О явлении преподобнаго священнику Феодосию 1-е и 2-е наказание и 3-е с прещением и казнию и потом с милостию чюдо. — КиберПедия 

Индивидуальные очистные сооружения: К классу индивидуальных очистных сооружений относят сооружения, пропускная способность которых...

Семя – орган полового размножения и расселения растений: наружи у семян имеется плотный покров – кожура...

О явлении преподобнаго священнику Феодосию 1-е и 2-е наказание и 3-е с прещением и казнию и потом с милостию чюдо.

2017-07-09 202
О явлении преподобнаго священнику Феодосию 1-е и 2-е наказание и 3-е с прещением и казнию и потом с милостию чюдо. 0.00 из 5.00 0 оценок
Заказать работу

И не умолчю же Божиа дарованиа, и не могу потаити благодеяниа Господа Нашего, и не хощу скрыти явления чюдеси святаго преподобнаго отца нашего новаго чюдотворца Александра началника и игумена нашея обители, Ошевнева монастыря, еже сотвори Бог его ради на мне грешнем. Яко же придох в монастырь и прияша мя, игумен же постриже мя, и сотвори черньца, и в черныя ризы облаче мя в понеделник 1 недели святаго поста, и вда мя некоему старцу Елесею имянем. И по четыредесятих днех закона монастырьскаго малым прешедшим, в среду светлыя недели яви ми ся преподобный Александр аки на яве, имянем зваше мя и рече ми: «Чадо Феодосии, иди в Великый Нов град, и прии//(л. 151)ми от архиепископа благословение и, возми священьства сан». Аз же познах его по образу написаному, иже на гробе его, и начат отрицатися. Он же, ем мя за десную руку, и обеща ми, аки мздовоздание некое по времяни дати хотя, еже и бысть последи по словеси святаго. И идох аз к архиепископу, и приях чин священьства, и пребываа во обители.

И по времяни же некоем бысть в монастыре роптание от некых братии, и аз же совокупихся с ними. И паки второе яви ми ся преподобны аки негде в велицеи церкви и рече ми: «Ты ли еси началный во обители?» Аз же, пад, поклонихся ему и рекох: «Что, господи отче, аки неведый вопрошаеши мя? Игумен убо есть у нас. Аз убо священник есмь». Святыи же рече ми: «Игумену своему тако рци, яко всех душь попечение на твоеи души лежит, а тебе же глаголю тако: останися всякого злокознованиа и попецися о своеи души». Аз же, пад пред ним на землю, и начат плакати,//(л. 151 об.) и рекох: «Ты ми, отче, буди наставник и учитель». И возбнув от видениа, никого же виде, токмо слезами захлипаяся о наказании святаго. И вечеру же приспевшу, приидох на собор и отрекох единому от них, яко не мое есть дело. Тако же и они престаша от таковаго дела. По сем же пребых неколико время и, диаволим наветом еще неверием одержим, иногда же веровах явлению истинну быти, овогда же соннаа привидениа вменях. Тако же о чюдесех святаго на двое мыслящу ми, и виде многа чюдеса, иже пред нашима очима содеяшася, и помыслих, и рекох в себе: «Аще бы не от Бога дарованна святому, то не могл бы сих знамении творити». И в чювьство прииде, позна свое согрешение и начат помышляти, еже бы от многа мало нечто написати о житии святаго и чюдесех его. И ятся делу, не свое ухищрение имея, но на Бога надежю возлагаа и на//(л. 152) молитвы преподобнаго надеяся. И прострох грешную и грубую мою десницу и начертати начало душеполезныя сея повести. И потом мало писах, обленихся и небрежением в забытии оставих. И празднику приспевшу великому и светлому дни тридневному Христову воскресению, и радостно праздновахом, и духовно веселящеся, и любовно ликоствоваху, и честне проводихом, вечерняя певше, и разидохомся во своя келиа. И возлеже почити, и вижю себе в некоем велице храме, и тамо видех некое Божие видение и глаголы некая слышах, их же не смех дерзнути поведати, ни писати, да не когда инем проповедав, а сам неключим буду.

И виде вшедшаго ту преподобнаго Александра, мал прут имея в руце своеи, и яро взре на мя, и со гневом рече ми: «Почто начинаеши//(л. 152 об.) дело выше своеа меры, а еже начал еси, леностию не свершаеши?» И претяше ми страстию. Аз начат плакати, и со слезами молитися, и рекох: «Господине отче, не прогневаися на мя о замедлении. Отдаи же ми, еже согреших к тебе, и сотвори на мне милость, понеже стар есмь, не могу страсти терпети. Аще оскорбиши мя, то не нареку тя уже отцем и прочее изыду из монастыря твоего». Преподобныи же, видев мя слезна и умилно плакавшася, и мало осклабився и рече ми: «Не много глаголи, ни пререку, и пади ниць». Аз же падох на помость, идеже стоях, и прострох руце и нозе. Святый же, назнаменуя мя трижды прутом онем, аки ударение творя, ниже болезни бысть, ни ударениа слышах, но токмо до портища притыче и повеле ми встати.

Аз же возбнув от видениа, и никого же//(л. 153) виде, и наипаче начат плакати и рыдати, понеже много пререковах святому, и уведе бывшаа над собою, яко деснаа рука моя ослабе, длан же о запястии согнуся, три же перста верхних едва возмогох вместо содвигнути, иже на лице своем крестное знамение воображати, два же перста нижних ко длани прикорчишася, и видех себе тако, страхом и трепетом обиат быв, и познах свое согрешение, яко маловериа ради моего тако сотвори ми Господь.

Всеблагый же Господь восхоте мя от маловериа в веру обратити и верна сотворити, и своего угодника болма прославити, да и прочии накажуться боятися Бога, да не такоже постражут, якоже и аз, и уведят вси, яко верен и праведен Господь, волю боящися его творит (Пс 144:19), и милостивное прошение исполняет, и небрегущих наказуя. И, шед, аз поведах//(л. 153 об.) прежереченному старцу Елесею. Он же, утешая, рече ми: «Не скорби прочее, радуися и веселися, яко Господь посети тебе, и вся Бог деиствует, елико хощеть». И потом, шед во притвор ко гробу Александрову, и начат облобызати раку святаго и с частым воздыханием плакатися и, слезами обливаяся, и со умиление молитися, и с рыданием глаголати: «О великый чюдотворче, преподобный Александр, веде бо и виде, яко воистинну еси неложный чюдотворець, отселе убо верую и пакы верую, и помози моему маловерию (Мк 9:24), и всю мою надежю по Бозе на тебе возлагаю, не остави мене». И инаа к сим многаа от жалости душа своеа изрече умилныя глаголы. Сие же не единова, ни дважды, но многажды, и по том шед в собор, поведа игумену и всеи братии и руку свою ослабленую, и болезненую всем явьственно показа, и у всех//(л. 154) прощениа прося, и всем повинуяся, и всех молих, да помолятся за мя, и вся же, елика имех в келии своеи вещи, в казну повелех отнести и уже живота своего отчаяхся, день от дни смерти ожидая, дни же мимошедшу, вечеру приспевшу, не надеяхся утреняго дни видети.

Нощи де минувше, и утрении день прииде и светом озарися, не веде, достигну ли вечера. И престану о сих много глаголати, жалостна бо есть. Иногда же приидох во притвор и, пад у гроба святаго, и начат плакатися, и рече: «О преподобны отче Александр, помилуи мя, не прогневаися на мя до зела, воспомяни первое свое явление и еже обещал ми еси, мздовоздание некое воздати ми хотя. Се ныне ти время даровати ми, свершаи слово свое обетованное. Вем бо, отче, яко вся упросишь у Бога, да и о мне умолить Бога твое преподобьство. Се уже состарился есми во гресех,//(л. 154 об.) не прошу ни богатьства, ни предолженых лет житиа, ни чти, ни славы мира сего, ни сана, ни величества. Еже прошу, то и даруи ми, да подасть ми Господь отпущение моих грехов твоих ради молитв. И всхотевшу бо ми изыти из обители твоеа, но ты ми не попусти и пакы не попущаи воли моеи совершатися. Отселе даи же ми, преподобне, терпение и единомыслие, еже ми не изыти от святаго сего места и своего обета не преступити, ни твоеи святыни удалитися. И еще, отче, прошу у тебе укрепити мою мышцу ослабленую, и десницу мою искривленую исправи, и персты моя скорченыя простри на проповедание чюдес моих. Ащи ти угодно будет, да елико возмогу испытати и взыскати о житии и о чюдесех твоих, и поработаю ти желанием и любовию, страхом и трепетом, желани//(л. 155)ем и любовию чюдес ради, еже на нас бываемых страхом и трепетом за леность и небрежение, да не тая же постражу или горша таковых».

И изидох ис притвора, и в том часе очютих облегчание болезненыя рукы своеа. Егда же святый яви ми ся, хотя мя бити прутом онем, аз же от жалости начат плакати и рече: «О преподобный отче, вижь, яко стар есми» и ина к сим изрече. Святыи же умилися о моем моление и мало осклабися, проображаа милостивное прощение подати ми и ослабленую руку здраву сотворити. А егда же назнамяная мя прутом онем, яко ударение творя трижды, тогда проявляя три недели страдати ми в болезни тои. И по трех неделях день от дни легчая ми бысть, и по том устроися рука моя здрава, яко и другая. О неизглаголаннеи милости Божии! О великому чюдеси преподобнаго Александра, яко ослабле//(л. 155 об.)ную мышцу мою укрепи, и искривленую руку исправи, и скорченыя персты простре. И се сбысться Исаино пророчество: «Людие мои узрять славу Господню и высоту Божию, укрепятся руки ослабленыя» (Ср. Ис 35:3). И мнози же, видевше иноци и миряня таковое чюдо, и прославиша Бога и преподобнаго отца Александра. Уже бо всеми видимо, яко же иногда ни яди ко устом рукою своею не можаше принести, ниже взяти что в руку свою. Ныне же бысть здравая, яко николиже болев.

В пятую же суботу по Пасце пакы служити начат Божию литургию и потом восхотех писанию предати житие святаго и чюдеса его, яко же преже рехом, от многа мало нечто, елико возмогу испытати и взыскати к ревности чтущим и послушающим на ползу. Яко же неключимый раб не восхоте тяжати дела господина своего, того ради биен бысть, та//(л. 156)ко же и аз, иже не восхоте волею послужити преподобному, и абие аки неволею поработа, и хвалю Бога о сем, яко сподоби мя Бог таковое Божие дело сотворити, и прославляю чюдеса преподобнаго Александра, яко не остави мя Господь от таковыя святыя слыжбы и не лиши мя святыи преподобныи таковаго дара своего. Ныне же, аще бы и множее сих обрел, не обленился бы уже писати, еще бы понудил старость свою за любовь святаго, елика сила бяше. И се до зде конець душеполезныя сея повести. И аще ли кто болша сих обрел будет, или известнее слышал, и яснее проповедал, и добреиши написал, не якоже аз худыи, мнее всех во обители, то и мы о сих славим и благодарим Бога, а тои же от Бога сугубу мьзду восприимет и болшеи чести сподобится о Христе Иисусе. Списано же бысть житие преподобнаго отца нашего Александра в лето 7075-е (1567) при державе царя и государя великаго князя Ивана Василиевича всея Росии//(л. 156 об.) самодержца, при митрополите всея Росии Филиппе, при архиепископе Пимине Великого Нова града и Пьскова во обители великого Николы Чюдотворца в созданнем от преподобнаго монастыре, иже имянуется Ошевнев, идеже святыи света сего житиа конець приат, а начало жизни вечныя, наследие неизреченныя радости, еа же да буди всем нам улучити о Христе Иисусе Господе Нашем, Ему же слава со Отцем и Святым Духом.

И о сем же наипаче молю вы, святии отци и братиа о Христе, егда почитающе житие святаго и, где буду небрежением описался или леностию не исправил, и вы Бога ради собою исправливаите, а на мою на грешную душю тяготы не рьцыте Господа ради и простите мя грешнаго, и Господь Нашь Иисус Христос вам простит ваша согрешениа, и да будеть со всеми вами милость его с Отцем и с Святым Духом в векы. Аминь.


Поделиться с друзьями:

Кормораздатчик мобильный электрифицированный: схема и процесс работы устройства...

Своеобразие русской архитектуры: Основной материал – дерево – быстрота постройки, но недолговечность и необходимость деления...

Архитектура электронного правительства: Единая архитектура – это методологический подход при создании системы управления государства, который строится...

История развития хранилищ для нефти: Первые склады нефти появились в XVII веке. Они представляли собой землянные ямы-амбара глубиной 4…5 м...



© cyberpedia.su 2017-2024 - Не является автором материалов. Исключительное право сохранено за автором текста.
Если вы не хотите, чтобы данный материал был у нас на сайте, перейдите по ссылке: Нарушение авторских прав. Мы поможем в написании вашей работы!

0.013 с.