Молитва первая, св. Великаго Василия

Паки запят бых окаянныи умом, и лукавым обычаем, работая греху. Паки князь тьмы, и страстных сладостей родитель, пленена мя сотвори. И яко же раба смиреннаго, того хотением и желанием плотьским работати принужает мя. И что сотворю, Господи мой, и Избавителю, и Заступниче уповающим на Тя? Аще бо не к Тебе паки возвращуся и постеню, и милости испрошю содеянным ми. Но боюся и трепещу, да не како всегда исповедаяся, и отступити от злых обещаваяся, и на кииждо час согрешаю. И не воздав молитвы моея Тебе, Богу моему, долготерпение Твое воздвигну к негодованию. И кто стерпит Господи гнева Твоего? Ведыи убо множество щедрот Твоих, и пучину человеколюбия Твоего, паки возверзаю себе на милость Твою, и взываю Ти, еже согреших, прости, помилуй мя падшаго. Даждь ми руку помощи, иже в тимении сластей погруженному. Не остави Господи создание Свое растлитися беззаконьми моими, и грехи моими. Но обычным Своим милосердием, и благостию принужаем, избави от кала и скверны телесныя, и страстных помышлении, оскверняющих всегда душу мою окаянную. Се бо Господи, яко же зриши, несть в ней места чиста, но вся проказися все тело объят язва. Сам убо Человеколюбче, Врачу душам и телесем, и милости Источниче, очисти ту слез моих течением, сих изливая на мя обильно. Излей на мя человеколюбие Твое, и даждь ми исцеление и очищение. Исцели сокрушение мое, и не отврати лица Твоего от мене, да не якоже вещь пояст мя отчаяния огнь. Но якоже рекл еси, неложныи Боже, яко велия радость бывает на небеси о едином грешнице кающемся. Сие сотвори и на мне грешнем, и не затвори ушию благоутробия Твоего, в молитве покаяния моего: но отверзи их, и яко кадило исправи ту пред Тобою. Веси бо немощь естества, Создателю, и удобь поползновение юности, и тяжесть тела. И презираеши грехи, и покаяние приемлеши, призывающих Тя истинною. Яко благословися и прославися пречестное и великолепое имя Твое, Отца и Сына и Святаго Духа, ныне и присно и во веки веком, аминь.

Молитва вторая, того же Великаго Василия

Многомилостиве, Нетленне, Нескверне, безгрешне Господи, очисти мя непотребнаго раба Твоего, от всякия скверны, плотьския и душевныя. Еже от невнимания и уныния моего, прибывшую ми нечистоту, со инеми всеми беззаконьми моими. Яви мя нескверна, Владыко, за благость Христа Твоего. И освяти мя нашествием Пресвятаго Твоего Духа, яко да возбнув от мглы нечистых привидении диявольских, и всякия скверны, сподоблюся чистою совестию, отверсти скверная моя и нечистая уста, воспевати всесвятое имя Твое, Отца и Сына и Святаго Духа, ныне и присно, и во веки веком, аминь.

Молитва третия

Господи Боже наш, аще что согреших во дни сем, аще словом, аще делом, аще помышлением содеях что, яко Благ и Человеколюбец прости ми. Мирен сон и безмятежен даруй ми Боже. Ангела ми хранителя посли, покрывающа и соблюдающа мя от всякаго зла. Яко Ты еси Хранитель душам нашим и телесем. И Тебе славу возсылаем, Отцу и Сыну и Святому Духу, ныне и присно, и во веки веком, аминь.

Молитва четвертая, св. Иоанна Златоустаго, искусившемуся во сне

Господи, да мя не лишиши небесных Твоих благ. Господи, избави мя вечных мук. Господи, или словом, или делом, или помышлением согреших, прости ми грешному. Господи, избави мя от всякаго неразумия, и забвения, и уныния. Господи, просвети сердце мое, еже помрачи лукавое желание. Господи, аз убо яко человек согреших, Ты же яко Бог Человеколюбец помилуй и прости. Господи, виждь немощь души моея и посли благодать Твою в помощь души моей, да и о мне прославится имя Твое святое. Господи, напиши мя в книгах животных, подая мне конец благ. Господи, аще и не сотворих пред Тобою что благо, но даждь ми по благости Твоей положити начало благо. Господи, одожди росу благодати Твоея в сердце мое. Господи, помяни мя грешнаго и непотребнаго раба Твоего, егда приидеши в царствии Твоем, яко благословен еси во веки, аминь.

Молитва пятая, искусившемуся во сне

Господи, и Владыко животу и смерти, власть имея во обоих, послав Единороднаго Сына Твоего спожити человеком на земли, Господа и Бога и Спаса нам Исуса Христа. И по воле Твоего благоволения, и Его хотения, всему изволив спастися человечеству, и в разум успевати истиныи. Сего ради Святаго Духа действом и чудотвореньми, призывая грешники в покаяние, являя Себе, Господи Исусе Христе, яко Бог нам и Спаситель. И в благовестии высоковещанно глаголя, аще кто жаждет да приидет ко Мне и пиет. И имже образом желает елень на источники водныя, пророчески дерзаю, сице и душа моя желательне желает к Тебе, Боже. Но нрав грехолюбныи пути благия поглаждает. И яко в безлунней нощи кривыми стопами жизнь мою измеряю. Отягчено ми бремя плоти, и в снедь удобно ми дневное течение. Во дне бо помышлении скверными и безгласными, ненасытне яди просит тело. И аще удовлится угодными напитаньми, то на другую потребу желает. И лица описует неотступне, и другая советует с помыслом, яко на се служение повсегда готову ему сущу. И аще во дне желанному не получит с трезвостию привнити, абие сну, яко потребну рабу к послужению приступившу, тогда вся позорная лица другая, яже дневным желанием в нощи сластолюбне объемлет, и лобызательне нудится спожити, и зачен раждает мерзость ненавистну Тебе, Богу моему и Творцу. Мне же всяческое того ради Господи, от Твоих святейших святынь удаление. Но, Господи мой, Господи, благоволивыи грешники спасти, ими же веси судьбами, спаси мя грешнаго и непотребнаго раба Твоего, к Твоим обращающася щедротам, и человеколюбию Ти припадающа. Аще и ничтоже достойно и благоприятно имам принести Твоей благости, ни Господи мой ни, не изорцы на мя, якоже на не имущую плода смокву ответовал еси, и видеся суха. Господи мой, Господи, кое и колико благодарение принесу во угождение пред Тя. Вем бо себе всячески суща безплодна, и от добродетельных плодов пуста. Сего ради припадая молюся, долготерпение Твое моля, да не повелиши, сладчайший Исусе, упражняющаго место покаяния посещи. Веси бо Благосерде, сеятеля злым плевелом, и завистьца душевней пользе, иже враждовати готов, к произволяющим спастися. Веси же наипаче, к красным и сладостным жития сего мое пристрастное любление, к сим же слабость и небрежение. Сия же зря во мне и мною действуема, Господи мой, Господи, совоздвигни мя преклоненаго всячески слабостию плоти, и введи мя во участие Тобою спасаемых. Яко да и аз получив некую часть милости, еже на мне Твоего человеколюбия, восхвалю вкупе прославляемое имя Твое, Отца и Сына и Святаго Духа, ныне и присно и во веки веком, аминь.