Кафизма восьмая после которой - малая ектения

Иерей: Я́ко Благ и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Аминь.

Чтец: Апо́стола вси́ и ученика́ Христо́ва восхва́лим пе́сньми в па́мять его́: боголе́пно бо на́шя помышле́ния, то́й я́звы гвозде́й осяза́в, изве́стну ве́ру изыска́в, утверди́ в ми́ре, и мо́лит Спа́са, поми́ловатися душа́м на́шым.

Сла́ва Отцу и Сыну и Святому Духу и ныне и присно и во веки веков. Аминь Апо́стола вси́ и ученика́ Христо́ва восхва́лим пе́сньми в па́мять его́: боголе́пно бо на́шя помышле́ния, то́й я́звы гвозде́й осяза́в, изве́стну ве́ру изыска́в, утверди́ в ми́ре, и мо́лит Спа́са, поми́ловатися душа́м на́шым.

 

Хор поет «Воскресение Христово видевше» один раз.

Сразу же Чтец (или хор): Господи, помилуй (трижды), Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Чтец читает псалом 50: Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Яко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Яко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы.

 

КАНОН

 

Песнь 1 Хор ирмос глас 1: Пои́м вси́ лю́дие, от го́ркия рабо́ты фарао́ни Изра́иля изме́ншему,/ и во глубине́ морсте́й нога́ми немо́крыми наста́вльшему,// пе́снь побе́дную: я́ко просла́вися.

Чтецы: Слава Тебе, Боже наш, слава Тебе. Дне́сь весна́ душа́м, зане́ Христо́с от гро́ба я́коже со́лнце возсия́в тридне́вный, мра́чную бу́рю отгна́ греха́ на́шего. Того́ воспои́м, я́ко просла́вися.

Слава Тебе, Боже наш, слава Тебе. Дне́сь весна́ душа́м, зане́ Христо́с от гро́ба я́коже со́лнце возсия́в тридне́вный, мра́чную бу́рю отгна́ греха́ на́шего. Того́ воспои́м, я́ко просла́вися.

Святый мучениче Са́вво, моли Бога о нас. И́же на земли́, сла́вне, во́инство оста́вль,/ Небе́сным чино́м и во́инством труды́ Боже́ственными/ сла́вно приче́лся еси́, Са́вво, сла́вя Христа́.

Святый мучениче Са́вво, моли Бога о нас. Си́лою, му́дре, свы́ше оде́ян на враги́,/ неподви́жим и непобеди́м яви́лся еси́,/ сих побежда́я до́блественно брань, пресла́вне.

1-й чтец: Слава Отцу и Сыну и Святому Духу

2-й чтец: и ныне и присно и во веки веков, Аминь.

 

Песнь 3 Хор ирмос глас 1:

Утверди́ мене́ Христе́ / на недви́жимом ка́мени за́поведей Твои́х,/ и просвети́ мя све́том лица́ твоего́:// не́сть бо свя́т па́че Тебе́ Человеколю́бче.

 

Чтецы: Слава Тебе, Боже наш, слава Тебе. Но́выя вме́сто ве́тхих, вме́сто же тле́нных нетле́нныя, Кресто́м Твои́м Христе́ соверши́в на́с, во обновле́нии жи́ зни жи́тельствовати досто́йно повеле́л еси́.

Слава Тебе, Боже наш, слава Тебе. Но́выя вме́сто ве́тхих, вме́сто же тле́нных нетле́нныя, Кресто́м Твои́м Христе́ соверши́в на́с, во обновле́нии жи́ зни жи́тельствовати досто́йно повеле́л еси́.

Святый мучениче Са́вво, моли Бога о нас. Силу́ Христо́с борца́ и держа́ву низло́ж сме́рти,/ оживи́ естество́ на́ше Свои́м Воскресе́нием и укрепи́.Святый мучениче Са́вво, моли Бога о нас. Те́плая, прему́дре, Христо́ва любы́, тя боже́ственно разже́гши,/ земны́х и тле́нных всех отлучи́ / и пре́лести супоста́та показа́.

1-й чтец: Слава Отцу и Сыну и Святому Духу

2-й чтец: и ныне и присно и во веки веков, Аминь.

Хор катавасию глас 2: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́ / в сердца́ нас, пою́щих Тя.

 

МАЛАЯ ЕКТЕНИЯ.

Иерей: Яко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Чтец читает конда́к: Непобеди́мый я́влься стратила́т,/ ва́рварский ко́зни победи́л еси́ / и, страда́льчествовав, сла́вне, тверде́йши,/ мно́жество враго́в неви́димых побори́л еси́,/ те́мже вене́ц испле́л еси́ побе́ды./ О нас моли́ Христа́, Са́вво всеблаже́нне,/ ве́рою почита́ющих тя.

2-й чтец читает седа́лен: Неподви́жим я́влься воево́да, ва́рварския ко́зни победи́л еси́ / и, пострада́в, сла́вне, кре́пко, полки́ пребори́л еси́ враг неви́димых./ Отону́дуже венце́м увя́злся еси́ побе́дным,/ о нас моли́ приле́жно, Са́вво преблаже́нне, ве́рою пою́щих тя.

Слава и ны́не, ипакои́, гла́с 6: Я́ко посреде́ ученико́в Твои́х прише́л еси́ Спа́се, ми́р дая́ и́м: прииди́ и к на́м и спаси́ на́с.

 

Песнь 4 Хор ирмос глас 1: Ве́лия та́йна Твоего́ Христе́, смотре́ния:/ сию́ бо свы́ше прови́дя, богозри́тельно Авваку́м,/ изше́л еси́, вопия́ше Тебе́,// во спасе́ние люде́й Твои́х Человеколю́бче.

Чтецы: Слава Тебе, Боже наш, слава Тебе. Же́лчи у́бо вкуси́, дре́внее вкуше́ние исцеля́я, ны́не же с со́том ме́да, просвеще́ние подая́ Христо́с пра́отцу, и Свое́ сла́дкое прича́стие.

Слава Тебе, Боже наш, слава Тебе. Ра́дуешися испыта́емь: те́мже Человеколю́бче на сие́ повелева́еши Фоме́, простира́я неве́рующу ре́бра, ми́рови уверя́я Твое́ Христе́, тридне́вное воста́ние.

Святый мучениче Са́вво, моли Бога о нас. Ноже́м отсе́кл еси́ и́стинных глаго́л твои́х/ лаки сплете́ния до́блеетвенне, Са́вво пресла́вне.

Святый мучениче Са́вво, моли Бога о нас. Цвету́щая телесе́ красота́ в тебе́ и́стинно яви́, страстоте́рпце,/ ду́ши твоея́ Боже́ственное благоле́пие.

1-й чтец: Слава Отцу и Сыну и Святому Духу

2-й чтец : и ныне и присно и во веки веков, Аминь.

 

Песнь 5 Хор ирмос глас 1: От но́щи у́тренююще пое́м Тя́ Христе́,/ Отцу́ собезнача́льна, и Спа́са ду́ш на́ших:// ми́р ми́рови пода́ждь Человеколю́бче.

 

Чтецы: Слава Тебе, Боже наш, слава Тебе. Предста́в друго́м скорбя́щым Спа́с, прише́ствием всю́ оте́млет ско́рбь, и игра́ти воздвиза́ет Свои́м Воскре́снием.

Слава Тебе, Боже наш, слава Тебе. Предста́в друго́м скорбя́щым Спа́с, прише́ствием всю́ оте́млет ско́рбь, и игра́ти воздвиза́ет Свои́м Воскре́снием.

Святый мучениче Са́вво, моли Бога о нас. Ты погребе́нием пло́ти борца́ на́шего погре́бл еси́ / и, я́ко Бог, истощи́в а́да, воскреси́ ме́ртвыя Свои́м Воскресе́нием, Христе́,/ Тя просла́вльшия.

Святый мучениче Са́вво, моли Бога о нас. Укра́шене, му́дре, тва́рей добро́те, позна́л еси́ всех Влады́ку,/ те́мже Его́ ра́ди, Са́вво, пострада́в, венце́в сподо́бился еси́.

1-й чтец: Слава Отцу и Сыну и Святому Духу

2-й чтец: и ныне и присно и во веки веков, Аминь.

 

Песнь 6 Хор ирмос глас 1: Проро́ка спа́сл еси́ от ки́та Человеколю́бче,// и мене́ из глубины́ прегреше́ний возведи́, молю́ся.

 

Чтецы: Слава Тебе, Боже наш, слава Тебе. Фомы́ не оста́вил еси́ Влады́ко, погружа́ема глубино́ю неве́рия, дла́ни просте́р на испыта́ние.

Слава Тебе, Боже наш, слава Тебе. Фомы́ не оста́вил еси́ Влады́ко, погружа́ема глубино́ю неве́рия, дла́ни просте́р на испыта́ние.

Святый мучениче Са́вво, моли Бога о нас. Погуби́в сме́ртию смерть,/ И́же нас ра́ди во́лею мертв вмени́лся еси́, Христе́,/ ме́ртвыя оживи́л еси́ и сея́ уз изба́вил еси́. Припев 4: Святый мучениче Са́вво, моли Бога о нас. Окропи́вся Христа́ Боже́ственною кро́вию,/ и́дольских треб оскверне́ния отступи́л еси́, Са́вво сла́вне,/ и све́том оде́явся благода́ти.

1-й чтец: Слава Отцу и Сыну и Святому Духу

2-й чтец : и ныне и присно и во веки веков, Аминь.

Хор катавасию глас 2: В бе́здне грехо́вней валя́яся,/ неизеле́дную милосе́рдия Твоего́ призыва́ю бе́здну:/ от тли, Бо́же, мя возведи́.

 

МАЛАЯ ЕКТЕНИЯ.

Иерей: Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Чтец читает Конда́к: Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же:/ созаключе́нным бо две́рем я́ко вше́л еси́,/ с про́чими апо́столы вопия́ше Тебе́:// Госпо́дь еси́ и Бо́г мо́й.

 

И́кос: Кто́ сохрани́ учени́чу дла́нь тогда́ неопали́му, егда́ ко о́гненным ре́бром приступи́ Госпо́дним? Кто́ даде́ е́й де́рзость, и возмо́же осяза́ти пла́менную ко́сть, вся́ко неосяжи́мую? А́ще бо не бы́ ребро́ си́лу по́дало бре́нней десни́це, ка́ко можа́ше осяза́ти, страда́ньми поколеба́вшая я́же вы́ше, и я́же ни́ зу? Cия́ благода́ть Фоме́ даде́ся, е́же сия́ осяза́ти, Христо́ви же вопи́ти: Госпо́дь еси́ и Бо́г мо́й.

 

Песнь 7 Хор ирмос глас 1: О́бразу служи́ти мусики́йскому согла́сию созыва́ющу лю́ди,/ от пе́сней Сио́нских пою́ще оте́чески о́троцы Дави́довы,/ мучи́телево разори́ша злочести́вое веле́ние,/ и пла́мень в ро́су преложи́ша, пе́снь воспева́юще:// превозноси́мый отце́в и на́ш Бо́же, благослове́н еси́. Чтецы: Слава Тебе, Боже наш, слава Тебе. Я́ко пе́рвый е́сть дне́й и госпо́дственный светоно́сный си́й, во́ньже ра́доватися досто́йно но́вым и боже́ственным лю́дем с тре́петом: прино́сит бо и ве́ка о́браз, я́ко осми́ца соверша́я бу́дущаго, превозноси́мый отце́в и на́ш Бо́же, благослове́н еси́.

Слава Тебе, Боже наш, слава Тебе. Еди́н дерзну́вый, неве́рною же ве́рою облагоде́тельствовавый на́с Фома́ Близне́ц, реши́т у́бо мра́чное неве́дение все́х конце́в, ве́рным неве́рствием, себе́ же вене́ц плете́т я́ве глаго́ля. Ты́ еси́ Госпо́дь превозноси́мый отце́в и на́ш Бо́же, благослове́н еси́.

Святый мучениче Са́вво, моли Бога о нас. Усну́в Христо́с во́лею я́ко мертв, пло́тию во гро́бе,/ ме́ртвыя, и́же во а́де спя́щия, от ве́ка возбуди́ / и живоно́сным воста́нием сих воскреси́, пою́щия:/ благослове́н Бог оте́ц на́ших.

Святый мучениче Са́вво, моли Бога о нас. Ору́жие, му́дре, Боже́ственных слове́с, я́ко нож держа́в,/ в сердца́ сих вонзи́л еси́ нече́ствующих,/ и уязви́л еси́ сопроти́вных ло́жная беззако́ния, и взыва́л еси́:/ благослове́н Бог оте́ц на́ших.

1-й чтец: Слава Отцу и Сыну и Святому Духу

2-й чтец : и ныне и присно и во веки веков, Аминь.

 

Песнь 8 Хор ирмос глас 1: В пла́мени о́гненне горя́щия пе́щи сохра́ншаго де́ти,/ и во зра́це а́нгела снизше́дшаго к ни́м,// по́йте Го́спода, и превозноси́те Его́ во ве́ки.

 

Чтецы: Слава Тебе, Боже наш, слава Тебе. Возжеле́вый Твое́ ра́достное виде́ние, пре́жде не ве́роваше Фома́: сподо́блься же того́, Бо́га и Го́спода Тя́ нарица́ше Влады́ко, Его́же превозно́сим во вся́ ве́ки.

Слава Тебе, Боже наш, слава Тебе. Возжеле́вый Твое́ ра́достное виде́ние, пре́жде не ве́роваше Фома́: сподо́блься же того́, Бо́га и Го́спода Тя́ нарица́ше Влады́ко, Его́же превозно́сим во вся́ ве́ки.

Святый мучениче Са́вво, моли Бога о нас. Сме́рти обрета́теля, сме́ртию твое́ю плотско́ю уби́в, Ще́дре,/ сего́ всем показа́л еси́ челове́ком ве́чную смерть:/ Ты превозно́сим, Животе́ и Нетле́ние.

Святый мучениче Са́вво, моли Бога о нас. Тиме́ния всего́ очи́щся безбо́жнаго/ и служе́ния и́дольскаго ба́нею, страстоте́рпче, креще́ния,/ Зижди́телю чи́сте приступи́л еси́, Са́вво,/ в по́двизех терпя́ до́блественне.

1-й чтец : Благословим Отца, и Сына, и Святаго Духа, Господа

2-й чтец: и ныне и присно и во веки веков, Аминь.

Хор: Хвалим, благословим, покланяемся Господеви, поюще, и превозносяще во вся веки. И сразу катавасию глас 2: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Диакон: Богоро́дицу и Ма́терь Све́та в пе́снех возвели́чим.

Хор: Я́ко призре́на смире́ние рабы́ Своея́……..

Песнь 9 Хор ирмос глас 1: Тебе́ све́тлую свещу́, и Ма́терь Бо́жию,/ пречу́дную сла́ву, и вы́шшую все́х тва́рей,// пе́сньми велича́ем.

Чтецы: Слава Тебе, Боже наш, слава Тебе. Тво́й све́тлый де́нь и пресве́тлый Христе́, всесве́тлую благода́ть, во́ньже кра́сный добро́тою ученико́м Твои́м предста́л еси́, в пе́снех велича́ем.

Слава Тебе, Боже наш, слава Тебе. Тво́й све́тлый де́нь и пресве́тлый Христе́, всесве́тлую благода́ть, во́ньже кра́сный добро́тою ученико́м Твои́м предста́л еси́, в пе́снех велича́ем.

Святый мучениче Са́вво, моли Бога о нас. Ты, утро́бу а́дову расто́рг, Ще́дре, истощи́л еси́ того́, я́ко си́лен,/ и небе́сный оскуде́вший напо́лнил еси́ мир,/ воздви́ г и оживи́в ме́ртвыя,/ и челове́ки вся возне́сл еси́ разуме́нием Твои́м. Святый мучениче Са́вво, моли Бога о нас. Восте́к на высоту́ у́мно, страстоте́рпче, Боже́ственнаго позна́ния Христо́ва,/ пре́лесть, до́лу влеку́щую, оста́вил еси́ / и крилы́ страда́ния к Сему́ возне́слся еси́,/ приле́жно велича́я и сла́вя Его́ я́ко Пребла́га.

1-й чтец: Слава Отцу и Сыну и Святому Духу

2-й чтец: и ныне и присно и во веки веков, Аминь.

Хор катавасию глас 2: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

 

МАЛАЯ ЕКТЕНИЯ.

Иерей: Яко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Чтец читает Ексапостила́рий: Мои́х удо́в руко́ю Твое́ю испыта́вый я́звы, не не ве́руй Ми́ Фомо́, уя́звленному тебе́ ра́ди: со ученики́ единому́дрствуй, и живу́щаго пропове́дуй Бо́га. Сла́ва, и ны́не: Дне́сь весна́ благоуха́ет, и но́вая тва́рь лику́ет. Дне́сь взима́ются ключи́ двере́й, и неве́рия Фомы́ дру́га вопию́ща: Госпо́дь и Бо́г мо́й.

 

Чтец: Хвали́те Го́спода с небе́с. Тебе́ подоба́ет песнь Бо́гу. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси А́нгели Его́, хвали́те вся Си́лы Его́. Тебе́ подоба́ет песнь Бо́гу. Хвали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я́ в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющимся Ему́. Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем eго́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех, связа́ти цари́их пу́ты, и сла́вныя их ручны́ми око́вы желе́зными. Сотвори́ти в них суд напи́сан. / Сла́ва сия́ бу́дет всем преподо́бным Его́. Хвали́те Бо́га во святы́х Его́, / хвали́те Его́ во утверже́нии си́лы Его́.

 

СТИХИРЫ НА ХВАЛИТЕХ

 Стихиры Триоди, глас 1: Канонарх: Глас 1, Хвали́те Его́ на си́лах Его́,/ хвали́те Его́ по мно́жеству вели́чествия Его.

 

Хор: Кре́ст претерпе́вый, и сме́рть упраздни́вый,/ и воскресы́й из ме́ртвых,/ умири́ на́шу жи́ знь Го́споди,// я́ко еди́н всеси́лен. Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех. Кре́ст претерпе́вый, и сме́рть упраздни́вый,/ и воскресы́й из ме́ртвых,/ умири́ на́шу жи́ знь Го́споди,// я́ко еди́н всеси́лен.

 

Канонарх:  Хвали́те Его́ в тимпа́не и ли́це,/ хвали́те Его́ во стру́нах и орга́не.

 

Хор: Не пренебрези́ мене́ Спа́се мо́й,/ ле́ностию грехо́вною содержи́ма:/ воздви́ гни мое́ помышле́ние к покая́нию,/ и Твоего́ виногра́да де́лателя иску́сна покажи́ мя,/ да́руя ми́ единонадеся́таго часа́ мзду́,// и ве́лию ми́лость.

 

Канонарх: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

 

Хор: Си́и во́ини Царя́ вели́каго,/ сопроти́вишася повеле́нием мучи́телей до́блественно, небрего́ша о му́ках,/ и пре́лесть всю́ попра́вше, досто́йно венча́ни бы́вше,// про́сят у Спа́са ми́ра, и ве́лия ми́лости. Слава и ныне, глас 2 (Триоди): Две́рем заключе́нным,/ предста́в Спа́с ученико́м,/ безстра́шие и ми́р дая́ше./ Та́же глаго́лет Фоме́:/ что́ Мне́ не ве́руеши, я́ко воскресо́х из ме́ртвых?/ Принеси́ се́мо ру́ку твою́,/ и вложи́ в ре́бра Моя́, и ви́ждь./ Тебе́ бо неве́рующу,/ вси́ навыко́ша стра́сти и Воскресе́ние Мое́зва́ти с тобо́ю:// Госпо́дь мо́й и Бо́г мо́й, сла́ва Тебе́.

 

 Чтец: Сла́ва Тебе́, показа́вшему нам свет. Славословие вседневное. Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь. На всяк день благословлю́ Тя и восхвалю́ и́мя Твое́ во ве́ки, и в век ве́ка. Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя. Сподо́би Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки, ами́нь. Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

 

ПРОСИТЕЛЬНАЯ ЕКТЕНИЯ.

Диа́кон: Испо́лним у́тренюю моли́тву на́шу Го́сподеви……

 Иере́й: Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

 

СТИХИРЫ НА СТИХОВНЕ

 Глас 2 (стихиры Триоди):

Канонарх: Глас 2, Воспоим Вернии

 

Хор: Воспои́м ве́рнии,/ непреста́нно со а́нгелы, Христа́ воскре́сшаго,// тридне́вна из гро́ба, и ми́р совоздви́ гшаго.

 Канонарх:  Во всю́ зе́млю изы́де веща́ние и́х, и в концы́ вселе́нныя глаго́лы и́х.

Хор: Фома́ Твоя́ ре́бра, Благоутро́бне,/ осяза́в, к ве́ре взы́де:// и мы́ те́м Тя́ Бо́га про́чее позна́хом.

 

Канонарх:  Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

 

Хор: Подае́ши о Изба́вителю,/ ми́р лю́дем Твои́м воскре́с из гро́ба,// и ми́р совоздви́ гнувый от а́да, Всеси́льне.

 

Канонарх: Сла́ва, и ны́не: гла́с 6. Слава Отцу и Сыну и Святому Духу.

 

Хор: И ныне и присно и во веки веков. Аминь. Две́рем заключе́нным,/ прише́л еси́ Христе́ ко ученико́м,/ тогда́ Фома́ смотри́тельно не обре́теся с ни́ми./ Глаго́лаше бо: не иму́ ве́ры, а́ще не уви́жду и а́з Влады́ки./ Уви́жду ребро́, отону́дуже изы́де кро́вь, вода́, креще́ние:/ уви́жду я́зву, от нея́же исцеле́ вели́кий стру́п челове́ческий:/ уви́жду, ка́ко не бе́ я́коже ду́х, но пло́ть и ко́сти./ Сме́рть попра́вый, и Фому́ уве́ривый,// Го́споди сла́ва Тебе́.

 

Чтец: Бла́го есть испове́датися Го́сподеви, и пе́ти И́мени Твоему́, Вы́шний: возвеща́ти зау́тра ми́лость Твою́, и и́стину Твою́ на вся́ку нощь.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди. Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

 

 Иерей: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Хор: Аминь. Тропарь, глас 5: Земна́го са́на по́яс оста́вив и по́чести, страда́льче,/ пред мучи́телем, льсти́вым царе́м/ Христа́, Бо́га су́ща, испове́дал еси́ / и Того́ ра́ди мно́га страда́ния подъя́л еси́, сла́вне./ Тем прекра́сным побе́ды венце́м увя́злся еси́ / от Царя́ всех ца́рствующаго,/ с Небе́сными во́и све́тло преукра́шен./ Предстоя́ Тому́, Са́вво,/ моли́, да спасе́т ду́ши на́ша.

Слава и ныне, тропа́рь, гла́с 7: Запеча́тану гро́бу,/ живо́т от гро́ба возсия́л еси́ Христе́ Бо́же,/ и две́рем заключе́нным,/ ученико́м предста́л еси́,/ все́х Воскресе́ние:/ Ду́х Пра́вый те́ми обновля́я на́м,// по вели́цей Твое́й ми́лости.

 

СУГУБАЯ ЕКТЕНИЯ.

Иере́й: Яко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь. Диа́кон: Прему́дрость.

Хор: Благослови.

Иере́й: Сый благослове́н Христо́с Бог наш, всегда́, ны́не и при́сно и во ве́ки веко́в.

Хор: Аминь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.

 

ЧИТАЕТСЯ ПЕРВЫЙ ЧАС: