О явлении преподобнаго Александра, како посети игумена Максима

Празднику же приспевшу великого Чюдотворца Николы успению, и Божиими судбами бысть теплота велиа, якоже речеся: «Послет слово свое и растает я, и дхнет дух его, и потекут воды» (Пс 147:7). Снегов же водою раслияшеся, и не бысть путнаго шествиа на возех, но и пешим нужно хожение бысть.

Игумен же Максим в недоумении бысть о сем и помысли в себе, глаголаше, яко «на праздник сеи никто не будет к нам от приходящих гостеи. Мы же убо тщи надежи, якоже преже рехом, яко ни нужная имеяхом, и неколико время ни сеятвы, ни оратвы //(л. 77 об.) не бысть, но токмо от христолюбець приносимыми питахуся. Ныне же убо что створим? Понеже скудость хлеба и мало рыбиць блюдомо на время гостеи ради». И сиа же помыслившу, и всхоте праздник без службы оставити. Се же все бысть Божиим изволением, а не игуменовым хотением, ни леностию. Всхоте бо Бог своего угодника Александра дарми чюдес прославити и игумена от маловериа в веру привести, да и во прочая времяна веровати начнет чюдесем святаго. И бысть же, в навечерии праздника вечерняя пениа певше, братиа же разидошася кождо в келиа своя. Игумен же, шед в келию свою, и седе, помышляше и недоумеяшеся, что сотворити. Абие вздремася мало, и слышит гремение дьскам, и види в видении из гробници исшеша старца светоносна образом, грядуща к келии его. И пришед ко окон//(л. 78)цу келиа, сотвори по обычаю молитву. Игумен же отвеща: «Аминь». Старець же к игумену рече: «Како, брате, хощеши таковый праздник без службы оставити? Не буди того ни помыслити, ничтоже рассужаа, ни размышляя, и не буди неверен, но верен (Ин 20:27). Вся бо недостаткы ваша Бог исполнить. И праздник честне проводивше, еще же изобилуеть, и в прочая времяна неоскудни будете». Игумен же, егда зря святаго и чюдися, едва позна преподобнаго Александра, а многажды его в животе сем видал. И абие взбнов от сна, и не виде никогоже, страхом и трепетом одержим, и чюдеси дивяся, славя Бога и преподобнаго Александра чюдотворца и посещению его радуяся веселою душею. И рече в себе: «Что се будет?», дондеже сбышася вся.

Игумен же, скоро шед к пономарю, и повеле ему просфиры печи. Сам же иде в келию свою, и нача готовитися к службе, и всю//(л. 78 об.) нощь моляся, бес сна пребываше. И в то же время бысть буря велиа, и слани, и снези, и пакы уяснися небо, и бысть тишина велиа, и примерзе снег к мокроте леда, и устроися путное шествие, яко же и прежде. Се же все бысть в мало время. Сия вся устрои Всещедрыи Бог, прославляя своего угодника преподобнаго Александра. Гости же со станов своих идоша, и бысть им путное шествие легко. Шествие же творяху к граду к Каргополю с езер с рыбою, и прииде множество гостеи, и сташа препочити противу монастыря об ону страну рекы. Игумен же повеле по обычаю звонити заутренюю, и начаша пети, и приидоша гости оне, и даша в монастырь множество рыб от всякого рода их малых и великых, свежих и просолных. И даша игумену на молебен кождо их, елико кто мога по силе. Игумен же должнаа молебнаа обещавается к Богу воздати о них, еже и бысть.// (л. 79)

И одарив их благословением, и отпусти их, они же идоша в путь свои. И посем приде множество народа от окрестных стран, везуще с собою в монастырь ин сребра, другыи от хлеба всякого жита, привезоша же и печеных хлебов множество и всяко требование. Игумен же и братиа, радостнии бывше и молебная певше, гостем же всем православным христианом честь воздающе, духовне веселящеся, праздновахом радующеся, друг с другом ликующе. И честне праздник проводивше, и всенародное множество разидошася кождо во своя сии. Игумен же всеи братии исповеда бывшее видение и посещение и вся по ряду сказа им, еже рече ему святыи. Братиа же, слышаще сиа, хвалу вздаша Богови и преподобну Александру, угоднику Божию.

О создании церкви Пречистыя Богородица Честнаго Ея Успениа

Слышана же быша чюдеса святаго Александра в окрестных местех, и в граде, и до лук морьскых. И мнози приходящи //(л. 79 об.) начаша стрищися, и приношаху от имении своих требование, и угодиа древнии, и пожни, и сребра, и хлеба, и от скот, и братиа множахуся, и обитель распространяшеся. Игумен же свещаеть с братиею другую церковь вздвигнути в имя Пречистыя Богородица Честнаго Еа Успениа. И створиста молитву, начаста дело, Богу поспешествующу, молитвами преподобнаго Александра помогающи, вскоре сздана бысть церковь во имя Пречистыя Владычице Нашея Богородица Честная Еа Успениа, и украси ю иконами и книгами, елика сила бяше.

О Пиале и о Росоле

И потом мину мало время, еже отстоя от монастыря, яко верьсть сто седмьдесят по Онеге по реце вниз и есть место, зовомо Пияла. И по некоему Божию строению явися тамо источник воды сланы в реце, иже нашею речию зовется Росоль. В то же время прииде к ним от лук морьскых некый старец Тарасии имянем, зовомыи Беляи// (л. 80), иже бе искусен таковому делу. Они же поселяне пияльци начаша его увещати и нарекоша ему жребии тоя воды. Старець же ятся делу и изведе им из рекы воду близ брегу, и кладязь устрои, и воду от росолу отлучи, и дасть тоя воды сланыя своего жребиа старець Тарасии на Соловкы в монастырь на црен, а во Александрову пустыню во Ошевнев монастырь на пол црена. Игумен же Максим, слышав и ехав тамо, и прикупи тоя же воды сланы на другую пол црена, купи же и земли место подвор и брега жреби на пристанище и по дрова. Есть же и доныне тамо тои промысл, братья тружаются, соль варять и продают купцем. И тем купять себе одеяние, и обувение, и вся потребнаа на братию и на монастырьское строение. Пияльци же, люди добродетелны и богобоязнивы, велию веру имеють к Господу Богу, и к Пречистои Его Богоматери, и к преподобному Александру и к монастырю много тщание и прилежание тво//(л. 80 об.)ряше. И вдаша и к монастырю и к тому промыслу, ин дровню, а другыи угодья пожьнии, а ин от сребра и от скот. Есть же и доныне всяко требование подающе на спасение своим душам в вековую милостыню.

О попове сыне Кириаке

И се да не умолчано будет: попа некоего сын имянем Кириак, жилище имея на Онеге реце в заостровии. Родителема же его умершима, сеи же млад остася, ремесла же не имея ни коего, и помысли в себе глаголя: «Что сотворю? Тяжести дела понести не могу, не обыкшу бо ми таковая, а просити стыжюся. И чем начну питатися?» Бог же, не хотя смерти грешнику, но обращение животу (Иез 33:11), и прииде ему помысл, и рече в себе: «Слышу чюдеса преподобнаго Александра, иже в области града Каргополя, иду ныне в монастырь его, иже зовется Ошевнев, аще Бог и молитвами преподобнаго Александра поможет ми, и поимуть //(л. 81) мя, и постригуся, и буду инок». Се же ему помышляющу и Богу помогающу, восхоте же и делом створити, пути емлется, и прииде во обитель, и приходить к игумену, и припадаеть к ногама его, и просит благословениа и молитвы, источникы слез от очию изливаеть и молит тепле, да бы его приял и створил мниха. Игумен же, видев его желание и усердие, ничто же отлагая, приемлеть его и постризаеть его. И нарече имя ему Кирил. И дасть ему некоему искусну старцю. Старець же научи его всякому благочинию, и потом от настоятеля посылаем бывает в поварню и в хлебню, и вся службы монастырьскыа строино прошед с всякым покорение и послушанием. И потом же игумен устрояеть его пономарха и просфиры пещи, и пребысть в тои службе время немало. Благый же Бог, хотя вся человекы спасти и в разум истинны привести (Иез 33:11), и иное желание в//(л. 85 об.)ложи ему Бог, да бы ему научитися Божественому писанию и молитвы клириков и диаков в обители пребывающих, и мзды даеть. Они же вдаша ему букв писанная. Старець же ятся делу. Они же направляющии, поучающе его, и извыче писанию божественому. И по времяни некоему приходить к игумену и просит благословение и отпущение со молитвую. Игумен же, наказав его, и отпусти с миром. Старець же отиде прочее, и иде в Великы Нов град, и приходить к архиепископу, и припадаеть к ногама его, да получит желание свое. Архиепископ же благослови его, и освяти его священьства саном, и отпусти. Он же отиде во своя си и пребысть в некоеи веси, имянуема Кенозеро, служа Богови. И оттуду прииде на Онегу, на на реку в весь, зовома конець Островие (ту есть храм всемилостиваго Спаса). И тамо пребысть, честне принося жертву Богови//(л. 86).