Пресвятей Богородице в честь и славу иконы Ея, нарицаемою

Пресвятей Богородице в честь и славу иконы Ея, нарицаемою

«ПРИ́ЗРИ НА СМИРЕНИЕ»

Для келейного (домашнего) чтения во всякое время

 

 

Ведомо буди! Если нет в твоём доме (келье) этого образа — можно молиться пред любой другой иконой Божией Матери, но с верою в Её заступничество и не чуть в том не сомневаясь.

 

Таже ведомо буди! Перед началом всякого келейного (домашнего молитвенного чтения) правила и по окончании его кладётся седмипоклонный начал.

 

Бо́же, ми́лостив бу́ди мне гре́шному. (Поклон)

Бо́же, очи́сти мя гре́шнаго и поми́луй мя. (Поклон)

Созда́вый мя, Го́споди, поми́луй мя. (Поклон)

Без числа́ согреши́х, Го́споди, прости́ мя. (Поклон)

Влады́чице моя, Пресвята́я Богоро́дице, спаси́ мя гре́шнаго. (Поклон)

А́нгеле, храни́телю мой святы́й, от вся́кого зла сохрани́ мя. (Поклон)

Все святии, моли́те Бо́га о мне. (Поклон)

И молитву сию:

Боже, очисти мя грешнаго, яко николиже благо сотворих пред Тобою (Земной поклон), но избави мя от лукаваго, и да будет во мне воля Твоя (Земной поклон), да неосуждено отверзу уста моя недостойная, и восхвалю имя Твое святое, Отца и Сына и Святаго Духа, ныне и присно и во веки веков, аминь (Земной поклон).

 

По сем, возжегши свещу, покадив ладаном и осенив себя Крестом, глаголи сице:

 

Во славу Святыя, Единосущныя и Неразделимыя Троицы, Отца, и Сына, и Святаго Духа, в честь же и похвалу небесныя Царицы, Пречистыя Девы Богородицы (†)

 

Под Твое благоутробие прибегаем, Богородице Дево, молитв наших не презри в скорбех, но от бед избави нас, едина чистая и благословенная (†)

 

Госпоже, устне мои отверзеши и уста моя возвестят хвалу Твою (†)

 

Госпоже моя, в помощь мою вонми. Слава Тебе, сирот Мати, сотвори нам милостива Вседержителя Бога (†)

 

Моли́твами Богоро́дицы и святы́х оте́ц на́ших, Го́споди Иису́се Христе́ Бо́же наш, поми́луй нас. Аминь. (†)

 

Сла́ва Тебе́, Бо́же наш, сла́ва Тебе́. (†)

 

Молитва Святому Духу

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

 

Трисвятое

Святы́й Бо́же, Святы́й Кре́пкий, Святы́й Безсме́ртный, поми́луй нас (Читается трижды, с крестным знамением и поясным (если позволяет здоровье — земным) поклоном на каждый раз).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Молитва Пресвятой Троице

(†) Пресвята́я Тро́ице, поми́луй нас; (†) Го́споди, очи́сти грехи́ на́ша; (†) Влады́ко, прости́ беззако́ния на́ша; (†) Святы́й, посети́ и исцели́ не́мощи на́ша, и́мене Твоего́ ра́ди. (Поклон малый)

 

Го́споди, поми́луй. (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Молитва Господня

(По Евангелию от Матфея, глава 6, стихи 9–13)

(†) О́тче наш, И́же еси́ на небесе́х Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. (Поклон малый)

 

Я́ко Твое́ есть Ца́рство и си́ла и сла́ва во веки. Аминь. (†)

 

И тропари

Глас 4

Необори́мая стена́ о́браз Тво́й и исто́чник чуде́с,/ я́коже дре́вле от Него́ заступле́ние Твое́ гра́ду Пско́ву дарова́ла еси,/ та́ко и ны́не на́с от все́х бе́д и скорбе́й ми́лостивно изба́ви/ и спаси́ ду́ши на́ша я́ко любвеоби́льная Ма́ти (2).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Паки то́йже:

Необори́мая стена́ о́браз Тво́й и исто́чник чуде́с,/ я́коже дре́вле от Него́ заступле́ние Твое́ гра́ду Пско́ву дарова́ла еси,/ та́ко и ны́не на́с от все́х бе́д и скорбе́й ми́лостивно изба́ви/ и спаси́ ду́ши на́ша я́ко любвеоби́льная Ма́ти (†).

 

Го́споди, поми́луй (12).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

 

Псалом 142

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Яко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от пе́чали ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Аллилу́иа, аллилу́иа, аллилу́иа, сла́ва Тебе́, Бо́же! (3)

 

Го́споди, поми́луй. (3)

 

Седа́льны

Гла́с 4: Божественными зарями просвети и верою утверди, Пренепорочная Дево, поющих Тя умы, да вси любовию торжествуем, славяще в песнех лика Твоего отображение, и Тя, яко Заступницу христиан, просим спасти рабы Твоя от веяния беды, на путь покаяния наставити и сохранити от хотящих погубити души наша.

 

Сти́х: Помяну́ и́мя Твое́/ во вся́ком ро́де и ро́де.

 

Пресветлаго зрака Твоего новое явление радость приносит всем верующим, и град Киев в скорбех утешается, богатство благости в обители нашей процветает. Темже вси, утверждение в правоверии от Тебе приемше, купно с Гавриилом возопиим: радуйся, Благодатная!

 

Сти́х: Слы́ши, Дщи, и виждь,/ и приклони́ у́хо Твое́.

 

Призри на смирение Твоих раб, Всенепорочная, утоляющи лютая на ны востания, всякия скорби нас изменяющи, Тя бо православнии твердое и известное утверждение имамы, и Твое предстательство стяжавше, ко иконе Твоей прибегаем: не посрами нашего упования, Владычице, вопиющих: Ты бо еси всех помоще, радосте и покрове, и спасение душ наших.

 

Сла́ва Отцу́ и Сы́ну и Свято́му Ду́ху, и ныне и присно, и во веки веков. Аминь. Глас то́йже:

 

Световидным явлением Твоим и божественным блистанием озари славящия Тя, и ум к содержанию крепкому истиннаго благочестия просвети, Пренепорочная Дево, неложна бо еси миру всему Предводительница к вечному радованию. Сего ради празднуем любовию вси явление Твоего зрака, славословяще Тя: не лиши нас Царствия Сына Твоего, едина Благословенная (†).

 

Го́споди, поми́луй. (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

 

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Яко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Яко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

 

По сем глаголи исповедание веры, сиречь:

СИМВОЛ ВЕРЫ

¹ Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. (†)

² И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. (†)

³ Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. (†)

⁴ Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. (†)

⁵ Распя́таго же за ны при Понти́йстем Пила́те, и страда́вша, и погребе́нна. (†)

⁶ И воскре́сшаго в тре́тий день по Писа́нием. (†)

⁷ И возше́дшаго на Небеса́, и седя́ща одесну́ю Отца́. (†)

⁸ И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. (†)

⁹ И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. (†)

¹⁰ Во еди́ну Святу́ю, Собо́рную и Апо́стольскую Це́рковь. (†)

¹¹ Испове́дую еди́но креще́ние во оставле́ние грехо́в. (†)

¹² Ча́ю воскресе́ния ме́ртвых, и жи́зни бу́дущаго ве́ка. Ами́нь. (†)

 

 

Кано́н Пресвяте́й Богоро́дице

Глас 4:

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Даждь, Владыко Христе, слово безгласным устом моим и просвети помраченный ми смысл, да восхвалю новое и ужасное чудо Пречистыя Твоея Матере.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

О Пресвятая Владычице Богородице! Приими сие малое моление и принеси е Сыну Твоему и Богу нашему, да спасет и просветит Тебе ради души наша.

 

Припе́в: Сла́ва Отцу́ и Сы́ну и Свято́му Ду́ху.

 

Сердца наша привлекла еси, Дево Чистая, и тайным образа Твоего благолепием, и боголепными онаго чудесы. Темже, поюще молим Тя: и наша души благообразны соделай, Владычице.

 

Припе́в: И ны́не и при́сно и во ве́ки веко́в, ами́нь.

 

Тя, Богоневесто Чистая, недостойнии раби, славим, лобызающе бренными усты образ Твой святый, и Тебе молимся со слезами: спаси нас от лютых грехопадений, да избавимся от вечныя муки.

 

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Оружие убо на ны обострив, совещавает льстивый враг беззаконный: Ты же, Дево Богородице, силою молитв Твоих вооружаеши на него рабы Твоя: темже проповедуем славу Твою.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Исполни, о Владычице, благими помышлении мой ум, долу приклоненный, да возвеселюся, узрев чудес сокровище, пречистый образ Твой.

 

Припе́в: Сла́ва Отцу́ и Сы́ну и Свято́му Ду́ху.

 

Начало и худость моего естества познавая, молю Тя, Дево, утоли страстей моих свирепеющую волну, и бурю злых помышлений потреби.

 

Припе́в: И ны́не и при́сно и во ве́ки веко́в, ами́нь.

 

Обуреваемь волнами моих прегрешений, и люте всегда борца работами потопляемь, и во глубину погибели ныне отпущен, вопию Ти, Пренепорочная: спаси мя.

 

Катава́сия: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

 

И стихиры сия:

 

Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству.

 

При́зри благосе́рдием, всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.

 

Го́споди, поми́луй. (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Кондак, глас 3: Пренепорочная Дево, отображение лика Твоего чтущих благодарныя дары приемлеши, живым и мертвым помогаеши, град и страну нашу заступающи и к Сыну Твоему молитвы приносиши, о спасении душ наших.

 

Икос: Яко дар прияла еси, Мати Божия, всех христиан недуги исцеляти и от бед избавляти, и от пленения спасати, и от врагов заступати; не презри нас, Госпоже, веси бо, ихже требуем, и молися о спасении душ наших.

 

Седален, глас 1: В годину новых испытаний и нестроений явившая образ Твой, Всепетая, люди, верно чтущия Тя и покланяющияся новоявленному образу Твоему, в православии и благочестии утверди.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Почитающий Тя град, Владычице, и по долгу славящий ограждай от безбожных, от еретиков и отступников, Пречистая Дево, Ты бо тому богатство неотемлемо еси, покров же и слава.

 

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Егда душа окаянная моя от телесе сего имать разлучатися, и не обрящется избавляяй, ниже утешаяй ю: тогда, Владычице, предстани и избави мя бесовскаго озлобления.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Со всякою скорбию, с печалию горькою прибегаю к Тебе, Мати Божия, яко чадо, от злых обидимое, вся приношу Тебе, Дево Чистая, чающи утешения и матерния милости.

 

Припе́в: Сла́ва Отцу́ и Сы́ну и Свято́му Ду́ху.

 

Тобою возстают разслабленнии, недугующии исцеляются, слепии прозирают, от бесов томимии свобождаются. Радуйся, источниче дарований, Богоблагодатная.

 

Припе́в: И ны́не и при́сно и во ве́ки веко́в, ами́нь.

 

Егоже от Твоих кровей родила еси, Чистая, совершенна Человека и Бога Истинна, Иисуса: умоли Того избавитися нам огня вечнаго.

 

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Во уповании тленных и временных вещей не остави мя, Пречистая, сокрушистася бо колена моя от нощи печали и забвения, но Ты не забуди мене, Мати Божия, и возстави мя, унывающаго.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Егда огусте мрак неверствия и лжесловесия, ересей и злокознства, явила еси, Владычице, небесную помощь земному отечеству нашему, чудесы от святаго образа Твоего православную веру в нем утверждающе.

 

Припе́в: Сла́ва Отцу́ и Сы́ну и Свято́му Ду́ху.

 

Любовь сея жизни преизлишнюю и плотскаго покоя рачение отложи от нас, молим Тя, Чистая, да не омрачени суетными и ложными, впадем в злочестия мрак душегубительный.

 

Припе́в: И ны́не и при́сно и во ве́ки веко́в, ами́нь.

 

Истины познание даруй нам, Владычице, изымающе из среды нашея всяко идолослужение, лихоимание и безбожие, да сохраним, Пречистая, заповеди Сына Твоего.

 

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Чистоты сокровище, огнь нечистоты и всякия скверны во мне морем благости Твоея угаси, и мглу греховную разжени, и сердце мое радости исполни.

 

Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́ и спаси́ нас.

 

Ааронов жезле прозябший, потреби лукавая страстей прозябения в души моей, да чистое сердце принесу Христу Богу моему.

 

Припе́в: Сла́ва Отцу́ и Сы́ну и Свято́му Ду́ху.

 

Тело и душу нескверны Богови соблюдши, чертог Божий одушевленный показалася еси, Дево Пренепорочная, темже присно молися соблюсти без вреда рабы Твоя.

 

Припе́в: И ны́не и при́сно и во ве́ки веко́в, ами́нь.

 

Имуще Твою, Богородице, икону, молим Тя, яко Матерь Света незаходимаго: отжени от нас мрак страстей да Того светлостию, просветившеся, воспоем Тя.

 

Катава́сия: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

 

И стихиры сия:

 

Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству.

 

При́зри благосе́рдием, всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.

 

Го́споди, поми́луй. (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Запе́в: Пресвята́я Богоро́дице, спаси́ нас.

 

Молитва ко Пресвятой Богородице

О, Пресвята́я Влады́чице, Пречи́стая Де́во Богоро́дице, Го́спода Бо́га моего́ И́исуса Христа́ Ма́ти! Припа́даю и молю́тися, я́ко Ма́тери Царе́вой, предначина́я к Тебе́ недосто́йное мое́ сие́ моле́ние, е́же при́емши, О! Ма́ти Царя́ небесе́ и земли́, принеси́ к Царю́ ца́рствующих, всех Го́споду, Сы́ну Твоему́ и Бо́гу, и проще́ние всем согреше́ниям мои́м испроси́, житию́ моему́ пода́ждь исправле́ние и на кончи́не от возду́шных враго́в немяте́жное преше́ствие, ца́рствия боже́ственный вход отве́рсти исхода́тайствуй ми и та́мо ра́йския пи́щи наслажде́ния, го́рняго о́наго гра́да, вы́шняго прекра́снаго Иерусали́ма, весе́лия и неизрече́нных того́ красо́т, све́тлости же трисия́ннаго Тро́ичнаго све́та и сла́дкаго гла́са а́нгельских пе́ний наслажда́тися: ея́же сла́вы и ра́дости насле́дника мя и свя́тым всем соприча́стника сотвори́, вся бо мо́жеши, я́ко Ма́ти Царя́ Всемогу́щаго; и ны́не у́бо, изря́днее же в ча́с се́й, услы́ши мя, Всеми́лостивая Влады́чице, предстоя́ща Ти, вонми́, Госпоже́ Цари́це, моле́бное пе́ние принося́щу Ти си́це:

 

Акафист

И тропари

Глас 4

Необори́мая стена́ о́браз Тво́й и исто́чник чуде́с,/ я́коже дре́вле от Него́ заступле́ние Твое́ гра́ду Пско́ву дарова́ла еси,/ та́ко и ны́не на́с от все́х бе́д и скорбе́й ми́лостивно изба́ви/ и спаси́ ду́ши на́ша я́ко любвеоби́льная Ма́ти (2).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Паки то́йже:

Необори́мая стена́ о́браз Тво́й и исто́чник чуде́с,/ я́коже дре́вле от Него́ заступле́ние Твое́ гра́ду Пско́ву дарова́ла еси,/ та́ко и ны́не на́с от все́х бе́д и скорбе́й ми́лостивно изба́ви/ и спаси́ ду́ши на́ша я́ко любвеоби́льная Ма́ти (†).

 

Вместо ектении глаголи сице:

 

Поми́луй нас, Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це, гре́шнии прино́сим: поми́луй нас. (Поклон)

 

Господи, помилуй (3).

 

Помяни́, Го́споди Иису́се Христе́, Бо́же наш, ми́лости и щедро́ты Твоя́ от ве́ка су́щия, и́хже ра́ди и вочелове́чился еси́, и распя́тие и смерть, спасе́ния ра́ди пра́во в Тя ве́рующих, претерпе́ти изво́лил еси́; и воскре́с из ме́ртвых, возне́слся еси́ на Небеса́ и седи́ши одесну́ю Бо́га Отца́, и призира́еши на смире́нныя мольбы́ всем се́рдцем призыва́ющих Тя. Приклони́ у́хо Твое́, и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго, Тебе́ за вся лю́ди Твоя́ принося́щаго. (Поклон)

 

И в пе́рвых помяни́ Це́рковь Твою́ Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разшири́, умно́жи, умири́, и непребори́му а́довыми враты́ во ве́ки сохрани́; раздира́ния Церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Ду́ха обрати. (Поклон)

 

Господи, помилуй (3).

 

Спаси́, Бо́же, лю́ди Твоя́ и благослови́ достоя́ние Твое́, посети́ мир Тво́й ми́лостию и щедро́тами, возвы́си ро́г христиа́н правосла́вных и низпосли́ на ны́ ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́диа и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Фили́ппа и Ермоге́на, святы́х, сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны, и все́х святы́х. Мо́лим Тя́, многоми́лостиве Го́споди, услы́ши мя, гре́шнаго, моля́щагося Тебе́, и поми́луй на́с. (Поклон)

 

Господи, помилуй (3).

 

Спаси́, Го́споди, и поми́луй богохрани́мую страну́ на́шу, вла́сти и во́инство ея́, огради́ ми́ром их, и глаго́ли ми́рная и блага́я в сердца́х их о Це́ркви Твое́й Святе́й, и о всех лю́дех Твои́х, да и мы в тишине́ их ти́хое и безмо́лвное житие́ поживе́м во правове́рии, и во вся́ком благоче́стии и чистоте́. (Поклон)

 

Господи, помилуй (3).

 

Спаси́, Го́споди, и поми́луй Вели́каго Господи́на и Отца́ на́шего Святе́йшего Патриа́рха Кири́лла, и святе́йшия вселе́нския патриа́рхи, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны, и весь при́чет церко́вный, я́же поста́вил еси́ пасти́ слове́сное Твое́ ста́до, и моли́твами их поми́луй и спаси́ мя гре́шнаго. (Поклон)

 

Господи, помилуй (3).

 

Спаси́, Го́споди, и поми́луй отца́ моего́ духо́внаго (имя его), и святы́ми его́ моли́твами прости́ моя́ согреше́ния. (Поклон)

 

Господи, помилуй (3).

 

Спаси́, Го́споди, и поми́луй [ аще живы: роди́тели моя́ (имена их),] бра́тию и сестры́ (имена их), и сро́дники моя́ по пло́ти (имена их), и вся бли́жния ро́да моего́ (имена их), и дру́ги (имена их), и да́руй им ми́рная Твоя́ и преми́рная блага́я. (Поклон)

 

Господи, помилуй (3).

 

Спаси́, Го́споди, и поми́луй во святого́рских монастыре́х, и в росси́йских, и во ине́х ме́стех живу́щия и пребыва́ющия отцы́ и бра́тию, и сестры́ наша (аще знаеши кого рцы их имена), и моли́твами их поми́луй и мене́, гре́шнаго. (Поклон)

 

Господи, помилуй (3).

 

Спаси́, Го́споди, и поми́луй по мно́жеству щедро́т Твои́х вся священнои́ноки, и́ноки же и и́нокини, и вся в де́встве же и благогове́нии и по́стничестве живу́щия в монастыре́х, в пусты́нях, в пеще́рах, гора́х, столпе́х, затво́рех, разсе́линах ка́менных, острове́х же морски́х, и на вся́ком ме́сте влады́чествия Твоего́ правове́рно живу́щия, и благоче́стно служа́щия Ти, и моля́щияся Тебе́ (аще знаеши кого рцы их имена): облегчи́ им тяготу́, и уте́ши их скорбь, и к по́двигу о Тебе́ си́лу и кре́пость им пода́ждь, и моли́твами их да́руй ми оставле́ние грехо́в. (Поклон)

 

Господи, помилуй (3).

 

Спаси́, Го́споди, и поми́луй ста́рцы и ю́ныя, ни́щия и сироты́ и вдови́цы, и су́щия в боле́зни и в печа́лех, беда́х же и ско́рбех, обстоя́ниих и плене́ниих, темни́цах же и заточе́ниих, изря́днее же в гоне́ниих, Тебе́ ра́ди и ве́ры правосла́вныя, от язы́к безбо́жных, от отсту́пник и от еретико́в, су́щия рабы́ Твоя́ (аще знаеши кого рцы их имена), и помяни́ я́, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь. (Поклон)

 

Господи, помилуй (3).

 

Спаси́, Го́споди, и поми́луй благотворя́щия нам, ми́лующия и пита́ющия нас, да́вшия нам ми́лостыни, и запове́давшия нам недосто́йным моли́тися о них, и упокоева́ющия нас, и сотвори́ ми́лость Твою́ с ни́ми, да́руя им вся, я́же ко спасе́нию проше́ния, и ве́чных благ восприя́тие. (Поклон)

 

Господи, помилуй (3).

 

Спаси́, Го́споди, и поми́луй по́сланныя в слу́жбу, путеше́ствующия, отцы́ и бра́тию на́шу (аще знаеши кого рцы их имена), и вся правосла́вныя христиа́ны. (Поклон)

 

Господи, помилуй (3).

 

Спаси́, Го́споди, и поми́луй и́хже аз безу́мием мои́м соблазни́х, и от пути́ спаси́тельнаго отврати́х, к дело́м злым и неподо́бным приведо́х (аще знаеши кого рцы их имена); Боже́ственным Твои́м Про́мыслом к пути́ спасе́ния па́ки возврати́. (Поклон)

 

Господи, помилуй (3).

 

Спаси́, Го́споди, и поми́луй ненави́дящия и оби́дящия мя, и творя́щия ми напа́сти, и не оста́ви их поги́бнути мене́ ра́ди, гре́шнаго. (Поклон)

 

Господи, помилуй (3).

 

Отступи́вшия от правосла́вныя ве́ры и поги́бельными ересьми́ ослепле́нныя (аще знаеши кого рцы их имена), све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти. Правове́рие же утверди́, и воздви́гни рог христиа́нский, и низпосли́ на нас ми́лости Твоя́ бога́тыя. (Поклон)

 

Господи, помилуй (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Запе́в: Пресвята́я Богоро́дице, спаси́ нас.

 

Об усопших

Пресвятая Госпоже, Владычице Богородице! К Тебе прибегаем, Чистая: Ты бо еси стена необоримая, предстательство и покров всем, прибегающим к Тебе с верою и упованием! Молим Тя, Преблагословенная, услыши молитву недостойных раб Твоих и предстани присно за усошпих рабов Твоих. Ты выну ходатайствуеши о всех чтущих Тя, прибегающих к покрову Твоему и тепле молящихся Тебе в болезнех, скорбех и напастех; но Твое ходатайство, Твое заступление наипаче благопотребно нам по смерти нашей; Ты выну являеши скорую помощь Твою рабом Твоим и не престаеши всем молящимся Тебе являти Свое благосердие и изливати великия и богатыя милости Сына Твоего и Бога нашего на всех верующих: на Тя единую по Бозе имамы твердую надежду и упование: никтоже, Тебе моляся, отходит от Тебе без помощи, радости, и утешения, и услаждения. Молим Тя, о, Пресвятая Богородице, Владычице мира, надеждо ненадежных, буди убо днесь ходатаицею к Рождшемуся от Тебе за усопших рабов Твоих (имя рек), умоли Сына Твоего и Бога нашего дати им прощение и оставление прегрешений. Моли, Богородице, много бо может моление матернее ко благосердию Владыки; от Тебе бо приемлет Господь всяко слово прошения, приими убо и Ты наши молитвы и моления, приносимыя Тебе, Пресвятая Дево, от всего сердца нашего и всея души нашея за души усопших рабов Твоих. Молим Тя, помози им. Владычице, матерним Твоим ко Господу дерзновением достигнути тихаго пристанища в небесном Иерусалиме; помози им, Заступнице усердная, непостыдно предстати на страшнем и втором пришествии Сына Твоего, идеже кийждо от своих дел или прославится, или постыдится; помози им, Благодатная, оправдатися пред лицем Седящаго на престоле славы, да не постыдятся пред Ангелы и всеми Святыми, пред всем миром, горним и дольним. О, Всепетая Мати, Владычице Богородице, молим Тя, заступи, спаси, сохрани и будущия изми муки усопших рабов Твоих, да не погибнут во век, но да спасутся Твоими молитвами и прейдут от смерти в живот. Мы же, грешнии и недостойнии раби Твои, не отступим от Тебе, не престанем во умилении взывати к Тебе: Пресвятая Госпоже, Царице и Владычице! моли Сына Твоего и Бога нашего об усопших рабех Твоих, да даст им Господь отпущение прегрешений; посли им, Благодатная, достигнути вожделеннаго отечества и узрети блага небесныя, ихже око не виде, ухо не слыша и на сердце человеку не взыдоша; моли о них, Богородице, да сподобятся, по Твоему предстательству, вкушати блага сии во царствии Сына Твоего, Христа Бога нашего, Ты бо еси единая благословенная в женах многомощная Заступница, надежда, покров и прибежище всем, притекающим к Тебе, — Ты еси мост, преводяй сущих от земли на небо и райских дверей отверзение. Аминь.

 

4.

И иная молитва

Достойно славимая и праведно от всех горних чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная, Ейже, яко Царице, предстоят лици Ангельстии, Гавриилову песнь возглашающе: радуйся, Благодатная! Наши же грешныя и бренныя уста кую достойную похвалу принести возмогут величию Твоему, точию да зовем Ти: о, пречудная Владычице, молися из Тебе воплощенному Христу Богу нашему, да призрит на ны, люди безответныя, да сохранит нас невредимых от всех навет вражиих и злых клевет,