Статья 2. Обращение иудеев тогда будет, когда исполнение языков внидет. Сие и Илии поможет ко обращению иудеев

1) Беседы св. Иоанна Златоустого на 14 посланий св. апостола Павла

547 Не бо хощу вас неведети, братие, тайну сею, да не будете у себе мудры. Тайну здесь, неведомое и несказанное глаголя, и многое убо чудо, многое же нечаемое против всех мнений имущее: якоже и инде глаголет, Се тайну вам глаголю: вси убо не умрем, вси же изменимся. Кая убо есть тайна?

Яко ослеплении Исраилеви отчасти бысть. Исполнение языком внидет, и тако весь Израиль спасется: якоже есть писано. Здесь паки биет Иудея, мняйся утоляти Язычника, а еже глаголет сице ов есть, еже и прежде глаголаше, яко не от всецелого неверствие, но от части. Яко когда глаголет: аще ли кто опечалил есть, не мене опечалил, от части [да не отягчу] всех вас. И аще вас первее от части насыщуся. Такожде же и здесь глаголет сие еже вышше глаголаше. Не отринул Бог людей своих их же пред уведе. И паки, что убо? согрешиша да отпадут? да не будет. Се же и здесь глаголет: яко не всецел привлачит язык, но яко и ныне уже многие вероваша, и хотят паки веровати. Посем понеже велие обещася, приводит свидетеля пророка сице глаголюща: Яко убо ослепление бысть, не приводит свидетельства [ибо явленно всем бе] а яко уверят и спасутся. Исаию паки приводит вопиюща, и глаголюща: Приидет от Сиона избавляя, и отврати нечестие Иакова. Также незнаменательное спасения полагая да не некто прежняя лета сие привлечет и спряжет, рече: И сей им от меня завет, егда отыму грехи их. Не когда обретжутся, не когда пожрут, не когда иная законная творят, но когда грехов получат оставление, аще бо сие обещано бысть, и на них же еще не бысть, ни же прияша крещением оставление, всячески будет: тем же и наведе. Нераскаянная бо дарования, и звание Божие. И ни же сим токмо утешает сих, но и уже случившимся и еже от последования случися, се аки предводительное полагает сице глаголя:

По благовествованию убо, враги вас ради: по избрании же, возлюбленни отца ради. Да не величает бо ся язычник, глаголя: аз стою, не глаголи ми что бы было, но что бысть, и отовсюду утоляет их глаголя: По благовествованию убо, врази вас ради. Понеже вы звани бысте, любоприятельнейшие быша они, но обаче Бог ни же тако пресече ваше звание: но ожидает всех иже от язык хотящих веровати, да внийдут, и тогда и они прейдут. Посем дарует им и иную некую благодать глаголя: По избранию же возлюбленнии отец ради. И что сие; зде бо убо враги. Мука их есть: а идеже возлюбленни? Ничесоже к ним прародителей добродетель, аще не уверят. Но обаче, якоже предварив рех. Не предстает словесы утешая их, да привлечет: тем же и отнюду устрояя прежде реченное, глаголет:

Яко же бо и вы иногда противитесь Богови, ине же помилованы бысте сих противлением: Тако и сии ныне противящиеся, Вашей Милости: да и те помилованы будут. Затвори бо всех Бог в противление, да всех помилует.

Показуя зде иже от язык первее званных: посем понеже не восхотеша, Иудеев избранных, и то же паки случившееся по сих. Елма бо не восхотеша Иудеи веровати, паки приведены быша языци, но не даже до сего поставляет, ни же в отвержение их обращает все, но в еже и тем помилованным быти паки. Зри колико дает сущим от язык: елико прежде Иудеям. Понеже бо вы иногда сущии от Язык противитеся, рече: приступиша Иудеи, паки понеже сии противишася – приступите вы. Не убо до конца погибнут. Затворил бо Бог всех в противление, сиречь, обличи, показал не покоряющихся: не да пребудут противящимися, но да иных спасет иных любопрением, сих оными, а оных сими. Смотри же:

Противитесь вы, а сии спасошася: паки сии противятся, а вы спасётесь. Не убо тако спасётесь, яко паки изыйти, якоже Иудеи, но еже тыя привлещи в ревности пребывающе. О, глубина богатства и премудростей и разума Божия! Коль не испытаны судьбы его! Здесь на прежняя лета возвратился и еже свыше Божие уразумев смотрение сущее отнелиже мир бысть даже до настоящего, и помыслив, как различно всё устроил есть, удивися и возопи, уверяя слышащих яко будут всячески яже рече. Ибо не бы возопил и удивился, аще не всяко хотело бы сие быти.

2) Беседы св. Иоанна Златоустого на евангелие

548 Се послю вам Илию Фесвитянина, иже устроит сердце отца к сыну, да не пришед поражу землю в конец. Видиши ли опасство пророческого речения? когда бо Иоанна Илию нарече Христос общего их ради служения, то да не возомниши яко сие, и от пророка глаголется ныне, приложи его и отечество рек, Фесвитянина: Иоанн же не бе Фесвитянин. И ино же с сим знамением полагает глаголя: да не пришед поражу землю в конец, второе его страшное являя пришествие, в первом бо не прииде поразити землю. Не прийдох бо, рече, да сужу мирови, но да спасу мир. Являя убо, яко прежде оного суд имеющего пришествия прийдет Фесвитянин, сие рече, и вину вкупе объявляет пришествия его. Какая же вина? да пришед увещает Иудеев веровати Христу, и да не все в конец погибнут пришедшу ему. Тем же убо и сам то им приводя на память, рече: и устроит вся, сиречь, исправит неверие Иудеев тогда обретаемых. Тем же и зело опасне рече: не глагола бо, обратить сердце сына ко отцу, но отца к сну. Понеже бо отцы беху Апостолом Иудее, сие глаголет, яко обратит ученьями сынов их, сиречь, Апостолов, сердца отцов, сиречь, рода Иудейского мысль.

549 Аще же глаголет кто: Чесо ради не и ныне Илию воскресив посла, аще толикая с пришествием его свидетельствует имущая прийти благая? Речем, яко и ныне Христа мняще Илию быти, не вероваху ему. Ови бо, рече Илию тебе глаголют, ови же Иеремию. И между Иоанном такоже и Илию ни едино же бе различие, точию время едино. Како убо тогда, веровать имут речеши? Ибо, тогда устроит вся, не яко знаем будет токмо, но яко и слава Христова до дне оного множде прострется, и всем паче Илии будет явственнейша. Когда убо толикой предыдущей славе и ожиданию, приидет он согласное сему проповедуя, и возвещая и сам Иисуса, удобнейше примут глаголемая.