Святаго апостола Матфия (ок 63).

Тропарь, глас 3:

Апо́столе святы́й Матфи́е, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 4:

Светоза́рное, я́ко со́лнце, / во весь мир изше́дшее / веща́ние твое́ / просвеща́ет язы́ческую Це́рковь благода́тию, / чудоно́сче Матфи́е апо́столе.

13. Святителя Тихона, епископа Воронежскаго,
Задонскаго чудотворца
(1783; второе обретение мощей, 1991).

Тропарь, глас 8:

От ю́ности возлюби́л еси́ Христа́, блаже́нне, / о́браз всем был еси́ сло́вом, житие́м, любо́вию, / ду́хом, ве́рою, чистото́ю и смире́нием, / те́мже и всели́лся еси́ в Небе́сныя оби́тели, / иде́же предстоя́ Престо́лу Пресвяты́я Тро́ицы, / моли́, святи́телю Ти́хоне, / спасти́ся душа́м на́шим.

Кондак, глас 8:

Апо́столов прее́мниче, / святи́телей украше́ние, / Правосла́вныя Це́ркве учи́телю, / Влады́це всех моли́ся / мир вселе́нней дарова́ти / и душа́м на́шим ве́лию ми́лость.

14. Предпразднство Успения
Пресвятыя Богородицы.

Тропарь, глас 4:

Лю́дие, предыгра́йте, / рука́ми пле́щуще ве́рно, / и любо́вию собери́теся, / днесь ра́дующеся / и све́тло восклица́юще вси весе́лием: / Бо́жия бо Ма́ти и́мать от земны́х к Вы́шним прейти́ сла́вно, / Ю́же пе́сньми при́сно я́ко Богоро́дицу сла́вим.

Кондак, глас 4:

В сла́вней па́мяти Твое́й / вселе́нная, невеще́ственным Ду́хом испещре́на, / у́мно с весе́лием зове́т Тебе́: / ра́дуйся, Де́во, / христиа́н похвало́.

Преподобнаго Феодосия Печерскаго
(пренесение мощей, 1091).

Тропарь, глас 8:

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / мона́шествующих Богодухнове́нное удобре́ние, / Феодо́сие прему́дре, / уче́ньми твои́ми вся просвети́л еси́, / цевни́це духо́вная. / Моли́ Христа́ Бо́га спасти́ся душа́м на́шим.

Кондак, глас 8:

Насле́дник отце́в был еси́, преподо́бне, / тех после́дуя житию́ и уче́нию, / обы́чаю и воздержа́нию, / моли́тве же и предстоя́нию. / С ни́миже, име́я дерзнове́ние ко Го́споду, / проще́ние согреше́ний и спасе́ние испроси́ вопию́щим ти: / ра́дуйся, о́тче Феодо́сие.

15. Успение Пресвятыя Владычицы нашея
Богородицы и Приснодевы Марии.

Тропарь, глас 1:

В рождестве́ де́вство сохрани́ла eси́, / во успе́нии ми́ра не оста́вила eси́, Богоро́дице, / преста́вилася eси́ к животу́, Ма́ти су́щи Живота́, / и моли́твами Твои́ми избавля́еши от сме́рти ду́ши на́ша.

Кондак, глас 2:

В моли́твах Неусыпа́ющую Богоро́дицу / и в предста́тельствах непрело́жное упова́ние / гроб и умерщвле́ние не удержа́ста: / я́коже бо Живота́ Ма́терь / к животу́ преста́ви / во утро́бу Всели́выйся присноде́вственную.

16. Пренесение из Едеса в Царьград
нерукотвореннаго образа Господа Бога
и Спаса нашего Иисуса Христа (944).

Тропарь, глас 2:

Пречи́стому Твоему́ о́бразу покланя́емся, Благи́й, / прося́ще проще́ния прегреше́ний на́ших, Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши я́же созда́л еси́ от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся, Спа́се наш, / прише́дый спасти́ мир.

Кондак, глас 2:

Неизрече́ннаго и Боже́ственнаго Твоего́ к челове́ком смотре́ния, / неопи́санное Сло́во О́тчее, / и о́браз непи́санный, / и богопи́санный победи́телен, / ве́дуще нело́жнаго Твоего́ воплоще́ния, / почита́ем, того́ лобыза́юще.

26. Празднество в честь Пресвятыя Владычицы нашея
Богородицы и Приснодевы Марии
ради Сретения Ея Владимирския иконы (1395).

Тропарь, глас 4:

Днесь све́тло красу́ется сла́внейший град Москва́, / я́ко зарю́ со́лнечную, восприе́мши, Влады́чице, / чудотво́рную Твою́ ико́ну, / к не́йже ны́не мы притека́юще и моля́щеся Тебе́, взыва́ем си́це: / о, пречу́дная Влады́чице Богоро́дице! / Моли́ся из Тебе́ воплоще́нному Христу́ Бо́гу на́шему, / да изба́вит град сей и вся гра́ды и страны́ христиа́нския / невреди́мы от всех наве́т вра́жиих / и спасе́т ду́ши на́ша, я́ко Милосе́рд.

Кондак, глас 8:

Взбра́нной Воево́де победи́тельная, / я́ко изба́вльшеся от злых / прише́ствием Твоего́ честна́го о́браза, Влады́чице Богоро́дице, / све́тло сотворя́ем пра́зднество сре́тения Твоего́ и обы́чно зове́м Ти: / ра́дуйся, Неве́сто Неневе́стная.

29. Усекновение честныя главы
святаго славнаго пророка,
предтечи и крестителя Господня Иоанна.

Тропарь, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в, ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра / и подаю́щаго нам ве́лию ми́лость.

Кондак, глас 5:

Предте́чево сла́вное усекнове́ние / смотре́ние бысть не́кое Боже́ственное, / да и су́щим во а́де Спа́сово пропове́сть прише́ствие. / Да рыда́ет у́бо Ироди́я, / беззако́нное уби́йство испроси́вши: / не зако́н бо Бо́жий, ни живы́й век возлюби́, / но притво́рный, привре́менный.

30. Пренесение мощей святаго благовернаго
великаго князя Александра Невскаго (1724).

Тропарь, глас 4:

Позна́й свою́ бра́тию, росси́йский Ио́сифе, / не в Еги́пте, но на Небеси́ ца́рствующий, / благове́рный кня́же Алекса́ндре, / и приими́ моле́ния их, / умножа́я жи́та лю́дем плодоно́сием земли́ твоея́, / гра́ды влады́чествия твоего́ огражда́я моле́нием / и правосла́вным христиа́ном на сопроти́вныя спобо́рствуя.

Кондак, глас 4:

Я́коже сро́дницы твои́ Бори́с и Глеб / яви́шася тебе́ с Небесе́ в по́мощь, / подвиза́ющемуся на Ве́лгера Све́йскаго и во́ев его́, / та́ко и ты ны́не, / блаже́нне Алекса́ндре, / прииди́ в по́мощь твои́м сро́дником / и побори́ борю́щия ны.

31. Положение честнаго пояса
Пресвятыя Богородицы (ок. 395–408).

Тропарь, глас 8:

Богоро́дице Присноде́во, челове́ков покро́ве, / ри́зу и по́яс пречи́стаго Твоего́ телесе́, / держа́вное гра́ду Твоему́ обложе́ние дарова́ла еси́, / безсе́менным рождество́м Твои́м нетле́нна пребыва́ющи, / о Тебе́ бо и естество́ обновля́ется и вре́мя. / Те́мже мо́лим Тя мир гра́ду Твоему́ дарова́ти / и душа́м на́шим ве́лию ми́лость.

Кондак, глас 2:

Благоприя́тное Твое́ чре́во, Богоро́дице, / объе́мший по́яс Твой честны́й / держа́ва гра́ду Твоему́ необори́ма / и сокро́вище есть благи́х неоску́дно, / еди́на ро́ждшая, Присноде́во.

Ин кондак, глас 4:

Честна́го по́яса Твоего́ положе́ние / пра́зднует днесь Твой, Препе́тая, храм / и приле́жно взыва́ет Ти: / ра́дуйся, Де́во, / христиа́н похвало́.

 

 

В оглавление.

 

ТРОПАРИ И КОНДАКИ
ИЗ ТРИОДИ ПОСТНОЙ

Неделя о мытаре и фарисее

По 50-м псалме.

Слава, глас 8: Покая́ния отве́рзи ми две́ри, Жизнода́вче, / у́тренюет бо дух мой ко хра́му свято́му Твоему́, / храм нося́й теле́сный весь оскверне́н: / но я́ко щедр, очи́сти / благоутро́бною Твое́ю ми́лостию.

И ныне, Богородичен: На спасе́ния стези́ наста́ви мя, Богоро́дице, / сту́дными бо окаля́х ду́шу грехми́, / и в ле́ности все житие́ мое́ ижди́х: / но Твои́ми моли́твами / изба́ви мя от вся́кия нечистоты́.

Также, глас 6: Поми́луй мя, Бо́же, / по вели́цей ми́лости Твое́й, / и по мно́жеству щедро́т Твои́х, / очи́сти беззако́ние мое́.

Мно́жества соде́янных мно́ю лю́тых, помышля́я окая́нный, / трепе́щу стра́шнаго дне су́днаго: / но наде́яся на ми́лость благоутро́бия Твоего́, / я́ко Дави́д вопию́ Ти: / поми́луй мя, Бо́же, / по вели́цей Твое́й ми́лости.

Тропарь воскресный гласа.

Кондак, глас 4.
Подобен: Яви́лся еси́ днесь:

Фарисе́ева убежи́м высокоглаго́лания, / и мытаре́ве научи́мся высоте́ глаго́л смире́нных, / покая́нием взыва́юще: / Спа́се ми́ра, / очи́сти рабы́ Твоя́.

Вторый кондак, глас 3.
Подобен: Де́ва днесь:

Воздыха́ния принесе́м мыта́рская Го́сподеви, / и к Нему́ присту́пим гре́шнии я́ко Влады́це: / хо́щет бо спасе́ния всех челове́ков, / оставле́ние подае́т всем ка́ющимся. / Нас бо ра́ди воплоти́ся, / Бог сый Отцу́ собезнача́льный.

Неделя о блудном сыне

Тропарь воскресный гласа.

Кондак, глас 3.
Подобен: Де́ва днесь:

Оте́ческия сла́вы Твоея́ удали́хся безу́мно, / в злых расточи́в е́же ми пре́дал еси́ бога́тство. / Те́мже Ти блу́днаго глас приношу́: / согреши́х пред Тобо́ю, О́тче ще́дрый, / приими́ мя ка́ющася / и сотвори́ мя я́ко еди́наго от нае́мник Твои́х.

Мясопустная Вселенская
родительская суббота

Тропарь, глас 8:

Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.

Слава, и ныне, Богородичен: Тебе́ и Сте́ну, и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

Кондак, глас 6:

Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Неделя мясопустная

Тропарь воскресный гласа.

Кондак, глас 1:

Егда́ прии́деши, Бо́же, на зе́млю со сла́вою, / и трепе́щут вся́ческая: / река́ же о́гненная пред суди́щем влече́т, / кни́ги разгиба́ются, и та́йная явля́ются: / тогда́ изба́ви мя от огня́ неугаси́маго / и сподо́би мя одесну́ю Тебе́ ста́ти, Судие́ пра́веднейший.

Суббота сырная

Тропарь, глас 4:

Бо́же оте́ц на́ших, / творя́й при́сно с на́ми по Твое́й кро́тости, / не отста́ви ми́лость Твою́ от нас, / но моли́твами их / в ми́ре упра́ви живо́т наш.

Кондак, глас 8.
Подобен: Я́ко нача́тки:

Я́ко благоче́стия пропове́дники, и нече́стия обузда́тели / богоно́сных собо́р уясни́л еси́, подсо́лнечную осиява́ющия. / В ми́ре соверше́нном тех моли́твами, / Тебе́ сла́вящия и велича́ющия сохрани́, / пою́щия Ти, Го́споди: Аллилу́ия.

Неделя сыропустная

Тропарь воскресный гласа.

Кондак, глас 6:

Прему́дрости Наста́вниче, смы́сла Пода́телю, / нему́дрых Наказа́телю, и ни́щих Защи́тителю, / утверди́, вразуми́ се́рдце мое́, Влады́ко. / Ты даждь ми сло́во, О́тчее Сло́во, / се бо устне́ мои́ не возбраню́, / во е́же зва́ти Тебе́: / Ми́лостиве, поми́луй мя па́дшаго.

Суббота первая
Великаго поста,
великомученика
Феодора Тирона

Тропарь, глас 2:

Ве́лия ве́ры исправле́ния, / во исто́чнице пла́мене, я́ко на воде́ упокое́ния, / святы́й му́ченик Фео́дор ра́довашеся: / огне́м бо всесожже́гся, / я́ко хлеб сла́дкий Тро́ице принесе́ся. / Того́ моли́твами, Христе́ Бо́же, / спаси́ ду́ши на́ша.

Кондак, глас 8:

Ве́ру Христо́ву, я́ко щит, внутрь прии́м в се́рдце твое́м, / проти́вныя си́лы попра́л еси́, многострада́льче, / и венце́м Небе́сным венча́лся еси́ ве́чно, Фео́доре, я́ко непобеди́мый.

Неделя первая
Великаго поста,
торжество Православия

Тропарь воскресный гласа.

Иный тропарь, глас 2:

Пречи́стому о́бразу Твоему́ покланя́емся, Благи́й, / прося́ще проще́ния прегреше́ний на́ших, Христе́ Бо́же, / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся, Спа́се наш, / прише́дый спасти́ мир.

Кондак, глас 2:

Неопи́санное Сло́во О́тчее, / из Тебе́, Богоро́дице, описа́ся воплоща́ем, / и оскве́рншийся о́браз в дре́внее вообрази́в, / Боже́ственною добро́тою смеси́, / но испове́дающе спасе́ние, / де́лом и сло́вом, сие́ вообража́ем.

Субботы
второй, третьей и четвертой седмицы
Великаго поста

Тропари, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Слава: Помяни́, Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, / моги́й и преста́вленным да́ти поко́й.

И ныне, Богородичен: Ма́ти Свята́я Неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

Кондак, глас 6:

Со святы́ми упоко́й, / Христе́, / ду́ши раб Твои́х, / иде́же несть / боле́знь, ни печа́ль, / ни воздыха́ние, / но жизнь безконе́чная.

Неделя вторая
Великаго поста,
Святителя Григория Паламы,
архиепископа Фессалоникийскаго
(1360)

Тропарь воскресный гласа.

И святителю тропарь, глас 8:

Правосла́вия свети́льниче, / Це́ркве утвержде́ние и учи́телю, / мона́хов добро́то, / богосло́вов побо́рниче непребори́мый, Григо́рие чудотво́рче, / Фессалони́тская похвало́, пропове́дниче благода́ти, / моли́ся вы́ну спасти́ся душа́м на́шим.

Кондак, глас 8.
Подобен: Взбра́нной:

Прему́дрости свяще́нный и Боже́ственный орга́н, / богосло́вия све́тлую согла́сно трубу́, / воспева́ем тя, Григо́рие богоглаго́льниче, / но я́ко ум, Уму́ пе́рвому предстоя́й, / к Нему́ ум наш о́тче наста́ви, да зове́м: / ра́дуйся, пропове́дниче благода́ти.

Неделя третья
Великаго поста,
Крестопоклонная

Тропарь воскресный гласа.

И честному Кресту тропарь, глас 1:

Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Кондак, глас 7. Самогласен:

Не ктому́ пла́менное ору́жие храни́т врат Еде́мских: / на ты́я бо на́йде пресла́вный соу́з Дре́во кре́стное, / сме́ртное жа́ло и а́дова побе́да прогна́ся, / предста́л бо еси́, Спа́се мой, вопия́ су́щим во а́де: / вни́дите па́ки в рай.

Неделя четвертая
Великаго поста,
преподобнаго
Иоанна Лествичника (649)

Тропарь воскресный гласа.

И преподобному тропарь, глас 1:

Пусты́нный жи́тель и в телеси́ А́нгел / и чудотво́рец яви́лся еси́, богоно́се о́тче наш Иоа́нне, / посто́м, бде́нием, моли́твою Небе́сная дарова́ния прии́м, / исцеля́еши неду́жныя и ду́ши ве́рою притека́ющих ти. / Сла́ва Да́вшему ти кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Кондак, глас 4.
Подобен: Яви́лся еси́ днесь:

На высоте́ Госпо́дь воздержа́ния и́стинна тя положи́, / я́коже звезду́ неле́стную, световодя́щую концы́, / наста́вниче Иоа́нне о́тче наш.

Четверток пятый
Великаго поста

Кондак великаго канона, глас 6:

Душе́ моя́, душе́ моя́, / воста́ни, что спи́ши? / Коне́ц приближа́ется, / и и́маши смути́тися: / воспряни́ у́бо, / да пощади́т тя Христо́с Бог, / везде́ сый и вся́ исполня́яй.

Суббота пятая
Великаго поста,
Похвала
Пресвятыя Богородицы

Тропарь, глас 8, самоподобен:

Повеле́нное та́йно прие́м в ра́зуме, / в кро́ве Ио́сифове тща́нием предста́ Безпло́тный, глаго́ля Неискусобра́чней: / приклони́вый схожде́нием Небеса́ вмеща́ется неизме́нно весь в Тя, / Его́же и ви́дя в ложесна́х Твои́х / прие́мша ра́бий зрак, / ужаса́юся зва́ти Тебе́: / ра́дуйся, Неве́сто Неневе́стная.

Кондак, глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Неделя пятая
Великаго поста,
преподобной
Марии Египетской (522)

Тропарь воскресный гласа.

И преподобней тропарь, глас 8:

В тебе́, ма́ти, изве́стно спасе́ся е́же по о́бразу, / прии́мши бо крест, после́довала еси́ Христу́, / и де́ющи учи́ла еси́ презира́ти у́бо плоть, прехо́дит бо, / прилежа́ти же о души́, ве́щи безсме́ртней. / Те́мже и со А́нгелы сра́дуется, преподо́бная Мари́е, дух твой.

Кондак, глас 3:
Подобен: Де́ва днесь:

Блуда́ми пе́рвее преиспо́лнена вся́ческими, / Христо́ва неве́ста днесь покая́нием яви́ся, / А́нгельское жи́тельство подража́ющи, / де́моны Креста́ ору́жием погубля́ет. / Сего́ ра́ди Ца́рствия неве́ста яви́лася еси́, / Мари́е пресла́вная.

Суббота шестая
Великаго поста, Лазарева

Тропарь, глас 1:

О́бщее воскресе́ние / пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы, побе́ды зна́мения нося́ще, / Тебе́, Победи́телю сме́рти, вопие́м: / оса́нна в вы́шних, / благослове́н Гряды́й во и́мя Госпо́дне.

Кондак, глас 2.
Подобен: Вы́шних ища́:

Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние.

Неделя Ваий

Тропарь, глас 1:

О́бщее воскресе́ние / пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы побе́ды зна́мения нося́ще, / Тебе́ Победи́телю сме́рти вопие́м: / оса́нна в вы́шних, / благослове́н Гряды́й во и́мя Госпо́дне.

Другий тропарь, глас 4:

Спогре́бшеся Тебе́ креще́нием, Христе́ Бо́же наш, / безсме́ртныя жи́зни сподо́бихомся Воскресе́нием Твои́м, / и воспева́юще зове́м: / оса́нна в вы́шних, / благослове́н Гряды́й во и́мя Госпо́дне.

Кондак, самогласен, глас 6:

На престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние / и дете́й воспева́ние прия́л еси́, зову́щих Ти: / благослове́н еси́, Гряды́й Ада́ма воззва́ти.

Великий понедельник

Тропарь, глас 8:

Се, Жени́х гряде́т в полу́нощи, / и блаже́н раб, его́же обря́щет бдя́ща, / недосто́ин же па́ки, его́же обря́щет уныва́юща. / Блюди́ у́бо, душе́ моя́, / не сном отяготи́ся, / да не сме́рти предана́ бу́деши, / и Ца́рствия вне затвори́шися, / но воспряни́ зову́щи: / Свят, Свят, Свят еси́, Бо́же, / Богоро́дицею поми́луй нас.

Кондак, глас 8.
Подобен: Я́ко нача́тки.

Иа́ков рыда́ше Ио́сифова лише́ния, / и до́блий седя́ше на колесни́це, я́ко царь почита́емь: / еги́птяныни бо тогда́ сласте́м не порабо́тав, / воспрославля́шеся от Ве́дущаго челове́ческая сердца́, / и Посыла́ющаго вене́ц нетле́нный.

Великий вторник

Тропарь, глас 8:

Се, Жени́х гряде́т в полу́нощи:

Таже кондак, глас 2.
Подобен: Вы́шних ища́:

Час, душе́, конца́ помы́сливши, / и посече́ния смоко́вницы убоя́вшися, / да́нный тебе́ тала́нт трудолю́бно де́лай, окая́нная, / бо́дрствующи и зову́щи: / да не пребу́дем вне черто́га Христо́ва.

Великая среда

Тропарь, глас 8:

Се, Жени́х гряде́т в полу́нощи:

Кондак, глас 4.
Подобен: Вознесы́йся:

Па́че блудни́цы, Бла́же, беззако́нновав, / слез ту́чи ника́коже Тебе́ принесо́х, / но молча́нием моля́ся припа́даю Ти, / любо́вию облобыза́я пречи́стеи Твои́ но́зе, / я́ко да оставле́ние мне, я́ко Влады́ка, пода́си долго́в, / зову́щу Ти, Спа́се: / от скве́рных дел мои́х изба́ви мя.

Великий четверток

Тропарь, глас 8:

Егда́ сла́внии ученицы́ / на умове́нии ве́чери просвеща́хуся, / тогда́ Иу́да злочести́вый, / сребролю́бием неду́говав, омрача́шеся, / и беззако́нным судия́м Тебе́, Пра́веднаго Судию́ предае́т. / Виждь, име́ний рачи́телю, / сих ра́ди удавле́ние употреби́вша! / Бежи́ несы́тыя души́, / Учи́телю такова́я дерзну́вшия: / И́же о всех благи́й, Го́споди, сла́ва Тебе́.

Кондак, глас 2.
Подобен: Вы́шних ища́:

Хлеб прие́м в ру́це преда́тель, / сокрове́нно ты́я простира́ет, / и прие́млет це́ну Созда́вшаго Свои́ма рука́ма челове́ка, / и неиспра́влен пребы́сть Иу́да, раб и льстец.

Великий пяток

Тропарь, глас 4:

Искупи́л ны еси́ от кля́твы зако́нныя / Честно́ю Твое́ю Кро́вию, / на кресте́ пригвозди́вся, и копие́м пробо́дся, / безсме́ртие источи́л еси́ челове́ком, / Спа́се наш, сла́ва Тебе́.

Кондак, глас 8:

Нас ра́ди Распя́таго, прииди́те, вси воспои́м: / Того́ бо ви́де Мари́я на Дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Великая суббота

Тропари, глас 2:

Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и воня́ми, / во гро́бе но́ве покры́в положи́.

Слава: Егда́ снизше́л еси́ к сме́рти, Животе́ безсме́ртный, / тогда́ ад умертви́л еси́ блиста́нием Божества́. / Егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

И ныне: Мироно́сицам жена́м при гро́бе предста́в, А́нгел вопия́ше: / ми́ра ме́ртвым суть прили́чна, / Христо́с же истле́ния яви́ся чуждь.

Кондак, глас 6:

Бе́здну заключи́вый мертв зри́тся, / и сми́рною и плащани́цею обви́вся, / во гро́бе полага́ется, я́ко сме́ртный, Безсме́ртный, / жены́ же приидо́ша пома́зати Его́ ми́ром, / пла́чущия го́рько и вопию́щия: / сия́ суббо́та есть преблагослове́нная, / в не́йже Христо́с усну́в, воскре́снет тридне́вен.

 

 

В оглавление.

 

ТРОПАРИ И КОНДАКИ
ИЗ ТРИОДИ ЦВЕТНОЙ

Часы на святую Пасху

Подобает ведати, яко от сего дне святыя и великия Недели Пасхи даже до субботы, часы сице поются.

Наченшу иерею: Благослове́н Бог наш:

Аще ли не иерей: Моли́тв ра́ди Пречи́стыя Твоея́ Ма́тери, и всех святы́х Твои́х, Го́споди Иису́се Христе́, Бо́же наш, поми́луй нас.

Лик: Ами́нь. Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.

Таже глаголем трижды:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.

Таже ипакои, глас 4, единощи:

Предвари́вшия у́тро, я́же о Мари́и, / и обре́тшия ка́мень отвале́н от гро́ба, / слы́шаху от А́нгела: во све́те присносу́щнем Су́щаго / с ме́ртвыми что и́щете, я́ко челове́ка? / Ви́дите гро́бныя пелены́, тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, спаса́ющаго род челове́ческий.

Таже кондак, глас 8, единощи:

А́ще и во гроб снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / И Твои́м апо́столом мир да́руяй, / па́дшим подая́й воскресе́ние.

Таже и сей тропарь единощи:

Во гро́бе пло́тски, во а́де же с душе́ю, я́ко Бог, / в раи́ же с разбо́йником, и на Престо́ле был еси́, Христе́, со Отце́м и Ду́хом, / вся исполня́яй, неопи́санный.

Слава: Я́ко Живоно́сец, я́ко рая́ красне́йший, / вои́стину и черто́га вся́каго ца́рскаго показа́ся светле́йший, Христе́, гроб Твой, / исто́чник на́шего воскресе́ния.

И ныне, Богородичен: Вы́шняго освяще́нное Боже́ственное селе́ние, ра́дуйся, / Тобо́ю бо даде́ся ра́дость, Богоро́дице, зову́щим: / благослове́нна Ты в жена́х еси́, Всенепоро́чная Влады́чице.

Таже Го́споди, поми́луй, 40.

Сла́ва, и ны́не: Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

И́менем Госпо́дним благослови́, о́тче.

Иерей: Моли́твами святы́х оте́ц на́ших: Мы же речем: Ами́нь.

И паки глаголем подобне: Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в. Трижды.

Сла́ва, и ны́не: Го́споди, поми́луй, трижды.

Благослови́. И отпуст перваго часа.

Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в. Трижды.

И нам дарова́ живо́т ве́чный, / покланя́емся Его́ / тридне́вному Воскресе́нию.

Неделя апостола Фомы

Тропарь, глас 7:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Кондак, глас 8:

Любопы́тною десни́цею / жизнопода́тельная Твоя́ ре́бра Фома́ испыта́, Христе́ Бо́же, / созаключе́нным бо две́рем я́ко вшел еси́, / с про́чими апо́столы вопия́ше Тебе́: / Госпо́дь еси́ и Бог мой.

Неделя святых жен Мироносиц

Тропари, глас 2:

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, покры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И ныне: Мироно́сицам жена́м при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.

Кондак, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / Воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

Неделя о расслабленном

Тропарь воскресный, глас 3:

Да веселя́тся Небе́сная, / да ра́дуются земна́я; / я́ко сотвори́ держа́ву / мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ ми́рови ве́лию ми́лость.

Кондак, глас 3:

Ду́шу мою́, Го́споди, во гресе́х вся́ческих / и безме́стными дея́ньми лю́те разсла́блену, / воздви́гни Боже́ственным Твои́м предста́тельством, / я́коже и разсла́бленнаго воздви́гл еси́ дре́вле, / да зову́ Ти спаса́емь: / Ще́дрый, сла́ва, Христе́, держа́ве Твое́й.

Преполовение Пятидесятницы

Тропарь, глас 8:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Кондак, глас 4.
Подобен: Вознесы́йся:

Пра́зднику зако́нному преполовля́ющуся, / всех Тво́рче и Влады́ко, / к предстоя́щим глаго́лал еси́, Христе́ Бо́же: / прииди́те и почерпи́те во́ду безсме́ртия. / Те́мже Тебе́ припа́даем и ве́рно вопие́м: / щедро́ты Твоя́ да́руй нам, / Ты бо еси́ Исто́чник жи́зни на́шея.

Неделя пятая, о самаряныне

Тропарь воскресный, глас 4:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Кондак, глас 8.
Подобен: Я́ко нача́тки:

Ве́рою прише́дшая на кла́дязь самаряны́ня, / ви́де Тя прему́дрости во́ду, / е́юже напои́вшися оби́льно, / Ца́рствие вы́шнее насле́дова ве́чно, я́ко присносла́вная.

Неделя шестая, о слепом

Тропарь воскресный, глас 5:

Собезнача́льное Сло́во Отцу́ и Ду́хови, / от Де́вы ро́ждшееся на спасе́ние на́ше, / воспои́м, ве́рнии, и поклони́мся; / я́ко благоволи́ пло́тию взы́ти на Крест, / и смерть претерпе́ти, / и воскреси́ти уме́ршия / сла́вным Воскресе́нием Свои́м.

Кондак, глас 4.
Подобен: Яви́лся еси́ днесь:

Душе́вныма очи́ма ослепле́н, / к Тебе́, Христе́, прихожду́, / я́коже слепы́й от рожде́ния, / покая́нием зову́ Ти: / Ты су́щих во тьме Свет пресве́тлый.

Вознесение Господне

Тропарь, глас 4:

Возне́слся еси́ во сла́ве, Христе́ Бо́же наш, / ра́дость сотвори́вый ученико́м, / обетова́нием Свята́го Ду́ха, / извеще́нным им бы́вшим благослове́нием, / я́ко Ты еси́ Сын Бо́жий, Изба́витель ми́ра.

Кондак, глас 6:

Е́же о нас испо́лнив смотре́ние, / и я́же на земли́ соедини́в Небе́сным, / возне́слся еси́ во сла́ве, Христе́ Бо́же наш, / ника́коже отлуча́яся, / но пребыва́я неотсту́пный, / и вопия́ лю́бящим Тя: / Аз есмь с ва́ми, и никто́же на вы.