Статья 8. Кланяться будут антихристу яко богу

1) Библия

583 Чюдися вся земля в след звери, и поклонишася змию, иже даст область зверю, и поколонишася зверю глаголюще кто подобен зверю, и кто может ратоватися с ним? и Даны быша ему уста глаголюща велика и хулна. И дана бысть ему область творити месяц четыредесять два, и отверзе уста своя в хуление к Богу, хулити имя его, и селение его, и живущая на небеси и дано бысть ему брань творити со святыми, и победити я. И дана бысть ему область на всяком колене людей, и на языцех и племенах. И поклонятся ему вси живущие на земли, им же не написаны суть имена в книгах животных агнца заколеного от сложения миру. Аще кто имать ухо да слышит, иже аще в пленение ведет, в пленение пойдет. Аще кто оружием убит, подобает ему оружием убиену быти. Здесь есть терпение и вера святых. И видев ин зверь восходящ от земли. И имяше рога два, подобна агньчим, и глаше яко змий, и власть первого зверя всю творяше пред ним, и творяше землю и вся живущая на ней, поклонитися первому зверю, ему же исцелена бысть язва смертная, и сотвори чудеса велика, да и огнь сотворит сходити с небес на землю пред человеки. И льстит живущих на земле, ради знамений, яже дана быша ему пред зверем творити, глагола живущим на земли, сотворити образ зверя. И иже имать язву оружную, и жив бысть, и дано бысть ему дати дух образу зверину да проглаголит икона зверина и сотворит да иже аще не поклонится образу звериному убиен будет.

2) Беседы св. Иоанна Златоустого на 14 посланий св. апостола Павла

584 Рече же негде и об антихристе, когда глаголаше (Спаситель): Аз приидох от Имени Отца моего, и не приясте мя: аще ин прииде о имени своем, оного приимете. И частые же и неизглаголанные беды, знамение быти глаголаше: и яко Илии подобает приити. Недоумевахуся убо тогда Солуняне о сих. Нам же полезно бысть онех недоумение. Не оным бо точию, но и нам сия суть полезная: да басней детинных, и блядий бабских свободимся. Или не слышасти многажды сущеи в детех и о имени антихристове многая глаголющу некоих, и о еже преклонити колена; еще бо мягким сущим мыслим нашим насевает сия диавол, да с нами догмат возрастет, да прельстити возможет. Не оставил бы убо сия Павел об антихристе беседуя, аще бы полезная быша. Да не убо взыскуем сих. Не бо тако приидет преклоняяй колена, но превозношаяся над всякого глаголемого Бога, или чтилища, яко тому в церкви Божией аки Богу сести, показующу себе яко бог есть. Якоже бо диавол от превозношения паде, тако и действуемый от него в превозношение помазуемый.

К сему читай выписку из сих же Бесед в 4 статье сего же отделения, под числом 2 (стр. 414).

3) Преподобного Ефрема Сирина

585 Яко вси приемшии печать антихристову, и поклоншеся ему яко богови святому, не имут убо части во Христово пришествие, но со змием вложени будут в геену. Блажен есть иже обретыйся крепок, и верно имея сердце свое к Богу, не сумняся врага, но без страха ему отвещает, и вопрошения его похулит, нерадя ни о муках, ни о страстях привидения его.

4) Апостол Толковый

586 Апостол. И сего ради послет им бог действо лести, во еже веровать им лжи, да суд приимут вси не веровавшии истине, но благоволиша о неправде.

Злат. Еже послет приити от Бога сущее попущение, действо веща лести, рекше лесть деяти прельстити могущу виждь же крепость слову, не рече да мучатся, ибо мучени будут вси неверовашие Христови. Почто же не вероваша Христу, яко веща речеся, Господь Бог твой, Бог един есть. Но слышаша прежде Троицу проповедаему, зриши ли Христу не вероваша яко есть Бог, антихристу же яко богу веруют и покланяются.

Что же рекут яко знамения творит? Не множайшая ли и бо́льшая сотвори Христос? И от писания свидетельствуем.

И кто убо Христос? Спаситель? Кто же антихрист? Губяй свидетельствуется.

Что же вредит верныя пришествие его? Вина венцем будет, прельстит же погибающих, ибо в тех единех может.

То же и в Макарьевскοй Μинее, месяц Октябрь, лист 1065, столб. 1.

5) Соборник Большой

587 (Антихрист) умножит знамения ложные, людям бо всем восхваляющим его мечтаний ради. Воззовет гласом крепким яко поколебаться месту, в нем множества тому предстоят. Разумейте люди, колена, язы́цы, мою великую власть и силу, и крепость моего царства, кто силен якоже аз? кто Бог велий разве мене? Кто власти моей супротивостанет?

588 Тажде повеления его скверные на каждый град послет и в законения по всех странах с бесы же и с чувственными человеками глаголюща, яко царь велий явися всей земли, приидите вси и видите крепость его и силу. Сей бо и живот вам подаст, и вино вам дарует, и богатство многоценно, и чести великие. Повелением бо его вся земля и море послушают, приидите вси к нему, и вси тесноты ради пищной к нему приидут, и поклонятся ему.

589 И отрицаюся еже паче должно есть глаголати, понеже бо и прежде слуг ради своих супостат враг, сиречь идолослужителей, мученикам Христовым повелит глаголя, отрецытеся распятого, и идолом поклонитеся! Таково нечто и при добру ненавистнице будет. Отрицаюся глаголюще печати творца небу и земли, отрицаюся, крещения, отрицаюся службы моея, и тебе прилагаюся и верую.

590 Тогда послет в горы и в вертепы и в пропасти земной бесовския полки, во еже взыскати и изобрести, скрывшияся от очию его, и тех привести на поклонение ему.

5) Макарьевская Минея

591 Противу положится, и превземлется, своею гордостью не токмо на всех Бога, но и на идолы. Не бо яко к идолослужению приведе человеки. Но тому самому яко Богу поклонитися.