О приходе преподобнаго отца Трифона к Вятке, и о приятии его во Успенской монастырь, и о преставлении его от привременнаго сего жития в вечную нестареющуюся жизнь.

Егда же возвратися преподобный отец наш Трифон от Соловецкия//(л. 228) обители к Вятке, идущу же ему Вяткою рекою, достиже града, нарицаемаго Орлова. И ту бысть в Соборной церкви архистратига Михаила, и слушав божественную литоргию, и оттуду пойде Вяткою же рекою в своем карбасце, и достиже села Николая Чюдотворца Подрельского, и ту впаде в телесную болезнь, прииде же под град Хлынов месяца июля в 15 день. Посла же//(л. 228 об.) преподобный отец Трифон слугу своего во обитель Пресвятыя Богородицы ко архимандриту Ионе Мамину, дабы его приял во святую обитель Богоматери. Архимандрит же Иона име вражду на учителя своего, преподобнаго отца Трифона, и не восхоте его во обитель прияти, и слугу его тщетна отпустив. Слуга же прииде ко преподобному и сказа, еже глагола архимандрит//(л. 229) Иона, яко «не внят прошения твоего и в монастырь внити не повеле». Преподобный же отец Трифон нимало о сем поропта, ни гнева понесе. Обычай бо бяше ему вся скорбная с радостию терпети, и все упование возложи на Всесилнаго Бога.

И уже преподобный во оной телесной болезни конечно изнеможе и посла слугу своего к Никольскому диакону Максиму//(л. 229 об.) Мальцову, дабы он его приял в дом свой. Той же диакон Максим имяше веру велию ко преподобному отцу, яко же исперва о нем писано. И сия слыша от слуги о преподобнем, яко строит у града под горою и зело изнеможе, а во обитель Богоматери архимандрит Иона не приял, той же диакон з братиею своею пойде в подгорие к реце к Вятке, идеже//(л. 230) преподобный стоит у брега. И егда узре преподобнаго отца Трифона лежаща в карбасце изнемогша, и пришед, припаде к нему до земли со слезами, прося от него благословения. Преподобный же едва двигнугнувся (так!) от великия болезни, и прием образ Пресвятыя Богородицы Владимерския, и благословив им диакона Максима, и нарече его сыном своим возлюбленным, и глагола ему святый: «Чадо мое//(л. 230 об.) священный диаконе Максиме, Бога ради приими мене убогаго старца в дом свой, да подаст тебе Господь Бог милость противу твоего труда в день судный». Диакон же, слышав от преподобнаго сия умилная словеса и зря нань, прослезися, рече: «Святче Божий, твоя святая воля да будет на мне рабе твоем. Аз же рад тебе служити со всем домом своим, яко же Бог наставит//(л. 231) к твоей святыни раба твоего». И приступи диакон ко преподобному с радостию, и взем его ис карбаса, и положи на возило свое, и привезе в дом свой, и внесе его в горницу, уготованную ему, и положи на одре своем, и служаше ему со благоговением. Преподобный же благослови дом его, и вся сущая в нем домочадцы его. Уведаша же приход преподобнаго отца Трифона//(л. 231 об.) градстии людие, судии и всяких чинов люди, и вси православнии христиане стицахуся к нему благословения ради. Святый же, видя толик народ, приходящ к нему, благодаряще Бога, и благословение всем подаваше. Они же от преподобнаго благословение приимаху и возвращахуся в домы своя с радостию, славяще и благодаряще Бога и Его Богоматерь, яко сподобишася святаго//(л. 232) видети и прияти от него благословение. И по сем прииде ко преподобному отец его духовный священноинок Варлаам, нарицаемый Болшагин. Преподобный же вопроси его о обители и о архимандрите Ионе, понеже ему, Варламу, Иона бе сын духовный, и о сожителстве братском, и о пении, и о всем монастырском строении священник же поведа ему вся по ряду. Пребысть же//(л. 232 об.) святый в дому диаконове месяца июля с 15 числа да по месяц сентябрь по 23-е число. Уведав же преподобный свое отшествие ко Господу, молит же и посылает в монастырь соборных протопопов и священников ко архимандриту Ионе, чтобы его во обитель приял. Архимандрит же Иона слыша соборное прошение и посла с радостию преподобнаго отца Трифона, отца его и своего//(л. 233) духовнаго Варлаама да келаря старца Дионисия. Они же приидоша ко преподобному, и благословение прияша, и возвестиша ему, яко архимандрит Иона благословения просит и во обитель Пресвятыя Богородицы призывает. Святый же слыша от них сия словеса, прослави Бога, и возрадовася зело, и повеле вести себе в монастырь Богоматере. И егда идяше во обитель, и дошед//(л. 233 об.) торга, идеже стояше животворящии крест Господень. Святый же ту став, и моляшеся пред животворящим древом Господним, Господеви Богу и Его Богоматери за царя, и за патриарха, и за весь освященный собор, и за всех православных христиан, и народному собранию благословение и прощение подаде всем, и пойде ко обители Богоматери, архимандрит же Иона стрете преподобнаго// (л. 234) со всею братиею во святых вратех, и припаде ко стопам ног святаго со всею братиею, и моляшеся со слезами, прося прощения о нем же согреших. И рече ко преподобному: «Отче святый, аз повинен бых твоему пришествию нужному и люто оскорбих тя зело, отдаждь ми, отче, о них же тя прогневах. Се бо, отче, враг омрачи ми сердце и разяри мя на тя, и вверже мя//(л. 234 об.) в сий грех». Преподобный же отец Трифон отвеща ему сице: «Чадо мое духовное Иона, Господь простит тя. Сие бо дело стараго врага диавола есть, и не подобает дивитися сему, ибо искони боряйся с человеки, паче же с боящимися Бога спону сотворяет». Архимандрит же Иона, видев смирение преподобнаго отца Трифона, и тихими словесы и смиренными глаголы глаголаше к//(л. 235) нему, аки ничто же зла восприим от него. И начат преподобнаго ублажати и честь велию воздаде ему. И поидоша в соборную церковь Пресвятыя Богородицы Честнаго и Славнаго Ея Успения, и пеша молебная пения, и воду освятиша. Преподобный же отец Трифон благослови архимандрита Иону и всю братию Честным и Животворящим Крестом. По совершении же молебнаго пения преподобный//(л. 235 об.) отец Трифон призва архимандрита Иону и всю братию, и много поучив их от божественнаго писания ко спасительному подвигу. И паки воззрев на архимандрита Иону, рече: «Вем тя, чадо, яко книжное писание разумееши. Ты же пребывай, в них же научен еси и верен бысть, ведый, яко измлада священная писания разумееши, могущая тя умудрити во спасение верою, яже//(л. 236) о Христе Иисусе (2 Тим 3:15). Лучше бо умрети без чад, нежели имети чада нечестива. Чадо, во след похотей своих не ходи, ниже веселися сластолюбными и многоразличными пищами. Чадо, согрешил ли еси, не приложи к тому и о предьних помолися, и бежи от греха, яко от лица змиина. Аще бо приступиши, угрызнет тя. Аз же, грешный, аще и в изгнании многи скорби приях, но от всех избави мя//(л. 236 об.) Господь Бог, понеже “вси хотящии благоверно жити о Христе гоними будут” (2 Тим 3:12). Аз же убо живот свой от сего света кончаю, и “время моего отшествия наста” (2 Тим 4:6)». И пойде в келлию свою. Видевше же святый себе в киновии своей, и возрадовася зело душею, и благодаряше Всесильнаго Бога и Пречистую Богоматерь.

И по своем пришествии не многи дни пожив в посте и молитве, и наконец в болезнь//(л. 237) телесную впаде, и исповедася Господеви пред отцем своим духовным Варлаамом, приим спутника себе преблагаго святых Божественных и Животворящих Таин. И призва к себе архимандрита Иону и братию, и рече ему: «Се уже братия моя, видите мя, яко конец живота моего приближися и отхожду от жития сего ко Господеви моему. Вас же предаю в руце Его». И поучив их от//(л. 237 об.) божественнаго писания о спасении душевнем и о богоугодном житии, еже имети чистоту душевную и телесную, и братолюбие нелицемерное, и смирением украшатися, к посту и молитве прилежати, и к церкви Божии тщание имети, и в ней с страхом Божиим божественных пений слушати. И всей братии заповеда у наставника своего архимандрита в послушании и в//(л. 238) покорении пребывати, и коемуждо в порученней от него службе со всяким прилежанием и страхом Божиим содержати, и ина многа наказуя ученику своему архимандриту Ионе и всей братии. И мир дав всем и последнее целование, и помолився Господеви, и рече: «На Тя, Господи, уповах, да не постыжуся во веки» (Пс 24:1). И паки: «В руце Твои, Господи, предаю дух мой» (Лк 23:46). И тако//(л. 238 об.) преставися в вечную жизнь в лето 7121-го (1619) месяца октоврия в 8 день.

По преставлении же преподобнаго архимандрит Иона, пришед в келлию святаго со всей братиею, и бе келлия его исполнена благоухания. Лице же святаго просветися, руце же имея на персех согбены крестообразно. На главе же его возложена схима. Честное же его святое//(л. 239) и многотрудное тело архимандрит Иона опрята своима рукама. И видев: со святаго и многотруднаго тела его спадоша вериги сами о себе. Архимандрит же Иона подивися преславному чюдеси, и благодарив Бога, и бысть известно всему освященному собору и всем людем о преставлении преподобнаго. И снидошася на погребение его множество народа, носяща//(л. 239 об.) свещи возжены. И тако несоша братия мощи святаго в созданнем его монастыре в соборную церковь Пресвятыя Богородицы Честнаго и Славнаго Ея Успения, и пеша надгробная, и оттуда внесоша его в малую церковь во имя Пресвятыя Богородицы Честнаго и Славнаго Ея Стретения икону Владимирския на уреченное место во уготованный гроб от южныя страны, и погребоша святаго//(л. 240) честно со псалмы, и пении духовными, и по завещании его над гробом память творяще с понахидою по вся субботы, даже и доднесь во славу Пресвятыя Троицы Отца, и Сына, и Святаго Духа ныне, и присно, и во веки веков. Аминь.

Дополнение по рукописи XIX века той же редакции, что и основная. Ф. 396 № 12.

[1] Вступление повторяет аналогичный фрагмент Пространной редакции Жития Сергия Радонежского.

[2] Цитата из сказания о Сказания о Борисе и Глебе. Слова страстотерпца Глеба перед кончиной.