Вход. Прокимен дне и чтения.

Пророчества Исаиина чтение (глава 43):

Т ако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляли; сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломони чтение (глава 3):

П раведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.

Премудрости Соломони чтение (главы 5 и 6):

П раведницы во веки живут, о Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое, и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.

На литии стихиры, глас 1:

И сцелений воды / ваши мощи притекающим источают всегда, / мученицы славнии Рафаиле, Николае и Ирино, / и омывают страсти и недуги врачуют, / и потопляют полки демонския действом Святаго Духа. / Темже молитеся даровати душам нашим // мир и велию милость.

Слава, и ныне, Богородичен, глас тойже:

С вет от Света произыде, / и в Твою девичу утробу неизреченно вниде, / и плотию обложися, / и недомыслено и несказанно / из Тебе Сын Твой, Христос Бог наш, родися, / Егоже убо рождеством вся земля освятися // и прелесть идольская разорися.

На стиховне стихиры, глас 2:

С окрушаему твоему телесе, / радовался еси, мучениче славне Рафаиле, / страданьми бо попрал еси главу вражию, / и сокрушил еси нечестивых шатания, / и шествовал еси крепко стезею Небесною, // Владыце победоносец явлься, всехвальне.

Стих: С вятым, иже суть на земли Его, / удиви Господь вся хотения своя в них.

С емя евангельское, прилежно всеянное, возделав / в чистей твоей души, Николае преподобне, / сие умножил еси болезньми страданий твоих / и, мудре положен в Небесных житницах, / нетленно обрел еси наслаждение, / егоже ныне насыщаяся, блаженне, / твоими ко Христу ходатайствы // спасай верно поющия тя.

Стих: М ноги скорби праведным, / и от всех их избавит я Господь.

Л юбве ради Христовы / мечное усечение и огнь претерпевши, / от Царя и Владыки мученическим венцем венчалася еси / и с лики святых в неизреченней славе / ныне предстоиши Престолу Владычню. / Поминай и нас, совершающих святую память твою, // Ирино добрая дево.

Слава, глас 6:

К ровию каплей терпеливаго вашего страдания / Владыце Христу предстали есте яко жертва благовонна, / чисто заколение, благоприятен дар, / священное приношение и посвящение непорочно. / Темже молитвами вашими, святии мученицы, / церковное исполнение в мире соблюдите, // и даруйте нам мир и велию милость.

И ныне, Богородичен, глас тойже:

Т ворец и Избавитель мой, Пречистая, / Христос Господь, из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся, Ангельски, радуйся, Владычице, / предстательство и покрове, // и спасение душ наших.

Тропарь, глас 1:

Н епорочное жительство соблюдше, / за Христом даже до страданий последовали есте, / Рафаиле Богомудре и Николае блаженне, / таже Ирино дево всечетная, / посреде мучений веру сохраньше, / стяжали есте неувядаемыя венцы. / Сего ради яви вас Господь людем Своим / яко новых молитвенников и чудотворцев, / исцеления и милости источающих // верою и любовию почитающим вас.

НА УТРЕНИ

На Бог Господь: тропарь святых дважды. Слава, и ныне, Богородичен, глас 1:

Г авриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, // слава Свободившему нас Рождеством Твоим.

По 1–м стихословии седален, глас 2:

К ровь твою, яко алавастр мира, Христови принесл еси, преподобне Рафаиле. Темже преблагий и великий Дарователь Бог прият тя в Небесныя обители, со духовными чады твоими, сего ради память твою с верою почитаем, досточудне.

Слава, и ныне, глас тойже:

Е дина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.

По 2–м стихословии седален, глас 6:

С обори верных вси, приидите, новоявленныя бо мученицы нас днесь созывают на трапезу духовную, со тщанием, веселящеся, тецем и память подвигов и скончания их почтим, славяще тех, яко Божиих угодников и чудотворцев.

Слава, и ныне, глас тойже:

У стами и сердцем величаем Тя, / Дево Мати: / Ты же, рождшая Бога, // не отрини нас от Твоего заступления.

Величание:

В еличаем вас, / страстотерпцы славнии Рафаиле, Николае и Ирино, / и чтим честная страдания ваша, // яже за Христа претерпели есте.

Псалом избранный:

1. Т ерпя потерпех Господа, и внят ми, и услыша молитву мою. 2. Б ог нам Прибежище и Сила, Помощник в скорбех, обретших ны зело. 1. М ноги скорби праведным и от всех их избавит я Господь. 2. П риведутся Царю девы, приведутся в веселии и радовании. 1. И скуси мя, Господи, и испытай мя, разжи утробы моя, и сердце мое. 2. С уди ми, Господи, яко аз незлобою моею ходих. 1. Д евы да восхвалят имя Господне. 2. Д а не погубиши с нечестивыми душу мою. 1. А з же незлобою моею ходих, избави мя, Господи, и помилуй мя. 2. Н ога моя ста на правоте: в церквах благословлю Тя, Господи.

По полиелеи седален, глас 8:

Б лагодатию Божественнаго Духа / собрании днесь, празднолюбцы, / лик составльше, поем песнь нову, / память сотворяюще всехвальных мучеников, / Рафаила всечуднаго и Николая Богоблаженнаго, / таже непобедимыя девы Ирины, / в нюже сошедшеся, Спаса величаем / и торжества виновником молебне рцем: / молите, страстоносцы честнии, / избавитися вреда всякаго // любовию славящим вас.

Слава, и ныне, Богородичен, глас тойже:

Т я надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.

Таже степенна, 1-й антифон, глас 4. Прокимен, глас 4: С вятым, иже суть на земли Его, / удиви Господь вся хотения своя в них. Стих: П резрех Господа предо мною выну, / яко одесную мене есть, да не подвижуся. В сякое дыхание: Евангелие от Матфея, зачало 36.

По 50-м псалме стихира самогласна, глас 6:

З емля освятися кровию всечестною вашею, / и человецы обогатишася дивными чудесы, / исцеление почерпающе от мощей ваших, / Богомудрии угодницы Христови, / славнии Рафаиле и Николае, / таже незлобивая девице Ирино, / Молитеся Господеви, / Емуже от юности прилепистеся, // спасти иже верою поющия вас.

Канон святым мучеником, глас 1:

Песнь 1

Ирмос: Т воя победительная десница / Боголепно в крепости прославися: / та бо, Безсмертне, / яко всемогущая, противныя сотре, / Израильтяном / путь глубины новосоделавшая.

С ей светлый ваш праздник благочестно хвалящия, мученицы многострадальнии, Царя Христа молите спастися нам и Небеснаго Царствия причастники быти.

К то изречет многая дарования, яже Христос подаде вам, страдальцы всеславнии? Темже облистаете чудесы, яко светильницы досточуднии.

В сю свою имея надежду к Богу и мысль, блаженнии, о временных и тленных отнюд небрегли есте, сего ради и венецы от руки Господни прияли есте.

Богородичен: К ую Ти достойную песнь наше принесет неможение? точию обрадовательную, ейже нас Гавриил тайно научил есть: радуйся Богородице Дево, Мати Неневестная.

Песнь 3

Ирмос: Е дине ведый человеческаго существа немощь / и милостивно в не воображся, / препояши мя с высоты силою, / еже вопити Тебе, Святый, / одушевленный храме / неизреченныя славы Твоея, Человеколюбче.

Д обре и богочестне в постничестве пожив, и мучения за Христа пертерпел еси, Рафаиле Богомудре, исполнился еси Божественнаго Света, идеже ныне наслаждаешися, веселяся.

Н ачало добродетельнаго твоего жития, страх Господень взял еси от юности, Николае блаженне, и сей имел еси, наставляющ тя к пути правому, имже шествуя, во дворы Господни вшел еси.

Д ивным обретением телес ваших, славнии, прославися честная Церковь, имущая в себе благодати сокровище неоскудное и пречудное.

Богородичен: У ма пресущественна видети, якоже мощно, сподоблься Гавриил, Дево Всенепорочная, радостный Тебе глас принесе, Слова зачатие явственне возвещающий, и неизреченное Рождество проповедающий.

Седален, глас 1:

Т ечение совершив истинное, / мучителей всю крепость победили есте, / и прияли есте венцы от руки Вседержителя, / мученицы всехвальнии Рафаиле, Николае и Ирино, / и показалися есте Ангелом сопричастницы.

Слава, и ныне, Богородичен:

П окров Твой, Дево Богородице, простри над смиренными воспеватели Твоими и сохрани нас от бед и скорбей, матернюю любовь к нам недостойным являюще.

Песнь 4.

Ирмос: Г ору Тя благодатию Божиею приосененную, / прозорливыма Аввакум / усмотрив очима, / из Тебе изыти Израилеву провозглашаше Святому, / во Спасение наше / и обновление.

З емлю, яко тления жилище, оставив, премирнаго Царства достигл еси,, венец страдания нося, в чертозе славы неизреченныя возлегл еси, Рафаиле преподобне, с лики Безплотных водворяяся.

И исуса, Владыки своего, законоположением последуя, того Божественное подобие в себе воображая, душу о стаде положил еси, жертва всеосвященна принеслся еси Богови, Николае преблаженне.

К расотою добродетелей просвещаема, от кровей багряницею украсилася еси очервленою, Ирино мудрая дево, якоже скиптр, Креста победу носяще, со Христом царствовати сподобилася еси, славословяще силу Его.

Богородичен: С вятых святая Богородице Всепетая, чаяние языков, и Спасение верных, из Тебе возсия Избавитель и Жизнодавец, и Господь: Егоже моли, спастися рабом Твоим.

Песнь 5

Ирмос: П росветивый сиянием пришествия Твоего, Христе, / и осветивый Крестом Твоим / мира концы, / сердца просвети / светом Твоего Богоразумия, / православно поющих Тя.

Б лагоухает рака ваша Божественная, идеже лежат священнии телеса ваши, блаженнии, и дары исцелений источают почитающим вас.

И сцеляете недуги и язвы врачуете душевнии, страстотерпцы славнии, не токмо просящим вашего заступления, но и не ведущим вас милости источаете.

Ж елание души моея ведаете, чудотворцы милостивии, и пламенем любве объята мя видите: разрешение грехов приятие ми даруйте и всякаго прошения исполнение.

Богородичен: В еселятся небесныя силы зряще Тя: радуются с ними человеков собрания: Рождеством бо Твоим совокупишася, Дево Богородице, еже достойно славим.

Песнь 6

Ирмос: О быде нас последняя бездна, / несть избавляяй, / вменихомся / яко овцы заколения, / спаси люди Твоя, Боже наш, / Ты бо крепость немощствующих и исправление.

В ризу спасения облече вас Господь, раздрав вретище земнаго жития вашего, тем ныне тепло согреваете земными недуги одержимыя молитвами и чудодействы вашими.

П решли еси от страдания к славе небесней, доблии мученицы, презревши жизнь временную, вечную жизнь восприяли есте, и ныне изливаете щедрыя дары, чтущим вас любовию.

П обеду вам Бог дарует, мученицы преизящнии, и венцы неувядаемии, мы же почерпаем исцеления от святых мощей ваших.

Богородичен: У мерщвлен бысть враг живоносным Твоим плодом Богоблагодатная: и попран бысть ад проявленне, и иже во узах свободихомся. Темже вопию: страсти разруши сердца моего.

Кондак, глас 1:

Я ко сокровище многоценное / и источник, точащий токи, недуги очищающий, / нам явишася телеса ваши священии, / болезнем различным подающии исцеление / и благодать Божественную притекающим к ним дарующии, / да верою и любовию зовем вам радостно: / мученицы всеславнии и достоблаженнии, // молите Христа о душах наших.

Икос:

П ремудростию и разумом украшен, / Рафаиле отче Богоблаженне, / мужеским и твердым сияя смыслом, / благ же, и кроток, и милостив был еси / и врученныя ти люди добре упасл еси, / от агарянскаго же нашествия / неправедное заколение с люди паствы твоея претерпел еси, / темже и венец болезней твоих приял еси, / Сего ради вопием ти, отче преподобне: // моли Христа о душах наших.

Песнь 7

Ирмос: Т ебе умную, Богородице, пещь / разсмотряем, вернии, / якоже бо отроки спасе три Превозносимый, / мир обнови, / во чреве Твоем всецел, / Хвальный отцев Бог и Препрославлен.

Ж итию твоему, Рафаиле всечудне, кто не удивится, собрал бо еси, якоже пчела благоразумная, множество цветовидных добродетелей: в нихже, красуяся, нас облагоухаеши.

Д ушу кроткую имея и сердечную чистоту стяжав, восшел еси к подвигом усердно, Единому Христу жизнь и сердце свое отдав, Николае треблаженне, о нас Владыце помолися.

П отекла еси, последуя Христовым стопам Божественным, и общница показался еси Страстей Того и Царствия, Ирино всеславная, за любовь твою изрядно венчаваема.

Богородичен: Н овый Адам от чистых кровей Твоих Превечный Бог бысть воистинну, Егоже ныне моли, обетшавшаго мя обновити зовуща: Хвальный отцев Бог и Препрославлен.

Песнь 8

Ирмос: В пещи отроцы Израилевы, / якоже в горниле, / добротою благочестия чистее злата блещахуся, глаголюще: / благословите, вся дела Господня, Господа, / пойте и превозносите во вся веки.

К репость и силу во Христе полагая, лютую мук преплыв пучину, и вышняго пристанища достигл еси, Рафаиле всечестне, весь украшен, весь Духа светолитии обильно осияемь.

Т ы злобу гонящих и мучения учителя твоего не возмогл еси зрети, отче Николае преподобне, душу в руце Христови предал еси, разрешив тленныя тенеты и жизнь нестареющую стяжав.

Т оки твоих кровей многобожия пламень угасиша, чудесы же, от гроба бываемыя, исторгоша демонскую лесть и пищу нам, Ирино, хваления доброт твоих соделаша.

Богородичен: Ч ертог световидный, из негоже всех Владыка, яко Жених произыде Христос, воспоим вси вопиюще: вся дела Господня Господа пойте, и превозносите во вся веки.

Песнь 9

Ирмос: О браз чистаго рождества Твоего, / огнепалимая купина / показа неопальная; / и ныне на нас / напастей свирепеющую угасити, молимся, пещь, / да Тя, Богородице, / непрестанно величаем.

Н емилостивно твою главу враг сокруши, отче Рафаиле добропобедне, юже Бог в высочайших диадимою венча победительною, страстоносче многострадальне, слава мучеников и всех преподобных.

М ученическими венча почестьми постническия твоя труды истинно, отче Николае блаженне, Подвигоположник един Бог наш, на убийцы укрепивый тя.

В ся во Свет Божественныя Троицы с веселием прешла еси, ангельским воинством ныне срадуешися, пречудная дево Ирино, с нимиже непрестанно моли всем спастися, поющим тя.

Богородичен: О паче ума чудес Твоих! Ты бо Дево едина паче солнца, всем дала еси разумети новейшее чудо, Всечистая, Твоего Рождества непостижимаго. Темже Тя вси величаем.

Светилен:

С ветом Превечнаго сияния озарившися, Рафаиле, Николае Ирино со присными страстотерпцы, Христу последовали есте, и Того благодатию просветившися, источник чудес и милостей явилися есте, сего ради молим вас: спасите души наша.

Слава, и ныне, Богородичен:

З арю пресветлую, являющую нам Солнце незаходимое, вемы, Тя, Пресвятая Дево Богородице. Сего ради молим Тя: яко Мати Света сущи, просвети нас светом Сына Твоего, Христа Бога нашего.

На хвалитех стихиры святаго, глас 1:

П риидите, Безплотных лицы, / во плоти сущим спразднуйте нам / в честней памяти страстотерпцев: / сии бо тело немощное носяще, / яко безплотнии, Христа ради подвизашася, / о лютых муках нерадивше, / с нимиже молитеся, // о еже стастися нам.

Я ко звезды днесь пресветлыя, / от земных недр возсияли есте / и Церковь Божию украсили есте, / сиянием Божественных дарований просветивши / души верою и любовию песнословящих вас, страстоносцы всечестнии, / огнепальная страстей наших стремления орошаете есте // Божественными вашими молитвами.

Я ко свещницы на престоле, возсияли есте, / святии мученицы и чудотворцы, / и, яко многоцветие благовонное, израсли есте, / темже неоскудно потоцы людей православных / притекают к раце ваших святых мощей, // просяще мирови мира и велия милости.

Слава, глас 8:

Б огоносных мучеников / Рафаила, Николая и Ирины / всечестную память ныне празднующе, вернии, / научимся, их вере и житию, / истинному поклонению и служению Пресвятей Троице, / ихже дерзновенным предстоянием да сподобимся // восприяти богатыя Ея милости и щедроты.

И ныне, глас тойже:

В ладычице, приими молитвы раб Твоих / и избави нас // от всякия нужды и печали.