АКАФИСТ Схиархимандриту Виталию(Тбилисскому)

АКАФИСТ Схиархимандриту Виталию(Тбилисскому)

Кондак 1

Избранный угодниче Христов, благоуханный цвете монашества,

богомудре отче Виталие, Евангелие самим твоим житием исполнил еси, крест страданий, унижений и гонений кротко носяще, тому же подвиги многотрудные приложил еси. Сего ради сосуд достойный благодати и любви Божественныя соделался еси, тем же в Небесных Обителях ныне пребываеши. Мы же, чтущие святую память твою, с умилением вопием ти:  

Радуйся, Виталие, скорый помощниче и молитвенниче о душах наших.

Икос 1

Ангеле земный и человече небесный был еси, отче, путем подвижничества крайнего в годы богоборчества, первым векам христианства подобного, неложно шествовавый. Гонения жестокия от властей безбожных и дьявола претерпевая, николиже от любви Божией и веры отступил еси,

пастырь добрый для овец рассеянных явился еси, образ старчества благодатного являя, притекающих тебе в вере, надежде, любви и терпении укрепляя.

Тем же приими пение похвальное:

Радуйся, молитвенниче пламенный;

радуйся, служителю Божий неукорный.

Радуйся, николижде злом побежден не бывый;

радуйся, зло добром побеждавый.

Радуйся, преображавый ближних любовью;

радуйся, первее сам ею преобразивыйся.

Радуйся, благий исполнителю воли Божией;

радуйся, небесных даров вместилище досточудное.

Радуйся, ближних паче себя любивый;

радуйся, исправлявый немощи их молитвою.

Радуйся, мир и радость о Духе Святем выну имевый;

радуйся, тихим светом Небесныя славы исполненный.

Радуйся, Виталие, скорый помощниче и молитвенниче о душах наших.

 

 

Кондак 2

Уведе священник по крещении твоем, отче Виталие, благодать на тебе почившую, божественное предизбрание твое предзнаменующее, у Престола Божия на горнем месте тя положи. Матери же твоей предрек тя великим человеком пред Богом и людьми быти. Мы же промышлению Божию о тебе дивяся вопием Ему: Аллилуиа.

 

Икос 2

Разумом от младенченства богопросвященный, многия скорби и болезни

от неразумных сродников тебе чинимые с кротостью ангельстей претерпевал еси, вся любовию побеждая. Мы же тя измлада смирению монашескому навыкоша ведуще, воспеваем ти похвальная:

Радуйся, Словом Божиим озаренный;

радуйся, из млада Бога взыскавый.

Радуйся, добродетелей Христовых древо многоплодное;

радуйся, подвижничество высокое являяй.

Радуйся, молитвенного уединения любителю;

радуйся, ревнителю служб церковных.

Радуйся, едва благовест заслыша в храм бежавый;

радуйся, за ревность к Дому Божию сильне биенный.

Радуйся, воздержание крайнее в младых летах явивый;

радуйся, всякого зла отвращавыйся.

Радуйся, дарами Духа Святаго благолепно украшенный;

радуйся, водами живота вечного напоенный.

Радуйся, Виталие, скорый помощниче и молитвенниче о душах наших.

Кондак 3

Силою Вышняго укрепляемый, единое гражданство небесное имети восхотел еси, отче Виталие, гражданства земного отрекаяся, подвиг многотрудный странничества приял еси, миру же безумен и юродив показася. Тем же дарами Духа Святаго преизобильно исполнился еси, непрестанно Богу взывая: Аллилуиа.

 

Икос 3

Имея попечение о спасении души непрестанное, по прошествии лет странничества многоскорбного, в пустынь Глинскую вселился еси,

старцами маститыми знаменитую, в послушании всецелом у тех пребывая, подвигом добрым во всецелом своеволия отсечения подвизался еси.

Ныне же приими пение похвальное:

Радуйся, не имевый где главу приклонити;

радуйся, странником и пришельцем на земли явивыйся.

Радуйся, путь послушания со всяким смирением прошедый;

радуйся, благия плоды того вкусивый.

Радуйся, вся имения своя раздавый, да Небесныя приобрящеши; радуйся, на всяк день правде Божией поучавыйся.

Радуйся, всем слугой бывый, сам же никого не утруждавый; радуйся, исполненный за вся благодарения.

Радуйся, стяжавый дар молитвы непрестанной;

радуйся, во время онной ничесоже не замечавый, и ко льду примерзавый.

Радуйся, его же Матерь Божия Своим чадом именовала;

радуйся, его же незримо омофором Своим от всяких бед покрывала.

Радуйся, Виталие, скорый помощниче и молитвенниче о душах наших.

Кондак 4

Бурею злобы дышуще, повелеша власти безбожные пустынь Глинскую вновь упразднити. Ты же, отче Виталие, монастырь твой в сердце твоем сокрывый, единое желание — Богу молитися и единое намерение — по святым местам ходити от юности имевый, вновь на путь скитальческий благословенный, воспел еси Богу: Аллилуиа.

 

Икос 4

Слышаще людие о житии твоем подвижническом, яко овцы,

пастыря не имущие, взоры своя к тебе направиша, да от проказы греховней их излечиши и водою живою Слова Божия омоеши. Мы же труды и подвиги твоя во славу Божию подъятые прославляя воспеваем ти похвальная:

Радуйся, проповедниче веры и покаяния;

радуйся, молитвы чистыя кадило благовонное.

Радуйся, яко слезами смирение в себе укоренил еси;

радуйся, яко любовь к врагам твоим имел еси.

Радуйся, преславный воин Христова ополчения;

радуйся, бесов многогорестное посрамление.

 

 

Радуйся, Глинских старцев приемниче;

радуйся, преподобных украшение.

Радуйся, страдания за Христа, блаженством почитавый;

радуйся, полную чашу страданий гонимого странника испивый.

Радуйся, претерпевый всякия поношения;

радуйся, ближнему аки самому Христу служивый.

Кондак 5

Богозданные горы Кавказския проповедью апостольской и кончиной мученической святого Симона Кананита освященные, прияша тя боголюбезне Виталие, идеже ты пустынножительство провожая, красоту мира Божия созерцал еси, молитвенным безмолвием природы услаждаяся, вопиял еси Богу: Аллилуиа.

 

 

Икос 5

Видяще братия, яко мера твоя духовная многажде меру их превозшедша,

и врагом спасения побуждаемые, брань на тя воздвигоша.

Людие же простодушные, исходящие от тя отче, благоухание духовное уразумевше, яко пчелы на аромат цветочный к тебе потянулися, труднодоступностью пустыни твоея и путем опасным не смущаяся,

приношаху тебе таковая:

Радуйся, плоть твою во всем утеснявый;

радуйся, яко лапоть обит и отрепан был еси.

Радуйся, на клевету благословением отвечал еси;

радуйся, всякого неблагополучия достойным себя считавый.

Радуйся, благодатные дары ради немощи братий юродством покрывавый;

радуйся, сердце твое цело от озлобления противу врагов сохранивый.

Радуйся, ближним как самому Христу служивый;

радуйся, от них же всяческия поношения с радостью терпевый.

Радуйся, сластолюбия и чревоугодия обличителю;

радуйся, нестяжания и довольствования малым учителю.

Радуйся, ради ближних себя не щадивый;

радуйся, всем вся бывый.

Радуйся, благотворивый с благодушием;

Кондак 6

Проповедник истинного послушания, печалился еси зело, отче Виталие, яко никтоже в век сей развращенный стяжати дар сей не радеет, указуя яко единого Адама преслушание тлению все человечество подвергло. Послушание же Богу Сына Человеческого в первозданное достоинство верных возвратило,

да тии от смерти к животу преидоша, воспоит Богу: Аллилуиа.

 

Икос 6

Воссиял еси яко свеща многосветлая светом добродетелей твоих,

мрак безбожия обличая. Из града же во град гонимый, и в миру надмирно пожил еси, духом в горняя воспаряя. Сего ради приими пение похвальное:

Радуйся, образе монашества;

радуйся, высото послушания.

Радуйся, плоть твою в жертву благоугодную Богу представивый;

радуйся, с веком сем развращенным не сообразовавыйся.

Радуйся, в любви не притворный;

радуйся, в почтительности ближнего предупреждавый.

Радуйся, в усердии не ослабевающий;

радуйся, смиренным последователю.

Радуйся, якоже преподобный Силуан за весь мир моливыйся;

радуйся, всех к познанию истины привести желавый.

Радуйся, никому кроме любви взаимной должным не оставыйся;

радуйся, смирением добродетели твоя покрывый.

Кондак 7

Хотя Христу последовати, плоть твою всячески умервщлял еси, блаженне Виталие. Взамен же вериг железных приял еси крест служения пастырского, подвизая паству за скорби и испытания Бога благодарити, взывая ему: Аллилуиа.

 

Икос 7

Нового молитвенника тя почитая, со всей Руси многострадальной к тебе,

отче Виталие, людие стекахуся, гладом духовным томимые, наставление и утешение христианское получити хотящие, приносяще тебе таковая:

Радуйся, пучино милосердия неистощимая;

радуйся, Животворящих Таинств Господних служителю.

Радуйся, скорбящих благодатное заступление;

радуйся, заблудших светозарное наставление.

 

Радуйся, прозорливче предивный;

радуйся, помощь неустанно подающий.

Радуйся, владыки Зиновия сподвижниче;

радуйся, его же с схиму тайно облачивый.

Радуйся, болезней его облегчение;

радуйся, молитвенное его укрепление.

Радуйся, он же по смерти чад своих тебе вверил еси;

радуйся, яко ты никого же от тех для Царства Небесного не потерял еси.

Кондак 8

Странное чудо в стране Иверстей явил еси, прехвальне Виталие, егда стольный град от снарядов смертоносных иконою Феодоровскою осенял еси, тии же вспять отвращалися, никому же вреда причиняя. Люди же таковое чудо зряще, воспели источнику чудес: Аллилуиа.

Икос 8

Весь огнем любви распаляем, подвигу Серафима преподобного поревновал еси, егда за страну Иверскую на камне молился еси, да сохранит ее Господь

от братоубийства безумного. Мы же постигающе како мир сей молитвами праведников держится, воспеваем ти похвальная:

Радуйся, плакавый с плачущими;

радуйся, радовавыйся с радостными.

Радуйся, яко душу твою по всяк день за ближних полагал еси;

радуйся, яко молитве за людей кровь твою проливал еси.

Радуйся, молитвенниче дерзновенный;

радуйся, проповедниче покаяния.

Радуйся, Богу о помиловании Иверии немолчно взывавый;

радуйся, к Заступнице Усердной с тоюжде молитвой прибегавый.

Радуйся, источниче радости и умиления;

радуйся, враждующих примирение.

Радуйся, сердец огрубелых умягчение; никогоже

радуйся, в напастех скорое избавление.

Кондак 9

Все души усопших в храме собиралися, егда ты, блаженне Виталие,

на проскомидии тех поминал еси, научая и нас, любовь к ближним за пределы земные простирати, да в селениих праведных воспоем вкупе Богу: Аллилуиа.

 

 

Икос 9

Ветия велеречивые изрещи недоумеют, како ты, отче, старец сый претрудный,

в подвигах христианских подобно отцам древним усердствовал еси,

наипаче о подвиге молитвенном ревнуя, каждодневно тысящи людей поминал еси. Сего ради ныне слышиши таковая:

Радуйся, благотворивый обидящим;

радуйся, благословлявый гонителей.

Радуйся, немощи ближних любовию покрывающий;

радуйся, вражду на дружбу кротостью прелагающий.

Радуйся, Христу в смирении подражателю;

радуйся, мира духовного тайнозрителю.

Радуйся, чистоты сердечная зерцало;

радуйся, сокровище благодати неистощимое.

Радуйся, Евангельское благоухание;

радуйся, заповедей блаженства исполнение.

Радуйся, едиными устами со святыми Бога славивый;

радуйся, язвы Христовы на себе носивый.

Кондак 10

Спасти всем хотяй, не токмо место запустения на месте святыя обители бывшую, трудами и молитвами упразднил еси, отче, но и сам дух жития монашеского возродил еси, да людие тамо подвизающиеся, храмом живым Духа Святаго станут, едиными усты и сердцем поя Богу: Аллилуиа.

Икос 10

Стена еси крепкая малому стаду Христову был еси, веру православную не на мудросте человечестей, но на силе Божией утверждая. Людие же благоухание жизни вечней от тебя исходившее обоняя, приют тихий радости блаженной подле тебя нашедше, тако тебе воспеваху:

Радуйся, любви Божией селение;

радуйся, чистотою Ангелом уподобление.

Радуйся, на небо при жизни восхищенный;

радуйся, видения Божией Матери сподобивыйся.

Радуйся, Ею же ради слез чад твоих на землю возвращенный;

радуйся, в болезни Феодором Стратилатом и мученицей Ириною посещенный.

Радуйся, ими же от смерти спасенный;

радуйся, ради твоего милосердия Богом помилованный.

 

Радуйся, о спасении душ тебе вверенных попечителю;

радуйся, падших из пучины греха свободителю.

Радуйся, благодатное в вере назидание;

радуйся, болезней безмездное врачевание.

Кондак 11

Пение умиленное тебе приносим, всехвальне Виталие, ты бо возъимел еси дерзновение молитвою твоею и десницу Самого Всевышняго для поражения грешников воздетую, удерживать на милость Бога преклоняя, ибо Сам Господь обещался волю боящихся его сотворить. Ему же выну поем: Аллилуиа.

Икос 11

Светоприемную свещу зрим тя, отче Виталие, от света любви Божественныя возженную, души верных для делания заповедей Божиих просвещающую, научая всех и к малому в деле спасения внимательным быти.

Сего ради приими ныне таковая:

Радуйся, в каждой былинке премудрость Божию постигавый;

радуйся, всякий дар Божий со тщанием беречь учивый.

Радуйся, чистоты душевныя и телесныя хранителю;

радуйся, целомудрия наставниче.

Радуйся, лицемерия фарисейского отвержение;

радуйся, противоборче всякого превозношения.

Радуйся, образе верного Богу служения;

радуйся, сердца сокрушенного Ему принесение.

Радуйся, во всяком познании Духом Святым наставленный;

радуйся, други твоя кротко ко спасению назидавый.

Радуйся, Божия Матери избранниче;

радуйся, Церкви Русския дивный светильниче.

Кондак 12

Благодать Божия на тебе почивающая и по успении твоем явилася, богохвальне Виталие, егда ты подобно Александру Невскому, его же зело любляше, приял еси сам в руце твои святые молитву разрешительную, показуя, яко и по смерти от нас не разлучаешися. Мы же чудо такое зряще поем богу: Алиллуиа.

 

 

Икос 12

Поюще равноангельское и многострадальное житие твое, веруем,

яко и по смерти нас не оставляеши, ты бо сам обещался еси выну за чтущих тя пред Богом ходатайствовати, завещавая аки к живому тебе прибегати.

Тем же чудеса многия по сей день являеши, утешение скорбящим посылая.

Сего ради приими радостное пение:

Радуйся, для Господа живый и для Господа умерый;

радуйся, всяким словом и познанием в Бозе обогативыйся.

Радуйся, свидетельство Христово в сердце твоем утвердивый;

радуйся, ни в коем же даре на пользу спасения недостатка имевый.

Радуйся, Трисолнечного Света причастниче;

радуйся, ангелов приятный собеседниче.

Радуйся, Духа Утешителя вместилище;

радуйся, лоза плодовита винограда Христова.

Радуйся, яко финикс в раю процветший;

радуйся, ризы ветхия на одежды праведных смеливый.

Радуйся, просящим полезных подателю;

радуйся, от враг видимых и невидимых избавителю.

Кондак 13

О, предивный Угодниче Божий, отче Виталие богомудре, приими моление наше малое с умилением тебе приносимое, и моли о нас Вседержителя, оставления грехов нам подати, и, Любви на Кресте распятой, всей душой и помышлением взыскати, да в раю с тобою обрящемся, вопия Источнику Благих: Аллилуиа, Аллилуиа, Аллилуиа.

(Этот кондак читается трижды, затем Икос 1 и Кондак 1)

МОЛИТВА

Схиархимандриту Виталию

О, преславный подвижниче Христов, богомудре Виталие! Ты измлада паче всех благ земных Крест Христов возлюбил еси и Спасителю ничто же сумняшеся последовал еси, ни во что же крики безумных, остановити тя хотящих вменяя.Того ради и слава Царствия Божия еще на земле тебе открылася, ныне же Престолу Божию вкупе со всеми святыми предстоиши и дерзновение за нас молитися имееши. Тем же к предательству твоему прибегающе, молим тя: помоги нам страсти, обдержащия нас одолети, ибо творим, чего не желаем, грехом, аки проказой пораженные.

 

Умоли Всемилостивого Владыку, да коснется сердец наших Своею благодатию, подаст силы греху противостати и отженет от нас всякого врага и супостата, ибо не хощет Господь смерти грешника, но хощет всем спастися и в разум истины приити и грядущего к Нему не изженет вон. Молись за нас ко Творцу, отче Виталие, да не отвратит лица Своего от созданий своих грехов наших ради, но помилует и имиже веси судьбами спасет нас. Аминь.

 

 

 

 

АКАФИСТ Схиархимандриту Виталию(Тбилисскому)

Кондак 1

Избранный угодниче Христов, благоуханный цвете монашества,

богомудре отче Виталие, Евангелие самим твоим житием исполнил еси, крест страданий, унижений и гонений кротко носяще, тому же подвиги многотрудные приложил еси. Сего ради сосуд достойный благодати и любви Божественныя соделался еси, тем же в Небесных Обителях ныне пребываеши. Мы же, чтущие святую память твою, с умилением вопием ти: