процветут злая, лукавство и всякого греха жилище, то нечисто инаково житие сотворити окаянный тогда человеческий род.

От нечиста бо кто очистится? будут бо тогда человецы во всякой пищи, якоже и при Ное, ничтоже зла нечаст, но и не веруют, еже им кто о каком чем случитися глаголет, якоже при Ное и Лоте.

Евангелие. В тот день иже будет на кровле, и сосуды его в дому, да не слазит взяти их. И иже на селе, такожде да не возвратится вспять. Поминайте жену лотову, и иже аще взыщет душу свою спасти, погубит ю. И иже аще погубит ю, живит ю.

Толкование: В тот же день антихристова пришествия, сый на кровле, еже есть на высоте добродетели, да не слазит, ни же ослабеет, коего ради извета житейского. Все бо житейское глаголются сосуди быти человеком, ино убо к добродетели, ино же к злобе слагаемо: тем ни иже на высоте добродетели стояй, слазит житейских деля, и отпадет своея высоты, но да стоит противу злобе, и да не умолчит. И иже на селе такожде, да не возвратится вспять, но на предь простирается. Якоже и инде рече: никто же возлож руки своея на рало, и обращься вспять, управлен есть в царство небесное, носит же указ на жену Лотову, яже возвращьшися, в столп слан сседеся. Се же есть не отшедши злобе, но пребыв тоя слабости до конца зла бывши. Также приводит последование выше реченым: иже взыщет душу свою спасти, погубит ю. Да не тщится рече кто, во антихристово гонение, спасая свою душу, погубит бо ю. Иже бо аще отдаст сам ся закланию, и спроста ведам спасется, не покорився мучителю животолюбия ради, якоже и выше рече. Якоже и на высоте добродетели, житейских ради вещей да не сходит, и закоснети имения ради, или стяжаний. Тако и ныне путь протворяя, рече: И что глаголю, яко не сходи сосуд ради? Ни же разве прежних ради добродетелей? Ни же самоя тоя души ради снабдения, приими поклонитися льстецу и гонителю.

3) Преподобного Ефрема Сирина

613 Всем бо имущим благовидение Божие и разум тогда, разумно будет пришествие мучителя. А имущим присно ум в вещех жития сего, и любящим земная, не разумно се будет, привязаны бо суть в вещах житейских, аще и услышат слово, то не имут веры.