Богородичен воскресный, глас 4.

Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Кафизмы 16-я и 17-я. Малые ектении.

Седальны Октоиха.

по 1-м стихосло́вии седа́льны му́ченичны, гла́с 5:

Сия́ет дне́сь па́мять страстоте́рпец, и́мать бо и от небе́с зарю́: ли́к а́нгельский торжеству́ет, и ро́д челове́ческий спра́зднует. Те́мже мо́лятся Го́сподеви, поми́ловатися душа́м на́шым.

Сти́х: Ди́вен Бо́г во святы́х Свои́х, Бо́г Изра́илев.

Чудеса́ святы́х Твои́х му́ченик сте́ну неразори́му на́м дарова́л еси́, Христе́ Бо́же: те́х моли́твами ве́рныя лю́ди твоя́ утверди́, я́ко Еди́н Бла́г и Человеколю́бец.

Сла́ва, и ны́не, Богоро́дичен: Ра́дуйся, две́ре Госпо́дня непроходи́мая, ра́дуйся, стено́ и покро́ве притека́ющих к Тебе́, ра́дуйся, необурева́емое приста́нище, и Неискусобра́чная, ро́ждшая пло́тию Творца́ Твоего́ и Бо́га: моля́щи не оскудева́й о воспева́ющих, и кла́няющихся Рождеству́ Твоему́.

По 2-м стихосло́вии седа́льны, му́ченичны, гла́с 5:

Го́споди, ча́ше Страсте́й Твои́х страстоте́рпцы Твои́ поревнова́вше, оста́виша жите́йскую красоту́, и бы́ша а́нгелом соприча́стницы: те́х мольба́ми пода́ждь душа́м на́шым ми́р Христе́ Бо́же, и ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Святы́х му́ченик исправле́нием небе́сныя си́лы преудиви́шася, ка́ко в те́ле ме́ртвеннем подви́гшеся до́бре, безпло́тнаго врага́ си́лою кре́стною победи́ша неви́димо: и мо́лятся Го́сподеви, поми́ловатися душа́м на́шым.

Сти́х: Блаже́ни, я́же избра́л и прия́л еси́, Го́споди, и па́мять и́х в ро́д и ро́д.

Та́же седа́лен, поко́ин:

Поко́й, Спа́се на́ш, с пра́ведными рабы́ Твоя́, и те́х всели́ во дворы́ твоя́, я́коже пи́сано е́сть, презира́я вся́ согреше́ния и́х, я́ко Бла́г, во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва, и ны́не, Богоро́дичен: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй на́с.

Псалом 50-й.

Каноны:

В храме Воскресения Христова – канон воскресный рядового гласа (с прошлой Недели) со ирмосом на 6 (ирмосы по дважды, тропари на 4: два воскресных тропаря, один Крестовоскресный и один Богородичен), священномученика на 4 и Октоиха (мученичный) на 4.

В храме Господском и Богородицы – канон храма со ирмосом на 6 (ирмосы по дважды), священномученика на 4 и Октоиха (мученичный) на 4.

В храме святого – канон священномученика со ирмосом на 6 (ирмосы по дважды), храма на 4 и Октоиха (мученичный) на 4.

Кано́н священномученика, глас 6.

Песнь 1

Ирмо́с: Я́ко по суху́, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

С ли́ки ше́ствуя ве́село в мы́сленных Небе́сных се́лех/ и сия́я све́том невече́рним,/ изба́ви мя от страсте́й моли́твами твои́ми, му́дре, я́ко да пою́ тя.

Светоно́сная твоя́ па́мять со́лнечная облиста́ет дарова́ния/ и просвеща́ет ве́рно в ней чту́щия тя,/ ра́дости пресве́тлыя вои́стинну,/ му́чениче тезоимени́те.

Крове́й твои́х ка́плями сла́ное неве́рия мо́ре потопи́л еси́,/ река́ благоче́стия был еси́,/ Христо́ву напоя́ющи вои́стинну Це́рковь при́сно.

Богоро́дичен: Грехо́в бу́ря, и помышле́ний проти́вныя во́лны,/ и страсте́й наше́ствия на мне преидо́ша,/ но Твое́ю, Богоро́дице Де́во,/ держа́вною моли́твою спаси́ мя.

Канон Октоиха (мученичный) на 4, глас 5.

Ирмо́с: Зе́млю, на ню́же не возсия́, ни ви́де со́лнце когда́: бе́здну, ю́же не ви́де на́гу широта́ небе́сная, Изра́иль про́йде невла́жно, Го́споди, и вве́л еси́ его́ в го́ру святы́ни Твоея́, хва́ляща и пою́ща побе́дную пе́снь.

Му́ченичен: Телеса́ предаю́ще некро́тким судия́м, претерпе́сте нестерпи́мыя ра́ны до́блии страда́льцы, ча́юще прия́ти по́чести свы́ше: и введе́ ва́с Христо́с в ве́чныя оби́тели, ра́дующихся и пою́щих побе́дную пе́снь.

Святи́телем: Преподо́бнии и пра́веднии, и святи́телие, благосла́внии соверши́вше повеле́ния Бо́жия, упасо́ша лю́ди, и до́бре наста́виша к воде́ ра́зума: и пото́ки сла́дости досто́йно восприя́ша, источа́юще благода́тию исцеле́ний ре́ки.

Сла́ва, поко́ин: Тебе́ мо́лим благопреме́ннаго Бо́га: упоко́й в не́дрех Авраа́мовых рабы́ Твоя́, Христе́, я́же к Тебе́ преста́вил еси́ от жите́йскаго мяте́жа, и сподо́би и́х све́та ве́чнаго, те́х согреше́ния презира́я я́ко бла́г.

И ны́не: Ра́дуйся, Тебе́ зове́м, ро́ждшей ра́дость, Всепе́тая: просвети́ на́шя умы́ и ду́шы, и к стезя́м ра́зума все́х напра́ви, и прегреше́ний все́м очище́ние да́ти моли́, еди́на Богоневе́сто, Сы́на Твоего́ и Бо́га.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Несть отню́д изрещи́ чуде́с мно́жества, я́же соде́лал еси́,/ еще́ в жи́зни ходя́ и к Бо́гу преше́д,/ страстоте́рпче му́чениче досточу́дне.

Си́лою Боже́ственною укре́плься,/ некре́пкую на́глость беззако́нных низложи́л еси́,/ я́коже во́ин кре́пок, Харала́мпие страда́льче,/ я́ко ору́жник Боже́ственнаго ополче́ния.

Крове́й исте́кшия то́ки твоего́ телесе́/ весь нече́стия пла́мень и лю́тое запале́ние угаси́ша,/ сла́дости же пото́к тебе́ исхода́таиша.

Богоро́дичен: Святы́х Свята́го Бо́га родила́ еси́, Всесвята́я,/ свя́тости храм я́вльшися чист и дверь, е́юже Еди́н Христо́с про́йде,/ спаса́яй челове́чество.