Рождество Пресвятой Богородицы. 8/21 сентября

Тропарь, глас 4-й

Рождествó Твоé Богорóдице Дéво/, рáдость возвести́ всей вселéнней/: из Тебé бо возсия́ Сóлнце прáвды Христóс Бог наш/, и разруши́в кля́тву, дадé благословéние//, и упраздни́в смерть, даровá нам живóт вéчный.

Кондак, глас 4-й

Иоаки́м и Áнна поношéния безчáдства/, и Адáм и Éва от тли смéртныя свободи́стася, Пречи́стая, во святéм рождествé Твоéм/. То прáзднуют и лю́дие Твои́/, вины́ прегрешéний избáвльшеся, внегдá звáти Ти:// неплóды раждáет Богорóдицу и питáтельницу жи́зни нáшея.

Величание

Величáем Тя,/ Пресвятáя Дéво,/ и чтим святы́х Твои́х роди́телей,/ и всеслáвное слáвим// рождествó Твоé.

 

Воздвижение Честного и Животворящего Креста 14/27 сентября

Тропарь, глас 1-й

Спаси́, Гóсподи, лю́ди Твоя́/ и благослови́ достоя́ние Твоé/, побéды правослáвным христиáном на сопроти́вныя дáруя//, и Твоé сохраня́я Крестóм Твои́м жи́тельство.

Кондак, глас 4-й

Вознесы́йся на Крест вóлею/, тезоимени́тому Твоему́ нóвому жи́тельству/ щедрóты Твоя́ дáруй, Христé Бóже/; возвесели́ нас си́лою Твоéю/, побéды дая́ нам на супостáты/, посóбие иму́щим Твоé, ору́жие ми́ра,// непобеди́мую побéду.

Величание

Величáем Тя,/ Живодáвче Христé,/ и чтим Крест Твой святы́й,/ и́мже нас спасл еси́// от рабóты врáжия.

 

.

Введение во храм Пресвятой Богородицы 21 ноября/4 декабря

Тропарь, глас 4-й

Днесь благоволéния Бóжия предображéние/ и человéков спасéния проповéдание,/ в хрáме Бóжии я́сно Дéва явля́ется/ и Христá всем предвозвещáет./ Той и мы велеглáсно возопии́м: /рáдуйся,// смотрéния Зи́ждителева исполнéние.

Кондак, глас 4-й

Пречи́стый храм Спáсов,/ многоцéнный чертог и Дéва,/ свящéнное сокрóвище слáвы Бóжия,/ днесь ввóдится в дом Госпóдень, благодáть совводя́щи,/ я́же в Ду́се Божéственном, ю́же воспевáют Áнгели Бóжии;// Сия́ есть селéние небéсное.

Величание

Величáем Тя, /Пресвятáя Дéво,/ Богоизбрáнная Отрокови́це,/ и чтим éже в храм Госпóдень //вхождéние Твоé.

Рождество Гóспода нашего Иисуса Христа 25 декабря/7 января

Тропарь, глас 4-й

Рождествó Твоé, Христé Бóже наш,/ возсия́ ми́рови свет рáзума,/ в нем бо звездáм служáщии/ звездóю учáхуся /Тебé клáнятися, Сóлнцу прáвды,/ и Тебé вéдети с высоты́ Востóка.// Гóсподи, слáва Тебé!

Кондак, глас 3-й

Дéва днесь Пресу́щественнаго раждáет,/ и земля́ вертéп Непристу́пному принóсит;/ Áнгели с пáстырьми славослóвят/, волсви́ же со звездóю путешéствуют;// нас бо рáди роди́ся Отрочá млáдо, превéчный Бог.

Величание

Величáем Тя,/ Живодáвче Христé,/ нас рáди ны́не плóтию рóждшагося/ от безневéстныя и Пречи́стыя// Дéвы Мари́и.

Крещение Господа нашего Иисуса Христа 6/19 января

Тропарь, глас 1-й

Во Иордáне крещáющуся Тебé, Гóсподи,/ Трóическое яви́ся поклонéние:/ Роди́телев бо глас свидéтельствоваше Тебé,/ возлю́бленнаго Тя Сы́на имену́я,/ и Дух, в ви́де голуби́не,/ извествовáше словесé утверждéние./ Явлéйся, Христé Бóже//, и мир просвещéй, слáва Тебé.

Кондак, глас 4-й

Яви́лся еси́ днесь вселéнней,/ и свет Твой, Гóсподи, знаменáся на нас,/ в рáзуме пою́щих Тя;/ пришéл еси́ и яви́лся еси́,// Свет непристу́пный.

Величание

Величáем Тя,/ Живодáвче Христé,/ нас рáди ны́не плóтию крести́вшагося от Иоáнна// в водáх Иордáнских.

Сретение Господа нашего Иисуса Христа 2/15 февраля

Тропарь, глас 1-й

Рáдуйся, Благодáтная Богорóдице Дéво,/ из Тебé бо возсия́ Сóлнце прáвды, Христóс Бог наш/, просвещáяй су́щия во тьме./ Весели́ся и ты, стáрче прáведный, /приéмый во объя́тия Свободи́теля душ нáших,// дáрующаго нам воскресéние.

Кондак, глас 1-й

Утрóбу Деви́чу освяти́вый рождествóм Твои́м,/ и ру́це Симеóне благослови́вый,/ я́коже подобáше, предвари́в,/ и ны́не спасл еси́ нас, Христé Бóже;/ но умири́ во бране́х жи́тельство// и  укрепи люди, ихже возлюбил еси, Едине Человеколюбче.

Величание

Величáем Тя,/ Живодáвче Христé,/ и чтим Пречи́стую Мáтерь Твою́, /Éюже по закóну ны́не// принéслся еси́ в храм Госпóдень.