И ныне, Богородичен: Низложи, Мати Божия, крепость всех врагов, обидящих ны, невредимо Твое стадо спасай от приражений римскаго неправоверия, яко да по долгу Тя ублажаем.

Песнь 6

Ирмос: Неистовствующееся бурею душетленною, Владыко Христе, страстей море укроти и от тли возведи мя, яко Благоутробен.

Видевши толикий плач о отшествии твоем, блаженная, сладостно утешающи южики и духовная чада твоя, провещаваеши: не оставити хощу вы, но помолитися хощу о вас на месте страданий и преславнаго воскресения Христа Спаса моего.

Духом прозревши преподобная, яко дщери брата ея, юныя отроковицы Кириния и Ольга – сосуди суть избраннии Господеви, рече к ним пред отшествием своим: хощу вы обручити Жениху Безсмертному, яко да внидете в чертог Царствия Его.

Слава: Усладися отроковицам Киринии и Ользе беседа преподобныя, к нейже со умилением припадша, радостно рекоша: да будет воля Господня, да устроит святая твоя молитва о нас, якоже хощеши. Святая же призва епископа, иже и введе Киринию и Ольгу во церковь Спаса, и тамо постриже я, и обручи Христу.

И ныне, Богородичен: Ты еси дверь Царя Небес и Храм славы Его, Дево Всепетая, отверзи нам двери милосердия и введи ны молитвами Твоими во обители Небесныя славы.

Кондак, глас 8:

Верою и любовию твое честное пренесение празднующе, молимся, блаженная: сохрани и соблюди нас от всякия злобы и еретическаго обольщения, имаши бо дерзновение ко Владыце всех – Христу Богу. Егоже моли спасти православныя люди, молящыя тя, да вси вопием ти: радуйся, Евфросиние, невесто Христова всечестная.

Икос:

Ангельски на земли житие совершила еси: чистотою и смирением, кротостию и терпением, милосердием и воздержанием Господеви угодила еси. И ныне во светлостех святых почивающи последи трудов твоих, приими от нас пение сие: радуйся, девственнице душею и телом; радуйся, наставнице предивная инокиням; радуйся, еще на земли сподобльшаяся ангельскаго видения; радуйся, от Господа чрез Ангела устроити обитель повеление приимшая; радуйся, со тщанием волю Господню исполньшая; радуйся, вся земная наслаждения мира сего Христа ради отвергшая; радуйся, Небесному Жениху Иисусу Сладчайшему себе обручившая; радуйся, в чистоте, постех и молитвах Тому послужившая; радуйся, безценное сокровище, Пречестный Крест, обители твоей во освящение и утверждение стяжавшая; радуйся, во трудех дневных и нощных житие твое совершившая; радуйся, в невечернем дни Царствия Божия ныне пребывающая; радуйся, Евфросиние, невесто Христова всечестная.

Песнь 7

Ирмос: П ревозносимый отцев Господь пламень угаси, отроки ороси, согласно поющия: Боже, благословен еси.

Вручивши обитель твою преподобней сестре твоей Евдокии, паче же Христу Богу, радостно востекла еси на предлежащий путь со князем Давидом и южикою Евпраксиею, купно с ними воспевающи: Боже, благословен еси.

Изыдоша провождати преподобную вси людие града Полотска. Старии убо плакахуся о ней, яко о сестре, рекуще: увы нам, подпоро старости нашея, просвещение душ наших! Юнии же глаголаху: камо уходиши, свете очей наших? Кто нашу юность укрепит? Не остави нас сирых, в молитвах твоих не забуди нас. Услышавше же, яко преподобная не оставити их хощет, но помолитися о них, со умилением вопияху: таковую молитвенницу нам даровавый, Боже, благословен еси.

Слава: Срете преподобная на пути благовернаго императора Царяграда Мануила, иже, слышав о желании сердца ея, даде ей спутники – воины, охраняти ю на пути в Царьград. Тамо же любовне прият ю патриарх Лука, и с нею во храме святыя Софии воспеваше: Боже, благословен еси.

И ныне, Богородичен: От девственных ложесн Твоих воплощься, Бог явися на спасение наше. Темже Тя Матерь ведуще, Богородице, правоверно вопием Ему: отец наших Боже, благословен еси.

Песнь 8

Ирмос: Т ебе, Вседетелю, в пещи отроцы всемирный лик сплетше, пояху: дела всякая Господа пойте и превозносите во вся веки.

Купивши златую кадильницу и фимиамы, прииде преподобная во святый град Иерусалим и со многим умилением просяше блаженнаго патриарха, да сотворит он ей милость и да отворит врата Гроба Христова. Исполни убо патриарх прошение ея; святая же, пришедши ко вратом, падши на землю, с молитвою лобызаше я, радостно вопиющи: дела всякая Господа пойте и превозносите во вся веки.

Треми деньми прихождаше преподобная во врата святая ко Гробу Спаса Христа, и, окадивши златою кадильницею Святый Гроб и поставивши зде кадило со многими дарми, моляшеся к Жениху Христу: сподоби мя, Владыко, скончатися на месте сем святем, приими дух мой во Святем граде сем и упокой мя на лоне Авраама, да со всеми угодившими Тебе воспеваю: дела всякая Господа пойте и превозносите во вся веки.

Слава: Услыша Господь, преподобная, моление твое и посла к тебе Ангела Своего, рекуща ти: блаженна ты еси в женах, и благословен труд твой; се уже отверсты двери райския, се уже собрашася и Ангели, держаще свещи, чающе твоего сретения. С теми убо и мы, недостойнии, о блаженнем успении преподобныя воспеваем: дела всякая Господа пойте и превозносите во вся веки.