Эмиссия газов от очистных сооружений канализации: В последние годы внимание мирового сообщества сосредоточено на экологических проблемах...
Общие условия выбора системы дренажа: Система дренажа выбирается в зависимости от характера защищаемого...
Топ:
Характеристика АТП и сварочно-жестяницкого участка: Транспорт в настоящее время является одной из важнейших отраслей народного хозяйства...
Проблема типологии научных революций: Глобальные научные революции и типы научной рациональности...
Интересное:
Уполаживание и террасирование склонов: Если глубина оврага более 5 м необходимо устройство берм. Варианты использования оврагов для градостроительных целей...
Берегоукрепление оползневых склонов: На прибрежных склонах основной причиной развития оползневых процессов является подмыв водами рек естественных склонов...
Подходы к решению темы фильма: Существует три основных типа исторического фильма, имеющих между собой много общего...
Дисциплины:
2017-06-02 | 488 |
5.00
из
|
Заказать работу |
|
|
Еуэщ-еIэри, зэрыжаIэмкIэ, Къуиижь ЦIыкIу Шэчэр Iуфэ Iусти, щхьэ блырыбл афIэту иныжьибл къакIуэри и щIы кIапэм къытетIысхьащ. КъытетIысхьащи, я джэд дэкIмэ, яубыд, я хьэ дэжмэ, къаукI, я мэш хъумэ фIашх.
Махуэ гуэрым Къуиижь ЦыкIу мэкъуауэ докI. Иныжьиблыр къокIуэри аби и выгур, и ужьгъэр, и пхъэIэщэр зэтралъхьэри ягъэс. Къуиижь ЦIыкIу къосыжри, цIутI жимыIэу, пхъэдзакIэ къыхэхумэ, хидзэжурэ, сын ирегъэухри, фIамыщIыр къыхегъэкъэбзыкI аби, IэгукIэ щIигъэпщурэ фэндым ирекIутэ. Иныжьиблыр бжыхь гъуапэмкIэ къыдоплъ, сыту пIэрэ мы цIыкIужьейми мурадыр жаIэурэ.
Йоуэри, Къуиижь ЦIыкIу фIамыщI къэпыр выгум ирелъхьэри къуажэ гуэрым макIуэ. МакIуэ аби, хъаныжьым деж йокIуалIэ.
- Ярэби, хъаныжь, сынолъэIунут.
- ЖыIэ!
- Си лIыщIапщIэ птелъыр пхузогъэгъу, мо Андзорей сымыкIуэу хъуркъыми, мы си фэндыр зы жэщ зы махуэкIэ схуэхъумэ, и щхьэр ямытIатэу, илъым нэ темыплъэу, - жи Къуиижь ЦIыкIу.
Хъаныжьыр мэгуфIэ:
- Хъунщ, - жи, - хьын, мо си пхъуитIым я пэшым щIэгъэувэ: сэ си Iуэхущ, абы цIыху щIыхьэу еплъмэ!
Къуиижь ЦIыкIу ехьри фIамыщI фэндыр хъыджэбз пэшым щIегъэувэ:
- Уэ тхьэIухудхэ, - жи, - сыволъэIу, мы къэпым и щхьэр фымытIатэ: мыбы илъыр дыщэщ, нэ теплъэмэ, фIамыщI хъунущ.
ХъыджэбзитIым я нэр къоцIыщхъукI, Къуиижь ЦIыкIуи зыхуеиххэрати, йоуэри, докIыж.
Дыщэ жыпIауэ бзылъхугъэм я псэр пхуэубыдын: зэрытегъэгушхуэм-зэреуштыжурэ къэпыщхьэр ятIатэри - фIамыщI сабэр къызэрыдоуей аби, я нэкIухэр къахуегъэуфIыцI. Алыхь-алыхь, табум дебакъуэри дыщэр фIамыщI хъуащ, жаIэри хъыджэбзитIым забзыщIыж..
Къуиижь ЦIыкIу жэщым ХьэмшутIхэ щоIэри, пщэдджыжьым къегъэзэж:
- Уий зиусхьэн, си фэндыр псэу? - жери.
- Дэнэ кIуэн уфIэщIрэ-тIэ: щIэтщ хъыджэбзитIым я деж, - жи Хъаным.
- НтIэ къыщIэсхыж хъун?
|
- УмыпIащIэ, хъыджэбзхэр къэтэджакъым.
- СопIащIэ, зиусхьэн, пащтыхьым и унэр ещэжри къэсщэхунущ, - жи Къуиижь ЦIыкIу. - Сыгувэмэ, сIэщIэкIынущ.
- СыткIэ къызэрыпщэхунур?
- Си фэндым илъ дыщэмкIэ!
- НакIуэ-тIэ, сэ къыщIозгъэхыжынщ, - жи хъаныжьым, ар зэрыдыщэр щхьэ сымыщIарэ жери зыхузэгуэпыжу.- НакIуэ, мыгъуэ дыушх!-
Унэм щIохьэри - фэндыщхьэр тIэтарэ фэндым илъыр фIамыщI защIэу! Къуиижь ЦIыкIу магъ-мабжэ:
- ЕIым-еIыж, анэмэтым гъейнэт тепщIащ, - жери.- И щхьэр ямытIатэу, илъым нэ темыхуэу схуэпхъумэну дызэгурыIуатэкъэ! Щхьэ сыбгъэунэхъуа? Ар къыщызэпщIакIэ, си лIыщIапщIэри къызэтыж, си дыщэри къысхуэгъуэтыж!
Хъаныжьым жиIэнур имыщIэу къызоплъэкIри - и пхъуитIми я нэкIур фIыцIабзэщ. Сыт ищIэжынт?
- Тхьэм и хьэтыркIэ, сумыIуэтэж!- жери и лIыщIапщIэри мэлипщIу къретыж, и фэндыми изу дыщэ кIанэр къыхурегъахъуэри къыдегъэкIыж.
Иджы, Iуэхур абыкIэ зэфIэкIыну щытамэ, Къуиижь ЦIыкIу щхьэкIэ Къуиижь ЦIыкIу жаIэнт! Йоуэри, мэлипщIыр япэ иту, езым вытIощыщIэр иIыгърэ, выгум зыгуэрхэр илъу иныжьхэм я дежкIэ къыблокIыжри и унэ къыдохьэж.
Иныжьхэм ягъэщIагъуэ: мыр сыт телъыджэ, фIамыщI щIэгъэпща дишри дэкIащ, мэлипщI къихури къэкIуэжащ, - мыбы зыгуэр щыщыIэщ!- жаIэ аби, къокIуэри къыкIэщIодэIухь, къыкIэщIоплъыхь. Ялъагъур сыт жыIэт - Къуиижь ЦIыкIу дыщэ кIанэхэр ибжурэ зы фэндым кърехри адрей фэндым ирелъхьэ: иныжьхэм я нэр къоху. Зэхахыр сыт жыIэт:
- Сыт щIэпта мыпхуэдиз дыщэм?- къоупщI Къуиижь ЦIыкIу и анэр.
- Изым из, - жи Къуиижь ЦIыкIу.- Дыщэ меркIэм фIамыщI меркIэ щIэстащ.
- Ан-на, а фIамыщI щIэгъэпщар пудыIуэу ептакъэ?
Иныжьхэр зоплъыж, я жьэ Iурыхуауэ.
- Уа, ухьэлэмэтщ уэ, нанэ, - къэгубжьыфэ зытрегъауэ Къуиижь ЦIыкIу, - мо мэлипщIыр къытрезгъэлъхьакъэ! Ар уфIэмащIэ?
Иныжьхэр къоджэри Къуиижь ЦIыкIу щIаш:
- Дэнэ щIыпIэ ущыIа, цIыкIужьей?- жаIэри.
Мыдрейми зытримыгъэхьэ хуэдэ зещI. Иныжьхэр мэлъаIуэ:
- ДяпэкIэ фи джэди дыубыдыжынкъым, фи хьи дыукIыжынкъым, фи мэши тшхыжынкъым: уздэщыIар къыджеIэ закъуэ!- жари.
- Хъунщ-тIэ, - жи мыдрейми, - апхуэдизу фыщылъаIуэкIэ: Мыштракъей сыщыIащ.
|
Иныжьхэр щIопхъуэри, мэкIуэж аби, я выгуиблри, я ужьгъиблри, я пхъэIэщнблри, я Iэниблыр абы хэтыжу, ягъэс, фIамыщIу къисыкIар IэбжьыгукIэ щIагъэпщ, фэндиблым иракIутэри, фэндыщхьэхэр быдэу щхьэщапхыкIыж аби, традзэри Мыштракъей макIуэ.
- ФIамыщIыр дыщэкIэ дохъуэж, - жаIэурэ уэрамышхуэмкIэ йох-къыдокIуеиж. - Изыр изкIэ, ныкъуэр ныкъуэкIэ!
Жылэр уэрамым къыдожри къащодыхьэшх нныжь делэхэм.
- Дэ ди фIамыщIыр Къуиижь ЦIыкIу и фIамыщIым нэхърэ нэхъ къабзэщ, нэхъ дахэщ, нэхъ пIащэщ... - жаIэурэ мэкIий.
Сытми зы зэман зэ къагуроIуэж къызэрыпцIари, къагъэзэж аби, Къуиижь ЦIыкIу дэстэкъыми, и анэр яукIри мэкIуэж.
Къуиижь ЦIыкIу къосыжри - и анэ мыгъуэр яукIауэ! Сыт ищIэжынт, иныжьхэм закъримыгъащIэу и анэр егъеиж, итIанэ иныжьхэм къалъагъуу хьэдэгъэпскI къешэри ирегъэгъэпскI, къабзэу ехуапэри, гум ирелъхьэ аби, йоуэри, ХьэмшутIейм я пщым деж макIуэ. ВитIыр щIетIыкIри мэкъу ярет, хьэдэ дияр кърехри гупкIэм деж иреупсей, езыр макIуэри хьэщIэщым щIотIысхьэ.
- Уэ еблагъэ, ди хьэщIэ лъапIэ! - жаIэри бысымыр къос. ТIыc, зыгъэпсэху, ди Iэнэри иджыпсту къахьынщ.
- Гъусэ сиIэщ.
- Хэт?
- Ди анэр.
- Дэнэ щыIэ-тIэ?
- Гум бгъэдэтщ.
ЩIэхыу жаIэри гуащэ хъыджэбзитIыр ягъакIуэ, нанэр унэмкIэ ирагъэблэгъэну. Бгъэдолъадэ мо тIури;
- Еблагъэ, нанэ!- жраIэ.- НакIуэ, унэмкIэ ныщIыхьэ.
Нанэм цIутI жиIэркъым.
- НакIуэ, тхьэм щхьэкIэ, умыукIытэ! - жаIэу и Iэр щаубыдкIэ, нанэр мэджалэ.
- АIей мыгъуэ, дауэ ухъут! Зыгуэр игъэуза? - жаIэри гуащэ хъыджэбзхэм зрадзых.- къэтэджыжыт, нанэ, иIэт, дн псэр зышхын! - жаIэурэ йолъэIу.
Нанэм зигъэгусащи, захуигъэхъейркъым.
- Къащтэ уи Iэр, дэ укъэтIэтыжынщ! - жаIэурэ епхъуэ щхьэкIэ, нанэм захуигъэхъейркъым, и Iэри къаритыркъым.
Зий нанэм щыхэмызагъэм, алыхь, и жагъуэ тщIащи арам, жаIэри, гуащэ хъыджэбзхэр къокIуэж аби, къэхъуар щаIуэтэжкIэ, унэм щIэсыр зэрыщIох, я напэр зэрытекIым иригузавэу. Къуиижь ЦIыкIу псом япэ носри, и анэр къеIэтыж аби, гъыуэ-зиукIыжу щIедзэ:
- Еууей, сыту гъуэгу мыгъуэм сыкъеужьэт! - жери зефыщIыж.- Сыту пщIантIэ мыгъуэм сыкъыдэухьэт! - жи.- Си анэжь тхьэмыщкIэ мыгъуэр гум кърадзри яукIащ: сыт гущэр сщIэжыну иджы?..
ЕрагъкIэ зэтрауIэфIэ Къуиижь ЦIыкIури, хьэщIэщым щIашэж.
Нанэр къабзэу ягъэпскI, брамбыху джанэр щатIагъэ, чэсейм и хужьыр джэбыну кърашэкI аби, гуащэ хьэдэм хуэдэу, ягъэлъапIэу щIалъхьэ, кхъэлэгъуни хутрагъэувэж. Ехьэжьауэ хьэдэIусышхуи хуащI.
|
- Уи анэ тхьэмыщкIэ мыгъуэр дэнэ къыпхуитхыжын, ауэ мыбы узэрихьэнщ, - жаIэри гуащэ хъыджэбзхэм я зыр къратри къаутIыпщыж, дыщырыкIыу мылъкуфI тIэкIуи и гъусэу.
Иныжьиблым ар щалъагъукIэ, я щхьэ блырыблыр къахьри, къокIуэ:
- Мы фыз дахэри мыпхуэдиз фIыгъуэри къыздипхар къыджеIэ!- жаIэри.
- СлIо вжесIэнур? Фэ фымыщIэ хэлъ абы!- жи Къуиижь ЦIыкIу.- Си анэм и хьэдэр хьэдэ щылъапIэм сшэри хъыджэбз дахэкIэ схъуэжащ, мыпхуэдиз мылъкуи къысхутралъхьащ.
Иныжьхэр делэ лъэпкъкъэ - къокIуэж аби, пщафIэу жьэгум пэрыс я анэжьыр къыщIалъэфри яукI, къабзэу ягъэпскI, яхуапэри, хьэдэ щылъапIэм яшэну, йожьэ. Йожьэри - здэкIуэнур ящIэркъым.
- Уо, Къуиижь ЦIыкIу, хьэдэ щылъапIэр дэнэ?- жаIэри къожэ.
- Муштокъуэ-Муштейщ. Ауэ къуажэм фыщыдыхьэкIэ фызэрыдыхьэн хуей щIыкIэр фщIэрэ?
- Дауэ?
- Нэхъыжьым вытIощыщIэр иIыгъыу я пэ итын хуеищ. Выгум и бгъуитIымкIэ иныжь тIурытI вгъэув, къэнагъитIыр гум иужь фиувэжи - апхуэдэу фыдыхьэ аби, «хъыджэбз дахэкIэ фызыжь хьэдэ дощэрэ, дощэрэ: хэт ищэхун?» - жыфIэурэ къэфкIухь, яжреIэ.
Арати, къуабэбжьабэжьхэр Муштокъуэ-Муштей носри дохьэ, Къуиижь ЦIыкIу зэригъэIущам хуэдэу. Дохьэр аби, кIииуэ докIуеикъохыж:
- Хъыджэбз дахэкIэ фызыжь хьэдэ дощэрэ, дощэрэ: хэт ищэхун?- жаIэурэ.
«Сыту делэ защIэ мы иныжь къуомыр!» - жаIэри муштеидэсхэм я хьэхэр къраушт аби, къыдахуж делэжьхэр.
«Аргуэру дыкъигъэпцIащ зинэкIэ къалъхуа Къуиижь ЦIыкIу.» - жаIэри къыщIопхъуэри, къокIуэж аби, Къуиижь ЦIыкIу яубыд:
- Ди мылъкур дыбгъэгъэсыжащ, ди анэжьыр дыбгъэукIыжащ, ди иныжь напэри къытхутепхащ: удмыукIыу хъунукъым! - жаIэри.
- Сыт мыгъуэр сщIэн-тIэ, сывукI!- жи Къуиижь ЦIыкIу.
Йоуэри зэшиблым Къуиижь ЦIыкIур чачэу мэзым ялъэфри, жыгеижь гуэрым ирапх аби, зэраукIын бжэгъу зырыз хахыну мэзым хохьэж.
Насып уиIэмэ, куэдрэ, йоуэри, а дакъикъэм ирихьэлIэу хьэмшутIеипщым и къуэр шууэ къокIуэ, дзапэ уэрэд жиIэурэ. Пщы щауэр хъыджэбз гуэрым телIэрт, жи, кърамыту-кърамыщэу, мори хьэщыкъ хъуарэ нэгъуэщI къахуимышэу. Арати, йоуэри, Къуиижь ЦIыкIум зифыщIыжу-кIийуэ щIедзэ:
- Сыхуейкъым, сыхуей мыгъуэкъым, Къэрэбыхуэ Дахэ мыгъуэм сыхуейкъым, къэсшэнукъым, сывукIами, къэсшэнукъым! – жери.
ХьэмшутIей пщы щауэр къыбгъэдолъадэ:
|
- Хэт, - жи, - уэ Къэрэбыхуэ дахэр къашэ жиIэу къыппэзыубыдар?
- Иныжь зэшиблым къыспаубыдащи, къэзмышэмэ, саукIынущ, къасшэми, сыкIуэдащ: ар зи дахагъэр сэ фыз схуэхъун, cэ cы Къуиижь ЦIыкIущ!- жери зефыщIыж.
- НтIэ, ауэ думыгъэщI, - жи пщы щауэм.- Сэ сыкIэрыпхэ абдежым, уэ мо си шым шэси, зыIуегъэх. Сэ си Iуэхущ, ахэр куэдрэ зэзгъэлъэIумэ!.
ЗэгуроIуэ, я щыгъынхэр зэрахъуэж, Къуиижь ЦIыкIум пщы щауэр жыгым быдэу ирепх аби, и шым къошэсри къожьэж. Иныжьиблым бжэгъу зырыз яIыгъыу къокIуэлIэжри пщы щауэр яудыну ирагъажьэ. Ирагъажьэри, пщы щауэр мэкIий:
- Куэдщ иджы, вгъэбэяу!- жи.- Содэ, содэ, Къэрэбыхуэ Дахэр къэсшэну сарэзыщ, фыбэяуж!...
- ·Хэт мы хьэбыршыбырым къишэну жыхуиIэр?- нэхъри зэрогъэгубжь Иныжьхэр.- Аргуэру дыкъигъэпцIэну аращ зыхэтыр: феуэ, маржэ!- жаIэри пщы щауэ делэр яукI аби, Шэчэр хадзэж. - Тхьэр бгъэпцIакъэ, уэ дяпэкIи дыкъыумыгъапцIэмэ!
Арати, Къуиижь ЦIыкIу и Iуэхур зэфIэкIащ жаIэри Шэчэр аузкIэ къыздехыжым маплъэри - Къуиижь ЦIыкIу пщIэгъуалэ къазыр псым хигъэсыхьу къалъагъу. Къалъагъу аби, зэщIоувыIыкI.
- Е гъуэгу мыгъуэм ежьэн цIыкIужьей, иджыпсту удукIри Шэчэрыжь ухэддзэжащ, укъыздикIыжар дэнэ? - жаIэри къыщохьэ.
- Дэнэ сыкъикIыжын, Шэчэрыжь сыкъыхэкIыжащ.
- Сыт щхьэкIэ, удукIатэкъэ?
- СывукIaт, шэчэрыжь сыхэвмыдзэжамэ! - къащодыхьэшх Къуиижь ЦIыкIу. - Шэчэрыпсыр псэ гъэхъужщ щIыжаIэр сыт фыфIэщIрэ! КъызэрысIурылъадэу сыкъэхъужащ. Си нэр къызэтесхмэ - Шэчэр лъащIэ Iэщрэ былыму щIэтым бжыгъэ ямыIэу. Сыт сщIэнт, къыхэсхумэ, здэсхун сиIэтэкъыми, мы шыр къэзубыдауэ сыкъыхокIыж. Чэт сщIынщ, Iуэ сщIынщи, итIанэ згъэзэжынщи, къыхэсхунщ.
Иныжьхэр зоплъыжри, бзаджагъэ хуекIуэну мурад ящI:
- НтIэ, а жыпIэр Пэжмэ, дэри дыукIи, дыхэдзэж Шэчэрыжьи дегъэплъыт!
- Уэлэхьи, сэ фэ къомыр фызукI-фыхэздзэжу фтезгъэкIуэдэн зэман хьэулей симыIэ: сэ чэт-Iуэ сщIын хуейщ.
- НтIэ ди ужь къинэр тхуэукIи, нытхухэдзэж!
АбыкIэ зэгуроIуэри, Шэчэрыщхьэ докIуей. Иныжьхэр нэхъыжьнэхъыщIэкIэ зэроукIыжри псым зэрыходзэж, нэхъыщIэ дыдэр я ужь къинати, ар Къуиижь ЦIыкIу еукIыж аби, псым якIылъыхедзэж.
Мис апхуэдэу Къуиижь ЦIыкIу и бийхэм кIэ яритри къигъэзэжащ и фыз гуащэм деж. И фызми къанжэм и фIыцIэр и фIыцIэу, къанжэм и хужьыр и хужьу дахэщи, малъхуэ-мапIэ-мэбагъуэри къуажэшхуэ зэрыгъэхъуауэ Шэчэр Шыгуэбыкъуэ щыхэхуэж тIyaщIэм деж дэсщ, Хьэтууейри къехъуапсэу, Андзорейри къехъуапсэу, езыр зэхъуэпсэж щымыIэу. Автобус макIуэ, мафIэгу йокIуалIэ, слъэгъуарэт жыпIэмэ, итIысхьи, кIуэ!..
ШЭЧЭРЫПС И IУБЫГЪУЭ 3АКЪУЭР
Еуэри, жеIэ, Нану и цIэу зы щIалэжь цIыкIу псэути, и анэр къытехуэри сымаджэшхуэ хъуащ. Iэзэри гъуазэри пэмылъэщу фызыр мэткIу. Апхуэдэурэ мазэ кIya, илъэс кIya - сытми фызым пщIыхьэпIэу елъагъу, зыгуэрым къыжриIэ хуэдэу: «Уи къуэр Шэчэрыщхьэ гъакIуи, вагъуэ нур фIэкIа хэмыпсауэ, псы Iубыгъуэ къегъэхьи, абы уефэмэ, сапсэууэ ухъужынущ», - жиIэу.
|
Нэху къокIри, пщIыхьэпIэр игу къыщыкIыжкIэ, фызыр хощтыкI: «Алыхьым имыухкIэ, - жи, - сэ си псэм щхьэкIэ си щIалэ цIыкIур хьэм езгъэшхыну!» И лIым абы гу лъетэри хегъэзыхь, щхьэ ухэщтыкIат, жери.
- Аууей, - жи фызым, - пщIыхьэпIэ делэ слъэгъуати аращ.
- Хъер ухъу: бегъымбархэм хуауIуати, мелыIычхэм яуIуэтэж! Уи пщIыхьэпIэр къызжеIэ!- жери, лъэщыгъэкIэ кърегъэIуатэ.
КърегъэIуатэри, Нану къреджэ аби, мыпхуэдэу жреIэ и адэм:
- Нану, - жи, - уи анэр хъужыну ухуей?
- Сыхуейщ, - жи и нэпсхэм къызэпажыхьауэ.
- НтIэ, уи анэр хъужыну ухуеймэ, мо псылъэ цIыкIур къащти, Шэчэрыщхьэ кIуэи, вагъуэ нур фIэкIа хэмыпсауэ, зы псы Iубыгъуэ къигъахъуи къэхь: уи анэм ар зэрыIухуэу хъужынущ, - жери жреIэ.
И анэм идэркъым:
- АIэ, - жи, - умыкIуэ, си щIалэ, хьэм уашхынщ, кхъуэм уашхынщ; сэ арыншэми сыхъужынущ, нэхъыфIи сыхъуащ.
- Нанэ, - жи щIалэ цIыкIум, къопсалъэри, - умыгузавэ уэ: хьэми самышхыу кхъуэми самышхыу сыкъызэрыкIуэжын Iэмал сощIэ сэ.
- АIэ, - жи и анэм, - алыхьым имыухкIэ! Уэ абы укIуэмэ, делэ сыхъуни, занщIэу сылIэни!..
АрщхьэкIэ Нану псылъэр къещтэри, йоуэр аби, Шэчэрыщхьэ макIуэ. МакIуэри, зыгуэрым цырхъ жиIэху, хэщтыкIыу щысщ, псыр къыщыщIэжым деж тIысауэ. Щысым-щысурэ, кIыфI игъэхъущ, вагъуэхэр лынду къригъэтIысхьэщ аби, шэчэрыпсыр изу псылъэ цIыкIум къригъэхъуащ. Къригъахъуэщ, псылъэм и щхьэр быдэу IуиукIэжри, и гуфIакIэм дилъхьэжащ, езыр кIуэри, кхъужьеишхуэ щытт абдежи, а кхъужьейм дэпщейщ аби, къудамэ гуэрым тетIысхьащ.
Жэщ ныкъуэм деж мазэр къыщIокIри дунейр егъэнэху. Иджы а кхъужьейр зы мыщэжь гуэрым къигъэунэхуауэ кхъужьашхэ къакIуэ и хабзэти, мазэгъуэ нэху зэрыхъуу, къосри жыгым къыдопщеи. Нану мэшынэри мэкIий: мыщэжьыр, мащтэри йохуэхыж аби, цым-цым жиIэу мэзым щIолъэдэж. Нану тхьэмыщкIэм и гур къихьэжакъимыхьэжауэ, дыгъужьыжь къокIуэри жыг щIагъым къыщIотIысхьэ, къыдэплъейрэ къугъыу. ЩIалэ цIыкIур мэкIэкуакуэ, магъ, кхъужь къыпичурэ къоух, дыгъужьым зигъэхъейркъым. Жэщ псом жыг щIагъым щIэсри нэхущыращ щыщIэпхъуэжар.
Пщэдджыжьым Нану шынэ-гузавэурэ жыгым къолъэжри къожьэж, си анэр хъужынкъэ иджы жиIэурэ гуфIэу. КъакIуэм-къалъэм, къакIуэм-къалъэурэ, къуажапщэм деж зы хьэфиз щысу кърохьэлIэ.
-Уэ ухэт?- жи хьэфизым.
-Сы-Нанущ.
-Дэнэ укъикIыжрэ?
-Мэзым.
-Сыт къэпхьрэ?
-Шэчэрыпс.
-Сыт пщIыну?
-Ди анэр езгъэфэнурэ згъэхъужынущ.
-КхъыIэ, сэр и зэ сегъэIуб! - жи хьэфизым.
Нану ар фIэгуэныхь мэхъури ирегъэIуб, зэреIубарауэ и нитIыр къоплъэж аби, кIииуэ Къуажэм долъэдэж:
- Уо-уо-о, Нану си нитIыр къигъэплъэжащ! - жери.
ЩIалэ цIыкIур къожьэжри, къакIуэм-къакIуэурэ, зы хъыджэбз нэIуджэ къыхуозэ, зыми зэрамыпэсу къыдэнэжауэ.
-Дэнэ укъикIыжрэ, Нану?- Жери къоупщI хъыджэбз къыдэнэжар.
-Мэзым.
-Сыт къэпхьрэ?
-Шэчэрыпс.
-Сыт пщIыну?
-Ди анэр езгъэфэнурэ згъэхъужынущ.
-Хьэфизыр зыгъэхъужар уэра?
-Сэращ.
- КхъыIэ, сэри зэ закъуэ сегъэIуб! - жери къолъэIу хъыджэбз нэIуджэр.
Нану ар фIэгуэныхь мэхъури хегъэф, зэрыхэфарауэ Хъыджэбзым, тхьэIухудым хуэдэу, зеукъэбзыж аби, гуфIэу жылэм холъэдэж:
- Уо-уо-о, Нану и псым сиукъэбзыжащ! - жери.
Нану къожьэж аргуэруи, къакIуэм-къалъэурэ, зы щIалэ цIыкIу, и лъакъуитIыр къыдэмыбзэу, IэплIэкIэ къахьщ аби, куэбжэпэм къагъэтIысауэ къыхуозэ:
- Дэнэ укъикIыжрэ, Нану?- къоупщI ари.
-Мэзым.
-Сыт къэпхьрэ?
- Шэчэрыпс.
-Сыт пщIыну?
-Ди анэр езгъэфэнурэ згъэхъужынущ.
-Хьэфизыр къэзыгъэплъэжар уэра?
-Сэращ.
-НэIуджэри зыукъэбзыжар уэра?
-Сэращ.
-КхъыIэ, сэри зэ закъуэпцIий сегъэIуб псапэ къэпхьынщ! - жери щIалэ цIыкIур къолъэIу.
Нану аргуэрыр фIэгуэныхь мэхъури псылъэр ирет:
- НтIэ зэ фIэкIа уемыIуб, ди анэм къыхуэнэжыр мащIэщ - жери.
ЩIалэ цIыкIум псылъэр егъэщIейри, къуртI-къуртI-къуртI жиIэу щэ еIубыгъуэ иоIубыр аби, и лъакъуитIыр къыщIоувэж. МэгуфIэри къыщолъэт, псылъэр Iэпохури къинэжа тIэкIур йожыж.
- Уо-уо-о, Нану си лъакъуитIыр къызитыжащ! - жери щIалэ цIыкIур кIииуэ долъэдэж.
Нану и псы тIэкIур щикIутакIэ игу фIы щыщIэнт - и щхьэр къыфIэхуауэ къожьэжри, къакIуэурэ, къакIуэурэ, и адэр зыщIыпIэ къикIыжу къыхуозэ:
- Къэпхьа шэчэрыпс?
- Хьэуэ.
- НтIэ щхьэ къомыхьарэ?
- Къесхьэжьам хьэфиз хэзгъэфри къэплъэжащ, нэджэIуджэ езгъэIубри зиукъэбзыжащ, лъэншэм Iузгъахуэри и лъэ къыщIэувэжащ - къыщыщIэувэжым псылъэр Iэпыхури къинэжа тIэкIур икIутыжащ, - жи Нану.
- Едым и лыр ушхи ушх уэ гъуамэм: жылэр бгъэхъужри уи анэр бгъэлIащ! - жери, къощхьэфауэр аби, и тхьэкIумэр иIыгъыу кърешэжьэж.
Кърешэжьэжри, къакIуэм-къалъэм, къакIуэм-къалъэурэ, и анэдэлъхур къахуозэ:
-Къэпхьрэ шэчэрыпс?- жи.
- Хьэуэ.
- НтIэ слIо къыщIомыхьыр?
- Къэсхьти, хьэфизым Iузгъахуэри къэплъэжащ, нэджэIуджэ хэзгъэфри зиукъэбзыжащ, лъэншэ езгъэIубри и лъэ къыщIэувэжащ - къыщыщIэувэжым псылъэр Iэпыхури къинэжа тIэкIур икIутыжащ.- жи Нану.
- Едым и лыр ушхи ушх уэ гъуамэм: жылэр бгъэхъужри уи анэр бгъэлIащ! - жери, аргуэрыр къыхущIоуэ аби, адрей тхьэкIумэр еубыдри кърашэжьэж.
КъакIуэм-къалъэм, къакIуэм-къалъэурэ, къэсыжыпауэ я гъунэгъур къыдокI:
- Къэпхьрэ шэчэрыпс? - жи.
-Хьэуэ.
- НтIэ щхьэ къыумыхьрэ?
- Къэсхьти, хьэфизым Iузгъахуэри къэплъэжащ, нэджэIуджэ хэзгъэфри зиукъэбзыжащ, лъэншэ езгъэIубри и лъэ къыщIэувэжащ - къыщыщIэувэжым псылъэр Iэпыхури къинэжа тIэкIур икIутыжащ, - жи Нану.
- Едым и лыр ушхи ушх уэ гъуамэм: жылэр бгъэхъужри уи анэр бгъэлIащ! - жери, аргуэрыр фIыуэ къыхущIоуэр аби, я ужь къоувэри къашэж.
Къэсыжри унэм щIашэж, здыщIашэжам и анэр хъужарэ пщафIэу ирохьэлIэж.
- А си щIалэ цIыкIу, а си нэ, а си псэ, псэууэ укъысхуэкIуэжа! - жери и анэм IэплIэшхуэ къыхуещI.
Нану къыщеудри магъ:
- Нанэ, - жи, - шэчэрыпс къыпхуэсхьти, хьэфизым Iузгъахуэри къэплъэжащ...
- Тхьэ, абдей сэри си нэр къэплъэжам!- жи и анэм.
-... нэджэIуджэ хэзгъэфри зиукъэбзыжащ...
- Тхьэ, абдей си узри сщхьэщыкIам!- жи и анэм.
-.. лъэншэ езгъэIубри и лъэр къыщIэувэжащ...
-Тхьэ, абдей сэр и сыкъэтэджыжам! - жи и анэм.
-... и лъэр къыщыщIэувэжым, псылъэр Iэпыхури къинэжа тIэкIур икIутыжащ, - жи Нану.
- А къурмэн сызыхуэхъун, сэ псы хущхъуи сыхуэныкъуэжкъым, сыту фIыт а тхьэмыщкIищым я дунейр зэрептыжар!- Жери, Iэнэ къахуегъэуври, и къуэр, и лIыр, и дэлъхур, я гъунэгъур егъатхъэ- егъашхэ.
Хьэфизу щытар лажьэурэ бей мэхъури, шы-уанэ зэтелъ къыхуешэ Нану, и чэзум тхьэигъэпсэу бжесIэну сигу къэкIыжатэкъым жери.
НэджэIуджэу - щытар хъаным и къуэм ешэри, фащэ eкIу къыщетIагъэ, и чэзум тхьэигъэпсэу бжесIэну сигу къэкIыжатэкъым жери.
Лъэншэу щытар ныбжьэгъу пэж къыхуохъу, и чэзум тхьэигъэпсэу бжесIэну сигу къэкIыжакъым жери.
Ноби шэчэрыпс вагъуэ нур фIэкIа хэмыпсауэ уефэмэ, уегъэхъуж жаIэ.
Пэжи, пцIыи.
|
|
Механическое удерживание земляных масс: Механическое удерживание земляных масс на склоне обеспечивают контрфорсными сооружениями различных конструкций...
Архитектура электронного правительства: Единая архитектура – это методологический подход при создании системы управления государства, который строится...
Двойное оплодотворение у цветковых растений: Оплодотворение - это процесс слияния мужской и женской половых клеток с образованием зиготы...
Археология об основании Рима: Новые раскопки проясняют и такой острый дискуссионный вопрос, как дата самого возникновения Рима...
© cyberpedia.su 2017-2024 - Не является автором материалов. Исключительное право сохранено за автором текста.
Если вы не хотите, чтобы данный материал был у нас на сайте, перейдите по ссылке: Нарушение авторских прав. Мы поможем в написании вашей работы!