На «Бог Господь» – тропарь Богородицы, глас 1-й (дважды). «Слава, и ныне» – тот же тропарь.

Кафизмы 4-я и 5-я. Малые ектении.

По 1-м стихосло́вии седа́лен, глас 1. Подо́бен: Гроб Твой, Спа́се:

Веселя́тся све́тло Афо́на па́ствы,/ пе́сней мно́жество соплета́ют, любо́вию Непоро́чную почита́юще,/ вели́чеством благода́ти крася́щеся,/ ю́же прия́ша прише́ствием ико́ны Всенепоро́чныя Отрокови́цы,/ златови́дными заря́ми благоче́стно пою́щих озаря́ющия.

По 2-м стихосло́вии седа́лен, глас 3. Подо́бен: Красоте́ де́вства:

Чу́до пресла́вное зри́тся Днесь,/ ка́ко в вода́х огнено́сная Богоотрокови́цы ико́на показу́ется,/ и зна́мения ́лучи́ испущает, и пребыва́ние по́стников чу́дом спаса́ет,/ сего́ ра́ди благода́рственно вопием:/ ра́дуйся, Благода́тная.

Величание:

Величаем Тя,/ Пресвятая Дево,/ Богоизбранная Отроковице,/ и чтим образ Твой святый,/ имже то́чиши исцеления/ всем, с верою притекающим.

Псалом избра́нный: Помяни, Господи, Давида и всю кротость его.

По полиеле́и седа́лен, глас 5. Подо́бен: Собезнача́льное Сло́во:

Во сне яви́ся, Всеблаже́нная,/ и преподо́бному возвеща́ет Гаврии́лу:/ иди́ ра́но, — глаго́лет, — и сни́ди со тща́нием,/ ку́пно с ли́ком мона́шествующих, ко бре́гу приближися,/ сме́ло пойди́ по волна́м и приими́ ико́ну Мою́.

Степенна – 1-й антифон 4-го гласа.

Прокимен, глас 4: Помяну имя Твое во всяком роде и роде.

Стих: Отры́гну сердце мое слово благо. Всякое дыхание да хвалит Господа.

Стих: Хвалите Бога во святых Его.

Евангелие от Луки, зачало 4.

По 50-м псалме: Слава: Молитвами Богородицы,/ Милостиве, очисти/ множества согрешений наших. И ныне: тойже. Помилуй мя, Боже.

Стихи́ра по 50-м псалме́, глас 6. Самогласна:

Егда́ явле́ние пречи́стаго Твоего́ о́браза приспе,/ тогда́ Афо́нстии отцы́ столп о́гненный на мори́ зряще,/ стра́хом содержи́ми, недоумева́ху,/ Гаврии́л же, я́ко вторы́й Пе́тр, по мо́рю ходя́,/ со слеза́ми вопия́ше Тебе́:/ о Пресвята́я!/ Прииди́ и сохрани́ достоя́ние Твое́ от враго́в ненаве́тно.

Канон Богородицы со ирмосом на 14 (ирмосы по дважды).

Библейские песни «Поем Господеви…». Катавасия «Отверзу уста моя…».

Кано́н умили́тельный ко Пресвяте́й Влады́чице на́шей Богоро́дице. Творе́ние мона́ха Гера́сима. Глас 8.

Песнь 1

Ирмо́с: Колесницегонителя фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же, беглеца́, пешеходца спа́се,/ песнь Богови воспевающа.

Дважды.

От скве́рных у́стен хвале́ние приими, Всенепоро́чная,/ я́коже пре́жде Сын Твой, Бог же мой и Госпо́дь/ прия́т две ле́пте вдови́цы/ и разреше́ние прегреше́ний мои́х пода́ждь,/ я́ко да по до́лгу почита́ю Тя. Трижды.

А́нгельское пе́ние подобаше Ти, Ма́тери Бо́жией,/ Творца́ бо сих родила́ еси́ стра́шно и па́че смы́сла,/ но приими́ всех, Цари́це, и от нас ма́лое приноше́ние,/ че́стную Твою́ ико́ну почита́ющих. Трижды.

Благотвори́ти рабо́м Твои́м произволи́вши, Влады́чице,/ проти́вныя по́лчища враго́в си́лою Сы́на Твоего́ и Твое́ю, Всемогу́щая,/ отгна́вши от па́ствы Твое́й,/ храм созда́ти к защище́нию на врате́х благоволи́ла еси́, Богоневе́сто. Трижды.

Изыде от нечести́ваго царя́ повеле́ние/ не покланя́тися первообра́зно Сы́на Твоего́, Де́во, Бо́жественному изображе́нию,/ и Твоему́, Богома́ти, и святы́х всех,/ и возмути́ ве́рных собра́ние,/ но Ты же вско́ре разори́ла еси́. Трижды.

Песнь 3

Ирмо́с: Утвержде́й в нача́ле Небеса́ ра́зумом,/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Едине Человеколю́бче. Дважды.

Иконобо́рцев нечести́вых стремле́ние услы́шавши, че́стная и Боголюбе́зная вдови́ца,/ ужа́сными рука́ми ико́ну Твою́ нося́щи, Всечестна́я,/ на во́лны морски́я слезоточа́щи пусти́. Трижды.

Скры́вшиеся у́бо су́дьбами Сы́на Твоего́ до́лгое вре́мя во глуби́нах морски́х,/ но ма́нием Бо́жественным в па́ству Твою́ изыде. Трижды.

Чу́до тре́петное и сла́вное ви́дяху в мори́,/ обита́ющии в Афо́нстей Горе́,/ и́бо после́дова све́тлость благода́ти Твое́й/ и услади́ сия́нием ико́ны всех, прославля́ющих Тя. Трижды.

Ра́дующеся, наде́яхуся, Чи́стая,/ мно́жества мона́шествующих о держа́ние ико́ны Твое́й получити,/ но Ты держа́вною Твое́ю руко́ю/ обители Твое́й подала́ еси́ я́ко хранили́ще некра́домо. Трижды.

Седа́лен, глас 4:

Весе́лое Днесь Засту́пницы на́шея торжество́,/ да взыгра́ется тварь, да ликовству́ют челове́честии собо́ри,/ созыва́ет нас Свята́я Богоро́дица видети огнено́сную ико́ну Свою́/ и луча́ми ми́лости ве́рных просвеща́ющую./ Тем, ра́дующеся, вопи́ем:/ спаси́, Госпоже́, от гла́да, огня́, меча́ и всех бед почита́ющих явле́ние Твое́ ве́рно.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог,/ Ты мое́ ра́дование,/ не оста́вль не́дра Отча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Дважды.

Наше́ствия нечести́вых отгоня́ющи от па́ствы Твое́я,/ Вра́тнина бы́ти изво́лила еси́, Всеблага́я,/ но сохрани́ сию́ и пребыва́ти во ве́ки благоволи́/ пою́щую честно́е изображе́ние светоно́сныя иконы Твоея́, Влады́чице. Трижды.

Виждь, Чи́стая, и́ноков собо́ры па́ствы Твоея,/ окружа́ющих ико́ну Твою́ благохва́льную,/ разреше́ние грехо́в прося́щих и жития́ исправле́ние,/ и Боже́ственныя сла́вы прича́стниками быти, Всенепоро́чная. Трижды.

Все́ю душе́ю и мы́сли пра́востию в па́стве Твое́й вси слику́юще,/ псалмы́ и пе́сньми духо́вными, и пе́нием Боже́ственным ико́ну Твою́ почита́ют,/ проще́ние прося́ще и душ спасе́ние,/ Ты же сие́ пода́ждь, Влады́чице Богоневе́сто. Трижды.

Храм Твой просвеща́ется, Влады́чице, све́том Твои́м,/ и украша́ется Боже́ственными пе́сньми,/ я́ко обогати́ся ве́лиим сокро́вищем, ико́ною Твое́ю пречи́стою,/ Боже́ственная же Твоя́ огра́да си́лою благода́ти Твое́й Не́бо слове́сное показу́ется. Трижды.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.   Дважды.

Да посрамя́тся ли́ца нечести́вых/ и заградя́тся уста́ отрица́ющих и умаля́ющих све́тлую и Бо́жественную ико́ну Твою́, Влады́чице,/ и во огнь негаси́мый и тьму ве́чную да послю́тся му́читися. Трижды.

Храм Твой, Де́во, я́ко рай други́й показа́ся ны́не,/ дре́во жи́зни име́я — ико́ну красоты́ Твое́я,/ ю́же усе́рдно вси со благогове́нием и любо́вию целу́юще, Отрокови́це, спаса́емся. Трижды.

Ре́ку Тя сла́дкую и пото́к насыще́ния,/ ма́нну Небе́сную, ме́д от ка́мени,/ изоби́лие и благода́ть приснотеку́щую стяжавше, Отрокови́це,/ во оби́тели обита́ющии благода́рно пою́т рождество́ Твое́. Трижды.

Ди́вно превознесе́ся вели́чие ико́ны Твое́й, Богоро́дице Де́во,/ всю́ду бо лучи́ испуща́ет и просвеща́ет усе́рдно пою́щих/ неизрече́нное рождество́ Твое́, Влады́чице. Трижды.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молюся:/ к Тебе́ бо возопи́х, и усль́ппи мя,/ Бо́же спасе́ния моего́.   Дважды.

При́зри благосе́рдно на па́ству Твою́, Пречи́стая,/ и вся́кий наве́т и вред при́сно востающи́ на ню осуети́,/ и сохрани́ невреди́му. Трижды.

Покро́в и храни́лище ико́на Твоя́ бысть, Вла́дычице,/ е́юже от враго́в мы́сленных избавля́ются, прибега́ющи,/ и́ноков совокупле́ния и ве́рных собо́ры,/ душе́ю и се́рдцем славосло́вят Тя, Богома́ти. Трижды.

Призыва́ние и́мени Твоего́ вои́стинну ду́шам есть очисти́лище/ и скве́рных мы́слей истребле́ние,/ и отгна́ние лука́вых ду́хов, Богоро́дице Присноде́во. Трижды.

Пое́м вси благогове́йно ико́ну Твою́ пречи́стую, в храм Твой входя́щи,/ в Боже́ственное весе́лие,/ и ду́шам исцеле́ние почерпа́ем, Богоневе́сто. Трижды.

Конда́к, глас 4. Подо́бен: Яви́лся еси́ Днесь вселе́нней:

Совозсия Днесь Све́ту Воскресе́ния свет чи́стыя ико́ны Твоея́,/ обо́я ве́село торжеству́юще вопием:/ сохрани́ раб Твои́х благода́тию, Влады́чице.

И́кос:

Древле изра́ильтеский люд столпо́м огня́ путенаста́вивый/ и че́рмну́ю во́лну сему́ подсла́вы в зна́мение свобо́ды от рабо́ты мучи́тельския,/ Той и ны́не ико́ну Своея́ Ма́тере огнеобра́зну показу́ет,/ во изве́ство безме́рныя бла́гости/ и Храни́тельницу, мо́ре пешеходя́щую, Святоиме́нной Горе́ подае́т;/ тем по до́лгу благода́ть почита́юще, вопием:/ сохрани́ раб Твои́х благода́тию, Вла́дычице.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди отроцы в пе́щи ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших. Дважды.

О па́стве Твое́й Предста́тельница буди́, Чи́стая Де́во,/ и дре́вния ми́лости Твоя́ покажи́ на рабе́х Твои́х, Бо́га ро́ждшая,/ правосла́вно Сы́ну Твоему́ зову́щих:/ благослове́н Бог оте́ц на́ших. Трижды.

Позна́ша, Влады́чице, ро́ди ага́рянстии си́лу Твою́,/ находя́щи су́етно на любе́зную па́ству Твою́,/ и падо́ша безче́стною сме́ртию пра́ведно, Чи́стая Богоблаже́нная. Трижды.

Блаже́н, Влады́чице, Боже́ственный храм Твоея́ све́тлости,/ стяжа́в внутрь, я́ко ве́лие сокро́вище,/ подо́бия Твоего́ Боже́ственное изображе́ние,/ его́же ны́не целу́юще, славосло́вим Христа́, Тя просла́вльшаго. Трижды.

Испо́лнися, Пречи́стая, уст Твои́х Боже́ственное прорече́ние,/ блажа́т Тя А́нгелов и челове́ков мно́жества и пою́т согла́сно Рождество́ Твое́:/ благослове́н Бог оте́ц на́ших. Трижды.

Песнь 8

Ирмо́с: Седмери́цею пещь/ халде́йский мучитель,/ Богочести́вым неистовно разжже,/ си́лою же лу́чшею, спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Дважды.

 

Ю́же возлюби́ла еси́ Богосо́бранную па́ству Твою́/ и пребыва́ти вы́ну в той благоволи́,/ укроща́ющи безбо́жных ага́рянов во́лны,/ ми́рную жизнь подаю́щи ве́рою вопию́щим:/ благослови́те, свяще́нницы, по́йте, лю́дие, Благода́тную во вся ве́ки. Трижды.

Стра́нна чудеса́ Твоя́ и пресла́вна, Влады́чице,/ мо́ре, земля́ и не́бо послу́шает Ти,/ но соблюди́ пла́вающих ми́рнаго мо́ря пучи́ны,/ спасаеши бо преходя́щих от всех бед и возво́диши к высоте́ Небе́сней пою́щих:/ лю́дие, превозноси́те Бо́жию Ма́терь. Трижды.

Кто изрещи́ возмо́жет чуде́с Твои́х бе́здну/ и вели́чия всечестны́я ико́ны Твоея́,/ от нея́же излива́ется свяще́нной оби́тели Твое́й и всем приходя́щим всех благ незави́ство,/ ихже причаща́ющеся, благоче́стно воспева́ют Благода́тную во вся ве́ки. Трижды.

Ра́дующеся пое́т Тебе́, Богоро́дице Всепе́тая,/ благочести́вая и блаже́нная па́ства Твоя́,/ Бо́жественную благода́ть прие́млюще, Де́во, от Тебе́/ и Ца́рствия Сы́на Твоего́ прича́стниками про́сит Тобо́ю, вопию́щии:/ ра́дуйся, Благода́тная, во вся ве́ки. Трижды.

Песнь 9

Ирмо́с: Ужасе́ся о се́м Не́бо,/ и земли́ удиви́шася концы́,/ я́ко Бог явися челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Дважды.

Ужасо́шася А́нгелов во́инство и челове́ков ро́ди, Всенепоро́чная,/ стра́шнаго и па́че ума́ рождества́ Твоего́,/ ка́ко и Де́ва пребыла́ еси́, и Ма́ти Бо́жия бы́ти сподо́билася еси́,/ сего́ ра́ди по до́лгу пое́м, благослови́м и покланя́емся ико́не Твое́й. Трижды.

Огражде́ние и стена́ духо́вная,/ столп ве́лий и утвержде́ние оби́тели Твое́й и всем ве́рным дарова́лася еси́ от Бо́га,/ и́хже и сохрани́ неврежде́нных Боже́ственное изображе́ние ико́ны Твоея велича́ющих. Трижды.

Осуети́, Де́во, нечести́вых сове́ты и беззако́нная ухищре́ния,/ ча́сто находя́щия на ста́до Твое́/ и прожени́ сих дале́че со студо́м/ и коне́чному разоре́нию преда́ждь,/ да позна́ют си́лу и власть Твою́, Богоневе́сто. Трижды.

При́зри, Де́во, ны́не на нас от высоты́ сла́вы Твоея́, Влады́чице,/ благогове́йно ико́ну Твою́ почита́ющих/ и проше́ния на́ша испо́лни Бо́жественных даро́в,/ и прегреше́ний дару́й оставле́ние. Трижды.

Ексапостиларий. Подо́бен: В Ду́се Свяще́нном:

В мо́ре вшед немо́кренно, восприя ико́ну Твою́, Всенепоро́чная, Гаврии́л свяще́нный/ зовы́й, ужаса́яся, почита́ет:/ О Всечестна́я, ве́лия Твоя́ чу́деса и благода́ть неисчерпа́емая,/ ю́же освяща́вши всю́ду воспева́ющих любовию.

На хвали́тех стихи́ры, глас 8. Подо́бен: О, пресла́внаго чудесе́:

О, несказа́нныя бла́гости!/ Ико́ны заря́ све́тится,/ сия́ет чудеса́ми и просвеща́ет благода́тию приходя́щих ве́рно,/ расточа́ющая же ополче́ния враго́в/ и пучи́ною ку́пно погружа́ющая, ю́же приемлюще,/ Чи́стую Богоотрокови́цу достодолжно песньми почита́ем и ублажа́ем.

О, Твоего́ о нас, Влады́чице, промышле́ния!/ чу́дную бо Твою́ ико́ну посыла́вши Днесь/ и стра́жа неусы́пна пода́вши благода́тию,/ Наде́ждо и Покро́ве прибега́ющих ве́рно/ и утеше́ние стра́нствию на́шему,/ тем позна́вше честны́я Твоя́ чудеса́,/ песньми Тя почита́ем и ублажа́ем.

О, пресла́внаго чудесе!/ Ка́ко огнено́сная ико́на пря́мо на волна́х морски́х, я́ко на колесни́це, прехо́дит,/ полносве́тлыми луча́ми благода́ти просвеща́ет ве́рных умы́,/ ея́же торжество́ пе́сньми почита́юще,/ ра́достно сла́ву возсыла́ем, Благоде́тельнице.

Сла́ва, и ны́не, глас 8:

Восприя́т свяще́нную ико́ну свяще́нный Гавриил,/ я́коже Всенепоро́чная повеле,/ чу́до чудесе́ после́дова,/ путеше́ствова бо немо́кренно во́ду,/ огнено́сную во́льно прия́т ико́ну,/ сие́ лик воста́ви и торжество́ совокупи́,/ тем и мы, удивля́ющеся, вопие́м Первовино́вному:/ сла́ва Тебе́, сотво́ршему ди́вная, еди́ному Царю́ и Бо́гу,/ Богоро́дицы ра́ди сохрани́ страну́ на́шу и побе́ды на враги́ дару́й, я́ко Всеси́лен.

Славосло́вие вели́кое.

Тропа́рь Богородицы, глас 1:

Де́рзость ненавидящих образ Господень/ и держава нечестивых безбожно в Никею прии́де,/ и по́сланнии безчеловечно вдовицу,/ благочестно чтущую икону Богоматере, истязу́ют,/ но та́я нощию с сыном икону в море пусти́, вопию́щи:/ слава Тебе, Чистая,/ яко непроходимое море плещи́ своя подаде́,/ слава правоше́ствию Твоему, Едина Нетленная.

На Литургии: