Сурэ 75. Къэтэджыжыгьуэ махуэр (iэл къиямэ)

ГуащIэмрэ гущIэгъумрэ зиIэ Алыхьым и цIэкIэ!

(1) Къемэт махуэмкIэ соIуэ,

(2) псэ зэгиижымкIэ соIуэ [фыкъэтэджыжынукIэ]!

(3) АтIэ цIыхум и къупщхьэр зэхуэдмыхьэсыжыну и гугъэ?

(4) [Ар дэнэ къэна], уеблэмэ, и Iэхъуамбэхэри дгъэпсыжынущ.

(5) Ауэ цIыхум сэхъуауэ [дунейм тетыну] нэхъ къещтэ.

(6) Ар щIоупщIэ: «Сыт щыгъуэ къэтэджыжыгъуэ Махуэр къыщысынур?» — [жеIэри]

(7) Нэр щыункIыфIыкIыу,

(8) мазэр иубыду,

(9) дыгъэмрэ мазэмрэ щызэбгъэдыхьэжкIэ,

(10) а Махуэм цIыхум жиIэнущ: «Дэнэ мыгъуэм сыкIуэн?»

(11) Хьэуэ! ЕгъэзыпIэ щыIэжкъым!

(12) А Махуэм уи Тхьэращ егъэзыпIэ хъунур.

(13) А Махуэм цIыхум ищIари, имыщIэу къигъэнари къыжраIэжынущ.

(14) Ае, [а Махуэм] цIыхур ищIам щыхьэту теувэжын хуей хъунущ,

(15) щхьэусыгъуэ гуэрхэр ищIу щытми.

(16) [Уэ Мухьэммэд, уэхьийм] япэ зибгъэщу [Iэятхэр] къэпIуэтэну ухуемыжьэ.

(17) Дэращ зи къалэныр [Iэятхэм] я угъуейинымрэ къеджэнымрэ.

(18) Дэ абы дыкъыщеджэкIэ, дяужь уиту къеджэ.

(19) Абы и зэхэхунри Дэ ди пщэ илъщ.

(20) ИтIани [цIыхухэм] дуней хьэхур къыхывох,

(21) ахърэтыр зыщывгъэгъупщауэ.

(22) А Махуэм зыкъомыр нэфIэгуфIэу

(23) я Тхьэм еплъынущ.

(24) Зыкьомри а Махуэм я нэгур уфауэ щытынущ,

(25) я тхыр зэпаудынкIэ шынэу.

(26) [Псэр] къурмэкъейм къыщыскIэ,

(27) жаIэнущ: «Хэт и Iэзэгъуэ ит мыбы?»

(28) Абдежым абы и фIэщ хъунущ дунейм зэрыхэкIыжыр.

(29) И лъэкIампIэхэм зызэрашэкIэжынущ[616].

(30) А Махуэм уи Тхьэм и пащхьэ урахуэжынущ:

(31) абы Iимани къихьакъым, нэмэзри ищIакъым.

(32) Ар (диныр) пцIыуэ къилъытэри и щIыбыр хуигъэзэжащ,

(33) икIи зигъэщIагъуэу и Iыхьлым яхэхьэжащ.

(34) Уунэхъуащ уэ, насыпыншэ!

(35) ИтIани уунэхъуащ уэ, насыпыншэ!

(36) АтIэ цIыхум и гугъэ ищIамкIэ къемыупщIыжыну?

(37) Ар нэпсыр ткIуэпсу зэхэткIуакъэ?[617]

(38) ИтIанэ, псы дыуэм ещхь хъури, иужькIэ цIыхуу игъэпсыжащ.

(39) ИкIи ар зэгуэгъуу къигъэхъуащ, цIыхухъурэ цIыхубзу.

(40) АтIэ [ар зыщIам] хузэфIэкIынукъэ лIахэр къиъэхъужын?

СУРЭ 76. ЦIЫХУР (IЭЛ IИНСАН)

ГуащIэмрэ гущIэгъумрэ зиIэ Алыхьым и цIэкIэ!

(1) ЦIыхур дунейм къытехьэн ипэкIэ зэман Iэджи блэкIакъэ?

(2) Дэ цIыхур нэпсыр зэхэткIуам къыхэдгъэщIыкIри, дгъэунэхун щхьэкIэ, зэхихыу, илъагъуу тщIащ.

(3) Дэ абы гъуэгу еттащи, е Iиман къихьынщ, е джаур хъунщ.

(4) Джаурхэм Дэ къахуэдгъэхьэзыращ гъущI блахэр, лъэхъухэр, мафIэр.

(5) ФIэрафIэхэр ефэнущ мэ гуакIуэ къызэхих бжьэм,

(6) абы итыр псынэу къыщIож, Алыхьым и пщылIхэр ефэн щхьэкIэ.

(7) Абыхэм нозыр ящIар ягъэзэщIэжырт, гIэзабыр къащытепсыхэну Махуэм щышынэрт.

(8) Езыхэм замыгъэнщIа пэтми [шхыныфIыр] тхьэмыщкIэхэм, ибэхэм, гъэрхэм ирагъэшхырт:

(9) «Дэ Алыхьым и хьэтыркIэ фыдгъашхэу аращ, — жаIэурэ, — армыхъумэ зыгуэр къыпэкIуэнуи фIыщIэ къытхуэфщIынуи дыщIэхъуэпсыркъым.

(10) Дэ [ар щIэтщIэр] а Махуэ дыдж, Махуэ гугъум Тхьэм гущIэгъу къытхуимыщIынкIэ дошынэри аращ».

(11) Алыхьым ахэр а Махуэм и гIэзабым щихъумэнущ икIи гуфIэгъуэ тхъэгъуэр къаритынущ.

(12) Яшэчам пэкIуэуи къаритынущ жэнэтымрэ шылэ фащэмрэ.

(13) Шэнтжьейхэми илъынущ, дыгъи уаи къалъэIэсынукъым.

(14) Жыг жьауэми щIэсынущ, дэIэбеймэ [зыхуей] пхъэщхьэ-мыщхьэр къыпачу.

(15) [Яшхынумрэ зэфэнумрэ] дыжьын хьэкъущыкъурэ абджкъабзэ IэгубжьэкIэ къыхуахьынущ.

(16) Абджкъабзэм хуэдэ дыжьын Iэгубжьэм щхьэж зыхуейм хуэдиз итынущ.

(17) Ахэр ирагъэфэнущ мэ гуакIуэ къызыхих бжьэм,

(18) СэлсэбилкIэ зэджэ псынэм къыщрагъахъуэурэ.

(19) Абыхэм я IуэхутхьэбзащIэнущ жьы мыхъу щIалэхэр, уахэплъамэ налкъутым хуэдэу къабзэхэу.

(20) [Жэнэтым] уиплъэ пэтми плъагъунур тхъэгъуэрэ мылъкушхуэмрэщ.

(21) Абыхэм я щыгъыныр данэ удзыфэм къыхэщIыкIаиц. Дыжьын Iэпщэхъухэри и яIэрылъынущ, я Тхьэми узэфэн къабзэ иригъэфэнущ.

(22) Ар фэ фи дежкIэ тыгъэшхуэщ, гугъу фызэрехьар игъэлъапIэу!

(23) [Уэ Мухьэммэд], Дэ КъурIэныр Iыхьэ-Iыхьэурэ ныпхуедгъэхащ.

(24) Уи Тхьэм унафэ ищIыхукIэ зышыIэ, икIи зыдомыгъэхьэх [цIыхум] ящыщ гуэныхьыщIэхэмрэ джаурхэмрэ.

(25) Уи Тхьэм и цIэр жыIэ пщэдджыжьми пщыхьэщхьэми.

(26) Жэщми уи щхьэр хуэгъэтIылъ, икIи нэху щыхукIэ щытхъур хуэгъэш.

(27) Мыдрейхэм (джаурхэм) дуней хьэхур фIыуэ ялъагъури, Махуэ гугъур къырадзэркъым.

(28) Дэ ахэр къэдгъэщIри я Iэпкълъэпкъыр дгъэбыдащ. Дыхуейми ахэр нэхъыфIкIэ зэтхъуэкIынщ

(29) Мыр зэхэзыщIыкIымкIэ узыгъэгупсысэщ, хуейм Тхьэм и гъуэгур къыхихынщ.

(30) Фэ фызыхуейракъым хъунур, Алыхьыр зыхуейращ[618]. Алыхьым сытри ещIэ, Iущщ!

(31) Езыр зыхуейм и гущIэгъур лъегьэIэс, ауэ щIэпхъаджэхэм гIэзаб гуащIэр къахуигъэхьэзыращ.