О явлении трех святых мужех, како виде Марко земледелатель, и о создании церквеи Божиих, и о устрении монастыря, и о игумене Максиме.

В то же время бе ту человек Марко именем, зовомый Спица, тоея прежереченныя веси зовомыя Усть-Волгы, иже бе знаем Акиму оному велможи, жилище имея единоя веси. Отозва же Якима от сонма и в таине наедине начат Якиму Марко поведати: «Господине Аким, аз видех в нощь сию чюдно видение, и дивно зрение, и ужаса исполнено, и неизреченно сказание, и страшно поведание. Видех, господине, на монастыре и коло монастыря множество древес великых и малых и множество людеи, делающих человек: секуть, рубять, тешуть, колють, церкви вздвизають, келии ставять, монастырь огражають. Аз же видех сиа, ужаснухся и страхом одержим, и стоях, зря, и чюдихся страшному видению, и помысли и рече в себе: «Что есть се, откуду се толико народа в пустыни сеи?» И мало позрех, и видех три мужа ходяща. И два бе//(л. 73) в них светоносна образом, сединами украшена. Един же в них в святительскую одежю одеян, образом взльк, власи главни, аки волна чиста, браду имея круглу, а в руце держа крест и крестом же огражая и благословляя место и делателеи. Другый же светоносныи старець, такоже сединами украшен, браду имея немалу, яко до перси, тои же хожаше, имея в руце своеи воду святую, и окропляя, и благословляя тако же место и делателеи. Третии же старець взрастом среднии человек, и тои бе образом умилен, власы имея русы, брада невелика и не велми густа, в полысед. Сеи же в руце имеа кадило, тои же пакы хожаше, покажая место, и делателеи, и благословляя такоже. Четвертыи же мало вдалее последи их хожаше, сеи млад бе, взрастом немал, и приидоша же близ мене. Аз же зрех и почюдихся доброте ею и светлости лица их, и, пад, по//(л. 73 об.)клонися има до земля, и востах, и познах третиаго в них, иже среднии возрастом, игумена Александра, началника месту сему. Он же, видев, и позва мя к себе. Аз же, пришед, поклонихся ему и рек к нему: “Повежь ми, отче, истинну, да услышу от неложных твоих уст, кто еста сиа святая светоносная мужа, иже зрак ею удиви мя, яко николиже тацех мужеи видех образом тем в житии моем, якоже сия”. Преподобныи же Александр тихо рече ему: “Сего ли не позна, иже есть первыи тои, иже ты пред образом предо стоя, всегда молишися ему? Тои ест славныи и великый в чюдотворцех Николае”. Аз же рех: “Да что бе дело ему зде и почто прииде семо?” Преподобныи же рече ко мне: “Како не разумееши, яко есть зде храм в имя его? Он же прииде посещати храма своего. Господь же повеле ему снабдети монастырь тои, хранити место то”. Аз же рех: //(л. 74) “Не взбрани ми, отче, еще вопрошу тя, скажи ми: другый же святоносны тои, иже воду святую ношаше, кто есть и како имянуеться?” Александр же рече ему: “А то есть преподобныи игумен Кирил, зовомый Белозерьскый чюдотворець”. И Марко рече: “Отче, и сеи убо что ради прииди семо, толик путь преиде и кем позван бысть?” Александр же рече ему: “А то есть отець нашь, и наставник, и учитель, понеже пострижение имех яз в его монастыре. Того ради ученик его имянуюся. Аз же, егда бех в тленнем житии, он же многажды мя посещая и укрепляя на подвигы, а иногда же в болезни посети мя и молитвами его здравие получи. И ныне же молих его, да приидет посетити место сие”. – “А сеи убо младыи старець, и сего же аз не вем, повежь ми, отче, и се”. Александр же рече ему: “А се есть диак Матфеи, живый во обители сеи. Ныне по Божию изволению отци наши устрояют его и благословляють//(л. 74 об.) во обители сеи в мое место игуменом быти и предают ему монастырь” и Марко рече: “И еще, отче, не прогневаися на мя воспросити единаго словеси. Аще ты ми не повеси, от кого увем истинну? А се, отче, толико народа в пустыни сеи… И откуду сии собрашася и кто можеть сих препитати?” Александр же рече: “Чадо Марко, Бог, сздавыи сих и совокупивый их, и посла к нам на помощь, можеть тои и напита их. Ты же, чадо, не дивися чюдесем Божиим неизреченным, иди Богом в созданную обитель сию, в нашь монастырь, и постригыся, и буди тамо до дни исхода своего. И устроят тя пономархом, иже есть стражь церковныи (еже и бысть по словеси святаго), се, чадо, поведаю ти, аще кто стерпить на месте сем, благодаря Бога со многым смирением и покорением, надежю имам на Господа, не лишен будет милости Божиа. Тако же и ты, //(л. 75) чадо, приимеши жребии с нами и мздовоздание от Бога по своему труду”. И сиа рек, прочее отиде. Аз же, взбнув, и не видех никогоже, и начат дивитися великому тому сну и страшному видению, и сие убо помыслих тебе поведати сиа».

Яким же яко услыша сиа глаголы от Марка, и вздохнув, и рече: «Благо тебе, брате Марко, яко не лиши тя Господь милости своеа. И блюди сиа словеса в сердце своем, и не забуди наказаниа преподобнаго отца Александра, и свершаи делом повеленная словеса святаго, а на месте же сем восиаеть великая благодать Божиа, церкви вздвигнет Господь, и место распространиться, и обитель умножиться, и всем довольством исполниться по словеси святаго», еже и бысть. И пришед пакы Яким в собор, и начат прилежнее увещати Матфея и Левонтиа, еже пострищися обема, и обещается помогати монастырю. Левонтии же, слышав //(л. 75 об.) таковая глаголы от Якима, ничто же не помедлив, ни отлагая, и рече: «Аще Бог изволит, а аз готов есмь на таковое тщание». Тако же и Матфеи, совещавшеся оба пострищися – Матфеи и Левотеи.

Яким же, дав в монастырь от скот своих, от конеи двое и от доилиць двое млека ради, и вда им хлеба от всякого жита, иже бы им доволно и до новаго хлеба, вда же им и семян на довольство их, и всякыми нужными вещми помогати им хотяше и посещати их начасте, и вда им милостыню, и, взем от них благословение, и отиде в своя си. Левонтеи же остави сына своего вящьшаго в своем пребывании. Сам же иде в монастырь, взем с собою два сына – Максима и Конана. И вдасть Максима служити на братию, а Конана же вдасть на учение святым книгам диаку некоему, во обители пребывающему, Семиону имянем. И абие спешне ему научившуся, //(л. 76) и было писаному грамоте горазд и потом пребыв в тои же обители диак время немало. Матфеи же и Левонтеи постригостася оба, постриже их Варлам старець священиик саном, преже постриже Левонтиа, нарече его Левада имянем, потом постриже сына своего Матфея, нарече его имянем Максима. Леванид же остася в монастыре, попечение имея о обители.

Повеле же Леванид клириком и диаком писати житие преподобна Александра, понеже он ведый известно святое житие его, и чюдеса виде, и пророчествиа святаго вся збышася, клирици же писаша памяти ради. Максим же поиде в великый Нов град, абие пути емлется. Бысть же ему путное шествие строино по суху и по водам Божиею помощию, и не по мнозе времяни обретается в великом граде и приходить ко архиепископу. Архиепископ же Сергии, видив, и благослови его, и повеле ему сести, и вопрошаше его многыми словесы о монастыре, и довольстве, и о устроении. Максим же исповеда ему вся о себе и о монастыре, яко место нужно бе и пустынно. Архиепископ же, видев его млада суща и смирена, проста мужа и незлобива, //(л. 76 об.) и, ничтоже истязав его, освяти его священиа саном, и сверши его игумена, и поучив его от божественых писании, и духовными беседами наказав, и дасть ему грамоту игуменьскую. Игумен же Максим, взем грамоту и благословение от архиепископа, и отходит в монастырь свои и тако благодатию Христовою доиде до обители.

Варлам же, и Леванид, и вся братиа стретоша его. Игумен же благослови их всех и о Христе целование дав им, и внидоша в церковь великого чюдотворца Николы и, молебная певше за праславного царя великого князя, и за архиепископа, и за все православное христианьство, и возведен бысть на место игуменское. И поучив братию доволно, и разидостася кождо во своя келиа, бе бо уже приспе вечер. Игумен же Максим начат пребывати в монастыре.

Малу же времяни мимошедшу, есени минующе и зиме належаще, водам и блатом померзающим, //(л. 77) яко же рече: «Противу лицю мраза его кто постоит?» (Пс 147:6). Снегови и слани на землю падающе, якоже реченно бысть: «Дающаго снег свои, яко волну и мглу яко пепел посыпающаго» (Пс 147:5), яко же и всегда бывати Божию строению, человеком же купцем преходящим сюду и овамо, на возех тружающимся, куплю деющим, мала же нам о том беседа, впред почтем и тамо ину ползу обрящем.