Житие Александра Ошевенского — КиберПедия 

Опора деревянной одностоечной и способы укрепление угловых опор: Опоры ВЛ - конструкции, предназначен­ные для поддерживания проводов на необходимой высоте над землей, водой...

Археология об основании Рима: Новые раскопки проясняют и такой острый дискуссионный вопрос, как дата самого возникновения Рима...

Житие Александра Ошевенского

2017-07-09 339
Житие Александра Ошевенского 0.00 из 5.00 0 оценок
Заказать работу

Житие Александра Ошевенского

Начальная часть Жития

(по рукописи НИОР РГБ ф. 209, № 277).

(л. 380) Месяца априля в 20 день преставление преподобнаго отца нашего игумена Александра, иже пречестен монастырь составльшаго на реке на Чуриюге, иже зовется Ошевнев, близ моря дышущаго Окиана во области града Каргополя. Благослови, отче.

Иже рече Господь: «Аз есмь свет миру» (Ин 8:12). Добродетель же, и правда, и истина свет есть, якоже Христос сведетелствует, глаголя: «Да просветится свет ваш пред человеки, яко да видят добраа ваша дела и прославят отца вашего, иже на небесех» (Мф 5:16). И ходяще во свете добродетели, не предкнутся, но в пути шествуют заповедий Господних, добродетели поучаема красных показает исправляющих ея, иже рече Господь: «Никто же может приити ко мне, аще не отец, пославыи мя, привлечет его» (Ин 6:644). Сам бо рече: «Призовите мя и услышу вас» (Пс 90:15), «всяк просяй приемлет» (Мф 7:8). И паки рече, яко «без мене не можете творити ничтоже» (Ин 15:5). «Основаниа бо иного никто же может положити, паче лежащаго, еже есть Христос» (1 Кор 3:11), свет от света Христова, еже со Отцем и купно Пресвятому Духу соприснующе, единого трисолнечнаго божества, наполняющаго вся, требованиа дающаго, премудрости великодарство и доволен всем разум и вещанием наполняюща.

Неподобно есть праведных и преподобных, на земли высокое житие живших и чистотою к Богу приближившихся, в глубине завистне погрузитися, ни под спудом молчаниа надолзе покрытися,// (л. 380 об.) но на светиле исповеданиа положитися. Святых отец жития, иже святое житие имевша и веру божественую сохранших, святых преподобны отец великих, в посте и подвизе просиявших непрестанными к Богу молитвами, и велику победу на враги мужески показавших, и мира сего краснаа и сладкаа вмале услажаема преобидеша, яко вся суть временна, без вести бываемаа, подобно сени и сну преходящу и цвету травы, утро процветая, а вечер засыша и отпадша (Ср.: Пс 89:6), купно являтися и погибати. Вся сия уразумевше и отвергше будущиа ради жизни, «яже уготова Бог любящим его» (1 Кор 2:9). Того ради подобает достойно памяти святых праздновати духовно и от Христа Бога дарованнаа тем чудеса похвалити «во псалмех и пениих, служаще Господеви» (Еф 5:19) день и нощь, памяти их ради подобает, яже видехом и яже в предняя слышахом истину, достоит сице писанию предати. О сем бо чаанием мзды будущих благ послушателем же и сказателем, иже в правду сведущим и паче тех, иже духовныи разум имущим и тех святых житиа исправляющи своими труды, аще молчанию предамы, то некако в забвении произыдут, аще мы ленимся воспомянути о сих, но Бог тех прослави на земли, и дарми чудес одари, и на небеси болша сих дарова, аще мы умолчим, то сами чудеса от них вопиют и по смерти бо живи сущи во веки. Ныне же нашего последняго рода кто изрещи возможет или по достоянию похвалити, похвала бо праведнику от Господа. И что сея похвалы похвалнее, иже рече Господь пророком: «Радуйтеся, праведники, о Господе, правым подобает похвала» (Пс 32:1). И паки рече: «Возвеселится праведник о Господе и уповает на Него, и похвалятся вси правии сердцем» (Пс 63:11). И понеже не тако просто святых похваляем, неоскудни бо они похвал небесных, того ради не яко они от нас похвал требующе, но паче мы, памяти их чтуще и духовно празднующе, и чудеса их видевше,// (л. 381) и житиа слышаще, и оставим злаа делати, и благая научимся, якоже они человецы бяху, якоже и мы, но не бяше тех произволение, якоже прочих человек, но вместо телеснаго покоя изволиша земныя труды и болезни, вместо сна – всенощное стояние, вместо радости – радостнотворныи плач, вместо человечьских молв – выну с Богом беседование и к нему, якоже по неким степенем день от дни приближающеся, в место широкаго пути тесным путем шествовавше. И таковому святых отец житию аггели удивишася и похвалиша, «ихже имена написана суть на небесех» (Лк 10:20), понеже бо Святаго Духа дарованием крест Христов на рамо вземше и многокозненаго врага поправше, и до конца низложиша. Сего ради небесному царствию сподобишася, и тем райскиа двери отверзены быша, и «внидоша в радость Господа своего» (Мф 25:21, 25:23), радующеся. И о сем пишет великий Василий в поучении своем, глаголя: «Будите ревнители право живущим и сих имена и делеса напиши на сердцы своем». О сем бо страшит мя велми слово, понеже стяжах на себе всегда неисправлена дела, нимало достиза дойти в меру и в прясло их. Се ныне нам свыше прийде звание от Бога, не от человек бо, но от вышняа премудрости Сына Божиа, Господа Нашего Иисус Христа. Аще ли дерзнем слово рещи, предлежит то верою несумненою, юже к нему имуще. И начнем повесть.

Откуду убо восиа нам сицевый светилник? Ныне да увемы известно, аще не от тех святых мест, идеже походи Господь наш Иисус Христос телесныма ногама своима обетовнныа земли, града Иерусалима и иных святых мест, ниже последи от иных великих градов, от еже наша Росийскаа страна просветися святым крещением до конец земли, иже Московскиа державы. Се время глагол начати, да не умолчано будет праведное и да не в забвение будет, иже пред многими леты бывшее, но на болшую ползу всем слышащим, появити хотяще, яко же явит ныне нам о сем писание, ему же послух Дух Святыи.

И прострох грешную мою руку// (л. 381 об.) десницу, и дерзнух написати, елико слышах, помощи Божиа прося и на молитвы сего святаго мужа надеяхся, рускую похвалу, новаго чюдотворца, преподобнаго Александра, им же посети Бог люди своа в последняа роды наша, прояви Бог в нашеи стране севернои Онежскиа земля области града Каргополя близ студенаго моря, иже преже многа лета живша без просвещениа, последи же святаго просвещаниа сподобльшихся, глаголю же очистившеся идольскаго поклонениа и вместо сих процвете православную веру и монастыря честныя. В них же мнози светилници возсиаша, яко же бы рещи «всю вселенную просвещающи». В них же бысть и сеи святый преподобный Александр, иже просиа в наших родех таковыи светилник. Не во времяна наших лет, но преже бытиа нашего, но от слышаниа уведехом и истинных свидетелеи и правых сказателей. Сего ради подвигся на рвение боголюбно вставити. И первие убо, неправедно помышляющи ми, овогда веровах и чюдихся, иногда же не веровах и лжи вменях. И Божиим благодеанием обоя сия на ползу ми быша, веровах убо, яко воистинну праведно. За неверие же нечто пострадах, и помилова мя Бог. И молитва преподобнаго Александра поможе ми, и у раки его прости мя Господь, да и в прочее время веровати начну, да не горша сих постражу, но и да инем проповедаю и сице глаголю: «Уясни ми язык, спасе мой, и разшири уста моя, и наполни я. Даи же ми глаголати полезнаа и творити подобнаа и мне, окаянному, по неизглаголанному ти милосердию створити начало повести сея, откуду сего родителие, от нею же се раб Божий от чресл ею произыде, подобно бо беяше преже поведати, яко от корени блага прозябнути блазеи ветви».

О скорби инок

Иноци же, стуживше сии велми, и начаша к себе с плачем и рыданием глаголати сие: «Что сотворим, яко уже изгибаем? И како сядем, и что имамы ясти и пити, и во что одежемся? (Мф 6:31)» Брат же некый в них, ни святым книгам учився, ни писани ведущи, но исполнен разума духовнаго, начат увещати братию, сице глаголаше: «Слышесте ли, братие, иже рече Господь в святом Евангелии: “Не убоитеся малое мое стадо, яко благоизволи отець вашь дати вам царство” (Лк 12:32). Мы же со Иевом речем: “Аще блага прияхом от Бога, злых ли не терпим?” (Иов 2:10). Еще же и се поведаю вам: егда убо отець нашь и наставник преподобный Александр поведа нам свое к Господу отхожение, тогда вся сиа прорече нам стра//(л. 70)нных пришельцов прихожение, и отхожение, и разграбление, и разношение, и еже на нас от них озлобление и уничижение. И терпети повеле нам на месте том, донелиже последнее речение пророчества святаго исполнится, еже и бысть по смотрению Божию. Мы же плакахомся, глаголюще: “Сам, отче, ко Господу отходиши, а нас сирых оставляеши”. Он же обещася неотступно духом с нами быти, мы же тогда не велми внимахом, ныне же уведехом, яко вся пророчествиа святаго на нас сбышася». И ина многа старець ко утешению братии глаголаше: «Еще мало претерпим, да надежи не погрешим. На Господа надежу возложим».

Како восхоте Бог преподобнаго Александра дар <обрезано>

Восхоте же Бог болми своего угодника дарми чюдес прославити, аще не восхоте святыи славы человеческыя в животе и по смерти, но крепкая десница Господня прослави его, иже бо рече Господь: «Прославляющаго мя прославлю» (1 Ц 2:30). //(л. 70 об.) И сего святыя его помощи в забвении не оставит Господь, да и храм великого чюдотворца Николы бес пениа не пребудет и место святых трудов его не оскудеет, яко же прорече святыи: «Аще обрел буду благодать пред Богом (Быт 18:3), то не оскудеет святое сие место, но и болми распространиться по моем отшествии», еже и бысть строением Вышняго Бога.

О Пиале и о Росоле

И потом мину мало время, еже отстоя от монастыря, яко верьсть сто седмьдесят по Онеге по реце вниз и есть место, зовомо Пияла. И по некоему Божию строению явися тамо источник воды сланы в реце, иже нашею речию зовется Росоль. В то же время прииде к ним от лук морьскых некый старец Тарасии имянем, зовомыи Беляи// (л. 80), иже бе искусен таковому делу. Они же поселяне пияльци начаша его увещати и нарекоша ему жребии тоя воды. Старець же ятся делу и изведе им из рекы воду близ брегу, и кладязь устрои, и воду от росолу отлучи, и дасть тоя воды сланыя своего жребиа старець Тарасии на Соловкы в монастырь на црен, а во Александрову пустыню во Ошевнев монастырь на пол црена. Игумен же Максим, слышав и ехав тамо, и прикупи тоя же воды сланы на другую пол црена, купи же и земли место подвор и брега жреби на пристанище и по дрова. Есть же и доныне тамо тои промысл, братья тружаются, соль варять и продают купцем. И тем купять себе одеяние, и обувение, и вся потребнаа на братию и на монастырьское строение. Пияльци же, люди добродетелны и богобоязнивы, велию веру имеють к Господу Богу, и к Пречистои Его Богоматери, и к преподобному Александру и к монастырю много тщание и прилежание тво//(л. 80 об.)ряше. И вдаша и к монастырю и к тому промыслу, ин дровню, а другыи угодья пожьнии, а ин от сребра и от скот. Есть же и доныне всяко требование подающе на спасение своим душам в вековую милостыню.

О попове сыне Кириаке

И се да не умолчано будет: попа некоего сын имянем Кириак, жилище имея на Онеге реце в заостровии. Родителема же его умершима, сеи же млад остася, ремесла же не имея ни коего, и помысли в себе глаголя: «Что сотворю? Тяжести дела понести не могу, не обыкшу бо ми таковая, а просити стыжюся. И чем начну питатися?» Бог же, не хотя смерти грешнику, но обращение животу (Иез 33:11), и прииде ему помысл, и рече в себе: «Слышу чюдеса преподобнаго Александра, иже в области града Каргополя, иду ныне в монастырь его, иже зовется Ошевнев, аще Бог и молитвами преподобнаго Александра поможет ми, и поимуть //(л. 81) мя, и постригуся, и буду инок». Се же ему помышляющу и Богу помогающу, восхоте же и делом створити, пути емлется, и прииде во обитель, и приходить к игумену, и припадаеть к ногама его, и просит благословениа и молитвы, источникы слез от очию изливаеть и молит тепле, да бы его приял и створил мниха. Игумен же, видев его желание и усердие, ничто же отлагая, приемлеть его и постризаеть его. И нарече имя ему Кирил. И дасть ему некоему искусну старцю. Старець же научи его всякому благочинию, и потом от настоятеля посылаем бывает в поварню и в хлебню, и вся службы монастырьскыа строино прошед с всякым покорение и послушанием. И потом же игумен устрояеть его пономарха и просфиры пещи, и пребысть в тои службе время немало. Благый же Бог, хотя вся человекы спасти и в разум истинны привести (Иез 33:11), и иное желание в//(л. 85 об.)ложи ему Бог, да бы ему научитися Божественому писанию и молитвы клириков и диаков в обители пребывающих, и мзды даеть. Они же вдаша ему букв писанная. Старець же ятся делу. Они же направляющии, поучающе его, и извыче писанию божественому. И по времяни некоему приходить к игумену и просит благословение и отпущение со молитвую. Игумен же, наказав его, и отпусти с миром. Старець же отиде прочее, и иде в Великы Нов град, и приходить к архиепископу, и припадаеть к ногама его, да получит желание свое. Архиепископ же благослови его, и освяти его священьства саном, и отпусти. Он же отиде во своя си и пребысть в некоеи веси, имянуема Кенозеро, служа Богови. И оттуду прииде на Онегу, на на реку в весь, зовома конець Островие (ту есть храм всемилостиваго Спаса). И тамо пребысть, честне принося жертву Богови//(л. 86).

О игумене Максиме

Игумен же Максим пребысть в монастыре лета доволна, велико тщание сотвори и великы труды и подвигы показа, много деревень от христолюбець к монасты присовокупи, и много угодие пожень к монастырю притяжа, своима рукама делаа, древеса посекаа, и хврастие собирая, и огню предаа, и пожни углажаа. Бе бо человек возрастом немал, телом крепок, неутомлен, иже во многых мало обретаются, яко же сеи. Се же творяше сего ради, дабы потове и подвигы пребыли во прочаа лета по смерти его, еже он приплоди к монастырю. И того ради тружаяся, дабы тем трудом обрести вечныи покои, и своеи душе спасение получити, и мздовоздание от Бога прияти. И не хощу много глаголати о сем тродолюбнем мужи, еже он показа труды, толико Бог весть, како потрудися в юне взрасте: тело трудом и страдою утоми, еже бы чисто соблюсти от скверны, и душю свою схранити от греха, и уневестити//(л. 88 об.) жениху своему Христу; и в свершенне мужестве молитвою и постом телесное ражжение угаси; в старости мастите бдением и слезами душю свою спасе. И жив же игумен Максим в всяком вздержании, никоеа же сладости кроме братии усладився, и потом от житиа своего исходить, держа монастыря того настоятельство лет 40 и 2 и полтретьяго, и добрым исповеданием дух свои предасть Господеви. И бысть же в то время прежепомянуты Корнилии священник, священьствуя в обители, не приим благословениа от архиепископа игуменьства, ни почтен бысть саном настоятельства.

По времяни же некоем прииде в обитель некый старець, а саном священник именем Маркел от иных монастыреи, прият бысть и начат оболщати братию. Неци же крамолници от братиа всхотеша его игуменом, еже и бысть. Инии же от братиа не начаша им прекословити за смирение. Маркел же, ехав в Великый Нов//(л. 89) град и от архиепископа взем благословение настоятельства, игуменьства сан, и взвратися в обитель, и привезе же с собою черньца пришелца некоего. И малу времяни минувшу, Маркел же игумен начат негодовати на Корнилиа, на священника. Корнилии же начат прекословити Маркелу-игумену, и бысть роптание ею ради в братие. Священник же прочее отиде.

Игумен же Маркел пакы начат оболщати братию: «Аз, братие, хощу ехати к Москве плакатися и бити челом царю государю великому князю просити милостыни». Те же крамолници начаша братии глаголати, яко «Бог посла нам отца игумена и строителя, попечение имееть о монастыре, а человек добр, речист, жилец московскои, и весь обычаи ведаеть». Игумен же черньца оного пришелца, иже с ним из Нова града прииде, и слугу тако же пришелца исгласивше с ними заедино, и поят их с собою. Братиа же, избравше старца некоего имянем Иону, и со игуменом послаша. Взят же игумен(л. 89 об.)// с собою от конеи три мерины лучших, выбрав от стада и казны монастырьскыя сребра два десять рублев, от всякаго запасу от хлеба, и от рыбы доволно, и от вещеи церковных, от книг и от риз, яко же прорече святый: «начнут расточати и разнашати». И яко же преже рехом, аще и писаниа божественаа ведуще, а горши неверных творяще, и книгу писанную, еже о житии, и о чюдесех, и о пророчестве преподобнаго Александра, с собою взят и рече: «Аз сиа писаниа пресвященному митрополиту взвещу и покажу. Он же царю и государю великому князю сиа явит». Се же глаголя, льстяще, яко же пророк рече: «Неправду умысли язык твои, яко бритва изощренна, створил еси лесть. Возлюбил еси злобу паче благостыня» (Пс 51:4-5) и прочаа: «Сего ради разрушит тя Бог до конца» (Пс 51:7), яко же и преже рехом, аще кто чюжаа всхищает неправдою, и своя с ними погубит, а ин же и живота зле гонзнеть. Иже //(л. 90) последи и бысть тако.

Игумен же, братию лестьным целованием лобзав, пути касаеться. Братия же, с любовию проводивше его, возвратишася. Игумен же иде в путь свои и, доехав некоего места великого Вожеезера, и начат старца во обитель взвращати. Оному же хотевшу, Маркел же рече ему: «Аще не послушаеши, то скоро умреши, во езере погрузим тя». И вся же отяша у него и, поверьгше его, отбегше. Маркел же, доехав до некоего места, от мужеи кровии злу кончину приат, иже последи инем поведают, а по смерти муку вечную наследит, яко же пророк рече: «Обратится болезнь его на главу его, и верх его вся неправда его сниде» (Пс 7:17).

Старец же Иона возвратися во обитель, и велика скорбь бысть братии о том, яко книгу писаную свезе от них. Они же таковаго дара лишени быша, оставшимся беспаметным житиа и чюдес святаго, и оттоле пребысть без написаниа. Неции же от братиа, иже крамолы деюще, начаша роптати на старца на Иону. Он же, не мога терпети, прочее отиде, но //(л. 90 об.) понеже не мощно бяше обители без настоятеля быти, прииде же во обитель из новогородскыя державы священник саном имянем Васиан, и прияша его, и бысть им игуменом. И сие убо о сем есть.

О создании болшои церкви.

Елма же сим тако бывающим, братьство немало бяше. Церкви же мала еще и ветха. Помышля же игумен Васиан з братиею новую церковь вместо тоя болшую воздвигнути. И размышляше же о том, како мощно будет разрушити церковь великаго чюдотворца Николы, юже сам преподобный Александр святыма своима рукама основал, и составил, и бояся, «да не како в благодеяние место негодование от святаго на себе привлечем». По сих же предреченныи благый свои помысл на Божии воли возложиша глаголюще: «Аще угодно будет Богу и Чюдотворцу Николе, может Бог и дело створити». И повелеша делателем приготовити лес на создание церковное, и бысть тако. Игумен же и братиа в печали бяше о тако//(л. 92)вом строении, яко начаша делати великую церковь. Скорбяше же не токмо древ ради, но и о брашне потребных, зане быти подобно многым делателем, но яко же Божие хотение и преподобнаго молитва, тако и будет. Иже древле в пустыни израилтяны прекормивый, и ис камени воду источив им, и пятию хлебы пять тысящь народ насыти, Тои и ныне малое умножить. И бысть тогда явьствьно чюдо и всеми зримо – Бог дарова молитв ради своего угодника Александра: обычная брашна та же мера, яко же своим по вся дни доволна бяше всем, еще же и изобилно. Скорбяше же пакы и о том, яко древодели не бяше. Таже, аки Богом послан, прииде во обитель древоделатель от лук морьскых некии человек Василей имянем и многими знаем, иже хитр бе плотничному делу, и мудр древоделець, и строен церковному зданию. Игу//(л. 92 об.)мен же з братиею совещають с ним о церковнем здании. Он же никакоже отречеся, но совещаеть с ними, благ свет рече им: «Рад есми таковому Божию делу и вашеи любви, яко же Бог поможет. Токмо о древех попечение имей, а о стронии Бог, Тои и разум подасть, а мзду по делу воздадите ми во время уреченное по труду моему». И совеща с ними приити во подобно время. Повеле жи им церковь старую сносити и место угладити. Сам ж прочее отиде и по мале же времяни пакы приде Василеи во обитель, церкви же ветхой еще на месте. Василеи же рече ко игумену и к братии: «Что есте не сносили ветхой церкви? Или на ино место хощете ставити?» Игумен же и братиа начаша Василиа увещати: «Подтщися, господине, Бога ради, твое се дело, тебе бо повеленно Богом таковаа сзидати. У нас же//(л. 93) несть такова человека на то дернути». Василеи же рече им: «Аз убо совещах с вами новую церковь создати, а не ветхую разоряти». Игумен же и братиа начаша его с любовию увещати. Василий же ятся делу. Бе бо тои Василеи искусен таковому строению и, взем от игумена благословение, и иде в хижю свою, иже дана бысть ему покоя ради, и постися на дни уреченныя, яко дний седмь. Седмому же дню прешедшю и к вечеру приближающуся, Василию же по молитве седшю и помышляющу ему о таковом строении, и воздремався мало труда ради молитвенаго, еже к Господу Богу.

О Закхеи черньце

Поведа же ми се прежереченны диак Иван о некоем черньце Закхее имянем, бывшу ему, рече, иногда во прежереченнои веси Пеяле прикащиком у промысла, идеже соль варять. Тамо пребысть неколико время, и прииде по обычаю в монастырь, и отдасть игумену и братии отчеть службы своеа, и сребро положих пред ними, еже ему Бог дарова от того промысла. И диавольскым же илучением утаи сребра седмь рублев, остави в келии своеи. В монастыре же в то время бе некый человек-пришлець Василеи имянем, рукоделие имея, порты шия. Сеи же часто прихожаше ко оному черньцу и, уведав сребро у него, и украде, и прочее изыде из монастыря, а Закхее же того не ведущу, и абие слышить роптание в братии, яко Закхеи брат утаил есть сребра, яко лихо име//(л. 97 об.)тель есть, казну монастырьскую похищаеть и скрываеть в келии своеи. Он же, слышав, раскаяся, и позна свое согрешение, и рече: «Почто аз толико сребра скрых в келии своеи? Пити и ясти вся готова суть с братиею на трапезе, одеяние и обувение с казны тако же готово бысть. Ничто же ино мню быти, но толико на болшее осуждение и на пагубу души своеи скрываю его, понеже всеи братии злодеи есми, и всем в ненависти буду, и приму от них клятву, а не благословение, яко же ин некый, ему же речено бысть: “Сребро твое с тобою да будеть в пагубу” (Деян 8:20). Ныне убо сам пагубник есми своеи души, малого ради сребра с еретикы осужден буду и со идолослужебники огню вечному предан буду. Святии бо отци сребролюбие вменяют второе идолопоклонение. Ию//(л. 98)да бо сребра ради удавлению предаться и “кости его рассыпашася при аде” (Пс 140:7). Тако же и аз во тму кромешную ввержен буду и бесконечно мучим буду». И пакы рече: «Шед, возму сребро, и положу пред игуменом и пред братиею, и обнажу свои грех, и прииму прощение и благословение». И шед взяти сребро, и не обрете его на положенном месте, и поискав, и не обрете нигде же, и рече: «Горе мне, и увы мне беды сея. Грех сотвори, имениа не получих, обое бедно мне таити и поведати». И смыслив же сие: «Лучши ми есть поведати, аще и срам ми есть, да срамом срама оного гоньзну». И шед, поведа игумену и всеи братии, и многу взысканию и испытанию бывшу, и не обретоша. Закхеи же рече, яко «Фотеи брат тои же, которавый со мною, тои же и похити». И пакы мнозе которе бывше//(л. 98 об.) и клятве межи има, и ничтоже успеша тем, толико студ и грех. Бог же, не хотя погибели человеком, но хотя всех спастися (Иез 33:11), преподобныи же Александр явися некоему древнему старцу во сне, аки на яве, рече: «Сребро ваше никтоже от братиа похити. Но пришлець он, тои есть украдеи, того ради прочее отиде. Ты же, шед, поведаи игумену и братии и, послав, обрящут его в некоеи ближнеи веси и сребро у него, донелиже мало изнурих его, даже вдалее не отидет». И сиа рече, и невидим бысть. Старец же взбнув от видениа, и не виде никогоже, и дивяся видению, и верова истинну быти. И скоро шед, поведа игумену и всеи братии, и пакы послаша на взыскание татя, и обретоша его, и взяша сребру у него и, мало потязав его о изнурившем сребре, ничим же вредивше, отпустиша его. И прослави Бога, и хвалу воздаша преподобному Александру, новому чюдотворцу.// (л. 99)

Чюдо о попе Игнатие.

Поп некый Игнатеи имянем, Фомин сын, жилище имея недалече от обители святаго – поприщь десять в веси некоеи, зовомои Нижнеи Борок. Случиже ся ему болезнь некаа, ослабла бо бе рука его шуяя. Он же, шед в церковь Живоначалныя Троица, идеже служаше, и, молебнаа певше и многых святых призываа на помощь, и не бысть ему помощи. Он же, вспомянув блаженнаго старца Александра, и рече: «О колика исцелениа творит Бог его ради!» И обет свои полагает, еже идти в монастырь святаго, и у раки его приложитися, и благодарение воздати Богу и святому. О великое Божие благодеяние! О дивное чюдо преподобнаго Александра!//(л. 131) О теплыя веры ерея к Господу Богу и к святому обет и моление! Яко в том часе бысть здрава рука его, яко и другаа. И потом приходить в монастырь и, шед во притвор, и приложися у раки святаго, и повеле молебнаа пети. Сам же начат облобызати раку святаго и со слезами молитися о согрешении своем. И молебнаа свершивше, и вся исповедает игумену и братии бывшее на нем чюдо святаго, и обещается милостыню послати, еже и сотвори. Игумен же и братиа вси, слышав, славяще Бога, и хвалениа, чюдесы удивляеми, благодарение Богу воздающе и глаголюще: «Слава единому творящему дивнаа и преславнаа, яже видеста очи наши». Священник же отиде в дом свои, благодаря Бога и прославляя чюдеса угодника Божиа – преподобнаго отца Александра, яко молитвами его исцеление получи и бысть здрав, яко ничтоже пострадав.// (л. 131 об.)

Житие Александра Ошевенского

Начальная часть Жития

(по рукописи НИОР РГБ ф. 209, № 277).

(л. 380) Месяца априля в 20 день преставление преподобнаго отца нашего игумена Александра, иже пречестен монастырь составльшаго на реке на Чуриюге, иже зовется Ошевнев, близ моря дышущаго Окиана во области града Каргополя. Благослови, отче.

Иже рече Господь: «Аз есмь свет миру» (Ин 8:12). Добродетель же, и правда, и истина свет есть, якоже Христос сведетелствует, глаголя: «Да просветится свет ваш пред человеки, яко да видят добраа ваша дела и прославят отца вашего, иже на небесех» (Мф 5:16). И ходяще во свете добродетели, не предкнутся, но в пути шествуют заповедий Господних, добродетели поучаема красных показает исправляющих ея, иже рече Господь: «Никто же может приити ко мне, аще не отец, пославыи мя, привлечет его» (Ин 6:644). Сам бо рече: «Призовите мя и услышу вас» (Пс 90:15), «всяк просяй приемлет» (Мф 7:8). И паки рече, яко «без мене не можете творити ничтоже» (Ин 15:5). «Основаниа бо иного никто же может положити, паче лежащаго, еже есть Христос» (1 Кор 3:11), свет от света Христова, еже со Отцем и купно Пресвятому Духу соприснующе, единого трисолнечнаго божества, наполняющаго вся, требованиа дающаго, премудрости великодарство и доволен всем разум и вещанием наполняюща.

Неподобно есть праведных и преподобных, на земли высокое житие живших и чистотою к Богу приближившихся, в глубине завистне погрузитися, ни под спудом молчаниа надолзе покрытися,// (л. 380 об.) но на светиле исповеданиа положитися. Святых отец жития, иже святое житие имевша и веру божественую сохранших, святых преподобны отец великих, в посте и подвизе просиявших непрестанными к Богу молитвами, и велику победу на враги мужески показавших, и мира сего краснаа и сладкаа вмале услажаема преобидеша, яко вся суть временна, без вести бываемаа, подобно сени и сну преходящу и цвету травы, утро процветая, а вечер засыша и отпадша (Ср.: Пс 89:6), купно являтися и погибати. Вся сия уразумевше и отвергше будущиа ради жизни, «яже уготова Бог любящим его» (1 Кор 2:9). Того ради подобает достойно памяти святых праздновати духовно и от Христа Бога дарованнаа тем чудеса похвалити «во псалмех и пениих, служаще Господеви» (Еф 5:19) день и нощь, памяти их ради подобает, яже видехом и яже в предняя слышахом истину, достоит сице писанию предати. О сем бо чаанием мзды будущих благ послушателем же и сказателем, иже в правду сведущим и паче тех, иже духовныи разум имущим и тех святых житиа исправляющи своими труды, аще молчанию предамы, то некако в забвении произыдут, аще мы ленимся воспомянути о сих, но Бог тех прослави на земли, и дарми чудес одари, и на небеси болша сих дарова, аще мы умолчим, то сами чудеса от них вопиют и по смерти бо живи сущи во веки. Ныне же нашего последняго рода кто изрещи возможет или по достоянию похвалити, похвала бо праведнику от Господа. И что сея похвалы похвалнее, иже рече Господь пророком: «Радуйтеся, праведники, о Господе, правым подобает похвала» (Пс 32:1). И паки рече: «Возвеселится праведник о Господе и уповает на Него, и похвалятся вси правии сердцем» (Пс 63:11). И понеже не тако просто святых похваляем, неоскудни бо они похвал небесных, того ради не яко они от нас похвал требующе, но паче мы, памяти их чтуще и духовно празднующе, и чудеса их видевше,// (л. 381) и житиа слышаще, и оставим злаа делати, и благая научимся, якоже они человецы бяху, якоже и мы, но не бяше тех произволение, якоже прочих человек, но вместо телеснаго покоя изволиша земныя труды и болезни, вместо сна – всенощное стояние, вместо радости – радостнотворныи плач, вместо человечьских молв – выну с Богом беседование и к нему, якоже по неким степенем день от дни приближающеся, в место широкаго пути тесным путем шествовавше. И таковому святых отец житию аггели удивишася и похвалиша, «ихже имена написана суть на небесех» (Лк 10:20), понеже бо Святаго Духа дарованием крест Христов на рамо вземше и многокозненаго врага поправше, и до конца низложиша. Сего ради небесному царствию сподобишася, и тем райскиа двери отверзены быша, и «внидоша в радость Господа своего» (Мф 25:21, 25:23), радующеся. И о сем пишет великий Василий в поучении своем, глаголя: «Будите ревнители право живущим и сих имена и делеса напиши на сердцы своем». О сем бо страшит мя велми слово, понеже стяжах на себе всегда неисправлена дела, нимало достиза дойти в меру и в прясло их. Се ныне нам свыше прийде звание от Бога, не от человек бо, но от вышняа премудрости Сына Божиа, Господа Нашего Иисус Христа. Аще ли дерзнем слово рещи, предлежит то верою несумненою, юже к нему имуще. И начнем повесть.

Откуду убо восиа нам сицевый светилник? Ныне да увемы известно, аще не от тех святых мест, идеже походи Господь наш Иисус Христос телесныма ногама своима обетовнныа земли, града Иерусалима и иных святых мест, ниже последи от иных великих градов, от еже наша Росийскаа страна просветися святым крещением до конец земли, иже Московскиа державы. Се время глагол начати, да не умолчано будет праведное и да не в забвение будет, иже пред многими леты бывшее, но на болшую ползу всем слышащим, появити хотяще, яко же явит ныне нам о сем писание, ему же послух Дух Святыи.

И прострох грешную мою руку// (л. 381 об.) десницу, и дерзнух написати, елико слышах, помощи Божиа прося и на молитвы сего святаго мужа надеяхся, рускую похвалу, новаго чюдотворца, преподобнаго Александра, им же посети Бог люди своа в последняа роды наша, прояви Бог в нашеи стране севернои Онежскиа земля области града Каргополя близ студенаго моря, иже преже многа лета живша без просвещениа, последи же святаго просвещаниа сподобльшихся, глаголю же очистившеся идольскаго поклонениа и вместо сих процвете православную веру и монастыря честныя. В них же мнози светилници возсиаша, яко же бы рещи «всю вселенную просвещающи». В них же бысть и сеи святый преподобный Александр, иже просиа в наших родех таковыи светилник. Не во времяна наших лет, но преже бытиа нашего, но от слышаниа уведехом и истинных свидетелеи и правых сказателей. Сего ради подвигся на рвение боголюбно вставити. И первие убо, неправедно помышляющи ми, овогда веровах и чюдихся, иногда же не веровах и лжи вменях. И Божиим благодеанием обоя сия на ползу ми быша, веровах убо, яко воистинну праведно. За неверие же нечто пострадах, и помилова мя Бог. И молитва преподобнаго Александра поможе ми, и у раки его прости мя Господь, да и в прочее время веровати начну, да не горша сих постражу, но и да инем проповедаю и сице глаголю: «Уясни ми язык, спасе мой, и разшири уста моя, и наполни я. Даи же ми глаголати полезнаа и творити подобнаа и мне, окаянному, по неизглаголанному ти милосердию створити начало повести сея, откуду сего родителие, от нею же се раб Божий от чресл ею произыде, подобно бо беяше преже поведати, яко от корени блага прозябнути блазеи ветви».


Поделиться с друзьями:

Папиллярные узоры пальцев рук - маркер спортивных способностей: дерматоглифические признаки формируются на 3-5 месяце беременности, не изменяются в течение жизни...

Эмиссия газов от очистных сооружений канализации: В последние годы внимание мирового сообщества сосредоточено на экологических проблемах...

Семя – орган полового размножения и расселения растений: наружи у семян имеется плотный покров – кожура...

Историки об Елизавете Петровне: Елизавета попала между двумя встречными культурными течениями, воспитывалась среди новых европейских веяний и преданий...



© cyberpedia.su 2017-2024 - Не является автором материалов. Исключительное право сохранено за автором текста.
Если вы не хотите, чтобы данный материал был у нас на сайте, перейдите по ссылке: Нарушение авторских прав. Мы поможем в написании вашей работы!

0.033 с.