Место рождения Иоанна Предтечи

Тропарь, глас 4

Пророче и Предтече пришествия Христова,/ достойно восхвалити тя недоумеем мы, любовию чтущии тя:/ неплодство бо рождшия и отчее безгласие разрешися/ славным и честным твоим рождеством,// и воплощение Сына Божия мирови проповедуется.

Кондак, глас 3

Прежде неплоды днесь Христова Предтечу раждает,/ и той есть исполнение всякаго пророчества:/ Егоже бо пророцы проповедаша,/ на Сего во Иордане руку положив,/ явися Божия Слова пророк, проповедник,// вкупе и Предтеча.

Величаем тя,/ Предтече Спасов Иоанне,/ и чтим еже от неплодове// преславное рождество твое.

Стихиры, глас 4

Божию Слову хотящу от Девы родитися, ангел от старческих чресл происходит, великий в рожденных женами, и пророков превышший: подобаше бо Божественных вещей преславным быти началом, кроме возраста исчадие, и без семене зачатие. Творяй чудеса во спасение наше, слава Тебе.

Явися днесь великий Предтеча, от неплодных ложесн Елисавети произшед, болий всех пророков пророк, и ин несть, ниже воста, яко Предтечи светильнику, Свет последова пресветлый, и гласу Слово, и невестоводцу Жених. Готовящему Господеви люди изрядныя и предочищающу при Дусе водою: Захаринно прозябение, и пустыни доброе воспитание, покаяния проповедник, очищение согрешений, сущим во аде благовествуяй из мертвых востание, и моля о душах наших.

Пророк и Предтеча из утробы явился еси, Христов Крестителю Иоанне, играя и радуяся во чреве матерни, зря Царицу пришедшу к рабе, носящую Безлетнаго, и от Отца без матере, к тебе от неплодныя и старца по обетованию возсиявшему. Того моли помиловати души наша.

Стихиры, глас 1

Искапайте, горы, сладость, и, холми, яко агнцы взыграйте: яко родися от Елисавети, хотяй с нами водворитися Господень Предтеча, разрешивый в рождестве отчее безгласие. Тем и мы вопием ему: Крестителю Христов, моли спастися душам нашим.

Тропарь Казанской иконе Божией Матери, глас 4.

Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися,/ в державный Твой покров прибегающим./ Всех нас заступи, о Госпоже Царице и Владычице,/ иже в напастех, и скорбех, и в болезнех, обремененных грехи многими,/ предстоящих и молящихся Тебе/ умиленною душею и сокрушенным сердцем,/ пред пречистым Твоим образом со слезами,/ и невозвратно надежду имущих на Тя/ избавления всех зол./ Всем полезная даруй/ и вся спаси, Богородице Дево:// Ты бо еси Божественный покров рабом Твоим.

Кондак, глас 8

Притецем, людие, к тихому сему и доброму пристанищу,/ скорой Помощнице, готовому и теплому спасению, покрову Девы,/ ускорим на молитву и потщимся на покаяние,/ источает бо нам неоскудныя милости Пречистая Богородица,/ предваряет на помощь и избавляет от великих бед и зол// благонравныя и богобоящияся рабы Своя.

МЕСТО ВОЗНЕСЕНИЯ ГОСПОДНЯ

Тропарь, глас 4

Вознеслся еси во славе, Христе Боже наш, / радость сотворивый учеником, /обетованием Святаго Духа, / извещенным им бывшим благословением, / яко Ты еси Сын Божий, Избавитель мира.

Кондак, глас 6

Еже о нас исполнив смотрение, / и яже на земли соединив Небесным, / вознеслся еси во славе, Христе Боже наш, / никакоже отлучаяся, но пребывая неотступный, / и вопия любящим Тя: // Аз есмь с вами, и никтоже на вы.

Стихира, глас 6

Господь вознесеся на небеса, / да послет Утешителя миру: / небеса уготоваша престол Его, / облацы восхождение Его. / Ангели дивятся, Человека зряще превыше себе. / Отец ждет, Егоже в недрах имать соприсносущна: / Дух же Святый велит всем ангелом Его: / возмите врата князи ваша, / вси языцы восплещите руками, // яко взыде Христос, идеже бе первее.

На горах святых зряще Твое вознесение Христе, / сияние славы Отчи, / воспеваем Твой светообразный лица зрак, / кланяемся страстем Твоим, / почитаем воскресение, // славное вознесение славяще: помилуй нас.

Стихира, глас 2

Родился еси яко Сам восхотел еси, / явился еси яко Сам изволил еси: / пострадал еси плотию Боже наш, / из мертвых воскресл еси поправ смерть. / Вознеслся еси во славе, всяческая исполняяй, / и послал еси нам Духа Божественнаго, // еже воспевати и славити Твое Божество.

Величание

Величаем Тя, / Живодавче Христе, / и почитаем Еже на небеса, /с Пречистою Твоею плoтию, // Божественное Вознесение.

МЕСТО ОБРЕТЕНИЯ

ЧЕСТНОЙ ГЛАВЫ СВЯТОГО ИОАННА ПРЕДТЕЧИ

Тропарь, глас 4

От земли возсиявши, Предтечева глава/ лучи испущает нетления верным исцелений,/ свыше собирает множество Ангел,/ доле же созывает человеческий род// единогласную возсылати славу Христу Богу.